ຄະນະຜູ້ແທນສະມາຄົມມິດຕະພາບ ກູບາ - ລາວ ແລະ ນັກສິລະປະຟ້ອນບາເລ່ ແຫ່ງຊາດກູບາ ມາຢ້ຽມຢາມ ແລະ ສະແດງສິລະປະຟ້ອນບາເລ່ ຢູ່ ສປປ ລາວ

ເຜີຍ​ແຜ່​ໂດຍ​: moderator ເວ​ລາ: 03/12/2024 11:14:40 ຈຳ​ນວນ​​ຢ້ຽມ​ຊົມ 125 ຄັ້ງ ​

        ຄະນະຜູ້ແທນສະມາຄົມ​ມິດຕະພາບ ກູບາ - ລາວ ແລະ ນັກສິລະປະ ຈໍານວນ 16 ສະຫາຍ, ນໍາໂດຍ ສະຫາຍ ນາງ ວຽງໄຊ ວານເດັດສ, ຮັກສາການປະທານສະມາຄົມມິດຕະພາບ ກູບາ - ລາວ, ຜູ້ອໍານວຍການຟ້ອນບາເລ່ ແຫ່ງຊາດກູບາ ພ້ອມດ້ວຍຄະນະ ມາຢ້ຽມຢາມ ສປປ ລາວ ແຕ່ວັນທີ 30 ພະຈິກ - 2 ທັນວາ 2024 ເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສ.ກູບາ ຄົບຮອບ 50 ປີ (04 /11/1974 – 04/11/2024).

      ໃນວັນທີ 1 ທັນວາ 2024, ຄະນະຜູ້ແທນສະມາຄົມມິດຕະພາບ ກູບາ-ລາວ ພ້ອມດ້ວຍຄະນະ ໄດ້ຢ້ຽມຂໍ່ານັບການນໍາຂັ້ນສູງ ຂອງພັກ, ລັດ ຂອງ ສປປ ລາວ ລວມມີ ສະຫາຍ ສຈ.ປອ. ຈະເລີນ ເຍຍປາວເຮີ, ກໍາມະການສູນກາງພັກ, ຮອງປະທານສະພາແຫ່ງຊາດ, ປະທານສະມາຄົມມິດຕະພາບລາວ-ກູບາ; ສະຫາຍ ນາງ ສວນສະຫວັນ ວິຍາເກດ, ກໍາມະການສູນກາງພັກ, ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແລະ ສະຫາຍ ບຸນເຫຼືອ ພັນດານຸວົງ, ຮັກສາການຫົວໜ້າຄະນະພົວພັນຕ່າງປະເທດສູນກາງພັກ. ບັນດາສະຫາຍການນໍາຂັ້ນສູງ ຂອງພັກ, ລັດລາວ ໄດ້ຕີໄດ້ຕີລາຄາສູງຕໍ່ການຢ້ຽມຢາມ ຂອງຄະນະຜູ້ແທນສະມາຄົມມິດຕະພາບ ກູບາ-ລາວ. ພ້ອມນັ້ນ, ຍັງໄດ້ຕີລາຄາສູງຕໍ່ສາຍພົວພັນ ແລະ ການຮ່ວມມືອັນເປັນມູນເຊື້ອລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ກູບາ ທີ່ສືບຕໍ່ໄດ້ຮັບການເສີມຂະຫຍາຍ ແລະ ເພີ່ມພູນຄູນສ້າງນັບມື້ກ້າວເຂົ້າສູ່ລວງເລິກ ແລະ ນໍາເອົາຜົນປະໂຫຍດມາສູ່ປະຊາຊົນສອງປະເທດ. ນອກນັ້ນ, ສອງຝ່າຍ ໄດ້ແຈ້ງສະພາບການອັນພົ້ນເດັ່ນ ຂອງ ສປປ ລາວ ກໍ່ຄືການເຄື່ອນໄຫວອັນພົ້ນເດັ່ນ ຂອງແຕ່ລະອົງການ ໃຫ້ຄະນະຜູ້ແທນຊາບ. ສ່ວນສະຫາຍ ນາງ ວຽງໄຊ ວານເດສ ໄດ້ສະແດງຄວາມຂອບໃຈຕໍ່ການຕ້ອນຮັບ ແລະ ອໍານວຍຄວາມສະດວກ ໃຫ້ແກ່ຄະນະຜູ້ແທນສະມາຄົມມິດຕະພາບ       ກູບາ-ລາວ.

      ໃນຕອນຄໍ່າ ຂອງວັນດຽວກັນ, ຄະນະຜູ້ແທນ ສ.ກູບາ ໄດ້ສະແດງສິລະປະຟ້ອນບາເລ່ ຢູ່ຫໍວັດທະນະທໍາແຫ່ງຊາດ ເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສ.ກູບາ; ໃນງານດັ່ງກ່າວ ນັກສະແດງໄດ້ສະແດງທັກສະການຟ້ອນບາເລ່ທີ່ເປັນເອກະລັກດີ, ມີຄວາມງົດງາມ ເຮັດໃຫ້ບັນຍາກາດໃນງານດັ່ງກ່າວມີຄວາມໝາຍ ແລະ ມີຜົນສໍາເລັດຢ່າງຈົບງາມ.  ພ້ອມນັັ້ນ, ໄດ້ມີພິທີປະດັບຫຼຽນໄຊມິດຕະພາບ ໃຫ້ແກ່ ສະຫາຍ ນາງ ວຽງໄຊ ວານເດັດສ, ເຊິ່ງເປັນຫຼຽນສູງສົ່ງ ຂອງ ລັດຖະບານແຫ່ງ ສປປ ລາວ ເພື່ອຊົມເຊີຍ ແລະ ຕອບແທນຄຸນງາມຄວາມດີ ທີ່ສະຫາຍໄດ້ປະກອບສ່ວນເສີມຂະຫາຍ ແລະ ເພີ່ມພູນຄູນສ້າງສາຍພົວພັນ ແລະ ການຮ່ວມມືອັນດີລະຫວ່າງ ສປປ ລາວ ແລະ ສ.ກູບາ.

        ການຢ້ຽມຢາມ ແລະ ສະແດງສິລະປະ ໃນຄັ້ງນີ້ ຂອງ ຄະນະຜູ້ແທນ ສ.ກູບາ ນອກຈາກເປັນການສະເຫຼີມສະ ຫຼອງວັນສ້າງຕັ້ງສາຍພົວພັນການທູດ ຍັງເປັນການເຄື່ອນໄຫວການທູດປະຊາຊົນ ກໍ່ຄືການແລກປ່ຽນສິລະປະ-ວັດທະ ນະທໍາ, ທັງເປັນການປະກອບສ່ວນເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນອັນເປັນມູນເຊື້ອ ແລະ ການຮ່ວມມືອັນດີງາມລະຫວ່າງ ສປປ ລາວ ແລະ ສ.ກູບາ.

       ນອກຈາກການເຮັດວຽກ ແລະ ສະແດງສິລະປະ ຄະນະຜູ້ແທນຍັງໄດ້ຢ້ຽມຊົມສະຖານທີ່ທອ່ງທ່ຽວປະຫວັດສາດວັດທະນະທໍາ ໃນນະຄອນຫຼວງວຽງຈັນ.

---