ໂທລະເລກຊົມເຊີຍ

ເຖິງ: ຄະນະບໍລິຫານງານສູນກາງພັກປະຊາຊົນກໍາປູເຈຍ

                                                                               ທີ່ນະຄອນຫຼວງພະນົມເປັນ

       ບັນດາທ່ານທີ່ຮັກແພງ,

  ຄະນະບໍລິຫານງານສູນກາງພັກປະຊາຊົນປະຕິວັດລາວ ຂໍສະແດງຄວາມຊົມເຊີຍຢ່າງຈິງໃຈມາຍັງ ຄະນະບໍລິຫານງານສູນກາງພັກປະຊາຊົນກໍາປູເຈຍ ທີ່ໄດ້ຮັບໄຊຊະນະໃນການເລືອກຕັ້ງສະມາຊິກສະພາແຫ່ງຊາດ ຊຸດທີ່ VII ໃນວັນທີ 23 ກໍລະກົດ 2023.

     ໄຊຊະນະຂອງພັກປະຊາຊົນກໍາປູເຈຍ ໃນການເລືອກຕັ້ງສະມາຊິກສະພາແຫ່ງຊາດຄັ້ງນີ້ ເປັນເຫດການ ການເມືອງທີ່ສຳຄັນຂອງພັກ ເຊິ່ງສະແດງໃຫ້ເຫັນເຖິງຄວາມເຊື່ອໝັ້ນ, ໄວ້ວາງໃຈ ແລະ ການສະໜັບ ສະໜູນຈາກປະຊາຊົນກໍາປູເຈຍ ທີ່ມີຕໍ່ພັກປະຊາຊົນກໍາປູເຈຍ ​ໃນ​​ການ​ນຳພາພາ​ລະ​ກິດສ້າງສາປະເທດ ຊາດອັນໄດ້ເຮັດໃຫ້ເສດຖະກິດ​ຂອງ​ປະ​ເທດ ນັບມື້ນັບໄດ້ຮັບການຂະຫຍາຍຕົວ, ຊີວິດການ ເປັນຢູ່ຂອງ ປະຊາຊົນນັບມື້ນັບໄດ້ຮັບການພັດທະນາດີຂຶ້ນເທື່ອລະກ້າວ ແລະ ເຮັດໃຫ້ບົດບາດຂອງ ຣາຊະອານາຈັກ ກໍາປູເຈຍ ນັບ​ມື້ໄດ້ຮັບການຍົກສູງຂຶ້ນ ໃນເວທີພາກພື້ນ ແລະ ສາກົນ.

    ພວກຂ້າພະເຈົ້າເຊື່ອໝັ້ນວ່າ, ພາຍໃຕ້ການນຳພາອັນ​ສະຫຼາດ​ສ່ອງ​​ໃສຂອງພັກປະຊາຊົນກໍາປູເຈຍ ອັນມີ ສົມເດັດ ອັກຄະມາຫາ ເສນາບໍດີ ເຕໂຈ ຮຸນແຊນ ເປັນຜູ້ນຳນັ້ນ, ພັກປະຊາຊົນກໍາປູເຈຍ ຈະສືບຕໍ່ນຳພາປະຊາຊົນກໍາປູເຈຍ ອ້າຍນ້ອງຍາດໄດ້ຜົນສຳເລັດອັນໃໝ່ໃຫຍ່ຫຼວງກວ່າເກົ່າ ໃນພາລະກິດ ການສ້າງສາ ແລະ ພັດທະນາປະເທດ ໄປສູ່ຄວາມຈະເລີນຮຸ່ງເຮືອງ.

  ພວກຂ້າພະເຈົ້າຫວັງຢ່າງຍິ່ງວ່າສາຍພົວພັນມິດຕະພາບອັນເປັນມູນເຊື້ອ ລະຫວ່າງ ພັກປະຊາຊົນ ປະຕິວັດລາວ ແລະ ພັກປະຊາຊົນກໍາປູເຈຍ ກໍ່ຄື ລະຫວ່າງ ປະຊາຊົນສອງຊາດ ລາວ-ກໍາປູເຈຍ ຈະສືບຕໍ່ ໄດ້ຮັບການ​ເສີມຂະຫຍາຍ ຍິ່ງໆ​ຂຶ້ນ ເພື່ອຜົນປະໂຫຍດຂອງປະຊາຊົນສອງຊາດ ກໍ່ຄື ເພື່ອສັນຕິພາບ, ມິດຕະພາບ, ການຮ່ວມມື ​ເພື່ອການພັດທະນາໃນພາກພື້ນ ແລະ ໃນໂລກ.

                                                         ນະຄອນຫຼວງວຽງຈັນ,​ ວັນທີ 25 ກໍລະກົດ 2023

                                                                                      ຄະນະບໍລິຫານງານສູນກາງພັກປະຊາຊົນປະຕິວັດລາວ