ສານ​ຊົມ​ເຊີຍ

          ເຖິງ: ສົມເດັດ ອັກຄະມະຫາ ​​ເສນາ​ບໍດີ ​ເຕ​ໂຈ ຮຸນແຊນ, ປະທານພັກປະຊາຊົນ ກໍາປູເຈຍ

                                                                                ທີ່ ນະຄອນຫຼວງພະນົມເປັນ

ສົມເດັດ ທີ່ນັບຖື,

        ຂ້າ​ພະ​ເຈົ້າ​ມີ​ຄວາມ​ປີ​ຕິ​ຍິນດີ​ເປັນ​ຢ່າງ​ຍິ່ງ ແລະ ຂໍສະແດງຄວາມຊົມເຊີຍຢ່າງຈິງໃຈມາຍັງ​ສົມ​ເດັດ  ແລະ ຜ່ານ​ສົມ​ເດັດ ​ໄປ​ຍັງຄະນະບໍລິຫານງານສູນກາງພັກປະຊາຊົນ ກໍາປູເຈຍ, ລັດຖະບານ ແລະ ປະຊາຊົນ ກຳປູເຈຍ ຕໍ່ຜົນສຳເລັດອັນຈົບງາມ ໃນການຈັດການເລືອກຕັ້ງສະມາຊິກສະພາ ແຫ່ງຊາດ ກຳປູເຈຍ ຊຸດທີ VII ໃນວັນທີ   23 ກໍລະກົດ 2023 ຜ່ານ​ມາ.

  ໄຊຊະນະອັນຍິ່ງໃຫຍ່ຂອງພັກປະຊາຊົນ ກໍາປູເຈຍ ໃນການເລືອກຕັ້ງສະມາຊິກສະພາແຫ່ງ ຊາດຄັ້ງນີ້ ອີກເທື່ອໜຶ່ງໄດ້ເປັນສິ່ງຢັ້ງຢືນໃຫ້ເຫັນເຖິງບົດບາດຂອງ ພັກປະຊາຊົນ ກໍາປູເຈຍ ອັນມີສົມເດັດ ເປັນຜູ້ ນຳພາ, ພ້ອມກັນນັ້ນ, ກໍ່ສະແດງໃຫ້ເຫັນຄວາມເຊື່ອໝັ້ນ, ໄວ້ວາງໃຈ ແລະ ສະໜັບສະໜູນຈາກປະ ຊາຊົນ ກໍາປູເຈຍ ທີ່ມີຕໍ່ພັກປະຊາຊົນ ກໍາປູເຈຍ.     

      ຂ້າພະເຈົ້າ ເຊື່ອໝັ້ນວ່າ ພາຍໃຕ້ການນຳພາຂອງພັກປະຊາຊົນ ກໍາປູເຈຍ ອັນມີ ສົມເດັດ ອັກຄະມາຫາ ເສນາ ບໍດີ ເຕໂຈ ຮຸນແຊນ ເປັນຜູ້ນຳນັ້ນ, ພັກປະຊາຊົນ ກໍາປູເຈຍ ຈະສືບຕໍ່ນຳພາປະຊາຊົນ ກໍາປູເຈຍ ອ້າຍນ້ອງ ຍາດໄດ້ ຜົນສຳເລັດອັນໃໝ່ໃຫຍ່ຫຼວງກວ່າເກົ່າ ໃນພາລະກິດແຫ່ງ​ການສ້າງສາ ພັດທະນາປະເທດ ກ້າວໄປສູ່ຄວາມຈະເລີນຮຸ່ງເຮືອງ, ຊີວິດການເປັນຢູ່ຂອງປະຊາຊົນ ນັບມື້ນັບໄດ້ຮັບການ ພັດທະນາຢ່າງບໍ່ຢຸດຢັ້ງ ແລະ ບົດບາດ ຂອງຣາຊະອານາຈັກກໍາປູເຈຍ ຈະນັບມື້ນັບສູງຂຶ້ນ ໃນເວທີພາກພື້ນ ແລະ ສາກົນ.

       ຂ້າພະເຈົ້າ ຫວັງຢ່າງຍິ່ງວ່າສາຍພົວພັນມິດຕະພາບອັນເປັນມູນເຊື້ອ ລະຫວ່າງ ພັກປະຊາຊົນ ປະຕິວັດລາວ ແລະ ພັກປະຊາຊົນກໍາປູເຈຍ  ແລະ ການເປັນຄູ່ຮ່ວມຍຸດທະສາດ ຮອບດ້ານ ໝັ້ນຄົງ ຍາວນານ ລະຫວ່າງ ລາວ-ກໍາປູເຈຍ ຈະສືບຕໍ່ໄດ້ຮັບການເພີ່ມທະວີ ແລະ ເສີມຂະຫຍາຍເຂົ້າສູ່ລວງເລິກ ເພື່ອຜົນປະໂຫຍດຂອງປະຊາຊົນສອງຊາດ ກໍ່ຄື ເພື່ອສັນຕິພາບ, ມິດຕະພາບ, ການຮ່ວມມື ແລະ ການພັດທະນາໃນພາກພື້ນ ແລະ ໃນໂລກ.

          ດ້ວຍຄວາມນັບຖືຢ່າງສູງ,

                                                                ທີ່ນະຄອນຫຼວງວຽງຈັນ, ວັນທີ 25 ກໍ​ລະ​ກົດ 2023

                                                                                     ທອງລຸນ ສີສຸລິດ

                                                               ເລຂາທິການໃຫຍ່ຄະນະບໍລິຫານງານສູນກາງ

                                                                                 ພັກປະຊາຊົນ ປະຕິວັດລາວ