ກອງປະຊຸມສໍາມະນາທິດສະດີ ລະຫວ່າງ ພັກປະຊາຊົນປະຕິວັດລາວ ແລະ ພັກກອມມູນິດຈີນ ຄັ້ງທີ 9
ເຜີຍແຜ່ໂດຍ: admin ເວລາ: 10/03/2022 14:11:03 ຈຳນວນຢ້ຽມຊົມ 482 ຄັ້ງ 
ເພື່ອເປັນການຜັນຂະຫຍາຍແຜນແມ່ບົດວ່າດ້ວຍການສ້າງຄູ່ຮ່ວມຊະຕາກໍາ ລາວ-ຈີນ ແລະ ປະຕິບັດຕາມແຜນການຮ່ວມມື ລະຫວ່າງ ພັກປະຊາຊົນປະຕິວັດລາວ ແລະ ພັກກອມມູນິດຈີນ ປະຈໍາປີ 2021, ໃນຕອນເຊົ້າຂອງວັນທີ 29 ທັນວາ 2021 ທີ່ຫໍປະຊຸມແຫ່ງຊາດ, ສະພາທິດສະດີສູນກາງພັກ ປປ ລາວ, ຄະນະພົວພັນຕ່າງປະເທດສູນກາງພັກ ສົມທົບກັບພາກສ່ວນກ່ຽວຂ້ອງຂອງລາວ ໄດ້ຮ່ວມກັບ ຄະນະໂຄສະນາສູນກາງພັກກອມມູນິດຈີນ ຈັດກອງປະຊຸມສໍາມະນາທິດສະດີ ລະຫວ່າງ ສອງພັກ ລາວ-ຈີນ ຄັ້ງທີ IX ຜ່ານວິດີໂອທາງໄກ ພາຍໃຕ້ຫົວຂໍ້: “ຜົນສໍາເລັດອັນຍິ່ງໃຫຍ່ ແລະ ບົດຮຽນປະຫວັດສາດ ຂອງ ພັກປະຊາຊົນປະຕິວັດລາວ ແລະ ພັກກອມມູນິດຈີນ ໃນການນໍາພາ ພາລະກິດສ້າງສາສັງຄົມນິຍົມຂອງຕົນ”ໂດຍການເປັນປະທານຮ່ວມ ຂອງ ສະຫາຍ ຄໍາພັນ ພົມມະທັດ, ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ ປປ ລາວ, ປະທານອົງການກວດກາແຫ່ງລັດ, ຫົວໜ້າຄະນະຕ້ານການສໍ້ລາດບັງຫຼວງຂັ້ນສູນກາງ ແລະ ສະຫາຍ ຮວງ ຄຸນມິງ, ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະໂຄສະນາສູນກາງພັກກອມມູນິດຈີນ, ເຂົ້າຮ່ວມກອງປະຊຸມຍັງມີ ສະຫາຍ ຄໍາພັນ ເຜີຍຍະວົງ, ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ ປປ ລາວ ພ້ອມດ້ວຍບັນດາສະຫາຍພະນັກງານການນໍາຂັ້ນສູງ, ບັນດານັກວິທະຍາສາດ, ນັກທິດສະດີ ຂອງ ສອງຝ່າຍເຂົ້າຮ່ວມ.
ກອງປະຊຸມຄັ້ງນີ້, ບັນດານັກວິທະຍາສາດ, ນັກທິດສະດີ ຂອງທັງສອງຝ່າຍ ໄດ້ຜັດປ່ຽນກັນຂຶ້ນສະເໜີບົດຄໍາເຫັນຫຼາຍຫົວຂໍ້ຍ່ອຍ. ຝ່າຍລາວ ໄດ້ນໍາສະເໜີບັນດາບົດກ່ຽວກັບ ຜົນສໍາເລັດ ແລະ ບົດຮຽນຂອງພັກ ປປ ລາວ ໃນການນໍາພາສ້າງສາລະບອບປະຊາທິປະໄຕປະຊາຊົນ ເພື່ອກ້າວຂຶ້ນສູ່ຈຸດໝາຍສັງຄົມນິຍົມ, ການຫັນປ່ຽນກົນໄກເສດຖະກິດ, ການເປີດກວ້າງການພົວພັນ ແລະ ການຮ່ວມມືສາກົນ, ການນໍາພາສ້າງຊັບພະຍາກອນມະນຸດ ໃຫ້ແກ່ການສ້າງ ແລະ ບູລະນະລະບອບປະຊາທິປະໄຕປະຊາຊົນ. ສໍາລັບຝ່າຍຈີນ, ໄດ້ສະເໜີບົດທີ່ປິ່ນອ້ອມບົດຮຽນ ແລະ ຜົນສໍາເລັດໃນການສ້າງສາສັງຄົມນິຍົມທີ່ມີສີສັນພິເສດຂອງຈີນ ເປັນຕົ້ນແມ່ນ ຂະບວນວິວັດອັນສະຫງ່າງາມ ຂອງ ພັກກອມມູນິດຈີນ ໃນການເຕົ້າໂຮມຄວາມສາມັກຄີ ແລະ ນໍາພາປະຊາຊົນຈີນຊອກຄົ້ນ ແລະ ກໍ່ສ້າງສັງຄົມນິຍົມ, ຜົນສຳເລັດ ໃນການກໍ່ສ້າງສັງຄົມນິຍົມຢູ່ປະເທດຈີນ, ການຢຶດໝັ້ນແລະພັດທະນາສັງຄົມນິຍົມວິທະຍາສາດ, ແນວຄິດສີຈິ້ນຜິງວ່າດ້ວຍການສັງຄົມນິຍົມທີ່ມີສີສັນພິເສດໃນຍຸກສະໄໝໃໝ່ ເຮັດໃຫ້ລັດທິມາກ ແບບຈີນ ໄດ້ຮັບການພັດທະນາ ໃນສະພາບແວດລ້ອມອັນໃໝ່ ໂດຍສະເພາະແມ່ນ ນັບແຕ່ກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນ ເປັນຕົ້ນມາ. ພ້ອມນັ້ນ, ຄະນະຜູ້ແທນຂອງທັງສອງຝ່າຍ ຍັງໄດ້ຮ່ວມກັນແລກປ່ຽນ ແລະ ຖອດຖອນບົດຮຽນກ່ຽວກັບການກໍ່ສ້າງສັງຄົມນິຍົມ ຢູ່ສອງປະເທດ ລາວ-ຈີນ.
ການຈັດກອງປະຊຸມສໍາມະນາທິດສະດີ ລະຫວ່າງ ສອງພັກ ລາວ-ຈີນ ເປັນກົນໄກການຮ່ວມມືລະຫວ່າງສອງພັກ ລາວ-ຈີນ ໃນການແລກປ່ຽນບົດຮຽນດ້ານທິດສະດີ ແລະ ພຶດຕິກຳຕົວຈິງ ເຊິ່ງກັນແລະກັນ ໃນການຄຸ້ມຄອງພັກ-ບໍລິຫານລັດ ແລະ ປະກອບສ່ວນເພີ່ມພູນຄັງສາງທິດສະດີ ລະຫວ່າງ ສອງພັກ, ສອງລັດ ໃຫ້ນັບມື້ນັບສົມບູນຂຶ້ນຢ່າງບໍ່ຢຸດຢັ້ງ.