ສະຫາຍຮອງຫົວໜ້າ ຄຕພ ພ້ອມດ້ວຍຄະນະ ເຂົ້າຮ່ວມພິທີວາງພວງມາລາ ແລະ ຂຽນປຶ້ມໄຫວ້ອາໄລ ສະຫາຍເລຂາທິການໃຫຍ່ຄະນະບໍລິຫານງານສູນກາງ ພັກກອມມູນິດຫວຽດນາມ

ເຜີຍ​ແຜ່​ໂດຍ​: moderator ເວ​ລາ: 29/07/2024 15:01:41 ຈຳ​ນວນ​​ຢ້ຽມ​ຊົມ 224 ຄັ້ງ ​

      ໃນວັນທີ 25 ກໍລະກົດ 2024, ສະຫາຍ ວາລະໄຊ ເລັ່ງສະຫວັດ, ຮອງຫົວໜ້າຄະນະພົວພັນຕ່າງປະເທດສູນກາງພັກ ພ້ອມດ້ວຍຄະນະ ໄດ້ໄປວາງພວງມາລາ ແລະ ຂຽນປື້ມໄຫວ້ອາໄລເຖິງ ດວງວິນຍານ ສະຫາຍ ຫງວຽນ ຟູ ຈ້ອງ, ເລຂາທິ ການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ ຢູ່ ສະຖານເອກອັກຄະລັດຖະທູດ ຫວຽດນາມ ທີ່ນະຄອນຫຼວງວຽງຈັນ, ເຊິ່ງເນື້ອໃນປື້ມໄຫວ້ອາໄລ ມີເນື້ອໃນຂຽນວ່າ: ຄະນະພັກ, ຄະນະນໍາ ແລະ ອ້າຍນ້ອງພະນັກງານ ຄະ ນະພົວພັນຕ່າງປະເທດສູນກາງພັກ ປະຊາຊົນ ປະຕິວັດລາວ ມີຄວາມໂສກເສົ້າເສຍດາຍເປັນຢ່າງຍິ່ງ ຕໍ່ການຈາກໄປຂອງ ສະຫາຍ ຫງວຽນ ຟູ ຈ້ອງ, ເລຂາທິການໃຫຍ່ ຄະນະບໍລິຫານງານສູນກາງ ພັກກອມ ມູນິດຫວຽດນາມ,  ເຊິ່ງເປັນການສູນເສຍ ນັກປະຕິວັດຜູ້ກ້າແກ່ນ, ຜູ້ນໍາທີ່ເຄົາລົບຮັກ ຂອງ ພັກ, ລັດ ແລະ ປະຊາຊົນຫວຽດນາມ ເປັນການສູນເສຍ ເພື່ອນມິດ ສະຫາຍ ທີ່ສະໜິດສະໜົມ ແລະ ໃກ້ຊິດທີ່ສຸດ ຂອງ ພັກ, ລັດ ແລະ ປະຊາຊົນລາວ.

        ສະຫາຍ ຫງວຽນ ຟູ ຈ້ອງ ເປັນຜູ້ໜຶ່ງ ທີ່ມີການປະກອບສ່ວນຢ່າງໃຫຍ່ຫຼວງ ເຂົ້າໃນພາລະກິດສ້າງສາພັດທະນາ ແລະ ປົກປັກຮັກສາປະເທດຫວຽດນາມ, ປະກອບສ່ວນສໍາຄັນເຂົ້າໃນການເສີມຂະ ຫຍາຍ ແລະ ເພີ່ມພູນຄູນສ້າງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຫວຽດນາມ-ລາວ

        ໃນເວລາອັນໂສກເສົ້າອາໄລຢ່າງສຸດຊຶ່ງນີ້, ພວກຂ້າພະເຈົ້າ ຂໍສະແດງຄວາມອາໄລອາວອນຢ່າງສຸດຊຶ່ງ ແລະ ຂໍແປງເບົາຄວາມທຸກໂສກ ມາຍັງ ພັກ, ລັດ ແລະ ປະຊາຊົນຫວຽດນາມ ກໍ່ຄື ຄອບຄົວ, ຍາດຕິພີ່ນ້ອງ ຂອງ ສະຫາຍ   ຫງວຽນ ຟູ ຈ້ອງ ມານະໂອກາດນີ້ດ້ວຍ.

ຂໍໃຫ້ດວງວິນຍານຂອງ ສະຫາຍ ຫງວຽນ ຟູ ຈ້ອງ ຈົ່ງໄປສູ່ສູ່ຂະຕິເຖີ້ນ.

---