ຄະນະຜູ້ແທນ ຄະນະພົວພັນຕ່າງປະເທດສູນກາງພັກປະຊາຊົນ ປະຕິວັດລາວ ຢ້ຽມຢາມ ແລະ ເຮັດວຽກຢູ່ ສສ ຫວຽດນາມ

ເຜີຍ​ແຜ່​ໂດຍ​: moderator ເວ​ລາ: 23/07/2024 10:46:37 ຈຳ​ນວນ​​ຢ້ຽມ​ຊົມ 253 ຄັ້ງ ​

            ຄະນະຜູ້ແທນ ຄະນະພົວພັນຕ່າງປະເທດສູນກາງພັກປະຊາຊົນ ປະຕິວັດລາວ ນໍາໂດຍ ສະຫາຍ ວາລະໄຊ ເລັ່ງສະຫວັດ, ຮອງຫົວໜ້າ ຄະນະພົວພັນຕ່າງປະເທດສູນກາງພັກປະຊາຊົນ ປະຕິວັດລາວ ໄດ້ຢ້ຽມຢາມ ແລະ ເຮັດວຽກຢູ່ ສສ ຫວຽດນາມ ແຕ່ວັນທີ 15 – 17/7/2024. ໂອກາດນີ້, ໃນວັນທີ 16/7, ທີ່ນະຄອນຫຼວງຮ່າໂນ້ຍ ສະຫາຍ ວາລະໄຊ ເລັ່ງສະຫວັດ, ຮອງຫົວໜ້າ ຄະນະພົວພັນຕ່າງປະເທດສູນກາງພັກປະຊາຊົນ ປະຕິວັດລາວ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ສະຫາຍ ເລ ຮວາຍ ຈູງ, ເລຂາທິການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຫວຽດນາມ, ໃນການຢ້ຽມຂໍ່ານັບ, ສະຫາຍ ວາລະໄຊ ເລັ່ງສະຫວັດ ໄດ້ສະແດງຄວາມປິຕິຊົມຊື່ນ ແລະ ເປັນກຽດຢ່າງສູງ ທີ່ໄດ້ນໍາພາຄະນະມາຢ້ຽມຢາມ ແລະ ເຮັດວຽກຢູ່ ສສ ຫວຽດນາມ ຢ່າງເປັນທາງການ ໃນນາມ ຮອງຫົວໜ້າຄະນະພົວພັນຕ່າງປະເທດສູນກາງພັກ, ສະແດງຄວາມຂອບໃຈ ສະຫາຍ ເລ ຮວາຍ ຈູງ ທີ່ໄດ້ໃຫ້ການຕ້ອນຮັບຢ່າງອົບອຸ່ນຕໍ່ຄະນະ; ຊົມເຊີຍບັນດາຜົນສໍາເລັດອັນສຳຄັນທີ່ ສສ ຫວຽດນາມ ຍາດມາໄດ້ ຕະຫຼອດໄລຍະຜ່ານມາ ແລະ ເຊື່ອໝັ້ນວ່າ ພາຍໃຕ້ການນໍາພາຂອງ ພັກກອມມູນິດຫວຽດນາມ, ປະຊາຊົນ ຫວຽດນາມ ຈະສາມາດສືບຕໍ່ຍາດໄດ້ ຜົນສໍາເລັດອັນ    ໃໝ່, ໃຫຍ່ຫຼວງກວ່າເກົ່າ ໃນພາລະກິດປ່ຽນແປງໃໝ່, ຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ XIII ຂອງພັກ; ຢືນຢັນວ່າ ສາຍພົວພັນສາມັກຄີພິເສດ ລາວ-ຫວຽດນາມ ສືບຕໍ່ນັບມື້ພັດທະນາຢ່າງເລິກເຊິ່ງ ທັງທາງກວ້າງ ແລະ ທາງເລິກ ໃນທຸກຂົງເຂດ, ພ້ອມທັງໄດ້ລາຍງານບັນດາຜົນສໍາເລັດໃນການປະສານສົມທົບຈັດຕັ້ງຜັນຂະຫຍາຍ ບັນດາຂໍ້ຕົກລົງລະຫວ່າງ ການນໍາຂັ້ນສູງຂອງສອງພັກ, ສອງລັດ; ໃນນັ້ນມີ ການແລກປ່ຽນຄະນະຜູ້ແທນການນໍາຂັ້ນສູງ ສອງພັກ, ສອງລັດ, ໂດຍສະເພາະແມ່ນ ການຢ້ຽມຢາມລັດຖະກິດ ສປປ ລາວ ຂອງ ສະຫາຍ ໂຕ ເລີມ, ປະທານປະເທດ ສສ ຫວຽດນາມ ໃນບໍ່ດົນຜ່ານມາ; ສະແດງຄວາມຂອບອົກຂອບໃຈຕໍ່ ພັກ, ລັດຖະບານ ສສ ຫວຽດນາມ ທີ່ໄດ້ໃຫ້ການສະ  ໜັບສະໜູນ, ຊ່ວຍເຫຼືອ ອັນໃຫຍ່ຫຼວງ, ລໍ້າຄ່າ ແກ່ ສປປ ລາວ ໃນເມື່ອກ່ອນ ກໍ່ຄືໃນປະຈຸບັນ, ພ້ອມນັ້ນ ກໍ່ໄດ້ແຈ້ງກ່ຽວກັບ ສະພາບພົ້ນເດັ່ນຂອງ ສປປ ລາວ ໃນໄລຍະຜ່ານມາ, ຜົນສໍາເລັດຂອງການພົບປະເຮັດວຽກສອງຝ່າຍ ແລະ ການພົວພັນຮ່ວມມືລະຫວ່າງ ສອງຄະນະພົວພັນຕ່າງປະເທດສູນກາງພັກ ລາວ-ຫວຽດນາມ.

       ສະຫາຍ ເລ ຮວາຍ ຈູງ ໄດ້ສະແດງຄວາມຊົມເຊີຍຕໍ່ການຢ້ຽມຢາມ ຂອງຄະນະໃນຄັ້ງນີ້ ເຊິ່ງມີຂຶ້ນໃນບັນຍາກາດທີ່ ການພົວພັນຮ່ວມມືລະຫວ່າງ ສອງພັກສອງລັດ ພວມສືບຕໍ່ຮັກສາລະດັບການພັດທະນາການທີ່ດີ  ແລະ ຕີລາຄາສູງຕໍ່ການນໍາພາຂອງ ພັກ, ລັດຖະບານລາວ, ຄວາມສາມັກຄີເປັນເອກະພາບຂອງທົ່ວທັງລະບົບການເມືອງ, ຄວາມເປັນຈິດໜຶ່ງໃຈດຽວຂອງປະຊາຊົນລາວທົ່ວທັງຊາດ ໃນການອອກແຮງພັດທະນາ ເສດຖະກິດ - ສັງຄົມ, ຜົນສໍາເລັດຂອງວຽກງານ ປ້ອງກັນຊາດ, ປ້ອງກັນຄວາມສະຫງົບ, ການພົວພັນຕ່າງປະເທດ, ກໍ່ສ້າງພັກ ແລະ ອື່ນໆທີ່ຍາດມາໄດ້ໃນໄລຍະຜ່ານມາ; ເຊື່ອໝັ້ນວ່າ ພາຍໃຕ້ການນໍາພາຂອງ ພັກປະຊາຊົນ ປະຕິວັດລາວ, ປະຊາຊົນລາວ ຈະສືບຕໍ່ຍາດໄດ້ຜົນສໍາເລັດອັນໃໝ່, ໃຫຍ່ຫຼວງກວ່າເກົ່າ, ຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ XI ຂອງພັກ ໄດ້ຢ່າງມີໄຊ, ກະກຽມດໍາເນີນກອງປະຊຸມ 3 ຂັ້ນຂອງພັກ ເພື່ອກະກຽມດໍາເນີນ ກອງປະຊຸມໃຫຍ່ ຄັ້ງທີ XII ຂອງພັກ, ເຮັດສໍາເລັດບົດບາດ, ໜ້າທີ່ ປະທານມູນວຽນ ASEAN ແລະ AIPA ໃນປີ 2024; ພ້ອມນັ້ນ, ສະຫາຍຍັງໄດ້ເນັ້ນໜັກເຖິງ ມູນເຊື້ອ ແລະ ຄວາມໝາຍສໍາຄັນຂອງ ຄວາມສາມັກຄີພິເສດ ຫວຽດນາມ-ລາວ ກໍ່ຄືການພົວພັນລະຫວ່າງ ຫວຽດນາມ-ລາວ-ກໍາປູເຈຍ; ຢືນຢັນວ່າ ຫວຽດນາມ ຈະເຮັດສຸດຄວາມສາມດຂອງຕົນ ຮ່ວມກັບຝ່າຍລາວ ປົກປັກຮັກສາ ແລະ ເພີມພູນຄູນສ້າງສາຍພົວພັນສາມັກຄີພິເສດ ຫວຽດນາມ-ລາວ ໃຫ້ນັບມື້ພັດທະນາ, ປະກອບສ່ວນເຂົ້າໃນການຮັກສາ ສະຖຽນລະພາບທາງດ້ານການເມືອງ ແລະ ພັດທະນາ ເສດຖະກິດ - ສັງຄົມ ຂອງແຕ່ລະປະເທດ ແລະ ສິ່ງນັ້ນເປັນພື້ນຖານ, ເປັນກໍາລັງແຮງຊຸກຍູ້ການພົວພັນຮ່ວມມືສອງປະເທດ ກ່າວຂຶ້ນລະດັບສູງໃໝ່.

       ສອງຝ່າຍ ຕ່າງກໍ່ສະແດງຄວາມປິຕິຊົມຊື່ນ ແລະ ຕີລາຄາສູງ ຕໍ່ໝາກຜົນຂອງການຮ່ວມມື ລະຫວ່າງ ສອງພັກ, ສອງລັດ ໃນນັ້ນ ມີການປະກອບສ່ວນສຳຄັນຂອງ ຄະນະພົວພັນຕ່າງປະເທດສູນກາງພັກ ລາວ ແລະ ຫວຽດນາມ; ຢືນຢັນ​ຈະ​ສືບ​ຕໍ່​ປະຕິບັດ​ບັນດາ​ຂໍ້​ຕົກລົງ​ລະຫວ່າງ​ການ​ນຳ​ຂັ້ນ​ສູງ​ຂອງ​ສອງ​ພັກ, ຂໍ້ຕົກລົງການຮ່ວມ​ມື​ລະຫວ່າງ ​ສອງ​ຄະນະພົວພັນຕ່າງປະເທດສູນກາງພັກ, ປະກອບສ່ວນ​ນຳ​ເອົາສາຍ​ພົວພັນ​ສາມັກຄີ​ແບບ​ພິ​ເສດ ລາວ - ຫວຽດນາມ ​ໃຫ້​ນັບ​ມື້​ນັບ​ພັດທະນາເຂົ້າສູ່ລວງ​ເລິກ​, ມີ​ປະສິດທິ​ຜົນ ​ແລະ ​ແທດ​ຈິງ ເພື່ອຜົນປະໂຫຍດຂອງ​ປະຊາຊົນ​​ແຕ່ລະ​ປະ​ເທດ, ປະກອບສ່ວນ​ເຂົ້າ​ໃນ​ສັນຕິພາບ, ສະຖຽນ​ລະ​ພາບ, ການ​ຮ່ວມ​ມື ​ແລະ ການ​ພັດທະນາ​ຢູ່​ພາກ​ພື້ນ ​ແລະ ​ໃນ​ໂລກ.

       ໃນຕອນເຊົ້າ ຂອງວັນດຽວກັນ, ຄະນະຜູ້ແທນ ຄະນະພົວພັນຕ່າງປະເທດສູນກາງພັກປະຊາຊົນ ປະຕິວັດລາວ ກໍ່ໄດ້ພົບປະເຮັດວຽກກັບ ສະຫາຍ ຫງວຽນ ມິງ ເຕີມ, ຮອງຫົວໜ້າ ຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ພ້ອມດ້ວຍຄະນະ. ໃນການພົບປະ, ສອງຝ່າຍ ໄດ້ແຈ້ງໃຫ້ກັນຊາບ ສະພາບພົ້ນເດີນຂອງແຕ່ລະພັກ, ແຕ່ລະປະເທດໃຫ້ກັນຊາບ, ຮ່ວມກັນຕີລາຄາ ການພົວພັນຮ່ວມມືລະຫວ່າງ ສອງພັກ, ສອງປະເທດ ໃນໄລຍະຜ່ານມາ, ພ້ອມທັງປຶກສາຫາລືກ່ຽວກັບ ທິດທາງແຜນການຮ່ວມມື ລະຫວ່າງ ຄະນະພົວພັນຕ່າງປະເທດຂອງສອງພັກ ລາວ-ຫວຽດນາມ ໃນຕໍ່ໜ້າ ແລະ ບາງເນື້ອໃນທີ່ທັງສອງຝ່າຍຕ່າງໃຫ້ຄວາມສົນໃນ ໂດຍສະເພາະແມ່ນຮ່ວມກັນລົງເລິກແລກປ່ຽນຄໍາຄິດເຫັນ ແລະ ຕີລາຄາ ສະພາບການທີ່ພົນເດັ່ນຂອງ ພາກພື້ນ ແລະ ສາກົນ. ສອງຝ່າຍ ເຫັນດີສືບຕໍ່ແລກປ່ຽນຄະນະຜູ້ແທນແລກປ່ຽນຂໍ້ມູນຂ່າວສານ ແລະ ບົດຮຽນ, ປະສານສົມທົບຢ່າງສະໜິດແໜ້ນໃນວຽກງານພົວພັນຕ່າງປະເທດ ກໍ່ຄືໃນການຈັດຕັ້ງຜັນຂະຫຍາຍ ບັນດາຂໍ້ຕົກລົງຂັ້ນສູງຂອງສອງພັກ ແລະ ບັນດາສັນຍາການຮ່ວມມື ລະຫວ່າງ ສອງປະເທດ ລາວ-ຫວຽດນາມ ໃຫ້ບັນລຸຜົນສໍາເລັດຕາມແຜນການທີ່ວາງໄວ້. ນອກຈາກການພົບປະເຮັດວຽກສອງຝ່າຍແລ້ວ, ຄະນະຜູ້ແທນ ຄະນະພົວພັນຕ່າງປະເທດສູນກາງພັກ ຢັງໄດ້ໄປຢ້ຽມຢາມ, ຮັບຟັງການລາຍງານຜົນສໍາເລັດ ການເຄື່ອນໄຫວດໍາເນີນທຸລະກິດ ຢູ່ ສປປ ລາວ ແລະ ແລກປ່ຽນບົດຮຽນ ໃນການກໍ່ສ້າງພັກຮາກຖານ ຢູ່ ກຸ່ມບໍລິສັດ ອຸດສາຫະກໍາ - ໂທລະຄົມ ກອງທັບ (Viettel) ອີກດ້ວຍ.

---