ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ພົບປະຜ່ານວິດີໂອທາງໄກ ກັບ ຫົວໜ້າສຳນັກງານຕ່າງປະເທດ ຂອງ ພັກເສລີປະຊາທິປະໄຕຍີ່ປຸ່ນ
ເຜີຍແຜ່ໂດຍ: admin ເວລາ: 10/03/2022 14:44:47 ຈຳນວນຢ້ຽມຊົມ 425 ຄັ້ງ ໃນວັນທີ 2 ມີນາ 2022 ທີ່ ສຳນັກງານ ຄະນະພົວພັນຕ່າງປະເທດສູນກາງພັກ, ທ່ານ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ໄດ້ພົບປະເຮັດວຽກຜ່ານວິດີໂອທາງໄກກັບ ທ່ານ ຄັດຊູອິ ຮີລາຊະວະ (HIRASAWA Katsuei), ຫົວໜ້າສຳນັກງານຕ່າງປະເທດ ຂອງ ພັກເສລີປະຊາທິປະ ໄຕຍີ່ປຸ່ນ.
ໃນໂອກາດດັ່ງກ່າວ, ທ່ານ ທອງສະຫວັນ ພົມວິຫານ ໄດ້ສະແດງຄວາມຍິນດີຕໍ່ການພົບປະ ໃນຄັ້ງນີ້, ເຊິ່ງເປັນການພົບປະຄັ້ງທຳອິດ ທີ່ມີຄວາມໝາຍຄວາມສຳຄັນຂອງສອງຝ່າຍ ແລະ ທັງເປັນໂອກາດອັນດີ ໃນການປຶກສາຫາລື ແລະ ແລກປ່ຽນຄໍາຄິດເຫັນ ກ່ຽວກັບ ການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ພັກ ປປ ລາວ ກັບ ພັກເສລີປະຊາທິປະໄຕຍີ່ປຸ່ນ ແລະ ສາຍພົວພັນຄູ່ຮ່ວມຍຸດທະສາດ ລະຫວ່າງ ສປປ ລາວ-ຍີ່ປຸ່ນ ໃນຕໍ່ໜ້າ.
ທ່ານ ທອງສະຫວັນ ພົມວິຫານ ໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນຂອງ ພະນະທ່ານ ທອງລຸນ ສີສຸລິດ, ເລຂາທິການໃຫຍ່ຄະນະບໍລິຫານງານສູນກາງພັກ ປປ ລາວ ຝາກໄປຍັງ ພະນະທ່ານKISHIDA Fumio, ປະທານພັກເສລີປະຊາທິປະໄຕຍີ່ປຸ່ນ; ແຈ້ງຫຍໍ້ ສະພາບການພົ້ນເດັ່ນພາຍໃນພັກ, ພາຍໃນປະເທດ ກໍ່ຄື ຜົນສຳເລັດໃນການສ້າງສາພັດ ທະນາເສດຖະກິດ-ສັງຄົມ, ການສະກັດກັ້ນການແຜ່ລະບາດຂອງພະຍາດໂຄວິດ-19 ແລະ ຜົນສຳເລັດໃນດ້ານຕ່າງໆທີ່ຍາດມາໄດ້ ພາຍໃຕ້ການນຳພາຂອງ ພັກ ປປ ລາວ ໃຫ້ຝ່າຍຍີ່ປຸ່ນຊາບ; ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງພັກ, ສອງລັດ ລາວ-ຍີ່ປຸ່ນ ໃນໄລຍະຜ່ານມາ ກໍ່ຄື ປັດຈຸບັນ, ສະແດງຄວາມຊົມເຊີຍ ຕໍ່ ພັກເສລີປະຊາທິປະໄຕ ກໍ່ຄື ລັດຖະບານຍີ່ປຸ່ນ ທີ່ສາມາດຍາດໄດ້ຜົນສຳເລັດອັນໃໝ່ໃຫຍ່ຫລວງກວ່າເກົ່າ ໃນການສ້າງສາ ແລະ ພັດທະນາປະເທດຍີ່ປຸ່ນ ໃຫ້ມີຄວາມເຂັ້ມແຂງ ແລະ ຈະເລີນວັດທະນາ; ສະແດງຄວາມຂອບໃຈ ຕໍ່ ພັກ ແລະ ລັດ ຖະບານຍີ່ປຸ່ນ ທີ່ໄດ້ໃຫ້ການຊ່ວຍເຫລືອໃນການຈັດຝຶກອົບຮົມໃຫ້ແກ່ພະນັກງານການນຳຂັ້ນຕ່າງໆຂອງພັກ, ລັດລາວ ໃນໄລຍະຜ່ານມາ ແລະ ຍິນດີຮ່ວມກັບຝ່າຍຍີ່ປຸ່ນ ໃນການຊຸກຍູ້ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງພັກ ລາວ-ຍີ່ປຸ່ນ ເພື່ອປະກອບສ່ວນເຂົ້າໃນການຊຸກຍູ້ ແລະ ເສີມຂະຫຍາຍສາຍພົວພັນຄູ່ຮ່ວມຍຸດທະສາດ ລາວ-ຍີ່ປຸ່ນ ໃຫ້ແຕກດອກອອກຜົນ ແລະ ນຳເອົາຜົນປະໂຫຍດຕົວຈິງ ມາສູ່ ປະຊາຊົນສອງຊາດ ໃຫ້ນັບມື້ນັບຫລາຍຂຶ້ນ.
ທ່ານ HIRASAWA Katsuei ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ກໍ່ຄື ການຢື້ຢາມຖາມຂ່າວ ຂອງ ພະນະທ່ານ ທອງລຸນ ສີສຸລິດ, ເລຂາທິການໃຫຍ່ຄະນະບໍລິຫານງານສູນກາງພັກ ປປ ລາວ ແລະ ຈະນຳເອົາຄຳຢ້ຽມຢາມຖາມຂ່າວດັ່ງກ່າວ ໄປຍັງ ພະນະທ່ານ KISHIDA Fumio, ປະທານພັກເສລີປະຊາທິປະໄຕຍີ່ປຸ່ນ; ພ້ອມນັ້ນ, ທ່ານ ຍັງໄດ້ແຈ້ງສະພາບພົ້ນເດັ່ນພາຍໃນພັກ, ປະເທດຍີ່ປຸ່ນ ໃຫ້ຊາບ, ໂດຍສະເພາະ ຜົນສຳລັດໃນການຈັດຕັ້ງປະ ຕິບັດແຜນການພັດທະນາເສດຖະກິດ-ສັງຄົມ, ການປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ ຍີ່ປຸ່ນ ໃນຜ່ານມາ; ຕີລາຄາສູງສາຍພົວພັນມິດຕະພາບ ລະຫວ່າງ ສອງພັກ ແລະ ການພົວພັນຄູ່ຮ່ວມຍຸດທະສາດ ລະ ຫວ່າງ ສອງປະເທດ ຍີ່ປຸ່ນ-ລາວ ໃນໄລຍະຜ່ານມາ ກໍ່ຄື ປັດຈຸບັນ, ຍິນດີຮ່ວມກັບຝ່າຍລາວ ໃນການສືບຕໍ່ເສີມຂະ ຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ຍີ່ປຸ່ນ-ລາວ ໃຫ້ໄດ້ຮັບການເສີມຂະຫຍາຍຍິ່ງໆຂຶ້ນ.
ໃນການພົບປະທາງໄກຄັ້ງນີ້, ສອງຝ່າຍ ຍັງໄດ້ປຶກສາຫາລືກ່ຽວກັບ ການພົວພັນຮ່ວມມືສອງຝ່າຍ ແລະ ເປັນເອກະພາບກັນ ກ່ຽວກັບ ທິດທາງການຮ່ວມມື ໃນຕໍ່ໜ້າ, ໂດຍສະເພາະ ການເພີ່ມທະວີການຮ່ວມມື ແລະ ແລກປ່ຽນການຢ້ຽມຢາມຊຶ່ງກັນ ແລະ ກັນ ລະຫວ່າງ ສອງພັກ, ສະມາຄົມມິດຕະພາບ ກໍ່ຄື ການໄປມາຫາສູ່ ລະຫວ່າງ ປະຊາຊົນຂອງສອງປະເທດ, ສືບຕໍ່ປະສານສົມທົບ ແລະ ເພີ່ມທະວີການພົວພັນຮ່ວມມື ລະຫວ່າງ ຄະນະພົວພັນຕ່າງປະເທດສູນກາງພັກ ປປ ລາວ ແລະ ສຳນັກງານຕ່າງປະເທດ ຂອງ ພັກເສລີປະຊາທິປະໄຕຍີ່ປຸ່ນ ເພື່ອເສີມຂະຫຍາຍສາຍພົວພັນມິດຕະພາບ ລະຫວ່າງ ສອງພັກ, ປະກອບສ່ວນເຂົ້າໃນການຊຸກຍູ້ ແລະ ສ້າງເງື່ອນໄຂອຳນວຍຄວາມສະດວກໃຫ້ແກ່ການພົວພັນຮ່ວມມື ລະຫວ່າງ ລັດກັບລັດ ໃຫ້ໄດ້ຮັບການພັດທະນາ ແລະ ເສີມຂະຫຍາຍເຂົ້າສູ່ລວງເລິກ ເພື່ອຜົນປະ ໂຫຍດຂອງປະຊາຊົນສອງຊາດ ລາວ-ຍີ່ປຸ່ນ ກໍ່ຄື ເພື່ອສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ. ນອກນັ້ນ, ສອງຝ່າຍ ຍັງໄດ້ແລກປ່ຽນຄຳຄິດເຫັນ ກ່ຽວກັບ ສະພາບການພາກພື້ນ ແລະ ສາ ກົນ ຈຳນວນໜຶ່ງ ທີ່ສອງຝ່າຍມີຄວາມສົນໃຈຮ່ວມກັນ.
ໃນການພົບປະທາງໄກ ຄັ້ງນີ້, ຍັງມີ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ຍີ່ ປຸ່ນ ເຂົ້າຮ່ວມ ຕາມການເຊື້ອເຊີນຂອງຝ່າຍຍີ່ປຸ່ນ.