ທູດ ສສ ຫວຽດນາມ ແລະ ທູດ ສປ ຈີນ ປະຈໍາ ສປປ ລາວ ເຂົ້າອວຍພອນ ຫົວໜ້າ ຄຕພ ໃນໂອກາດຮັບໜ້າທີ່ໃໝ່”.

ເຜີຍ​ແຜ່​ໂດຍ​: moderator ເວ​ລາ: 20/11/2024 16:06:34 ຈຳ​ນວນ​​ຢ້ຽມ​ຊົມ 129 ຄັ້ງ ​

     ໃນຕອນບ່າຍວັນທີ 18 ພະຈິກ 2024, ທີ່ສຳນັກງານ ຄະນະພົວພັນຕ່າງປະເທດສູນກາງພັກ, ສະຫາຍ  ຫງວຽນ ມິງ ເຕິມ, ເອກອັກຄະລັດຖະທູດວິສາມັນຜູ້ມີອຳນາດເຕັມ ສສ ຫວຽດນາມ ປະຈຳ ສປປ ລາວ ໄດ້ເຂົ້າອວຍພອນ ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ທີ່ໄດ້ຮັບການແຕ່ງຕັ້ງເປັນ ລັດຖະມົນຕີກະຊວງການຕ່າງປະເທດຄົນໃໝ່ ໃນກອງປະຊຸມເທື່ອທີ 8 ຂອງ ສະພາແຫ່ງຊາດ ຊຸດທີ IX. ສະຫາຍທູດຫວຽດນາມ ໄດ້ສະແດງຄວາມປິຕິຍິນດີ ຕໍ່ໜ້າທີ່ໃໝ່ ຂອງ ສະຫາຍ ທອງສະຫວັນ ພົມວິຫານ, ພ້ອມທັງໄດ້ນໍາເອົາຄວາມຊົມເຊີຍ ຂອງ ສະຫາຍ ເລຮວາຍຈຸງ, ເລຂາທິການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ແລະ ສະຫາຍ ບຸຍແທງເຊິນ, ກໍາມະການສູນກາງພັກ, ລັດຖະມົນຕີກະຊວງການຕ່າງປະເທດ ສສ ຫວຽດນາມ ມາຍັງ ສະຫາຍ ທອງສະຫວັນ ພົມວິຫານ, ເຊິ່ງເປັນການສະແດງໃຫ້ເຫັນເຖິງຄວາມໄວ້ເນື້ອເຊື່ອໃຈສູງຈາກ ພັກ ແລະ ລັດຖະບານລາວ ຕໍ່ການປະກອບສ່ວນຂອງສະຫາຍ.

      ສະຫາຍ ທອງສະຫວັນ ພົມວິຫານ ໄດ້ສະແດງຄວາມຂອບໃຈ ຕໍ່ ຄຳອວຍພອນຂອງຝ່າຍຫວຽດນາມ ກໍ່ຄື ການສະໜັບສະໜູນ, ຮ່ວມມື ຢ່າງໃກ້ຊິດໃນຕະຫຼອດໄລຍະການປະຕິບັດໜ້າທີ່ວຽກງານທີ່ຜ່ານມາ, ເຖິງວ່າຈະຍົກຍ້າຍໄປຮັບໜ້າທີ່ໃໝ່ ກໍ່ຍັງຈະສືບຕໍ່ຮ່ວມກັບບັນດາສະຫາຍຫວຽດນາມ ສືບຕໍ່ເສີມຂະຫຍາຍສາຍພົວພັນ ລາວ-ຫວຽດນາມ ໃຫ້ກ້າວເຂົ້າສູ່ລວງເລິກ.

      ໃນໂອກາດດຽວກັນ, ສະຫາຍ ນາງ ຟາງ ຫົງ, ເອກອັກຄະລັດຖະທູດຜູ້ມີອໍານາດເຕັມ ແຫ່ງ ສປ ຈີນ ປະຈໍາ ສປປ ລາວ ກໍ່ໄດ້ເຂົ້າອວຍພອນ ສະຫາຍ ທອງສະຫວັນ ພົມວິຫານ ໃນຕອນເຊົ້າວັນທີ 19 ພະຈິກ 2024, ຝ່າຍຈີນ ໄດ້ນໍາເອົາຄວາມຊົມເຊີຍ ຈາກ ສະຫາຍລັດຖະມົນຕີກະຊວງການຕ່າງປະເທດ ສປ ຈີນ ມາຍັງ ສະຫາຍລັດຖະມົນຕີກະຊວງການຕ່າງປະເທດ ສປປ ລາວ ຄົນໃໝ່, ໄດ້ຕີລາຄາສູງ ຕໍ່ຜົນງານ ແລະ ການປະກອບສ່ວນຂອງ ສະຫາຍ ທອງສະຫວັນ ພົມວິຫານ ຕໍ່ການພົວພັນຮ່ວມມື ຈີນ-ລາວ ໃນໄລຍະຜ່ານມາ, ເຊິ່ງຝ່າຍລາວ ກໍ່ໄດ້ຂອບໃຈ ຕໍ່ຄໍາອວຍພອນອັນຈິງຈິງຂອງຝ່າຍຈີນ. ສອງຝ່າຍ ຕ່າງກໍ່ໄດ້ສະແດງຄວາມໝາຍໝັ້ນ ຈະສືບຕໍ່ປະສານສົມທົບກັນຈັດຕັ້ງປະຕິບັດ ຄໍາເຫັນສໍາຄັນທີ່ເຫັນດີເປັນເອກະພາບກັນ ລະຫວ່າງ ການນໍາສູງສຸດ ສອງພັກ, ສອງລັດ ລາວ-ຈີນ, ຈີນ-ລາວ ໃນການເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອ ແລະ ການສ້າງຄູ່ຮ່ວມຊາຕາກໍາ ລາວ-ຈີນ ໃຫ້ມີມາດຕະຖານສູງ, ຄຸນນະພາບສູງ ແລະ ລະດັບສູງກວ່າເກົ່າ.

 

---