ກອງປະຊຸມໃຫຍ່ ຄັ້ງທີ II ຂອງ ສະມາຊິກຊາວໜຸ່ມ ໜ່ວຍຮາກຖານກົມເອີຣົບ-ອາເມຣິກາ, ຄະນະພົວພັນຕ່າງປະເທດສູນກາງພັກ.

ເຜີຍ​ແຜ່​ໂດຍ​: moderator ເວ​ລາ: 27/06/2024 16:17:22 ຈຳ​ນວນ​​ຢ້ຽມ​ຊົມ 1141 ຄັ້ງ ​

        ໃນຕອນເຊົ້າຂອງ ວັນທີ 26 ມິຖຸນາ 2024, ໜ່ວຍຊາວໜຸ່ມກົມເອີຣົບ-ອາເມຣິກາ (ອອ), ຄຕພ ໄດ້ຈັດກອງປະຊຸມໃຫຍ່ ຄັ້ງທີ II ຂອງຕົນຂຶ້ນ ທີ່ສໍານັກງານ ຄຕພ ໂດຍການໃຫ້ກຽດເຂົ້າຮ່ວມຂອງ ສະຫາຍ ນ. ສິຣິພອນ ຄູຫາເທບ, ກໍາມະການຄະນະພັກ, ເລຂາໜ່ວຍພັກກົມ, ຫົວໜ້າກົມເອີຣົບ-ອາເມຣິກາ; ສະຫາຍ ວົງຄຳ ແສນສະທິດ, ວ່າການເລຂາຄະນະບໍລິຫານງານຊາວໜຸ່ມ ຄຕພ, ຮອງຫົວໜ້າກົມການທູດປະຊາຊົນ ແລະ ຕາງໜ້າຈາກຄະນະໜ່ວຍຊາວໜຸ່ມຫ້ອງການ-ບັນດາກົມພາຍໃນ ຄຕພ, ຕາງໜ້າໜ່ວຍກໍາມະບານ-ແມ່ຍິງກົມ ອອ ແລະ ຜູ້ແທນກອງປະຊຸມ ກໍຄື ສະມາຊິກຊາວໜຸ່ມກົມ ອອ ເຂົ້າຮ່ວມຢ່າງພ້ອມພຽງ.

        ໃນກອງປະຊຸມໄດ້ຜ່ານ ບົດລາຍງານການເມືອງ ແລະ ບົດສໍາຫຼວດການນໍາພາ ຂອງ ຄະນະໜ່ວຍຊາວໜຸ່ມກົມອອ ສະໄຫມທີ I, ເຊິ່ງໄດ້ຕີລາຄາຜົນສຳເລັດ, ຈຸດດີ-ຈຸດຄົງຄ້າງ, ຂໍ້ສະດວກ-ຂໍ້ຫຍຸ້ງຍາກ ໃນການຊີ້ນຳ-ນຳພາວຽກງານຊາວໜຸ່ມຂອງກົມ ໃນໄລຍະ 05 ປີຜ່ານມາ ແລະ ທິດທາງແຜນການຈຸດສຸມໃນໄລຍະ 05 ປີຕໍ່ໜ້າ.

        ກອງປະຊຸມໃຫຍ່ ໄດ້ປ່ອນບັດເລືອກຕັ້ງເອົາຄະນະໜ່ວຍຊຸດໃໝ່, ເຊິ່ງປະກອບມີ 03 ສະຫາຍຄື: ສະຫາຍ ຄູນແກ້ວ ດວງນາລີ, ເປັນເລຂາໜ່ວຍ; ສະຫາຍ ທະນູໄຊ ເຫງົ້າວົງສີ, ເປັນຮອງເລຂາ ທັງເປັນປະທານກວດກາໜ່ວຍ ແລະ ສະຫາຍ ນ. ລັດສະດາພອນ ພຸດທະວົງ, ເປັນກໍາມະການໜ່ວຍ.

        ກອງປະຊຸມ ຍັງໄດ້ຖືເປັນກຽດຮັບຟັງການໂອ້ລົມ ແລະ ໃຫ້ທິດຊີ້ນໍາຂອງ ສະຫາຍ ນ. ສິຣິພອນ ຄູຫາເທບ, ຄະນະພັກ ຄຕພ, ເລຂາໜ່ວຍພັກກົມ-ຫົວໜ້າກົມ ອອ ແລະ ສະຫາຍ ວົງຄຳ ແສນສະທິດ, ວ່າການເລຂາຄະນະບໍລິຫານງານຊາວໜຸ່ມ ຄຕພ, ຮອງຫົວໜ້າກົມການທູດປະຊາຊົນ, ໂດຍໄດ້ຕີລາຄາສູງ ແລະ ຊົມເຊີຍຜົນງານທີ່ຄະນະໜ່ວຍ ແລະ ສະມາຊິກຊາວໜຸ່ມກົມ ອອ ຍາດມາໄດ້ໃນສະໄໝຜ່ານມາ, ຮຽກຮ້ອງໃຫ້ຄະນະໜ່ວຍຊຸດໃໝ່ ສືບຕໍ່ນຳພາສະມາຊິກໃນການເສີມຂະຫຍາຍມູນເຊື້ອ ຜົນສໍາເລັດດັ່ງກ່າວ ແລະ ເອົາໃຈໃສ່ແກ້ໄຂຂໍ້ຄົງຄ້າງ ໃຫ້ດີຂຶ້ນເທື່ອລະກ້າວ; ໄດ້ເນັ້ນໜັກໃຫ້ສືບຕໍ່ຍົກສູງດ້ານການເມືອງ-ແນວຄິດ ໃຫ້ໜັກແໜ້ນ, ເອົາໃຈໃສ່ຈັດຕັ້ງປະຕິບັດຂໍ້ແຂ່ງຂັນ 04 ບຸກ ຂອງຊາວໜຸ່ມ ແລະ ເນື້ອໃນຂໍ້ແຂ່ງຂັນຍ້ອງຍໍຮັກຊາດ ແລະ ພັດທະນາຂອງກົມ ອອ ກໍຄື ຂອງ ຄຕພ ໃຫ້ໄດ້ຕາມຄາດໝາຍທີ່ວາງໄວ້.

---