ສະຫາຍ ກິມ ເຈິງ ອຸນ, ເລຂາທິການໃຫຍ່ ພັກແຮງງານເກົາຫຼີ ສົ່ງໂທລະເລກຊົມເຊີຍວັນສ້າງຕັ້ງ ພັກປະຊາຊົນ ປະຕິວັດລາວ ຄົບຮອບ 67 ປີ ມາຍັງ ສະຫາຍ ທອງລຸນ ສີສຸລິດ, ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ

ໃນວັນທີ 22 ມີນາ 2022 ສະຫາຍ ກິມ ເຈິງ ອຸນ, ເລຂາທິການໃຫຍ່ ພັກແຮງງານເກົາຫຼີ ສົ່ງໂທລະເລກຊົມເຊີຍວັນສ້າງຕັ້ງ ພັກປະຊາຊົນ ປະຕິວັດລາວ ຄົບຮອບ 67 ປີ ມາຍັງ ສະຫາຍ ທອງລຸນ ສີສຸລິດ, ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ເຊິ່ງມີເນື້ອໃນດັ່ງລຸ່ມນີ້:

         ເນື່ອງໃນໂອກາດ ວັນສ້າງຕັ້ງ ພັກປະຊາຊົນ ປະຕິວັດລາວ ຄົບຮອບ 67 ປີ, ຂ້າພະເຈົ້າ ຂໍສົ່ງຄຳຊົມເຊີຍອັນອົບອຸ່ນ ແລະ ອວຍພອນໄຊອັນປະເສີດ ມາຍັງ ສະຫາຍ ທອງລຸນ ສີສຸລິດ, ເລຂາທິການໃຫຍ່, ຄະນະບໍລິຫານງານສູນກາງພັກ ປປ ລາວ ແລະ ສະມາຊິກພັກ ປປ ລາວ ທຸກຖ້ວນໜ້າ.

         ຕະຫຼອດໄລຍະ 67 ປີ ແຫ່ງການສ້າງຕັ້ງ ພັກປະຊາຊົນ ປະຕິວັດລາວ, ພາຍໃຕ້ການນຳພາຂອງພັກປະຊາຊົນ ປະຕິວັດລາວ ໄດ້ນຳພາປະຊາຊົນ ໃນການຕໍ່ສູ້ປົດປ່ອຍປະເທດຊາດ ແລະ ກໍ່ສ້າງສັງຄົມໃໝ່ທີ່ເປັນເອກະລາດ ແລະ ວັດທະນາຖາວອນ ເຊີ່ງສາມາດຍາດມາໄດ້ບັນດາຜົນສຳເລັດອັນໃຫຍ່ຫຼວງ.

         ຂ້າພະເຈົ້າ ເຊື່ອໝັ້ນຢ່າງແນ່ວແນ່ວ່າ ພາຍໃຕ້ການນຳພາອັນເຂັ້ມແຂງຂອງ ສະຫາຍ ເລຂາທິການໃຫຍ່, ພັກປະຊາຊົນ ປະຕິວັດລາວ ຈະນຳພາປະຊາຊົນລາວ ຜ່ານຜ່າຄວາມຫຍຸ້ງຍາກ ແລະ ອຸປະສັກນາໆປະການ, ສາມາດບັນລຸເປົ້າໝາຍສູ້ຊົນທີ່ກອງປະຊຸມໃຫຍ່ ຄັ້ງທີ 11 ຂອງພັກໄດ້ວາງອອກ ແລະ ສືບຕໍ່ເສີມຂະຫຍາຍລະບອບປະຊາທິປະໄຕ ປະຊາຊົນ ໃຫ້ມີຄວາມເຂັ້ມແຂງ ແລະ ຊຸກຍູ້ການກໍ່ສ້າງສັງຄົມນິຍົມ ຢ່າງມີໄຊ.

         ໃນໂອກາດອັນສະຫງ່າລາສີນີ້, ຂ້າພະເຈົ້າເຊື່ອໝັ້ນວ່າ ສາຍພົວພັນມິດຕະພາບ ແລະການຮ່ວມມືອັນດີງາມລະຫວ່າງສອງພັກ ຈະສືບຕໍ່ໄດ້ຮັບການເສີມຂະຫຍາຍ ຢ່າງບໍ່ຢຸດຢັ້ງບົນເສັ້ນທາງແຫ່ງ ການປະຕິບັດພາລະກິດສັັງຄົມນິຍົມ ແລະ ຂໍອວຍພອນໄຊອັນປະເສີດ ມາຍັງ ສະຫາຍເລຂາທິການໃຫຍ່ ຈົ່ງປະສົບຜົນສຳເລັດ ໃນພາລະໜ້າທີ່ອັນມີຽດສະຫງ່າຂອງສະຫາຍ ເພື່ອສ້າງພັກໃຫ້ນັບມື້ນັບເຂັ້ມແຂງ.