ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ນາງ ທໍາມາ ເພັດວິໄຊ, ຮອງປະທານສູນກາງສະຫະພັນແມ່ຍິງລາວ ພ້ອມດ້ວຍຄະນະ

ເຜີຍ​ແຜ່​ໂດຍ​: moderator ເວ​ລາ: 08/04/2024 15:26:01 ຈຳ​ນວນ​​ຢ້ຽມ​ຊົມ 455 ຄັ້ງ ​

        ໃນຕອນເຊົ້າຂອງວັນທີ 4 ເມສາ 2024 ທີ່ ສໍານັກງານຄະນະພົວພັນຕ່າງປະເທດສູນກາງພັກ, ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ນາງ ທໍາມາ ເພັດວິໄຊ, ຮອງປະທານສູນກາງສະຫະພັນແມ່ຍິງລາວ ພ້ອມດ້ວຍຄະນະ ໃນໂອກາດລົງມາຊຸກຍູ້ ວຽກງານສ້າງພະນັກງານນໍາພາ-ຄຸ້ມຄອງເພດຍິງ ກໍ່ຄື ວຽກງານການກະກຽມກອງປະຊຸມໃຫຍ່ ແລະ ວຽກງານຮອບດ້ານຂອງສະຫະພັນແມ່ຍິງ ຄຕພ.

        ໃນໂອກາດດັ່ງກ່າວ, ສະຫາຍ ທອງສະຫວັນ ພົມວິຫານ ໄດ້ສະແດງຄວາມຂອບໃຈ ຕໍ່ ຄະນະສູນກາງສະຫະພັນແມ່ຍິງລາວ ທີ່ມີຄວາມເປັນຫວງເປັນໃຍ, ເອົາໃຈໃສ່ ແລະ ໄດ້ລົງມາຊຸກຍູ້ວຽກງານສະຫະພັນແມ່ຍິງຂອງ ຄຕພ ໃນຄັ້ງນີ້. ເຊິ່ງເປັນໂອກາດສໍາຄັນໃຫ້ແກ່ ສະຫະພັນແມ່ຍິງ ຄຕພ ໃນການກະກຽມກອງປະຊຸມໃຫຍ່ຂອງຕົນ,  ເປັນການຊຸກຍູ້ວຽກງານ ສ້າງພະນັກງານນໍາພາ-ຄຸ້ມຄອງເພດຍິງ ກໍ່ຄື ວຽກງານການກະກຽມ ບຸກຄະລາກອນເພດຍິງຂອງ ຄຕພ ໃຫ້ແກ່ກອງປະຊຸມໃຫຍ່ 3 ຂັ້ນຂອງພັກ.

        ສະຫາຍ ທອງສະຫວັນ ພົມວິຫານ ໄດ້ແຈ້ງສະພາບການເຄື່ອນໄຫວພົ້ນເດັ່ນ ຂອງສະຫະພັນແມ່ຍິງ ຄຕພ ໃນໄລຍະຜ່ານມາ ໂດຍຫຍໍ້ ໃຫ້ຄະນະຊາບ, ໂດຍສະເພາະ ຜົນສໍາເລັດການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ I ຂອງສະຫະພັນແມ່ຍິງ ຄຕພ ໃນໄລຍະເຄິ່ງສະໄໝຜ່ານມາ, ການປະກອບສ່ວນຂອງ ສະຫະພັນແມ່ຍິງ ຄຕພ ໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9, ການປະຕິບັດ 2 ວາລະແຫ່ງຊາດ, ການກະກຽມດໍາເນີນກອງປະຊຸມໃຫ່ຍ ຄັ້ງທີ II ຂອງຂັ້ນຕົນ ໃນທ້າຍປີ 2024, ລວມທັງແຜນວຽກງານສ້າງພະນັກງານນໍາພາ-ຄຸ້ມຄອງເພດຍິງ ຂອງ ຄຕພ ໃນຕໍ່ໜ້າ ແລະ ຜົນສໍາເລັດໃນການປະກອບສ່ວນຂອງ ສະຫະພັນແມ່ຍິງ ຄຕພ ເຂົ້າໃນການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ II ຂອງ ຄຕພ ໃນເຄິ່ງສະໄໝຜ່ານມາ.

        ສະຫາຍ ນາງ ທໍາມາ ເພັດວິໄຊ ໄດ້ສະແດງຄວາມຂອບໃຈ ຕໍ່ການຕ້ອນຮັບ ແລະ ແຈ້ງໃຫ້ຊາບ ກ່ຽວກັບສະພາບພົ້ນເດັ່ນ ການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ແມ່ຍິງລາວທົ່ວປະເທດ ຄັ້ງທີ VIII ກໍ່ຄື ຜົນສໍາເລັດໃນການເຄື່ອນໄຫວວຽກງານຂອງ ສະຫະພັນແມ່ຍິງລາວ ແລະ ວຽກງານສ້າງພະນັກງານນໍາພາ-ຄຸ້ມຄອງເພດຍິງ ໃນຜ່ານມາ.

        ໃນໂອກາດດັ່ງກ່າວ ສະຫາຍ ວາລະໄຊ ເລັ່ງສະຫວັດ, ກໍາມະການຄະນະພັກ, ປະທານກວດກາຄະນະພົວພັນຕ່າງປະເທດສູນກາງພັກ, ຮອງຫົວໜ້າຄະນະພົວພັນຕ່າງປະເທດສູນກາງພັກ ຍັງໄດ້ພົບປະເຮັດວຽກກັບ ຄະນະສະຫະພັນແມ່ຍິງສູນກາງ ໃນໂອກາດດັ່ງກ່າວ.

---