ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບການເຂົ້າຢ້ຽມຂໍ່ານັບຂອງ ຫົວໜ້າກໍາມາທິການແຫ່ງລັດດ້ານການທ່ອງທ່ຽວ ແຫ່ງ ສາທາລະນະລັດ ຕາຕາສະຖານ, ສະຫະພັນຣັດເຊຍ.

ເຜີຍ​ແຜ່​ໂດຍ​: moderator ເວ​ລາ: 06/11/2024 16:28:21 ຈຳ​ນວນ​​ຢ້ຽມ​ຊົມ 152 ຄັ້ງ ​

ໃນວັນ​ທີ 05 ພະຈິກ 2024, ຢູ່ສໍານັກງານຄະນະພົວພັນຕ່າງປະເທດສູນກາງພັກ, ທ່ານ ທອງສະຫວັນ ພົມວິຫານ, ກໍາມະການສູນກາງພັກ, ຫົວ​ໜ້າ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ​ໄດ້​ຕ້ອນຮັບການເຂົ້າຢ້ຽມຂໍ່ານັບຂອງ ຄະນະຜູ້ແທນດ້ານການທ່ອງທ່ຽວ ຂອງ ສາທາລະນະລັດ ຕາຕາສະຖານ, ສະຫະພັນຣັດເຊຍ ນໍາໂດຍ​ ທ່ານ ເຊີເກ ອີວານົບ, ຫົວໜ້າກໍາມາທິການແຫ່ງລັດດ້ານການທ່ອງທ່ຽວ ແຫ່ງ ສາທາລະນະລັດ ຕາຕາສະຖານ, ສະຫະພັນຣັດເຊຍ.

 

      ທ່ານ ທອງສະຫວັນ ພົມວິຫານ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ ການຢ້ຽມຢາມລາວຂອງຄະນະຜູ້ແທນໃນຄັ້ງນີ້ ທີ່ໄດ້ເຄື່ອນໄຫວຢ່າງຫ້າວຫັນໃນການເສີມຂະຫຍາຍການຮ່ວມມືດ້ານການທ່ອງທ່ຽວ ລະຫວ່າງ ສາທາລະນະລັດ ຕາຕາສະຖານ ກໍຄື ສະຫະພັນຣັດເຊຍ ກັບ ສາທາລະນະລັດ ປະຊາທິປະໄຕ ປະຊາຊົນລາວ ໃຫ້ແໜ້ນແຟ້ນ ແລະ ມີໝາກຜົນຍິ່ງໆຂຶ້ນ, ໂດຍໄດ້ມີການລົງນາມສັນຍາຮ່ວມມືດ້ານການທ່ອງທ່ຽວນໍາກັນ ລະຫວ່າງ ບໍລິສັດທ່ອງທ່ຽວພັດທະນາຈໍາປາໃໝ່ ຂອງລາວ ແລະ ກຸ່ມບໍລິສັດທ່ອງທ່ຽວຂອງ ຕາຕາສະຖານ. ຄຽງຄູ່ກັນນີ້, ທ່ານ ທອງສະຫວັນ ຍັງໄດ້ແຈ້ງໃຫ້ຊາບກ່ຽວກັບ ພາລະບົດບາດຂອງ ຄະນະພົວພັນຕ່າງປະເທດສູນກາງພັກ ໂດຍສະເພາະການປະກອບສ່ວນຊຸກຍູ້ສາຍພົວພັນຮ່ວມມືລະຫວ່າງປະເທດ ທາງສາຍພັກ, ສາຍລັດ ແລະ ວຽກງານການທູດປະຊາຊົນ, ພ້ອມທັງໄດ້ຕີລາຄາການພົວພັນຮ່ວມມື ລາວ-ຣັດເຊຍ ໃນໄລຍະຜ່ານມາ ກໍຄື ໃນໄລຍະໃໝ່ ໂດຍສະເພາະສົ່ງເສີມການຮ່ວມມືດ້ານເສດຖະກິດ, ການຄ້າ, ການລົງທຶນ, ພະລັງງານ, ການສຶກສາ, ວິທະຍາສາດ-ເຕັກນິກ, ການທ່ອງທ່ຽວ ແລະ ອື່ນໆ ຊຶ່ງໄດ້ຍົກໃຫ້ເຫັນວ່າ ໃນປີ 2023 ຜ່ານມາ ມີນັກທ່ອງທ່ຽວຣັດເຊຍ ເຂົ້າມາລາວເຫັນວ່າຍັງບໍ່ທັນຫຼາຍ ຖ້າທຽບໃສ່ປະເທດອື່ນ, ເຫັນຄວນສືບຕໍ່ຊຸກຍູ້ວຽກງານດັ່ງກ່າວໃຫ້ມີທ່າອ່ຽງເພີ່ມຂຶ້ນໃນອະນາຄົດ ພ້ອມທັງຄົ້ນຄວ້າເປີດຖ້ຽວບິນກົງ ລະຫວ່າງ ລາວ-ຣັດເຊຍ ຄືນໃໝ່. ຫົວໜ້າຄະນະພົວພັນ ຍັງໄດ້ຖືໂອກາດນີ້ ເຊື້ອເຊີນ ແລະ ຍິນດີຕ້ອນຮັບ ນັກທ່ອງທ່ຽວຈາກ ສ.ຣັດເຊຍ ກໍຄືຈາກ ສາທາລະນະລັດ ຕາຕາສະຖານ ເຂົ້າມາທ່ອງທ່ຽວລາວ ໃຫ້ຫຼາຍຂຶ້ນ.

     ທ່ານ ເຊີເກ ອີວານົບ ໄດ້ສະແດງຄວາມຂອບໃຈຕໍ່ ການຕ້ອນຮັບອັນອົບອຸ່ນ ຂອງ ຫົວໜ້າຄະນະພົວພັນຕ່າງປະເທດສູນກາງພັກ, ຊຶ່ງເປັນການຢ້ຽມຢາມລາວ ຄັ້ງທໍາອິດ ແລະ ເຫັນດີເປັນເອກະພາບຕໍ່ ການຕີລາຄາການຮ່ວມມື ລະຫວ່າງ ສອງປະເທດ ລາວ-ຣັດເຊຍ ທີ່ໄດ້ຮັບການເສີມຂະຫຍາຍຢ່າງຮອບດ້ານ, ໃນນັ້ນ ກໍມີດ້ານການທ່ອງທ່ຽວ. ພ້ອມກັນນີ້, ທ່ານ ອີວານົບ ຍັງໄດ້ກ່າວວ່າ, ສປປ ລາວ ເປັນປະເທດທີ່ມີທ່າແຮງບົ່ມຊ້ອນຫຼາຍດ້ານ ແລະ ມີແຫຼ່ງທ່ອງທ່ຽວທາງປະຫວັດສາດ-ທໍາມະຊາດອັນສວຍສົດງົດງາມ ທີ່ດຶງດູດນັກທ່ອງທ່ຽວຈາກທົ່ວທຸກມຸມໂລກ ແລະ ເຊື່ອໝັ້ນວ່າ ການທ່ອງທ່ຽວລາວ ຈະເຕີບໃຫຍ່ຂະຫຍາຍຕົວ ແລະ ພັດທະນາຍິ່ງໆຂຶ້ນໃນຕໍ່ໜ້າ ພ້ອມທັງສະແດງຄວາມຍິນດີຄົ້ນຄວ້າທ່າແຮງການຮ່ວມມືລະຫວ່າງ ລັດຕາຕາສະຖານ ກັບ ສປປ ລາວ ໃນດ້ານອື່ນໆຕື່ມອີກ.

      ໃນຕອນທ້າຍຂອງການພົບປະ, ຫົວໜ້າຄະນະພົວພັນຕ່າງປະເທດ ໄດ້ອວຍພອນໃຫ້ ທ່ານ ເຊີເກ ອີວານົບ, ຫົວໜ້າກໍາມາທິການແຫ່ງລັດດ້ານການທ່ອງທ່ຽວ ແຫ່ງ ສາທາລະນະລັດ ຕາຕາສະຖານ, ສະຫະພັນຣັດເຊຍ ພ້ອມຄະນະ ຈົ່ງປະສົບຜົນສໍາເລັດໃນການເຄື່ອນໄຫວຢ້ຽມຢາມ ສປປ ລາວ ໃນຄັ້ງນີ້ ແລະ ເດີນທາງກັບຄືນປະເທດດ້ວຍຄວາມສະຫວັດດີພາບ.

---