ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ຢ້ຽມຢາມ-ເຮັດວຽກຢູ່ ສປ ຈີນ

ເຜີຍ​ແຜ່​ໂດຍ​: moderator ເວ​ລາ: 14/11/2024 08:59:40 ຈຳ​ນວນ​​ຢ້ຽມ​ຊົມ 142 ຄັ້ງ ​

      ໂດຍປະຕິບັດຕາມແຜນການຮ່ວມມືປະຈໍາປີ ລະຫວ່າງ ຄະນະພົວພັນຕ່າງປະເທດສູນກາງພັກ ປປ ລາວ ແລະ ຄະນະພົວພັນຕ່າງປະເທດສູນກາງພັກກອມມູນິດຈີນ, ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ໄດ້ນໍາພາຄະນະ ເດີນທາງໄປຢ້ຽມຢາມ ແລະ ເຮັດວຽກ ຢູ່ ນະຄອນຫຼວງປັກກິ່ງ, ສປ ຈີນ ແຕ່ວັນທີ 11-13 ພະຈິກ 2024 ເພື່ອຮ່ວມກັນກັບຝ່າຍຈີນ ປຶກສາຫາລື-ແລກປ່ຽນຄໍາຄິດເຫັນ ກ່ຽວກັບ ທິດທາງການພົວພັນຮ່ວມມື ລະຫວ່າງ ສອງພັກ, ສອງລັດ ແລະ 2 ຄະນະພົວພັນຕ່າງປະເທດສູນກາງພັກ ລາວ-ຈີນ ໃນຕໍ່ໜ້າ.

          ໃນໄລຍະຢ້ຽມຢາມ, ສະຫາຍ ທອງສະຫວັນ ໄດ້ເຂົ້າຢ້ຽມຂໍ່ານັບ ການນໍາຂັ້ນສູງ ຂອງ ພັກກອມມູນິດຈີນ ແລະ ໄດ້ພົບປະເຮັດວຽກກັບ ການນໍາຄະນະພົວພັນຕ່າງປະເທດສູນກາງພັກກອມມູນິດຈີນ. ໃນການພົບປະ ຝ່າຍລາວ ໄດ້ແຈ້ງຈຸດປະສົງຂອງການຢ້ຽມຢາມ ແລະ ຕີລາຄາສູງ ຕໍ່ການນໍາຂັ້ນສູງ ພັກກອມມູນິດຈີນ ທີ່ໄດ້ໃຫ້ກຽດຕ້ອນຮັບຄະນະຜູ້ແທນ ຄະນະພົວພັນຕ່າງປະເທດສູນກາງພັກ ປປ ລາວ; ນໍາເອົາຄວາມຢ້ຽມຢາມຖາມຂ່າວ ຈາກການນໍາຂັ້ນສູງຂອງລາວ ມາຍັງການນໍາຂັ້ນສູງຂອງ ພັກ-ລັດຈີນ ແລະ ສະແດງຄວາມຊົມເຊີຍ ຕໍ່ບັນດາຜົນສໍາເລັດອັນໃຫຍ່ຫຼວງ ຮອບດ້ານ ທີ່ປະຊາຊົນຈີນອ້າຍນ້ອງ ຍາດໄດ້ໃນຕະຫຼອດໄລຍະຜ່ານມາ ໃນການສ້າງສາປະເທດສັງຄົມນິຍົມທີ່ມີສີສັນພິເສດຂອງຈີນ ພາຍໃຕ້ການນໍາພາອັນຖືກຕ້ອງ ຂອງ ພັກກອມມູນິດຈີນ ທີ່ຖື ສະຫາຍເລຂາທິການໃຫຍ່ ສີ ຈິ້ນຜິງ ເປັນແກນກາງ. ສະຫາຍ ທອງສະຫວັນ ຍັງໄດ້ແຈ້ງໃຫ້ຊາບ ກ່ຽວກັບ ສະພາບການພົ້ນເດັ່ນພາຍໃນ ພັກ, ສປປ ລາວ ແລະ ສະພາບລວມ ການພົວພັນຮ່ວມມືສອງຝ່າຍ ກໍ່ຄື ການຈັດຕັ້ງປະຕິບັດແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ  ສະບັບໃໝ່ ໃນໄລຍະຜ່ານມາ.

         ຝ່າຍຈີນ ໄດ້ຕີລາຄາສູງຕໍ່ການນໍາພາອັນໜັກແໜ້ນ ຂອງ ພັກ ປປ ລາວ ທີ່ໄດ້ນໍາພາປະຊາຊົນລາວບັນດາເຜົ່າ ຍາດໄດ້ຜົນສຳເລັດໃນການປົກປັກຮັກສາ ແລະ ສ້າງສາພັດທະນາປະເທດຊາດ ຕະຫຼອດໄລຍະຜ່ານມາ, ໂດຍສະເພາະແມ່ນ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ໄລຍະທ້າຍສະໄໝ ຂອງພັກ ປປ ລາວ, ຊົມເຊີຍຜົນສໍາເລັດ ຂອງການດໍາເນີນກອງປະຊຸມຄົບຄະນະ ເທື່ອທີ 9 ສະໄໝທີ XI ຂອງພັກ ປປ ລາວ ແລະ ການເປັນປະທານກອງປະຊຸມສຸດຍອດອາຊຽນ ຄັ້ງທີ 44 ແລະ 45 ຂອງ ສປປ ລາວ; ຕີລາຄາສູງ ຕໍ່ການພົວພັນຮ່ວມມື ສອງພັກ, ສອງລັດ ແລະ ປະຊາຊົນສອງຊາດ ຈີນ-ລາວ ທີ່ພວມຢູ່ໃນໄລຍະດີທີ່ສຸດໃນປະຫວັດສາດການພົວພັນຂອງສອງຝ່າຍ, ເຊື່ອໝັ້ນວ່າ ພາຍໃຕ້ການນໍາພາຊີ້ນໍາ ຂອງ ການນໍາສູງສຸດ ສອງພັກ, ສອງລັດ ຈີນ-ລາວ, ການພົວພັນຮ່ວມມືສອງຝ່າຍ ກໍ່ຄື ການສ້າງຄູ່ຮ່ວມຊາຕາກໍາ ຈີນ-ລາວ ຈະສືບຕໍ່ໄດ້ຮັບການເສີມຂະຫຍາຍຢ່າງຮອບດ້ານ ແລະ ນໍາເອົາຜົນປະໂຫຍດຕົວຈິງມາສູ່ ປະຊາຊົນສອງຊາດນັບມື້ນັບຫຼາຍຂຶ້ນກວ່າເກົ່າ; ໄດ້ສະແດງຄວາມຊົມເຊີຍ ຕໍ່ການປະສານສົມທົບ ແລະ ໄປມາຫາສູ່ກັນ ລະຫວ່າງ 2 ຄະນະພົວພັນຕ່າງປະເທດສູນກາງພັກ ຈີນ-ລາວ, ເຊິ່ງເປັນການປະກອບສ່ວນສຳຄັນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອ ຈີນ-ລາວ ກໍ່ຄື ການຈັດຕັ້ງປະຕິບັດແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກໍາ ຈີນ-ລາວ ໃຫ້ນັບມື້ມີປະສິດທິຜົນສູງ, ຄຸນນະພາບສູງ ແລະ ລະດັບສູງກວ່າເກົ່າ.

       ໃນຂອບການພົວພັນຮ່ວມມື ລະຫວ່າງ ສອງຄະນະພົວພັນຕ່າງປະເທດສູນກາງພັກ, ສອງຝ່າຍ ໄດ້ຮ່ວມກັນຕີລາຄາຄືນ ສະພາບລວມການພົວພັນຮ່ວມມື ລະຫວ່າງ ສອງພັກ, ສອງ ຄະນະພົວພັນຕ່າງປະເທດສູນກາງພັກ ລາວ-ຈີນ ໃນປີ 2024; ປຶກສາຫາລື ແລະ ເຫັນດີເປັນເອກະພາບກັນຫຼາຍບັນຫາ ກ່ຽວກັບ ທິດທາງການຮ່ວມມືສອງຝ່າຍ ໃນຕໍ່ໜ້າ, ໂດຍສະເພາະແມ່ນ ທິດທາງໃນການຮ່ວມກັນຕິດຕາມຊຸກຍູ້ ການຈັດຕັ້ງປະຕິບັດ ແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ແລະ ບັນດາແຜນການຮ່ວມມື ສອງພັກ ລາວ-ຈີນ ໃນປີ 2025 ກໍ່ຄື ໃນຕໍ່ໜ້າ. ນອກຈາກການພົວພັນສອງຝ່າຍແລ້ວ ຍັງໄດ້ມີການແລກປ່ຽນສະພາບການພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈ.

       ໃນໄລຍະຢູ່ຢ້ຽມຢາມ, ສະຫາຍ ທອງສະຫວັນ ພົມວິຫານ ພ້ອມດ້ວຍຄະນະ ຍັງໄດ້ເຂົ້າຮ່ວມກອງປະຊຸມແລກປ່ຽນຄໍາຄິດເຫັນກັບ ຄະນະກໍາມະການຄຸ້ມຄອງຊັບສິນຂອງລັດ ສປ ຈີນ, ບັນດາວິສາຫະກິດຈີນ ທີ່ລົງທຶນຢູ່ ສປປ ລາວ ແລະ ໄດ້ທັດສະນະສຶກສາຖອດຖອນບົດຮຽນ ການກໍ່ສ້າງຮາກຖານພັກ ຢູ່ໃນນະຄອນຫຼວງປັກກິ່ງ. ໃນໂອກາດດັ່ງກ່າວ, ສະຫາຍ ສົມພອນ ສີຈະເລີນ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສປ ຈີນ ກໍ່ໄດ້ຕິດຕາມຄະນະ ແລະ ຮ່ວມເຄື່ອນໄຫວນໍາ ຢ່າງມີຜົນສໍາເລັດ.

---