ຈົດໝາຍອວຍພອນ

          ເຖິງ:   ສະຫາຍ ສີ ຈິ້ນຜິງ, ເລຂາທິການໃຫຍ່ ຄະນະກໍາມະການສູນກາງພັກກອມມູນິດຈີນ,                                               ປະທານປະເທດ ແຫ່ງສາທາລະນະລັດ ປະຊາຊົນຈີນ.                                                                                           ທີ່ນະຄອນຫລວງປັກກິ່ງ

ສະຫາຍ ສີຈິ້ນຜິງ ທີ່ນັບຖື,

      ເນື່ອງໃນໂອກາດວັນເກີດ ຂອງ ສະຫາຍ ຄົບຮອບ 70 ປີ, ຂ້າພະເຈົ້າ ມີຄວາມປິຕິຍີນດີເປັນຢ່າງຍິ່ງ ສົ່ງຄວາມຢື້ຢາມຖາມຂ່າວ ແລະ ຄຳອວຍພອນໄຊອັນປະເສີດ ດ້ວຍໄມຕີຈິດອັນດູດດື່ມ, ສຸດອົກສຸດໃຈ ແລະ ສະໜິດສະໜົມຖານສະຫາຍອ້າຍນ້ອງ ມາຍັງ ສະຫາຍ ແລະ ຄອບຄົວ ນະໂອກາດນີ້.

      ຂ້າພະເຈົ້າ ຕີລາຄາສູງ ຕໍ່ຄວາມບາກບັ່ນ ຂອງສະຫາຍ ທີ່ໄດ້ທຸ່ມເທເຫື່ອແຮງ ແລະ ສະຕິປັນຍາ ຢ່າງບໍ່ຮູ້ອິດຮູ້ເມື່ອຍ ເຂົ້າໃນພາລະກິດ ສ້າງສາສັງຄົມນິຍົມທີ່ມີສີສັນພິເສດຂອງຈີນ ຕະຫຼອດໄລຍະຜ່ານມາ, ໂດຍສະເພາະ ນັບແຕ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIX ຂອງພັກກອມມູນິດຈີນ ເປັນຕົ້ນມາ, ສະຫາຍໄດ້ສະເໜີ ແນວຄິດ ວ່າດ້ວຍສັງຄົມນິຍົມທີ່ມີສີສັນພິເສດຂອງຈີນ ໃນຍຸກສະໄໝໃໝ່ ທີ່ໄດ້ກາຍເປັນ ຄັນທຸງ ແລະ ທິດນຳຍຸດທະສາດ ຂອງພັກກອມມູນິດຈີນ ໃນການນໍາພາປະຊາຊົນຈີນອ້າຍນ້ອງ ພັດທະ ນາປະເທດຊາດດ້ວຍທ່ວງທ່າໃໝ່, ຍາດໄດ້ຜົນສໍາເລັດຢ່າງຮອບດ້ານ ແລະ ໜ້າອັດສະຈັນ, ສາມາດແກ້ໄຂຄວາມທຸກຍາກຂອງປະຊາຊົນໃນທົ່ວປະເທດຈີນ ແລະ ບັນລຸເປົ້າໝາຍ 100 ປີເຫດການທໍາອິດ ໃນການສ້າງປະເທດສັງຄົມນິຍົມທີ່ອີ່ມໜໍາສໍາລານຮອບດ້ານໂດຍພື້ນຖານ. ບົດຮຽນ ແລະ ຜົນສໍາເລັດ ຂອງ ສປ ຈີນ ກໍ່ຄື ບັນດາຂໍ້ລິເລີ່ມຕ່າງໆຂອງສະຫາຍ ໄດ້ປະກອບສ່ວນສໍາຄັນເຂົ້າໃນພາລະກິດ ແຫ່ງການເສີມສ້າງສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກອີກດ້ວຍ.

      ໃນໂອກາດນີ້, ອີກເທື່ອໜຶ່ງ ຂ້າພະເຈົ້າ ຂໍສະແດງຄວາມຮູ້ບຸນຄຸນອັນເລິກເຊິ່ງ ຕໍ່ຄວາມເອົາໃຈໃສ່ ຂອງສະຫາຍ ຕໍ່ການສະໜັບ ສະໜູນຊ່ວຍເຫຼືອຢ່າງທັນການ ແລະ ມີປະສິດທິຜົນ ຕໍ່ ສປປ ລາວ ຕະຫຼອດໄລຍະທີ່ຜ່ານມາ.

      ຂ້າພະເຈົ້າ ມີຄວາມໝາຍໝັ້ນທີ່ຈະຮ່ວມກັບສະຫາຍ ສືບຕໍ່ປົກປັກຮັກສາ ແລະ ເພີ່ມພູນຄູນສ້າງ ສາຍພົວພັນມິດຕະພາບ ອັນເປັນມູນເຊື້ອ, ການຮ່ວມມືແບບຄູ່ຮ່ວມຍຸດທະສາດຮອບດ້ານໝັ້ນຄົງ ຍາວນານ ຕາມທິດ 4 ດີ ແລະ ການສ້າງຄູ່ຮ່ວມຊະຕາກໍາ ລາວ-ຈີນ, ຈີນ-ລາວ ໃຫ້ກ້າວ ເຂົ້າສູ່ລວງເລິກ, ແຕກດອກອອກຜົນ ແລະ ນໍາເອົາຜົນປະໂຫຍດຕົວຈິງ ມາສູ່ປະຊາຊົນສອງຊາດ ລາວ-ຈີນ ນັບມື້ນັບຫຼາຍຂື້ນ.

      ຂໍອວຍພອນໃຫ້ສະຫາຍ ພ້ອມດ້ວຍຄອບຄົວ ຈົ່ງມີສຸຂະພາບແຂງແຮງ, ມີຄວາມຜາສຸກ ແລະ ປະສົບຜົນສໍາເລັດໃນໜ້າທີ່ອັນມີກຽດ ສູງສົ່ງຂອງຕົນ, ສືບຕໍ່ນໍາພາປະຊາຊົນຈີນອ້າຍນ້ອງ ສ້າງສາພັດທະນາ ສາທາລະນະລັດ ປະຊາຊົນຈີນ ຕາມເສັ້ນທາງສັງຄົມນິຍົມ ທີ່ມີສີສັນ ພິເສດຂອງຈີນ ໃນຍຸກສະໄໝໃໝ່, ສ້າງປະເທດຈີນໃຫ້ນັບມື້ນັບມີຄວາມເຂັ້ມແຂງທັນສະໄໝ, ບັນລຸເປົ້າໝາຍ 100 ປີເຫດການທີສອງ ກໍ່ຄື ຄວາມມຸ້ງຫວັງແຫ່ງການຟື້ນຟູຄວາມຮຸ່ງເຮືອງສີວິໄລຂອງປະຊາຊາດຈີນ.

       ຮຽນມາດ້ວຍຄວາມເຄົາລົບ ແລະ ນັບຖື ຢ່າງສູງ,   

                                                            ນະຄອນຫຼວງວຽງຈັນ, ວັນທີ 15 ມິຖຸນາ 2023

                                                    ທອງລຸນ ສີສຸລິດ

                                             ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ

                                              ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ