ຄະນະຜູ້ແທນຂັ້ນສູງຂອງ ພັກ ປປ ລາວ ຢ້ຽມຢາມສັນທະວະໄມຕີ ສ. ກູບາ

ເຜີຍ​ແຜ່​ໂດຍ​: moderator ເວ​ລາ: 09/05/2024 15:37:31 ຈຳ​ນວນ​​ຢ້ຽມ​ຊົມ 285 ຄັ້ງ ​

        ໂດຍປະຕິບັດຕາມເເຜນການຮ່ວມມື ລະຫວ່າງ 2 ພັກ ແລະ ຕອບສະໜອງຕາມຄໍາເຊື້ອເຊີນ ຂອງ ສະຫາຍ ໂຣເບີດໂຕ ໂມຣາເລັດສ ໂອເຮດາ, ກໍາມະການກົມການເມືອງສູນກາງພັກ, ເລຂາທິການສູນກາງພັກກອມມູນິດກູບາ; ໃນລະຫວ່າງວັນທີ 04-07 ພຶດສະພາ 2024 ສະຫາຍ ປອ ບຸນທອງ ຈິດມະນີ, ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ ພ້ອມດ້ວຍຄະນະ ເຄື່ອນໄຫວຢ້ຽມຢາມ ສັນທະວະໄມຕີ ສ.ກູບາ.

        ໃນວັນທີ 05 ພຶດສະພາ 2024 ທີ່ ນະຄອນຫຼວງ ລາຮາວານ, ສູນກາງພັກກອມມູນິດກູບາ ໄດ້ຈັດພິທີຕ້ອນຮັບ ສະຫາຍ ປອ ບຸນທອງ ຈິດມະນີ ພ້ອມດ້ວຍຄະນະ ຢ່າງເປັນທາງການ ຈັດໂດຍ ສະຫາຍ ໂຣເບີດໂຕ ໂມຣາເລັດສ ໂອເຮດາ ຊຶ່ງສອງຝ່າຍໄດ້ແຈ້ງໃຫ້ກັນຊາບ ກ່ຽວກັບ ສະພາບການພົ້ນເດັ່ນຢູ່ແຕ່ລະປະເທດ, ການເຄື່ອນໄຫວຂອງແຕ່ລະພັກ, ແລກປ່ຽນທັດສະນະ ກ່ຽວກັບ ບັນຫາພາກພື້ນ ແລະ ສາກົນ ທີ່ສອງຝ່າຍໃຫ້ຄວາມສົນໃຈ. 

        ໃນການພົບປະສອງຝ່າຍ, ສະຫາຍ ປອ ບຸນທອງ ຈິດມະນີ ໄດ້ສະແດງຄວາມດີໃຈ ທີ່ໄດ້ມີໂອກາດຢ້ຽມຢາມ ສ. ກູບາ, ຂອບໃຈຢ່າງຈິງໃຈ ຕໍ່ ສະຫາຍ ໂຣເບີດໂຕ ໂມຣາເລັດສ ໂອເຮດາ ທີ່ໄດ້ໃຫ້ການຕ້ອນຮັບອັນອົບອຸ່ນ, ພ້ອມທັງສະແດງຄວາມຊົມເຊີຍ ແລະ ຕີລາຄາສູງ ຕໍ່ບັນດາຜົນສຳເລັດຂອງກູບາ ຕະຫຼອດໄລຍະ 60 ກວ່າປີ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ປົກປັກຮັກສາໝາກຜົນຂອງການປະຕິວັດໄວ້ຢ່າງໝັ້ນຄົງ ແລະ ສຶບຕໍ່ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VIII ຂອງພັກ ໃຫ້ປະກົດຜົນເປັນຈິງ, ຊົມເຊີຍວັນສ້າງຕັ້ງສາຍພົວພັນການທູດ ລາວ-ກູບາ ຄົບຮອບ 50 ປີ (1974-2024), ຊື່ງສອງພັກ, ສອງລັດ ແລະ ປະຊາຊົນສອງຊາດ ພວກເຮົາ ຈະໄດ້ຮ່ວມກັນສະເຫຼີມສະຫຼອງວັນສໍາຄັນດັ່ງກ່າວ, ພ້ອມທັງຢືນຢັນ ຈະສືບຕໍ່ຮ່ວມມືກັບເພື່ອນກູບາ ເພື່ອເສີມຂະຫຍາຍສາຍພົວພັນ ແລະ ການຮ່ວມມືທີ່ເປັນມູນເຊື້ອອັນດີງາມໃຫ້ນັບມື້ເຂົ້າສູ່ລວງເລິກ ແລະ ມີປະສິດທິຜົນຍິ່ງຂຶ້ນ; ສະແດງຄວາມຂອບໃຈຢ່າງຈິງໃຈ ຕໍ່ການສະໜັບສະໜູນ ແລະ ຊ່ວຍເຫຼືອອັນລໍ້າຄ່າຂອງພັກ, ລັດ ແລະ ປະຊາ ຊົນກູບາອ້າຍນ້ອງ ໃນພາລະກິດຕໍ່ສູ້ກູ້ຊາດໃນເມື່ອກ່ອນ ກໍຄືພາລະກິດປົກປັກຮັກສາ ແລະ ສ້າງສາປະເທດຊາດຂອງ ສປປ ລາວ ໃນປັດຈຸບັນ.

        ສະຫາຍ ໂຣເບີດໂຕ ໂມຣາເລັດສ ໂອເຮດາ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ການຢ້ຽມຢາມ      ສ. ກູບາ ຂອງຄະນະ, ຊຶ່ງເປັນການປະກອບສ່ວນອັນສໍາຄັນ ເຂົ້າໃນການເພິ່ມພູນຄູນສ້າງ ແລະ ເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອອັນດີງາມ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດກູບາ-ລາວ ໃຫ້ນັບມື້ແໜ້ນແຟ້ນຍິ່ງໆຂຶ້ນ, ຊົມເຊີຍຕໍ່ ບັນດາຜົນສຳເລັດ ທີ່ປະຊາຊົນລາວ ຍາດມາໄດ້ໃນພາລະກິດສ້າງສາພັດທະນາປະເທດຊາດ ພາຍໃຕ້ການນໍາພາອັນຖືກຕ້ອງ ແລະ ສະຫຼາດສ່ອງໃສ ຂອງ ພັກ ປປ ລາວ, ອັນໄດ້ເຮັດໃຫ້ຊີວິດການເປັນຢູ່ຂອງປະຊາຊົນລາວ ໄດ້ຮັບການປັບປຸງໃຫ້ດີຂຶ້ນເທື່ອລະກ້າວ, ບົດບາດ ແລະ ອິດທິພົນ ຂອງ ສປປ ລາວ ນັບມື້ສູງເດັ່ນຂຶ້ນໃນເວທີພາກພື້ນ ແລະ ສາກົນ; ຕີລາຄາສູງຕໍ່ສາຍພົວພັນຮ່ວມມືທີ່ເປັນມູນເຊື້ອ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດກູບາ-ລາວ ແລະ ອວຍພອນໃຫ້ພັກ, ລັດ ກໍຄື ປະຊາຊົນລາວ ຈົ່ງປະສົບຜົນສໍາເລັດອັນ  ໃໝ່ໃຫຍ່ຫຼວງກວ່າເກົ່າ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກໃຫ້ປະກົດຜົນເປັນຈິງ.

         ໃນໂອກາດດັ່ງກ່າວ, ຄະນະຜູ້ແທນຂັ້ນສູງ ພັກ ປປ ລາວ ໄດ້ເຂົ້າຢ້ຽມຂໍ່ານັບ ສະຫາບ ມີເກນ ດຽດ ກາເນນ, ເລຂາທິການທີໜຶ່ງ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສ.ກູບາ; ຈັດກອງປະຊຸມສຳມະນາທິດສະດີ ແລະ ພຶດຕິກຳຕົວຈິງ ລະຫວ່າງ ສອງພັກເປັນຄັ້ງທີ 2, ເພື່ອແລກປ່ຽນບົດຮຽນທາງດ້ານທິດສະດີ ແລະ ພຶດຕິກຳຕົວຈິງ ເຊິ່ງກັນ ແລະ ກັນ; ພົບປະເຮັດວຽກ ລະຫວ່າງ ສອງຫົວໜ້າຄະນະພົວພັນຕ່າງປະເທດສູນກາງພັກລາວ-ກູບາ ແລະ ຢ້ຽມຢາມພື້ນຖານເສດຖະກິດ, ສະຖານທີ່ສໍາຄັນທາງປະຫວັດສາດ ແລະ ວັດທະນະທໍາ ຈໍານວນໜຶ່ງໃນນະຄອນຫຼວງລາຮາວານ.

---