ໃນວັນທີ 8 ຕຸລາ 2021, ສະຫາຍ ທອງລຸນ ສີສຸລິດ, ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ປະທານປະເທດແຫ່ງ ສປປ ລາວ ໄດ້ສົ່ງໂທລະເລກອວຍພອນເຖິງ ສະຫາຍ ກິມເຈິງອຸນ, ເລຂາທິການໃຫຍ່ພັກແຮງງານເກົາຫຼີ, ປະທານກິດຈະການແຫ່ງລັດ ແຫ່ງ ສປປ ເກົາຫຼີ, ຜູ້ບັນຊາການສູງສຸດກໍາລັງປະກອບອາວຸດ ແຫ່ງ ສປປ ເກົາຫຼີ ເນື່ອງໃນໂອກາດວັນສ້າງຕັ້ງພັກແຮງງານເກົາຫຼີ ຄົບຮອບ 76 ປີ (10/10/1945-10/10/ 2021), ຊຶ່ງມີເນື້ອໃນດັ່ງນີ້:

   ເນື່ອງໃນໂອກາດວັນສ້າງຕັ້ງພັກແຮງງານເກົາຫຼີ ຄົບຮອບ 76 ປີ (10/10/1945-10/10/2021), ຂ້າພະເຈົ້າ ຂໍສະແດງຄວາມຂໍ່ານັບຊົມເຊີຍອັນອົບອຸ່ນ ແລະ ສົ່ງຄໍາອວຍພອນໄຊອັນປະເສີດ ມາຍັງ ສະຫາຍ ພ້ອມດ້ວຍບັນດາສະຫາຍ ໃນຄະນະບໍລິຫານງານສູນກາງພັກແຮງງານເກົາຫຼີ, ສະມາຊິກພັກ ແລະ ປະຊາຊົນ ແຫ່ງ ສາທາລະນະລັດ ປະຊາຊົນ ປະຊາທິປະໄຕ ເກົາຫຼີ ອ້າຍນ້ອງທຸກຖ້ວນໜ້າ.

   ພວກຂ້າພະເຈົ້າ ມີຄວາມປິຕິຍິນດີ ແລະ ພາກພູມໃຈເປັນຢ່າງຍິ່ງ ທີ່ເຫັນວ່າ ໃນຕະຫຼອດໄລຍະ 76 ປີ ຜ່ານມາ ພາຍໃຕ້ການຊີ້ນໍາ-ນໍາພາອັນເດັດດ່ຽວໜຽວແໜ້ນ ຂອງພັກແຮງງານເກົາຫຼີ ອັນມີ ປະທານ ກິມອິນຊຸງ ແລະ ສະຫາຍ ກິມເຈິງອິນ, ຜູ້ນໍາທີ່ຍິ່ງໃຫຍ່ໃນເມື່ອກ່ອນຂອງ ປະຊາຊົນ ສປປ ເກົາຫຼີ ກໍ່ຄື ສະຫາຍ ກິມເຈິງອຸນ ທີ່ເປັນຜູ້ສືບທອດພາລະກິດ ໃນປັດຈຸບັນ, ສປປ ເກົາຫຼີ ແລະ ປະຊາຊົນ ສປປ ເກົາຫຼີ ອ້າຍນ້ອງ ສາມາດຍາດໄດ້ຜົນສໍາເລັດອັນໃຫຍ່ຫຼວງຫຼາຍດ້ານ ໃນການປົກປັກຮັກສາໝາກຜົນ ຂອງການປະຕິວັດ ໄວ້ໄດ້ຢ່າງໝັ້ນຄົງ, ການເມືອງມີສະຖຽນລະພາບ, ວຽກງານປ້ອງກັນຊາດ-ປ້ອງກັນຄວາມສະຫງົບ ມີຄວາມໜັກແໜ້ນ ແລະ ເຕີບໃຫຍ່ເຂັ້ມແຂງ, ເສດຖະກິດນັບມື້ນັບໄດ້ຮັບການພັດທະນາ, ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງດີຂຶ້ນເທື່ອລະກ້າວ, ການພົວພັນຕ່າງປະເທດນັບມື້ນັບໄດ້ຮັບການເປີດກວ້າງ, ບົດບາດຂອງ ສປປ ເກົາຫຼີ ນັບມື້ນັບໄດ້ຮັບການຍົກສູງຂຶ້ນໃນເວທີພາກພື້ນ ແລະ ສາກົນ.

   ພວກຂ້າພະເຈົ້າ ເຊື່ອໝັ້ນວ່າ ພາຍໃຕ້ການຊີ້ນໍາ-ນໍາພາຂອງພັກແຮງງານເກົາຫຼີ, ພັກ, ລັດ ແລະ ປະຊາຊົນ ສປປ ເກົາຫຼີ ຈະສາມາດບັນລຸຜົນສໍາເລັດ ໃນການປະຕິບັດບັນດາມະຕິຂອງກອງປະຊຸມໃຫຍ່ ຄັ້ງທີ VIII ຂອງພັກ, ສືບຕໍ່ຊີ້ນໍາ ນໍາພາປະຊາຊົນ ສປປ ເກົາຫຼີ ຍາດໄດ້ຜົນສໍາເລັດອັນໃຫຍ່ ໃນພາລະກິດແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ, ສ້າງສັງຄົມນິຍົມໃຫ້ຮັ່ງມີເຂັ້ມແຂງ ແລະ ບັນລຸຜົນສໍາເລັດ ໃນການທ້ອນໂຮມປະເທດຊາດ ໂດຍສັນຕິວິທີ.

   ເນື່ອງໃນໂອກາດອັນສະຫງ່າລາສີນີ້, ຂ້າພະເຈົ້າ ຂໍອວຍພອນໃຫ້ ສະຫາຍ ກິມເຈິງອຸນ ຈົ່ງມີພະລານາໄມສົມບູນ, ມີຄວາມຜາສຸກ, ປະສົບຜົນສໍາເລັດອັນຍິ່ງໃຫຍ່ ໃນພາລະກິດອັນສູງສົ່ງຂອງສະຫາຍ.

   ຂໍອວຍພອນໃຫ້ ສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອ ທີ່ມີມາແຕ່ດົນນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ສປປ ລາວ-ສປປ ເກົາຫຼີ ຈົ່ງສືບຕໍ່ໄດ້ຮັບການເສີມຂະຫຍາຍຍິ່ງໆຂຶ້ນ ເພື່ອຜົນປະໂຫຍດຂອງປະຊາຊົນສອງຊາດ ກໍ່ຄື ພາລະກິດສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.