ຄະນະພົວພັນຕ່າງປະເທດສູນກາງພັກ ຈັດພິທີປະກາດພະນັກງານ ອອກພັກການ-ຮັບອຸດໜູນບຳນານ

ເຜີຍ​ແຜ່​ໂດຍ​: moderator ເວ​ລາ: 05/05/2025 08:37:46 ຈຳ​ນວນ​​ຢ້ຽມ​ຊົມ 613 ຄັ້ງ ​

         ໃນ​ຕອນ​ເຊົ້​າ​ຂອງວັນ​ທີ 02 ພຶດ​ສະ​ພາ 2025, ທີ່​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໄດ້​ຈັດ​ພິ​ທີ​ປະ​ກາດ ພະ​ນັກ​ງານ​ຂັ້ນ​ສູນ​ກາງ​ຄຸ້ມຄອງ ອອກ​ພັກ​ການ-ຮັບ​ອຸດ​ໜູນ​ບຳ​ນານ ໂດຍໃຫ້​ກຽດ​ເປັນ​ປະ​ທານ ຂອງ  ສະ​ຫາຍ ບຸນ​ເຫຼືອ   ພັນ​ດາ​ນຸ​ວົງ, ຮັກ​ສາ​ການ​ເລ​ຂາ​ຄະ​ນະບໍ​ລິ​ຫານງ​ານ​ພັກ, ຮັກ​ສາ​ການ​ຫົວ​ໜ້າ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໂດຍ​ມີ ​ຄະ​ນະ​ພັກ, ຄະ​ນະ​ນຳ, ຄະ​ນະ​ກົມ ແລະ ພະ​ແນກ​ເຂົ້າ​ຮ່ວມ​ຢ່າງ​ພ້ອມ​ພຽງ.

       ໃນ​ພິ​ທີ​ດັ່ງ​ກ່າວ, ສະ​ຫາຍ ເກີ​ລໍ່ ຢ່າງ​ກໍ່, ກຳ​ມະ​ການ​ຄະ​ນະ​ພັກ, ​ເລ​ຂາ​ໜ່ວຍ​ພັກ, ຫົວ​ໜ້າ​ກົມ​ຈັດ​ຕັ້ງ-ພະ​ນັກ​ງານ ໄດ້​ຂຶ້ນ​ຜ່ານ​ມະ​ຕິ​ຕົກ​ລົງ​ຂອງ​ຄະ​ນະ​ເລ​ຂາ​ທິ​ການ​ສູນ​ກາງ​ພັກ​ ສະ​ບັບ​ເລກ​ທີ 336/ຄ​ລ​ສ​ພ, ລົງ​ວັນ​ທີ 02/01/2025 ວ່າ​ດ້ວຍ​ການ​ອະ​ນຸ​ມັດ​ໃຫ້ ສະ​ຫາຍ ນາງ ສິ​ຣິ​ພອນ ຄູ​ຫາ​ເທບ, ກຳ​ມະ​ການ​ຄະ​ນະ​ພັກ, ເລ​ຂາ​ໜ່ວຍ​ພັກ, ຫົວ​ໜ້າ​ກົມ ​ເອີ​ຣົບ-ອາ​ເມ​ຣິ​ກາ ຂອງ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ອອກ​ພັກ​ການ-ຮັບ​ອຸດ​ໜູນ​ບຳ​ນານ ຕາມ​ກົດ​ໝາຍ​ວ່າ​ດ້ວຍ​ພະ​ນັກ​ງານ-ລັດ​ຖະ​ກອນ.

       ສະ​ຫາຍ ນາງ ສິ​ຣິ​ພອນ ຄູ​ຫາ​ເທບ ແມ່ນ​ຜູ້​ໜຶ່ງ​ທີ່ມີຄຸນງາມຄວາມດີ ແລະ ຜົນ​ງານຢ່າງຫຼວງຫຼາຍຕໍ່ຂະ  ແໜງການຕ່າງປະເທດ ໃນໄລຍະຜ່ານມາເປັນ​ຕົ້ນ​ແມ່ນໄດ້​ຮັບ​ການ​ແຕ່ງ​ຕັ້ງ​ເປັນ​ພະ​ນັກ​ງານ​ນຳ​ພາ-ຄຸ້ມ​ຄ​ອງ​ຂັ້ນ​ຕ່າງໆ.  ນອກນັ້ນ​, ຍັງ​ເຄີຍ​ໄປ​ປະ​ຈຳ​ການຢູ່​ຕ່າງ​ປະ​ເທດ ເຊິ່ງ​ເປັນ​ຮອງ​ຫົວ​ໜ້າ​ສຳ​ນັກ​ງານ​ການ​ທູດ ສປ​ປ ລາວ ປະ​ຈຳ ສິງ​ກະ​ໂປ.

ໃນ​ຕອນ​ທ້າຍ, ສະ​ຫາຍ ບຸນ​ເຫຼືອ ພັນ​ດາ​ນຸ​ວົງ, ຮັກ​ສາ​ການ​ເລ​ຂາ​ຄະ​ນະ​ພັກ, ຮັກ​ສາ​ການ​ຫົວ​ໜ້າ     ຄ​ຕ​ພ ກໍ່ໄດ້​ໃຫ້​ກຽດ​ມີ​ຄຳ​ເຫັນ​ຕໍ່​ພິ​ທີ​ດັ່ງ​ກ່າວ ໂດຍ​ໄດ້​ກ່າວ​ວ່າ: ການອອກພັກຜ່ອນຮັບອຸດໜູນ-ບຳນານ ໝາຍເຖິງກຽດອັນສູງສົ່ງຂອງພະນັກງານ ທີ່ໄດ້ເຮັດສຳ​ເລັດ​ໜ້າ​ທີ່ການປະຕິວັດ ຢ່າງສຸດກົກສຸດປາຍ, ເປັນການປະຕິ ບັດນະໂຍບາຍຂອງພັກ-ລັດ ໃຫ້ສອດຄ່ອງກັບກົດໝາຍວ່າດ້ວຍພະນັກງານ-ລັດຖະກອນ ຕໍ່ພະນັກງານທີ່ມີຄຸນງາມຄວາມດີ, ເຮັດສຳເລັດການປະຕິວັດ ແລະ ໜ້າທີ່ການເມືອງ ທັງເປັນກົດເກນທີ່ພະນັກງານທຸກຂັ້ນຕ້ອງໄດ້ຮັບ​ການ​ຈັດ​ຕັ້ງປະຕິບັດ.

---