ຄະນະພົວພັນຕ່າງປະເທດສູນກາງພັກ ຈັດພິທີປະກາດພະນັກງານ ອອກພັກການ-ຮັບອຸດໜູນບຳນານ

ເຜີຍ​ແຜ່​ໂດຍ​: moderator ເວ​ລາ: 26/03/2026 14:46:21 ຈຳ​ນວນ​​ຢ້ຽມ​ຊົມ 625 ຄັ້ງ ​

      ໃນວັນທີ 26 ມີນາ 2026, ທີ່ ຄະນະພົວພັນຕ່າງປະເທດສູນກາງພັກ (ຄຕພ) ໄດ້ຈັດພິທີປະກາດພະນັກງານຂັ້ນສູນກາງຄຸ້ມຄອງ ອອກພັກການ-ຮັບອຸດໜູນບຳນານ  ໂດຍການໃຫ້ກຽດເປັນປະທານ ຂອງ ສະຫາຍ ບຸນເຫຼືອ ພັນດານຸວົງ, ກຳມະການສູນກາງພັກ, ເລຂາຄນະບໍລິຫານງານພັກ, ຫົວໜ້າຄະນະພົວພັນ ຕ່າງປະເທດສູນກາງພັກ, ມີຄະນະພັກ-ຄະນະນຳ, ຄະນະກົມ ຕະຫຼອດຮອດພະນັກງານທົ່ວ ຄຕພ ເຂົ້າຮ່ວມຢ່າງພ້ອມພຽງ.

      ໃນພິທີດັ່ງກ່າວ, ສະຫາຍ ເກີລໍ່ ຢ່າງກໍ່, ຫົວໜ້າກົມຈັດຕັ້ງ-ພະນັກງານ ໄດ້ຜ່ານມະຕິຕົກລົງ ຂອງ ຄະນະເລຂາທິການສູນກາງພັກ ສະບັບເລກທີ 1095/ຄລສພ, ລົງວັນທີ 29/12/2025 ວ່າດ້ວຍການອະນຸມັດໃຫ້ ສະຫາຍ ຄຳພັນ ອັ່ນລາວັນ, ຫົວໜ້າຫ້ອງການ ຄະນະພົວພັນຕ່າງປະເທດສູນກາງພັກ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ຣາຊະອານາຈັກໄທ ອອກພັກການ-ຮັບອຸດໜູນບຳນານ ຕາມກົດໝາຍ ວ່າດ້ວຍພະນັກງານ-ລັດຖະກອນ ເຊິ່ງ ສະຫາຍ ຄຳພັນ ອັ່ນລາວັນ ແມ່ນພະນັກງານຫຼັກແຫຼ່ງຜູ້ໜຶ່ງທີ່ມີຄຸນງາມຄວາມດີ ແລະ ປະກອບສ່ວນສ້າງຜົນງານຢ່າງຫລວງຫລາຍ ຕໍ່ຂະແໜງການຕ່າງປະເທດໃນໄລຍະຜ່ານມາ ເປັນຕົ້ນ ໄດ້ຮັບການແຕ່ງຕັ້ງເປັນພະນັກງານນຳພາ-ຄຸ້ມຄອງຂັ້ນຕ່າງໆ. ນອກນັ້ນ, ກ່ອນໜ້ານີ້ ສະຫາຍ ຍັງໄດ້ຖືກແຕ່ງຕັ້ງເປັນເອກອັກຄະລັດຖະທູດວິສາມັນຜູ້ມີອຳນາດ ເຕັມແຫ່ງ ສປປ ລາວ ປະຈຳ ມາເລເຊຍ ແລະ ປະຈຳ ສ.ອາເມຣິກາ.

       ສະຫາຍ ບຸນເຫຼືອ ພັນດານຸວົງ ໄດ້ມີຄຳເຫັນຕໍ່ ສະຫາຍ ຄຳພັນ ອັ່ນລາວັນ ແລະ ບັນດາຜູ້ເຂົ້າຮ່ວມພິທີວ່າ: ການອອກພັກຜ່ອນຮັບອຸດໜູນ-ບຳນານ ໝາຍເຖິງການເຮັດສຳເລັດໜ້າທີ່ການເມືອງ ຢ່າງສຸດກົກສຸດປາຍ ເຊິ່ງຖືເປັນກຽດອັນສູງສົ່ງຂອງ ສະຫາຍ ທີ່ໄດ້ປະກອບສ່ວນປະຕິບັດໜ້າທີ່ຕະຫຼອດໄລະຍ 39 ປີ ຜ່ານມາ, ທັງເປັນແບບຢ່າງທີ່ພະນັກງານ ຄຕພ ຄວນນໍາໄປສຶກສາຮຽນຮູ້. ຕໍ່ຜົນງານດັ່ງກ່າວ, ການຈັດຕັ້ງຈຶ່ງໄດ້ປະຕິບັດນະໂຍບາຍໃຫ້ສອດຄ່ອງກັບກົດໝາຍ ວ່າດ້ວຍພະນັກງານ-ລັດຖະກອນ ຕໍ່ຜູ້ກ່ຽວ ເຊິ່ງເປັນກົດເກນທີ່ພະນັກງານທຸກຂັ້ນຕ້ອງໄດ້ຮັບການຈັດຕັ້ງປະຕິບັດ ພາຍຫຼັງເຮັດສຳເລັດການປະຕິບັດໜ້າທີ່ການເມືອງ.

---