ຄະນະຜູ້ແທນພັກ ປປ ລາວ ສຳເລັດການເຂົ້າຮ່ວມກອງປະຊຸມສະພາທຸລະກິດຂອງບັນດາພັກການເມືອງໃນອາຊີ ຄັ້ງທີ 2 (2nd Meeting of ICAPP Business Council), ທີ່ບາງກອກ, ຣາຊະອານາຈັກໄທ,

ເຜີຍ​ແຜ່​ໂດຍ​: moderator ເວ​ລາ: 30/05/2024 15:07:30 ຈຳ​ນວນ​​ຢ້ຽມ​ຊົມ 212 ຄັ້ງ ​

        ຄະນະຜູ້ແທນພັກ ປປ ລາວ ນໍາໂດຍ ສະຫາຍ ວັງຮື ເນັ່ງມົງວ່າງ, ຮັກສາການຫົວໜ້າກົມຄົ້ນຄວ້າ ແລະ ພົວພັນຫຼາຍຝ່າຍ, ຄະນະພົວພັນຕ່າງປະເທດສູນກາງພັກ ໄດ້ເດີນທາງໄປເຂົ້າຮ່ວມກອງປະຊຸມສະພາທຸລະກິດໄອແຄັບ ຄັ້ງທີ 2ພາຍໃຕ້ຫົວຂໍ້: “ການສົ່ງເສີມການທ່ອງທ່ຽວ ແລະ ຄວາມໝັ້ນຄົງດ້ານສະບຽງອາຫານ” ທີ່ບາງກອກ, ຣາຊະອານາຈັກໄທໃນລະຫວ່າງວັນທີ 27-30 ພຶດສະພາ 2024 ໂດຍ​ການ​ເປັນ​ເຈົ້າ​ພາບຂອງ​ສະພາແຫ່ງຣາຊະອານາຈັກໄທ, ເຊິ່ງມີຜູ້ແທນຈາກບັນດາພັກການເມືອງ ແລະ ບັນດາຜູ້ນຳທຸລະກິດ ຫຼາຍກວ່າ 100 ທ່ານ ທີ່ມາຈາກ 22 ພັກການເມືອງອາຊຽນ ແລະ 38 ອົງການທຸລະກິດ ເຂົ້າຮ່ວມ.

         ຄະນະຜູ້ແທນພັກ ປປ ລາວ ໄດ້ປະກອບຄຳເຫັນໃນກອງປະຊຸມ ໂດຍໄດ້ຕີລາຄາສູງ ແລະ ຊົມເຊີຍຕໍ່ການເປັນເຈົ້າພາບຂອງສະພາແຫ່ງຣາຊະອານາຈັກໄທ ແລະ ກອງເລຂາໄອແຄັບ; ບົດບາດຄວາມສໍາຄັນຂອງການນໍາພາຂອງພັກການເມືອງ ກໍຄື ການຮ່ວມມືເຊິ່ງກັນແລະກັນລະຫວ່າງບັນດາພັກການເມືອງໃນພາກທຸລະກິດ ອັນເປັນປັດໄຈສໍາຄັນໃນການຂັບເຂື່ອນເພື່ອການພັດທະນາຂອງໂລກ; ພ້ອມກັນນັ້ນ, ໄດ້ຍົກໃຫ້ເຫັນນະໂຍບາຍຂອງພັກ-ລັດ ກໍ່ຄື ສປປ ລາວ ທີ່ຖືເອົາການພັດທະນາອຸດສາຫະກຳການທ່ອງທ່ຽວ ໃຫ້ກາຍເປັນຂະແໜງເສດຖະກິດໃຫມ່ທີ່ມີທ່າແຮງຂອງປະເທດ ໂດຍສຸມການພັດທະນາແຫຼ່ງທ່ອງທ່ຽວທໍາມະຊາດ, ວັດທະນະທໍາ, ປະຫວັດສາດ ແລະ ທ່ອງທ່ຽວກະສິກໍາ; ການເອົາໃຈໃສ່ຂອງພັກ ແລະ ລັດຖະບານ ສປປ ລາວ ທີ່ໄດ້ວາງນະໂຍບາຍ ແລະ ມາດຕະການດ້ານຕ່າງໆເພື່ອຊຸກຍູ້ໃຫ້ປະຊາຊົນຂະຫຍາຍການຜະລິດ ແລະ ສາຂາອາຊີບຕ່າງໆ ໃຫ້ສາມາດກຸ້ມຕົນເອງ, ເພີ່ງຕົນເອງດ້ານສະບຽງອາຫານ ແລະ ຜະລິດ ຕະພັນໃຊ້ສອຍ, ການຜະລິດສະບຽງອາຫານໃຫ້ມີຄວາມໝັ້ນຄົງ ໂດຍການສົ່ງເສີມຜູ້ປະກອບການອີກດ້ວຍ. ພັກ ປປ ລາວ ຢືນຢັນຈະສືບຕໍ່ໃຫ້ການຮ່ວມມືກັບບັນດາພັກການເມືອງຕ່າງໆໃນອາຊີ ລວມທັງໃນຂອບໄອແຄັບ ເພື່ອຮັບມືກັບບັນດາສິ່ງທ້າທາຍຕ່າງໆທີ່ຖ່ວງດຶງການພັດທະນາຂອງໂລກ.

        ກອງປະຊຸມຄັ້ງນີ້, ໄດ້ຮັບຜົນສໍາເລັດຢ່າງຈົບງາມ, ບັນດາຜູ້ແທນກອງປະຊຸມໄດ້ເປັນເອກະພາບກັນຮັບຮອງເອົາຖະແຫຼງການບາງກອກ ເຊິ່ງມີເນື້ອໃນສຳຄັນທີ່ເນັ້ນໜັກເຖິງບົດບາດສໍາຄັນຂອງບັນດາພັກການເມືອງ ກໍຄື ການຊຸກຍູ້ລັດຖະບານຂອງບັນດາປະເທດສືບຕໍ່ຮ່ວມມືກັນຢ່າງໃກ້ຊິດ ໃນການຮັບມືກັບສິ່ງທ້າທ້າຍທີ່ບັນດາປະເທດໃນໂລກກໍາລັງ ປະເຊີນຢູ່ ຕໍ່ກັບວິກິດຄວາມໝັ້ນຄົງດ້ານສະບຽງອາຫານ ແລະ ການທ່ອງທ່ຽວ ທີ່ໄດ້ຮັບຜົນກະທົບຕັ້ງແຕ່ການແຜ່ລະ ບາດຂອງພະຍາດໂຄວິດ-19 ເປັນຕົ້ນມາ, ອີກທັງຊຸກຍູ້ໃຫ້ບັນດາປະເທດ ເຮັດວຽກຮ່ວມກັນຢ່າງໃກ້ຊິດ ທັງພາກລັດ ແລະ ເອກະຊົນ ກໍຄື ຫົວໜ່ວຍທຸລະກິດ ໃນການກໍານົດຍຸດທະສາດສົ່ງເສີມການທ່ອງທ່ຽວ ແລະ ການເສີມຂະຫຍາຍຕ່ອງໂສ້ການສະໜອງການຜະລິດສະບຽງອາຫານ ພາຍໃນປະເທດ ກໍຄື ໃນໂລກ ໃຫ້ມີຄວາມຍືນຍົງ ແລະ ກວມລວມ.

        ນອກຈາກເຂົ້າຮ່ວມກອງປະຊຸມແລ້ວ, ຄະນະຜູ້ແທນພັກ ປປ ລາວ ຍັງໄດ້ໄປເຄື່ອນໄຫວຢ້ຽມຊົມງານວາງສະ ແດງ “ThaiFex-Anuga Asia 2024” ເຊິ່ງເປັນງານວາງສະແດງສາກົນທີ່ມີຊື່ສຽງ ກ່ຽວກັບ ຜະລິດຕະພັນອາຫານ, ເຊິ່ງຈັດຂື້ນໂດຍກົມສົ່ງເສີມການຄ້າລະຫວ່າງປະເທດຂອງໄທ.

---