ຄະນະຜູ້ແທນພັກ ປປ ລາວ ສຳເລັດການເຂົ້າຮ່ວມກອງປະຊຸມອົງການຊາວໜຸ່ມໄອແຄັບ ຄັ້ງທີ 7 (The ICAPP Youth Wing) ໃນວັນທີ 23-26 ກຸມພາ 2024 ທີ່ ນະຄອນຫຼວງອູລານບາຕໍ, ປະເທດມົງໂກລີ.
ເຜີຍແຜ່ໂດຍ: moderator ເວລາ: 06/03/2024 15:08:32 ຈຳນວນຢ້ຽມຊົມ 228 ຄັ້ງ ຄະນະຜູ້ແທນພັກ ປປ ລາວ ນໍາໂດຍ ຜູ້ຕາງໜ້າຈາກສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ປະເທດມົງໂກລີ, ໄດ້ເຂົ້າຮ່ວມກອງປະຊຸມຊາວໜຸ່ມໄອແຄັບ ຄັ້ງທີ 7 ພາຍໃຕ້ຫົວຂໍ້ “ພວກເຮົາເຫັນດີໃຫ້ມີຊາວໜຸ່ມໃນສະພາ” (We Say Yes to Youth in Parliament), ເຊິ່ງໄດ້ຈັດຂຶ້ນຢູ່ທີ່ ນະຄອນຫຼວງອູລານບາຕໍ, ປະເທດມົງໂກລີ ໃນລະຫວ່າງວັນທີ 23-26 ກຸມພາ 2024 ພາຍໃຕ້ການເປັນເຈົ້າພາບຂອງພັກປະຊາຊົນມົງໂກລີ, ໂດຍມີຜູ້ເຂົ້າຮ່ວມທັງໝົດ 176 ທ່ານ ຈາກ 18 ພັກການເມືອງ ທີ່ມາຈາກ 12 ປະເທດ, ອົງການສັງຄົມນິຍົມສາກົນ ແລະ ສະຫະພັນລັດຖະສະພາສາກົນ.
ກອງປະຊຸມຊາວໜຸ່ມໄອແຄັບ ຄັ້ງທີ 7 ໄດ້ຈັດຂື້ນເພື່ອເປັນການສືບຕໍ່ຜົນສໍາເລັດຂອງກອງປະຊຸມຄັ້ງທີ 6 ໂດຍໄດ້ປຶກສາຫາລືກັນ ກ່ຽວກັບ ບົດບາດ, ພຶດຕິກໍາ ແລະ ຄວາມສາມາດຂອງຊາວໜຸ່ມໃນພາກພື້ນ ໃນການເຂົ້າເຖິງການສຶກສາ, ການຈ້າງງານ ແລະ ການຮັບມືກັບການເລືອກປະຕິບັດທາງສັງຄົມໃນຮູບແບບຕ່າງໆທີ່ເພີ່ມທະວີຂຶ້ນ ອັນໄດ້ກາຍ ເປັນສິ່ງທ້າທ້າຍໃຫມ່ສຳລັບຊາວໜຸ່ມ. ບັນດາຜູ້ແທນກອງປະຊຸມ ຍັງໄດ້ແລກປ່ຽນບົດບາດຂອງຊາວໜຸ່ມຢູ່ໃນບັນດາອົງ ການບໍລິຫານຂອງພັກ-ລັດ ໂດຍສະເພາະໃນສະພາ ເຊິ່ງໄດ້ມີອັດຕາສ່ວນທີ່ຫຼຸດລົງຕາມການລາຍງານໃນຫຼາຍປະເທດ ແລະ ຈະເຮັດໃຫ້ຄວາມສຳຄັນຂອງຊາວໜຸ່ມໃນເວທີການເມືອງເຂົ້າໃນຂະບວນການຕັດສິນໃຈຕ່າງໆນັ້ນຫຼຸດລົງເຊັ່ນດຽວກັນ; ການ ສະໜັບສະໜູນບັນດາໂຄງການ ແລະ ກິດຈະກໍາຕ່າງໆ ເພື່ອພັດທະນາພາວະຄວາມເປັນຜູ້ນໍາໃຫ້ກັບຊາວໜຸ່ມແມ່ນມີຄວາມ ຈໍາເປັນຢ່າງຍິ່ງ ໃນຍຸກສະໄຫມໃຫມ່ ເພື່ອເປັນການກະກຽມຄວາມພ້ອມຮອບດ້ານໃຫ້ຊາວໜຸ່ມ ກໍຄື ການເພີ່ມສິດຂອງຊາວໜຸ່ມໃນການສາມາດມີສ່ວນຮ່ວມໃນລະບົບການເມືອງດ້ວຍຫຼາຍຮູບການ ເປັນຕົ້ນແມ່ນ ການເຂົ້າຮ່ວມການເລືອກຕັ້ງ, ລົງຄະແນນສຽງ ແລະ ຮັບເລືອກຕັ້ງໃນສະພາ ເຊິ່ງຈະປະກອບສ່ວນເຂົ້າໃນແນວຄິດ “ການຫັນເປັນສະພາ 3D” ກໍຄື ດີຈີຕອນ, ປະຊາທິປະໄຕ ແລະ ມີເປົ້າໝາຍ (Digital, Democratic, Deliberative). ກອງປະຊຸມຄັ້ງນີ້ ຍັງໄດ້ຮັບຊາບ ກ່ຽວກັບ ສະມາຊິກຫ້ອງການຊາວໜຸ່ມໄອແຄັບຊຸດໃຫມ່ທີ່ຈະປະຕິບັດໜ້າທີ່ໄລຍະປີ 2024-2025.
ບັນດາຜູ້ແທນກອງປະຊຸມ ໄດ້ເປັນເອກະພາບກັນຮັບຮອງເອົາຖະແຫຼງການສຸດທ້າຍຂອງກອງປະຊຸມ ຊຶ່ງໄດ້ເນັ້ນໜັກໃຫ້ເຫັນເຖິງບົດບາດສໍາຄັນຂອງບັນດາພັກການເມືອງ ກໍຄື ການຊຸກຍູ້ລັດຖະບານຂອງບັນດາປະເທດໃຫ້ມີນະໂຍບາຍສົ່ງເສີມຊາວໜຸ່ມ, ສົ່ງເສີມການເຄື່ອນໄຫວຮ່ວມກັນຂອງບັນດາພັກການເມືອງໃນອາຊີ ເພື່ອຊຸກຍູ້ ແລະ ເສີມຂະຫຍາຍການມີສ່ວນຮ່ວມຂອງຊາວໜຸ່ມໃນສະພາ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20