ສະຫາຍຮອງຄະນະພົວພັນຕ່າງປະເທດສູນກາງພັກ ຕ້ອນຮັບ ການເຂົ້າອວຍພອນ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 69 ປີ ຂອງ ເອກອັກຄະລັດຖະທູດ ສສ ຫວຽດນາມ.

ເຜີຍ​ແຜ່​ໂດຍ​: moderator ເວ​ລາ: 25/03/2024 09:24:26 ຈຳ​ນວນ​​ຢ້ຽມ​ຊົມ 252 ຄັ້ງ ​

        ໃນຕອນ​ເຊົ້າຂອງວັນ​ທີ  21 ມີນາ 2024, ສະ​ຫາຍ ວາລະໄຊ ເລັ່ງສະຫວັດ, ຮອງຫົວ​ໜ້າ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ປະຊາຊົນ ປະຕິວັດລາວ ​ໄດ້​ຕ້ອນຮັບ​ ສະຫາຍ  ຫງວຽນບ໋າຮຸ່ງ, ​ເອກ​ອັກ​ຄະ​ລັດ​ຖະ​ທູດ ວິສາມັນຜູ້ມີອໍານາດເຕັມ ແຫ່ງ ສາ​ທາ​ລະ​ນະ​ລັດ ສັງ​ຄົມ​ນິ​ຍົມ ຫວຽດ​ນາມ ປະ​ຈຳ ສາ​ທາ​ລະ​ນະ​ລັດ​ ປະ​ຊາ​ທິ​ປະ​ໄຕ ປະ​ຊາ​ຊົນ​ລາວ ພ້ອມດ້ວຍຄະນະ ເຂົ້າອວຍພອນ ເນື່ອງໃນໂອກາດ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 69 ປີ.

        ສະຫາຍ ວາລະໄຊ ເລັ່ງສະຫວັດ ໄດ້ສະແດງຄວາມຂອບໃຈຕໍ່ ສະຫາຍ ຫງວຽນບ໋າຮຸ່ງ ພ້ອມດ້ວຍຄະນະ ທີ່ມາອວຍພອນ ໃນໂອກາດວັນດັ່ງກ່າວ ເຊິ່ງເປັນການສະແດງເຖິງ ໄມຕີຈິດມິດຕະພາບແຫ່ງສາຍພົວພັນອັນເປັນມູນເຊື້ອທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ກໍ່ຄື ລະຫວ່າງ ຄະນະພົວພັນຕ່າງປະເທດສູນກາງພັກ ແລະ ສະຖານເອກອັກຄະລັດຖະທູດຫວຽດນາມ, ເຊິ່ງສະຫາຍ ໄດ້ເນັ້ນວ່າ ພັກປະຊາຊົນ ປະຕິວັດລາວ ແລະ ພັກກອມມູນິດຫວຽດນາມ ມີຕົ້ນກໍາເນີດມາຈາກ ພັກກອມມູນິດອິນດູຈີນ ອັນດຽວກັນ, ເຊິ່ງໃນຕະຫຼອດໄລຍະ 69 ປີ ແຫ່ງການກໍາເນີດ ແລະ ເຕີບໃຫຍ່ເຂັ້ມແຂງ, ພັກປະຊາຊົນ ປະຕິວັດລາວ ໄດ້ແບກຫາບພາລະກໍາປະຫວັດສາດ ໃນການນໍາພາການປະຕິວັດລາວ ເຮັດສໍາເລັດ ພາລະກິດປົດປ່ອຍປະເທດຊາດ, ສືບຕໍ່ປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອກ້າວສູ່ຈຸດໝາຍສັງຄົມນິຍົມ, ເຖິງວ່າ ຈະໄດ້ຮັບຜົນກະທົບຈາກ ສະພາບການພາກພື້ນ ແລະ ສາກົນ, ຄວາມຫຍຸ້ງຍາກທາງດ້ານເສດຖະກິດ-ການເງິນ, ແຕ່ ພັກ, ລັດຖະບານລາວ ກໍ່ໄດ້ມີຄວາມພະຍາຍາມສູງໃນການແກ້ໄຂບັນຫາ,  ຊີວິດການເປັນຢູ່ຂອງປະຊາຊົນລາວບັນດາເຜົ່າ ນັບມື້ໄດ້ຮັບການປັບປຸງດີຂື້ນເທື່ອລະກ້າວ. ພ້ອມນັ້ນ, ສະຫາຍ ຍັງໄດ້ສະແດງຄວາມຂອບໃຈ ແລະ ຮູ້ບຸນຄຸນຢ່າງເລິກເຊິ່ງຕໍ່ ພັກ, ລັດ ແລະ ປະຊາຊົນ ຫວຽດນາມ ອ້າຍນ້ອງ ທີ່ໄດ້ໃຫ້ການຊ່ວຍເຫຼືອອັນໃຫຍ່ຫຼວງ, ລໍ້າຄ່າ, ທັນການ ແລະ ມີປະສິດທິຜົນແກ່ ພາລະກິດຕໍ່ສູ້ກູ້ຊາດ ໃນເມື່ອກ່ອນ ກໍ່ຄື ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຂອງປະຊາຊົນລາວ ໃນປັດຈຸບັນ, ຍິນດີຮ່ວມກັບ ສະຫາຍທູດ ກໍ່ຄື ສະຖານທູດ ຫວຽດນາມ ປະຈໍາ ສປປ ລາວ ເພື່ອສືບຕໍ່ເພີ່ມພູນຄູນສ້າງ ແລະ ເສີມຂະຫຍາຍສາຍພົວພັນດັ່ງກ່າວ ໃຫ້ງອກງາມຍິ່ງໆຂຶ້ນ.

         ສະຫາຍ ຫງວຽນບ໋າຮຸ່ງ ໄດ້​ສະ​ແດງ​ຄວາມ​ຊົມ​ເຊີຍ ແລະ ຕີ​ລາ​ຄາ​ສູງ ຕໍ່​ບັນ​ດາ​ຜົນ​ສຳ​ເລັດ ໃນດ້ານຕ່າງໆ ແລະ ຜົນ​ງານ​ອັນ​ໃຫຍ່​ຫລວງ, ຮອບ​ດ້ານ​ຂອງ ​ປະ​ຊາ​ຊົນລາວ  ຍາດ​ມາ​ໄດ້ຕະຫຼອດໄລຍະ 69 ປີ ທີ່ຜ່ານມາ ພາຍໃຕ້ການນໍາພາ ອັນຖືກຕ້ອງ ແລະ ສະຫຼາດສ່ອງໃສຂອງ ພັກປະຊາຊົນ ປະຕິວັດລາວ, ປະຊາຊົນລາວ ໄດ້ຜ່ານຜ່າຄວາມຫຍຸ້ງຍາກ, ສີ່ງທົດສອບນາໆປະການ, ຍາດໄດ້ໄຊຊະນະອັນໃຫຍ່ຫຼວງ, ມີຄວາມໝາຍປະຫວັດສາດໃນພາລະກິດການຕໍ່ສູ້ປົດປ່ອຍຊາດ, ກໍ່ຄື ພາລະກິດ ແຫ່ງ ການປົກປັກຮັກສາ ແລະ ສ້າງສາພັດທະນາປະເທດຊາດ ໃນປັດຈຸບັນ, ເຊື່ອໝັ້ນວ່າ ດ້ວຍມູນເຊື້ອອັນພິລະອາດຫານ ແລະ ປີຊາສາມາດຂອງ ພັກ ປປ ລາວ ແລະ ບັນດາຜົນສໍາເລັດທີ່ຍາດມາໄດ້ນັ້ນ, ພັກ, ລັດ ແລະ ປະຊາຊົນລາວ ຈະສືບຕໍ່ຍາດໄດ້ບັນດາຜົນສໍາເລັດໃໝ່ໃຫຍ່ຫຼວງກວ່າເກົ່າ ໃນການສືບຕໍ່ປະຕິບັດມະຕິກອງປະຊຸມໃຫຍ່ ສະໄໜ XI ຂອງພັກປະຊາຊົນ ປະຕິວັດລາວ ໃຫ້ປະສົບຜົນສໍາເລັດຢ່າງມີໄຊ.

        ສອງຝ່າຍ ຕ່າງກໍ່ໄດ້ຕີລາຄາສູງ ຕໍ່ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ທີ່ ສືບຕໍ່ໄດ້ຮັບການເພີ່ມພູນຄູນສ້າງ ແລະ ເສີມຂະຫຍາຍກ້າວເຂົ້າສູ່ລ່ວງເລິກ ແລະ ມີປະສິດທິຜົນໃນທຸກຂົງເຂດວຽກງານ ເພື່ອນໍາເອົາຜົນປະໂຫຍດຕົວຈິງ ມາສູ່ປະຊາຊົນສອງຊາດ ລາວ-ຫວຽດນາມ.

 

---