ຄະນະພົວພັນຕ່າງປະເທດສູນກາງພັກ (ຄຕພ) ໄດ້ຈັດພິທີມອບ-ຮັບໜ້າທີ່ ຄະນະບໍລິຫານງານ ຂອງ ຄະນະສັນຕິພາບ ແລະ ສາມັກຄີຂອງລາວ ແລະ ສະມາຄົມມິດຕະພາບລາວ-ເບລາຣຸສ ລະຫວ່າງ ຊຸດເກົ່າ ແລະ ຊຸດໃໝ່ ຂຶ້ນໃນວັນທີ 7 ມີນານີ້ ທີ່ສໍານັກງານ ຄຕພ ໂດຍການໃຫ້ກຽດເຂົ້າຮ່ວມເປັນປະທານ ຂອງ ສະຫາຍ ທອງສະຫວັນ ພົມວິຫານ ກຳມະການສູນກາງພັກ ເລຂາຄະນະພັກ ຫົວໜ້າຄະນະພົວພັນຕ່າງປະເທດສູນກາງພັກ ມີພາກສ່ວນກ່ຽວຂ້ອງເຂົ້າຮ່ວມ.

ໃນພິທີດັ່ງກ່າວ, ສະຫາຍ ດວງຕາ ຈູມພາວັນ ຫົວໜ້າກົມຄຸ້ມຄອງ-ພະນັກງານ ຕາງໜ້າຄະນະຈັດຕັ້ງສູນກາງພັກ ໄດ້ຜ່ານມະຕິຕົກລົງ ຂອງ ຄະນະເລຂາທິການສູນກາງພັກ ວ່າດ້ວຍການແຕ່ງຄະນະບໍລິຫານງານ ຄະນະສັນຕິພາບ ແລະ ສາມັກຄີຂອງລາວ ແລະ ສະມາຄົມມິດຕະພາບ ລາວ-ເບລາຣຸສ.

ພາຍຫຼັງຜ່ານມະຕິຕົກລົງ ຂອງຄະນະເລຂາທິການສູນກາງພັກ ກໍໄດ້ມີພິທີເຊັນບົດບັນທຶກ ມອບ-ຮັບໜ້າທີ່ ລະຫວ່າງ ປະທານຄະນະສັນຕິພາບ ແລະ ສາມັກຄີຂອງລາວ ແລະ ສະມາຄົມມິດຕະພາບ ລາວ-ເບລາຣຸດ ຜູ້ເກົ່າ ແລະ ຜູ້ໃໝ່ ລະຫວ່າງ ສະຫາຍ ສົມພັນ ແພງຄຳມີ ອະດີດກຳມະການສູນກາງພັກ ອະດີດຮອງປະທານສະພາແຫ່ງຊາດ ປະທານຄະນະສັນຕິພາບ ແລະ ສາມັກຄີຂອງລາວ ຜູ້ເກົ່າ ແລະ ສະຫາຍ ສົມມາດ ພົນເສນາ ກຳມະການສູນກາງພັກ ຮອງປະທານສະພາແຫ່ງຊາດ ປະທານຄະນະສັນຕິພາບ ແລະ ສາມັກຄີຂອງລາວ ຜູ້ໃໝ່; ສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ ລັດຖະມົນຕີກະຊວງການເງິນ ປະທານສະມາຄົມມິດຕະພາບ ລາວ-ເບລາຣຸສ ຜູ້ເກົ່າ ແລະ ສະຫາຍ ນາງ ທຳມາ ເພັດວິໄຊ ຮອງປະທານສູນກາງສະຫະພັນແມ່ຍິງລາວ ປະທານສະມາຄົມມິດຕະພາບ ລາວ-ເບລາຣຸສ ຜູ້ໃໝ່ ໂດຍການເປັນສັກຂີພິຍານຂອງ ສະຫາຍ ທອງສະຫວັນ ພົມວິຫານ ແລະ ພາກສ່ວນກ່ຽວຂ້ອງ.

ໃນໂອກາດດັ່ງກ່າວ ສະຫາຍ ທອງສະຫວັນ ພົມວິຫານ ໄດ້ສະແດງຄວາມຍ້ອງຍໍ-ຊົມເຊີຍ ສະຫາຍ ປະທານ ແລະ ຄະນະບໍລິຫານງານ ຂອງ ຄະນະສັນຕິພາບ ແລະ ສາມັກຄີຂອງລາວ ແລະ ສະມາຄົມມິດຕະພາບ ລາວ-ເບລາຣຸສ ຊຸດເກົ່າ ທີ່ໄດ້ປະກອບສ່ວນສຸມສະຕິປັນຍາ, ເຫື່ອແຮງ ຊີ້ນຳໆພາການເຄື່ອນໄຫວວຽກງານການທູດປະຊາຊົນ ໄປຄຽງຄູ່ກັບການພົວພັນຕ່າງປະເທດດ້ານພັກ ແລະ ການທູດສາຍລັດ ໂດຍສະເພາະການສ້າງກິດຈະກຳຕ່າງໆ ເພື່ອສົ່ງເສີມສາຍພົວພັນມິດຕະພາບ ແລະ ການຮ່ວມມືໃນຂົງເຂດດ້ານການສຶກສາ-ກິລາ, ສາທາລະນະສຸກ, ວັດທະນະທຳ-ສັງຄົມ, ການທ່ອງທ່ຽວ, ເສດຖະກິດ-ການຄ້າ, ການລົງທຶນ, ວິທະຍາສາດ-ເຕັກນິກ, ດ້ານມະນຸດສະທຳ, ດ້ານການກຸສົນ ແລະ ໄດ້ຂົນຂວາຍເອົາການຊ່ວຍເຫຼືອຈາກອົງການຈັດຕັ້ງຂອງປະເທດເພື່ອນມິດຈຳນວນຫຼວງຫຼາຍມາຊ່ວຍ ສປປ ລາວ. ພ້ອມນັ້ນ ຍັງໄດ້ມີຄຳເຫັນຊີ້ ນຳໃຫ້ປະທານ ແລະ ຄະນະບໍລິຫານງານ ຂອງ ຄະນະສັນຕິພາບ ແລະ ສາມັກຄີຂອງລາວ ແລະ ສະມາຄົມມິດຕະພາບ ລາວ-ເບລາຣຸສ ຊຸດໃໝ່, ສືບຕໍ່ປະຕິບັດໜັາທີ່ຕາມພາລະບົດບາດ, ຂອບເຂດສິດ ແລະ ໜ້າທີ່ ທີ່ພັກ-ລັດ ມອບໝາຍ ໂດຍສະເພາະແມ່ນການໂຄສະນາເຜີຍແຜ່ແນວທາງນະໂຍບາຍຂອງ ສປປ ລາວ ຕໍ່ຕ່າງປະເທດ, ສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ກໍຄືການໄປມາຫາສູ່ ລະຫວ່າງ ປະຊາຊົນລາວ ແລະ ຕ່າງປະເທດໃຫ້ຫຼາຍຂຶ້ນ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນ ກໍຄືປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາ ສປປ ລາວ.

ຂ່າວ-ພາບ: ຄຕພ