ຜົນສຳເລັດກອງປະຊຸມໃຫຍ່ ຄັ້ງທີ II ໜ່ວຍພັກໜ່ວຍພັກກົມຄົ້ນຄວ້າ ແລະ ພົວພັນຫຼາຍຝ່າຍ, ຄຕພ

ເຜີຍ​ແຜ່​ໂດຍ​: moderator ເວ​ລາ: 02/04/2025 11:20:56 ຈຳ​ນວນ​​ຢ້ຽມ​ຊົມ 202 ຄັ້ງ ​

        ໜ່ວຍພັກກົມຄົ້ນຄວ້າ ແລະ ພົວພັນຫຼາຍຝ່າຍ, ຄະນະພົວພັນຕ່າງປະເທດສູນກາງພັກ ໄດ້​ຈັດ​ກອງ​ປະຊຸມໃຫຍ່ ​ຄັ້ງ​ທີ II ຂອງ​ໜ່ວຍ​ພັກຕົນຂຶ້ນ ​ໃນ​ວັນ​ທີ 31 ມີນາ 2025 ​ນີ້ ທີ່ສຳນັກງານ ຄະນະພົວພັນຕ່າງປະເທດສູນກາງພັກ ໂດຍ​ພາຍ​ໃຕ້ການ​ເປັນ​ປະທານ ​ຂອງ ສະຫາຍ ຈັນທະພອນ ຄຳມະນີຈັນ, ຮັກສາການ ເລຂາໜ່ວຍພັກກົມຄົ້ນຄວ້າ ແລະ ພົວພັນຫຼາຍຝ່າຍ, ໃຫ້​ກຽດ​ເຂົ້າ​ຮ່ວມ​ຂອງ ສະຫາຍ ວາລະໄຊ ເລັ່ງສະຫວັດ, ຮອງເລຂາຄະນະພັກ ຄະນະພົວພັນຕ່າງປະເທດສູນກາງພັກ, ຮອງຫົວໜ້າຄະນະພົວພັນຕ່າງປະ ເທດສູນກາງພັກ, ມີ​ບັນດາສະຫາຍເລຂາ, ຮອງເລຂາ,  ຄະນະໜ່ວຍ​ພັກອ້ອມຂ້າງ ຄະນະພົວພັນຕ່າງປະ ເທດສູນກາງພັກ, ສະມາຊິກ​ພັກ​ສົມ​ບູ​ນ-​ສຳຮອງໜ່ວຍພັກ ກົມຄົ້ນຄວ້າ ແລະ ພົວພັນຫຼາຍຝ່າຍເຂົ້າຮ່ວມຢ່າງພ້ອມພຽງ.

     ສະຫາຍ ຈັນທະພອນ ຄຳມະນີຈັນ, ໄດ້​ຜ່ານ​ບົດ​ລາຍ​ງານການເມືອງຂອງໜ່ວຍພັກ ​ໃນ​ໄລຍະ 5 ປີ ຜ່ານ​ມາ ແລະ ທິດທາງແຜນການໃນ 5 ປີຕໍ່ໜ້າ, ຊຶ່ງສະຫາຍໄດ້ຍົກໃຫ້ເຫັນວ່າ ຕະຫລອດໄລຍະ 5 ປີ ຜ່ານ​ມາ, ໜ່ວຍ​ພັກ​ກົມຄົ້ນຄວ້າ ແລະ ພົວພັນຫຼາຍຝ່າຍ ໄດ້​ຖື​ວຽກ​ງານ​ສຶກສາ​ອົບຮົມ​ການ​ເມືອງ​-​ແນວ​ຄິດ ໃຫ້ແກ່ສະມາຊິກ​ພັກ, ພະນັກ​ງານ​-​ລັດຖະກອນ ພາຍ​ໃນ​ກົມ​ເປັນຕົ້ນ​ຕໍ; ​ໄດ້​ປັບປຸງ​ການ​ກໍ່ສ້າງ​ພັກ ແລະ​ ຂະຫຍາຍພັກຕາມ​ກົດ​ລະບຽບ​ພັກ; ສ້າງ​ໜ່ວຍ​ພັກ, ສະມາຊິກ​ພັກ​ໃຫ້​ປອດ​ໃສ, ເຂັ້ມແຂງ, ໜັກ​ແໜ້ນ ​ທາງດ້ານ​ການເມືອງ, ແນວ​ຄິດ, ການຈັດຕັ້ງ​ ແລະ ​ແບບແຜນ​ວິ​ທີ​ນໍາ​ພາ. ນອກຈາກນັ້ນ, ໜ່ວຍພັກ ໄດ້ຊຸກຍູ້ບັນດາສະຫາຍສະມາຊິກພັກ, ພະນັກງານພາຍໃນກົມ ເຂົ້າຮ່ວມຮັບຟັງການຈັດ​ຕັ້ງ​ເຜີຍແຜ່​ເຊື່ອມ​ຊຶມ​ແນວທາງ​ນະໂຍບາຍ, ລະບຽບ​ກົດໝາຍ, ມະຕິ, ຄຳ​ສັ່ງ ແລະ​ ເອກະ​ສານ​ສໍາ​ຄັນ​ຕ່າງໆ​ຂອງ​ພັກ​ຂອງ​ຊາດ, ໄດ້​ຜັນ​ຂະຫຍາຍ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ XI ຂອງ​ສູນ​ກາງ​ພັກ, ມະຕິຂອງກອງປະຊຸມໃຫຍ່ ຄັ້ງທີ II ຂອງອົງຄະນະ​ພັກຄະນະພົວພັນຕ່າງປະເທດສູນກາງພັກ, ອັນ​ພົ້ນ​ເດັ່ນ ແມ່ນ​ໄດ້​ຈັດ​ຕັ້ງ​ປະຕິບັດບັນດາແຜນ ການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີຂອງໜ່ວຍ ເຊິ່ງໜ່ວຍພັກໄດ້ຮັບນາມມະຍົດເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2020, 2021, 2023 ແລະ 2024.

       ກອງ​ປະຊຸມ ​ໄດ້​ປ່ອນ​ບັດ​ເລືອກເອົາ​ຄະນະ​ພັກ​ຊຸດ​ໃໝ່ 3 ສະຫາຍ ຈາກຜູ້ຮັບລົງສະໝັກທັງໝົດ 5 ສະຫາຍ; ເລືອກ​ໄດ້ ສະຫາຍ ຈັນທະພອນ ຄຳມະນຈັນ, ເປັນ​ເລຂາໜ່ວຍ​ພັກ, ສະຫາຍ ທອງດົມ ອິນທະພົນ, ເປັນຮອງ​ເລຂາ​ໜ່ວຍ​ພັກ ແລະ ສະຫາຍ ພູເງິນ ສຸກວິໄລ, ເປັນ​ກຳມະການໜ່ວຍພັກ, ທັງເປັນປະ ທານກວດກາຂອງໜ່ວຍພັກ.

       ໃນ​ໂອກາດ​ດັ່ງກ່າວ ສະຫາຍ ວາລະໄຊ ເລັ່ງສະຫວັດ ໄດ້​ໃຫ້​ກຽດ​ໂອ້​ລົມ​ຕໍ່ກອງປະຊຸມໂດຍໄດ້ຍ້ອງຍໍ​ຊົມເຊີຍ​ຜົນງານ​ຮອບດ້ານຂອງໜ່ວຍທີ່​ຍາດມາໄດ້ໃນໄລຍະຜ່ານ​ມາ ເຊິ່ງໄດ້ຕີລາຄາຄວາມເອົາໃຈໃສ່ຂອງ​ຄະນະ​ໜ່ວຍ​ພັກ, ສະ ມາຊິກ​ພັກຂອງໜ່ວຍພັກກົມຄົ້ນຄວ້າ ແລະ ພົວພັນຫຼາຍຝ່າຍ ​ໃນ​ການ​ປະຕິບັດ​ພາລະ​ບົດບາດ, ໜ້າທີ່, ສິດ​ຄວາມຮັບຜິດ​ຊອບ​ຂອງ​ຄະນະ​ໜ່ວຍ​ພັກ, ເຮັດສຳເລັດໜ້າທີ່​ການເມືອງ​ທີ່ຖືກມອບ​ໝາຍ. ພ້ອມກັນນັ້ນ, ສະຫາຍຮອງເລຂາຄະນະພັກຄະນະພົວພັນຕ່າງປະເທດສູນກາງພັກ ກໍໄດ້ເນັ້ນ ໜັກໃຫ້ ຄະນະໜ່ວຍພັກຄົ້ນຄວ້າ ແລະ ພົວພັນຫຼາຍຝ່າຍ ຊຸດໃໝ່ ສືບຕໍ່ນໍາພາ-ຊີ້ນໍາ ວຽກງານຂອງກົມຄົ້ນຄວ້າ ແລະ ພົວພັນຫຼາຍຝ່າຍ ກໍຄືການເປັນເສນາທິການໃນວຽກງານຄົ້ນຄວ້າສະພາບການພົ້ນ ເດັ່ນໃນພາກພື້ນ ແລະ ສາກົນ ຕະຫຼອດຮອດການກຳນົດບັນດາຍຸດທະສາດ ການພົວພັນລະຫວ່າງພັກ ປປ ລາວ ກັບພັກ ຂອງຕ່າງປະເທດ ໃຫ້ມີຄວາມຊັດເຈນ, ຖືກຕ້ອງ ແລະ ນຳເອົາຜົນປະໂຫຍດຕົວຈິງມາໃຫ້ແກ່ປະເທດຊາດ; ຮັບປະກັນໃຫ້ການພົວພັນດ້ານພັກຂອງພວກເຮົາ ນັບມື້ຫຼາຍຂຶ້ນ ເພື່ອຍາດແຍ່ງການຊ່ວຍເຫຼືອ, ຄວາມເຫັນອົກເຫັນໃຈ ຂອງຕ່າງປະເທດໃນເວລທີສາກົນຫຼາຍຂຶ້ນ; ເອົາໃຈໃສ່ ໃກ້ຊິດຕິດແທດພະນັກງານ, ສ້າງພະນັກງານສືບທອດ ປ່ຽນແທນ ພາຍໃນກົມ ເພື່ອຮັບປະກັນໂຄງສ້າງຂອງກົມ ໃຫ້ຄົບຊຸດ ເປັນພື້ນຖານໃນການນໍາພາການປະຕິບັດວຽກງານໃຫ້ສໍາເລັດຕາມຄາດໝາຍທີ່ວາງໄວ້; ຮຽກຮ້ອງໃຫ້ພະນັກງານ, ສະມາຊິກພັກໃນໜ່ວຍພັກກົມ ກຳໄດ້ແນວທາງການຕ່າງປະເທດຂອງພັກ-ລັດເຮົາ ແລະ ແຜນພັດທະນາເສດຖະກິດ-ສັງຄົມຂອງປະເທດໃນແຕ່ລະໄລຍະ, ຝຶກຝົນຍົກລະດັບດ້ານວິຊາສະເພາະ, ພາ ສາຕ່າງປະເທດ; ສືບຕໍ່ສ້າງໃຫ້ໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ.

---