ຫົວໜ້າຄະນະພົວພັນຕ່າງປະເທດສູນກາງພັກ ເຄື່ອນໄຫວຢ້ຽມຢາມ ແລະ ແລກປ່ຽນບົດຮຽນຢູ່ ສິງກະໂປ
ເຜີຍແຜ່ໂດຍ: moderator ເວລາ: 28/03/2024 16:41:21 ຈຳນວນຢ້ຽມຊົມ 378 ຄັ້ງ ໂດຍຕອບສະໜອງຕາມການເຊື້ອເຊີນຂອງລັດຖະບານສິງກະໂປ, ທ່ານ ທອງສະຫວັນ ພົມວິຫານ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ແລກປ່ຽນບົດຮຽນຢູ່ ສິງກະໂປ ຕາມໂຄງການແລກປ່ຽນ ລີກວນຢູ (LKYEF) ໃນລະຫວ່າງວັນທີ 25-27 ມີນາ 2024 ເພື່ອເສີມຂະຫຍາຍສາຍພົວພັນມິດຕະພາບຂອງສອງປະເທດ ພາຍໃຕ້ບັນຍາກາດແຫ່ງການສະເຫຼີມສະຫຼອງ ຄົບຮອບ 50 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສ. ສິງກະໂປ.
ໃນໂອກາດຢ້ຽມຢາມຄັ້ງນີ້, ທ່ານ ທອງສະຫວັນ ພົມວິຫານ ໄດ້ນຳພາຄະນະ ເຂົ້າພົບປະສອງຝ່າຍກັບການນໍາຂັ້ນສູງຂອງ ສິງກະໂປ ໂດຍເຂົ້າຢ້ຽມຂໍ່ານັບ ພະນະທ່ານ ລີ ຊຽນ ລຸງ (Lee Hsien Loong), ນາຍົກລັດຖະມົນຕີສິງກະໂປ; ທ່ານ ລໍແຣັນສ ວອງ (Lawrence Wong), ຮອງນາຍົກລັດຖະມົນຕີ ທັງເປັນລັດຖະມົນຕີກະຊວງການເງິນ; ພົບປະກັບ ທ່ານ ວິວຽນ ບາລາຄຣິສນານ (Vivian Balakrishnan), ລັດຖະມົນຕີກະຊວງການຕ່າງປະເທດ; ທ່ານ ຕັນ ຊີ ເລັງ (Tan See Leng) ລັດຖະມົນຕີກະຊວງແຮງງານ ທັງເປັນລັດຖະມົນຕີກະຊວງການຄ້າ ແລະ ອຸດສາຫະກຳ ຜູ້ທີສອງ; ທ່ານ ລີ ຈູ ຢາງ (Lee Tzu Yang), ປະທານໂຄງການແລກປ່ຽນ ສະຖາບັນລີກວນຢູ ໄດ້ເປັນກຽດມອບໂລ້ຢັ້ງຢືນຜູ້ເຂົ້າຮ່ວມໂຄງການແລກປ່ຽນລີກວນຢູ, ຊຶ່ງເປັນບຸກຄົນທີ 77 ແລະ ເປັນຜູ້ທີ 3 ຈາກ ສປປ ລາວ. ໃນການພົບປະ, ທັງສອງຝ່າຍໄດ້ຕີລາສູງຕໍ່ສາຍພົວພັນມິດຕະພາບ ແລະ ການຮ່ວມມື ລາວ-ສິງກະໂປ ຕະຫຼອດໄລຍະ 50 ປີຜ່ານມາ, ໄດ້ແລກປ່ຽນສະພາບການພັດທະນາເສດຖະກິດ-ສັງຄົມ ຂອງປະເທດຕົນໃຫ້ກັນຊາບ ແລະ ເອກະພາບກັນຄົ້ນຄວ້າທ່າແຮງເພື່ອການຮ່ວມມືໃນຕໍ່ໜ້າ ໂດຍສະເພາະ ດ້ານການຄ້າ-ການລົງທຶນ, ພະລັງງານສະອາດ, ເຕັກໂນໂລຊີ, ການພັດທະນາຊັບພະຍາກອນມະນຸດ, ການທ່ອງທ່ຽວສີຂຽວ ແລະ ອື່ນໆ. ຝ່າຍສິງກະໂປ ຍິນດີສືບຕໍ່ສົ່ງເສີມວຽກງານການພັດທະນາຊັບພະຍາກອນມະນຸດ ແລະ ສະໜັບສະໜູນຍຸດທະສາດຂອງລາວ ໃນການຫັນເປັນປະເທດເຊື່ອມໂຍງເຊື່ອມຈອດ ໃຫ້ກວ້າງຂວາງຍິ່ງຂຶ້ນ, ພ້ອມທັງ ຍິນດີໃຫ້ການສະໜັບສະໜູນການເປັນປະທານໝູນວຽນອາຊຽນ ຂອງ ສປປ ລາວ ໃນປີ 2024 ໃຫ້ໄດ້ຮັບຜົນສຳເລັດຢ່າງຈົບງາມ. ຝ່າຍລາວໄດ້ສະແດງຄວາມຂອບໃຈ ຕໍ່ການສະໜັບສະໜູນ ແລະ ການຊ່ວຍເຫຼືອດ້ານຕ່າງໆຂອງ ສິງກະໂປ ຕໍ່ ສປປ ລາວ ເປັນຕົ້ນແມ່ນ ດ້ານການພັດທະນາຊັບພະຍາກອນມະນຸດ, ສາທາລະນະສຸກ ແລະ ຫວັງວ່າໃນຕໍ່ໜ້າ ຝ່າຍສິງກະໂປ ຈະສົ່ງເສີມການໄປມາຫາສູ່ ລະຫວ່າງ ປະຊາຊົນສອງຊາດໃຫ້ຫຼາຍຂຶ້ນ.
ໃນໄລຍະການເຄື່ອນໄຫວຢ້ຽມຢາມດັ່ງກ່າວ, ທ່ານ ທອງສະຫວັນ ພົມວິຫານ ພ້ອມດ້ວຍຄະນະ ຍັງໄດ້ມີໂອກາດຢ້ຽມຢາມໂຮງໝໍຊຸມຊົນອຸທຣາມ (Outram Community Hospital), ໂຮງຮຽນປະຖົມວາເລີ (Valour Primary School) ແລະ ມູນນິທິສາກົນສິງກະໂປ (SIF) ເພື່ອແລກປ່ຽນບົດຮຽນ ກ່ຽວກັບ ລະບົບການຮັກສາສຸຂະພາບ, ການສຶກສາ ແລະ ບັນດາກິດຈະກຳທາງສັງຄົມຂອງ ສິງກະໂປ.
ການຢ້ຽມຢາມ ສິງກະໂປ ຂອງຫົວໜ້າຄະນະພົວພັນຕ່າງປະເທດສູນກາງພັກ ໃນຄັ້ງນີ້ ໄດ້ຮັບຜົນສຳເລັດຕາມຄາດໝາຍ, ຊຶ່ງແມ່ນໜຶ່ງໃນບັນດາກິດຈະກໍາ ເພື່ອສົ່ງເສີມ ສາຍພົວພັນມິດຕະພາບຂອງສອງປະເທດ ລາວ-ສິງກະໂປ, ຊຸກຍູ້ການພົວພັນດ້ານພັກ, ສ້າງຄວາມເຂົ້າອົກເຂົ້າໃຈ ແລະ ການໄປມາຫາສູ່ກັນ ລະຫວ່າງ ປະຊາຊົນສອງຊາດ, ສ້າງສະພາບແວດລ້ອມທີ່ເອື້ອອໍານວຍຕໍ່ພາລະກິດແຫ່ງການສ້າງສາ ແລະ ພັດທະນາປະເທດຊາດ, ນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ກໍຄື ເພື່ອສົ່ງເສີມສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20