ສະພາແຫ່ງຊາດ ແຫ່ງ ສປປ ລາວ ພົບປະທາງໄກກັບສະພາແຫ່ງຣາຊະອານາຈັກໄທ
ເຜີຍແຜ່ໂດຍ: admin ເວລາ: 11/03/2022 11:24:18 ຈຳນວນຢ້ຽມຊົມ 448 ຄັ້ງ 
ທ່ານ ໄຊສົມພອນ ພົມວິຫານ ປະທານສະພາແຫ່ງຊາດແຫ່ງ ສປປ ລາວ ພົບປະທາງໄກ ກັບ ທ່ານ ຊວນ ຫຼີກໄພ ປະທານສະພາຜູ້ແທນຣາຊະດອນ ແຫ່ງ ຣາຊະອານາຈັກໄທ ໃນວັນທີ17ສິງຫາທີ່ສະພາແຫ່ງຊາດ.
ການພົບປະທາງໄກໃນຄັ້ງນີ້ໄດ້ດຳເນີນໄປດ້ວຍບັນຍາກາດໄມຕີຈິດມິດຕະພາບອັນອົບອຸ່ນທີ່ມີຄວາມໝາຍຄວາມສຳຄັນໃນການປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນມິດ ຕະພາບ ແລະ ການຮ່ວມມືທີ່ມີມູນເຊື້ອອັນດີງາມລະຫວ່າງສອງປະເທດລາວ-ໄທ, ໃນຖານະບ້ານໃກ້ເຮືອນຄຽງທີ່ມີມາແຕ່ດົນນານໃຫ້ຈະເລີນງອກງາມຍິ່ງໆຂຶ້ນ ເວົ້າລວມ, ເວົ້າສະເພາະແມ່ນສືບຕໍ່ການພົວພັນຮ່ວມມືລະຫວ່າງສະພາແຫ່ງຊາດແຫ່ງ ສປປ ລາວ ແລະ ສະພາຜູ້ແທນຣາຊະດອນແຫ່ງຣາຊະອານາຈັກໄທໃຫ້ມີບາດກ້າວໃໝ່ເພື່ອຜົນປະໂຫຍດຂອງປະຊາຊົນສອງຊາດ.
ພ້ອມນີ້, ສອງຝ່າຍໄດ້ສະແດງຄວາມຂອບໃຈ ແລະ ຊົມເຊີຍຊຶ່ງກັນ ແລະ ກັນໃນໂອກາດທີ່ໄດ້ຮັບເລືອກຕັ້ງເປັນປະທານສະພາຜູ້ແທນຣາຊະດອນໄທ ແລະ ເປັນປະທານສະພາແຫ່ງຊາດລາວໃນໄລຍະທີ່ຜ່ານມາ. ພ້ອມທັງແຈ້ງໃຫ້ກັນຊາບສະພາບການພົ້ນເດັ່ນຂອງແຕ່ລະປະເທດເປັນຕົ້ນແມ່ນສະ ພາບການຕ້ານ, ສະກັດກັ້ນ ແລະ ຮັບມືກັບການແຜ່ລະບາດຂອງພະຍາດໂຄວິດ-19 ຢູ່ ສປປ ລາວແລະ ຣາຊະອານາຈັກໄທໃນປັດຈຸບັນ, ຮ່ວມກັນຕີລາຄາການພົວພັນ ແລະ ການຮ່ວມມືລະຫວ່າງສອງປະເທດໃນໄລຍະຜ່ານມາເຫັນວ່າໄດ້ຮັບການເສີມຂະຫຍາຍດີຂຶ້ນ ຊຶ່ງສະແດງອອກມີການແລກປ່ຽນຢ້ຽມຢາມຂອງຄະນະຜູ້ແທນຂັ້ນສູງຂອງລັດຖະບານ, ບັນດາຂະແໜງການໃນລະດັບສູນກາງ ແລະທ້ອງຖິ່ນ, ການຮ່ວມມືທາງດ້ານເສດຖະກິດ, ການຄ້າ-ການລົງທຶນ, ການທ່ອງທ່ຽວ, ການສຶກສາ, ສາທາລະນະສຸກ ແລະ ຂະແໜງການອື່ນໆ. ພ້ອມກັນນີ້, ສອງລັດຖະບານໄດ້ເອົາໃຈໃສ່ຈັດຕັ້ງປະຕິ ບັດບັນດາສັນຍາ, ສົນທິສັນຍາ, ຂໍ້ຕົກລົງ ແລະ ບົດບັນທຶກຊ່ວຍຈຳໂດຍຜ່ານຫຼາຍກົນໄກການຮ່ວມມືທີ່ມີໝາກຜົນ ຊຶ່ງໄດ້ນຳເອົາຜົນປະໂຫຍດຕົວຈິງມາໃຫ້ສອງປະເທດກໍຄືປະຊາຊົນສອງຊາດລາວ-ໄທ.
ໃນໂອກາດດັ່ງກ່າວ, ທ່ານປະທານສະພາແຫ່ງຊາດລາວໃນນາມຕາງໜ້າໃຫ້ລັດຖະບານ, ສະ ພາແຫ່ງຊາດ ແລະ ປະຊາຊົນລາວບັນດາເຜົ່າ ສະແດງຄວາມຂອບໃຈມາຍັງລັດຖະບານ, ສະພາຜູ້ແທນຣາຊະດອນໄທ ແລະ ປະຊາຊົນໄທ ທີ່ອໍານວຍຄວາມສະດວກ ແລະ ຊ່ວຍເຫຼືອແຮງງານລາວໃຫ້ໄດ້ເດີນທາງກັບປະເທດ ແລະ ໃຫ້ການຊ່ວຍເຫຼືອອຸປະກອນການແພດທີ່ຈໍາເປັນເປັນຕົ້ນ ຜ້າອັດປາກ-ດັງ, ຊຸດ PPE, ຕຽງສະໜາມ ແລະ ອຸປະກອນອື່ນໆຈໍານວນໜຶ່ງໃຫ້ແກ່ ສປປ ລາວ.
ນອກຈາກນີ້, ສອງປະທານສະພາລາວ ແລະ ໄທ ກໍໄດ້ທົບທວນຄືນການພົວພັນຮ່ວມມືຂອງສອງອົງການນິຕິບັນຍັດນຳກັນໃນໄລຍະຜ່ານມາ ຊຶ່ງສະແດງອອກໄດ້ມີການແລກປ່ຽນຄະນະຜູ້ແທນນຳກັນໃນລະດັບປະທານສະພາ, ກຳມາທິການ, ຄະນະມິດຕະພາບລັດຖະສະພາ, ຄະນະເລຂາທິການຈົນຮອດຄະນະວິຊາການ, ໄດ້ຮ່ວມກັນຈັດສຳມະນາເພື່ອແລກປ່ຽນບົດຮຽນກ່ຽວກັບການປະຕິບັດບົດບາດດ້ານນິຕິບັນຍັດ, ມີການແລກປ່ຽນຂໍ້ມູນຂ່າວສານ, ການສະໜັບສະໜູນ ແລະ ຮ່ວມມືກັນໃນເວທີລັດຖະສະພາພາກພື້ນ ແລະ ສາກົນເປັນຕົ້ນແມ່ນໃນຂອບການເຄື່ອນໄຫວຂອງອົງການລັດຖະສະພາລະ ຫວ່າງຊາດອາຊຽນ, IPU, APA, ASEP ແລະ ອື່ນໆ.
ໃນໄລຍະການແຜ່ລະບາດຂອງພະຍາດໂຄວິດ-19, ລັດຖະສະພາໄທກໍຍັງໄດ້ຊ່ວຍເຫຼືອອຸປະ ກອນປ້ອງກັນພະຍາດດັ່ງກ່າວແກ່ສະພາແຫ່ງຊາດລາວ. ທັງສອງຝ່າຍໄດ້ເຫັນດີນຳກັນຈະສືບຕໍ່ພົວພັນຮ່ວມມືກັນແລກປ່ຽນຄະນະຜູ້ແທນໃນລະດັບປະທານສະພາ, ກຳມາທິການ, ຄະນະເລຂາທິການ, ຄະ ນະມິດຕະພາບລັດຖະສະພາລາວ-ໄທໄປພ້ອມກັບການຈັດການແລກປ່ຽນບົດຮຽນກ່ຽວກັບການຈັດຕັ້ງປະຕິບັດພາລະບົດບາດດ້ານນິຕິບັນຍັດ ແລະ ຈັດສໍາມະນາໃນຫົວຂໍ້ຕ່າງໆທີ່ສອງຝ່າຍມີຄວາມສົນໃຈ; ສືບຕໍ່ຊຸກຍູ້ໃຫ້ລັດຖະບານຂອງສອງປະເທດຈັດຕັ້ງປະຕິບັດບັນດາສັນຍາ, ສົນທິສັນຍາ, ຂໍ້ຕົກລົງ, ບົດບັນທຶກຄວາມເຂົ້າໃຈທີ່ພົວພັນເຖິງການຮ່ວມມືສອງຝ່າຍທີ່ໄດ້ຕົກລົງຮ່ວມກັນໃຫ້ເປັນຮູບປະທຳ ແລະ ມີປະສິດທິຜົນດີກວ່າເກົ່າ; ສະໜັບສະໜູນ ແລະ ຮ່ວມມືກັນໃນການເຄື່ອນໄຫວໃນເວທີລັດຖະສະພາພາກພື້ນ ແລະ ສາກົນ. ພ້ອມກັນນີ້, ທ່ານປະທານສະພາແຫ່ງຊາດລາວຍັງໄດ້ສະເໜີໃຫ້ທ່ານປະທານສະພາຜູ້ແທນຣາຊະດອນໄທໄດ້ຊຸກຍູ້ໃຫ້ລັດຖະບານໄທເອົາໃຈໃສ່ຮ່ວມກັນກັບຝ່າຍລາວແກ້ໄຂບັນຫາການປັກຫຼັກໝາຍຊາຍແດນທາງບົກ ແລະ ທາງນ້ຳໃຫ້ສຳເລັດໂດຍໄວຕາມການຕົກລົງເຫັນດີນຳກັນ, ສະເໜີໃຫ້ມີການເບິ່ງແຍງແຮງງານລາວທີ່ກຳລັງອອກແຮງງານຢູ່ໄທພ້ອມທັງຊ່ວຍອຳນວຍຄວາມສະ ດວກໃຫ້ແຮງງານລາວທີ່ເດີນທາງກັບຄືນປະເທດ ຊຶ່ງເຫັນວ່າມີຜູ້ຕິດເຊື້ອພະຍາດໂຄວິດ-19 ເປັນຈຳນວນຫຼວງຫຼາຍ.
ໃນຕອນທ້າຍ, ທັງສອງປະທານອົງການນິຕິບັນຍັດກໍໄດ້ອວຍພອນຊຶ່ງກັນ ແລະ ກັນ ແລະ ເຊື້ອເຊີນຊຶ່ງກັນ ແລະ ກັນມາຢ້ຽມຢາມປະເທດຂອງກັນ ແລະ ກັນໃນເວລາທີ່ພະຍາດໂຄວິດ-19 ຫາກຜ່ອນຄາຍລົງ ແລະ ມີຄວາມສະດວກທັງສອງຝ່າຍ.
ຂ່າວ : ສະພາແຫ່ງຊາດ, ຮູບ : ນາງແສງຈັນ
20/12/2024 15:15:07
19/12/2024 14:38:41
19/12/2024 14:27:24
19/12/2024 14:00:44
18/12/2024 15:37:57
17/12/2024 11:13:01
17/12/2024 10:46:39
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
09/12/2022 14:35:10
04/04/2023 15:42:25
14/07/2022 15:49:10
16/03/2022 08:33:46