ຄະນະຜູ້ແທນພັກກອມມູນິດຈີນ ຢ້ຽມຢາມ ແລະ ເຮັດວຽກ ຢູ່ ສປປ ລາວ

ເຜີຍ​ແຜ່​ໂດຍ​: moderator ເວ​ລາ: 13/05/2024 15:01:10 ຈຳ​ນວນ​​ຢ້ຽມ​ຊົມ 271 ຄັ້ງ ​

     ໂດຍຕອບສະໜອງຕາມການເຊື້ອເຊີນ ຂອງ ຄະນະພົວພັນຕ່າງປະເທດສູນກາງພັກ ປປ ລາວ ແລະ ເພື່ອປະຕິບັດແຜນການຮ່ວມມື ລະຫວ່າງ ພັກ ປປ ລາວ ແລະ ພັກກອມມູນິດຈີນ ແລະ ແຜນການຮ່ວມມື ລະຫວ່າງ ຄະນະພົວພັນຕ່າງປະເທດ ຂອງ 2 ສູນກາງພັກ ລາວ-ຈີນ ປະຈຳປີ 2024, ຄະນະຜູ້ແທນ ຂອງ ພັກກອມມູນິດຈີນ ນຳໂດຍ ສະຫາຍ ຈ້າວ ຊື້ທົງ, ຜູ້ຊ່ວຍຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ ພ້ອມດ້ວຍຄະນະ ໄດ້ເດີນທາງ​ມາ​ຢ້ຽມ​ຢາມ ແລະ ​ເຮັດ​ວຽກຢູ່ ສ​ປ​ປ ລາວ ແຕ່​ວັ​ນ​ທີ 9-12 ພຶດສະພາ 2024.

    ໃນຕອນບ່າຍວັນທີ 10 ພຶດສະພາ 2024, ສະຫາຍ ຈ້າວຊືທົງ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ສະຫາຍ ບຸນທອງ ຈິດມະນີ, ກໍາມະການກົມການເມືອງ, ຜູ້ປະຈໍາການ ຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ, ເຊິ່ງໃນໂອກາດດັ່ງກ່າວ ສະຫາຍ ບຸນທອງ ຈິດມະນີ ໄດ້ສະແດງຄວາມຄວາມຍີນດີຕ້ອນຮັບ ແລະ ຕີລາຄາສູງຕໍ່ການຢ້ຽມຢາມ-ເຮັດວຽກ ຢູ່ ສປປ ລາວ ຂອງ ສະຫາຍ ຈ້າວ ຊື້ທົງ ພ້ອມດ້ວຍຄະນະໃນຄັ້ງນີ້, ໂດຍສະເພາະແມ່ນ ການພົບປະເຮັດວຽກກັບພາກສ່ວນທີ່ກ່ຽວຂ້ອງຂອງລາວ ເພື່ອຮ່ວມກັນຕີລາຄາຄືນ ການຈັດຕັ້ງປະຕິບັດ ແຜນແມ່ບົດວ່າດ້ວຍ ການສ້າງຄູ່ຮ່ວມຊາຕາກຳ ລາວ-ຈີນ ໃນໄລຍະຜ່ານມາ ແລະ ກໍານົດທິດທາງໃນການຊຸກຍູ້ ການຈັດຕັ້ງປະຕິບັດແຜນແມ່ບົດສະບັບໃໝ່ (ປີ 2024-2028) ໃຫ້ມີຄຸນນະພາບສູງ, ມາດຕະຖານສູງ ແລະ ຄຸນນະພາບສູງກວ່າເກົ່າ; ໄດ້ຕີລາຄາສູງ ຕໍ່ການພົວພັນຮ່ວມມື ລະຫວ່າງ ສອງພັກ ລາວ-ຈີນ ໃນໄລຍະຜ່ານມາ, ກໍຄືການປະສານສົມທົບກັນ ລະຫວ່າງ 2 ຄະນະພົວພັນຕ່າງປະເທດສູນກາງພັັກ ລາວ-ຈີນ ທີ່ໄດ້ປະກອບສ່ວນສຳຄັນ ໃນການຈັດຕັ້ງປະຕິບັດແຜນແມ່ບົດ, ແຜນການຮ່ວມມື ລະຫວ່າງ ສອງພັກ ແລະ ການຈັດຕັ້ງຜັນຂະຫຍາຍບັນດາເນື້ອໃນຈິດໃຈ ທີ່ການນຳສອງພັກ, ສອງລັດ ລາວ-ຈີນ ໄດ້ຕົກລົງເປັນເອກະພາບນກັນ ໃຫ້ປະກົດຜົນເປັນຈິງ. ສະຫາຍ ບຸນທອງ ຈິດມະນີ ຍັງໄດ້ມີຄໍາເຫັນຊີ້ນໍາໃຫ້ 2 ຄະນະພົວພັນຕ່າງປະເທດສູນກາງພັັກ ລາວ-ຈີນ ສືບຕໍ່ປະສານສົມທົບກັນ ໃນການເປັນເສນາທິການດ້ານການຕ່າງປະເທດໃຫ້ແກ່ 2 ສູນກາງພັກ ລາວ-ຈີນ ກໍ່ຄື ການຊຸກຍູ້ຈັດຕັ້ງປະຕິບັດ ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ໃຫ້ເກີດດອກອອກຜົນໃນລະດັບສູງກວ່າເກົ່າ ແລະ ຕາງໜ້າ ພັກ-ລັດລາວ ສະແດງຄວາມຂອບໃຈ ພັກ-ລັດຈີນ ທີ່ໄດ້ໃຫ້ການຊ່ວຍເຫຼືອອຸປະກອນ ແລະ ພາຫະນະ ໃນການເປັນປະທານອາຊຽນ 2024 ຂອງ ສປປ ລາວ.

    ສະຫາຍ ຈ້າວ ຊື້ທົງ ໄດ້ສະແດງຄວາມຂອບໃຈຕໍ່ ສະຫາຍ ບຸນທອງ ຈິດມະນີ ທີ່ໃຫ້ກຽດຕ້ອນຮັບຄະນະ ແລະ ໄດ້ລາຍງານຜົນການພົບປະ-ເຮັດວຽກ ກັບພາກສ່ວນກ່ຽວຂ້ອງຂອງຝ່າຍລາວ ໃຫ້ຊາບ; ໄດ້ແຈ້ງສະພາບການທີ່ພົ້ນເດັ່ນຈຳນວນຫນຶ່ງ ຂອງການພົວພັນຮ່ວມມືສອງຝ່າຍໃນໄລຍະຜ່ານມາ ແລະ ທິດທາງແຜນການໃນຕໍ່ຫນ້າ ເພື່ອສືບຕໍ່ຈັດຕັ້ງປະຕິບັດບັນດາເນຶ້ອໃນຈິດໃຈທີ່ການນຳສອງພັກ, ສອງລັດ ໄດ້ຕົກລົງເປັນເອກະພາບກັນ ກໍຄື ການຈັດຕັ້ງປະຕິບັດ ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ແລະ ແຜນການຮ່ວມມື ລະຫວ່າງ ສອງພັກ ໃນຕໍ່ຫນ້າໃຫ້ມີປະສິດທິຜົນກວ່າເກົ່າ.

      ໃນໂອກາດມາຢ້ຽມຢາມ ສປປ ລາວ ຄັ້ງນີ້, ສະຫາຍ ຈ້າວຊື້ທົງ ພ້ອມດ້ວຍຄະນະ ຍັງໄດ້ເຂົ້າຢ້ຽມຂໍ່ານັບ ສະຫາຍ ຄຳພັນ ເຜີຍຍະວົງ, ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ; ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ; ພົບປະເຮັດວຽກກັບ ສະຫາຍ ວາລະໄຊ ເລັ່ງສະຫວັດ, ຮອງຫົວໜ້າຄະນະພົວພັນຕ່າງປະເທດສູນກາງພັກ; ຈັດກອງປະຊຸມແລກປ່ຽນບົດຮຽນກັບ ພາກສ່ວນກ່ຽວຂ້ອງຂອງລາວ ແລະ ຢ້ຽມຢາມສຳນັກງານ ບໍລິສັດສາຍສົ່ງໄຟຟ້າແຫ່ງຊາດລາວ (EDL-T) ຢູ່ນະຄອນຫຼວງວຽງຈັນ. ພ້ອມນັ້ນ, ຄະນະຍັງໄດ້ຢ້ຽມຢາມພື້ນຖານການປະຕິວັດ ຢູ່ແຂວງຫົວພັນ, ຢ້ຽມຢາມຖໍ້າທູດຈີນ ເຊິ່ງເປັນສະຖານທີ່ສໍາຄັນ ທີ່ສະແດງເຖິງມູນເຊື້ອການພົວພັນ ລາວ-ຈີນ ໃນສະໄໝຕໍ່ສູ້ກູ້ຊາດ ແລະ ເຂົ້າຢ້ຽມຂໍ່ານັບ ສະຫາຍ ເພີດ ມາປັນຍາ, ຮອງເລຂາພັກແຂວງ, ຜູ້ປະຈໍາການ ຄະນະບໍລິຫານງານພັກແຂວງຫົວພັນ ໃນໂອກາດດັ່ງກ່າວ.

---