ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບເອກອັກຄະລັດຖະທູດ ເບລາຣຸດຊີ

ເຜີຍ​ແຜ່​ໂດຍ​: moderator ເວ​ລາ: 29/02/2024 09:59:25 ຈຳ​ນວນ​​ຢ້ຽມ​ຊົມ 288 ຄັ້ງ ​

        ໃນຕອນບ່າຍ ຂອງວັນທີ 27 ກຸມພາ 2024, ທີ່ສໍານັກງານ ຄະນະພົວພັນຕ່າງປະເທດສູນກາງພັກ, ທ່ານ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ອູລາດຊີເມຍ ບາຣາວິກູ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ເບລາຣຸດຊີ ປະຈໍາ ສປປ ລາວ ທີ່ມີສໍານັກງານສະຖານທູດຕັ້ງຢູ່ ນະຄອນຫຼວງຮ່າໂນ້ຍ, ສສ.ຫວຽດນາມ.

         ໃນໂອກາດນີ້, ທ່ານ ທອງສະຫວັນ ພົມວິຫານ ໄດ້ກ່າວສະແດງຄວາມຍິນດີ ຕໍ່ ການເດີນທາງມາເຄື່ອນໄຫວວຽກງານຢູ່ລາວ ແລະ ຍາດໂອກາດມາພົບປະເຮັດວຽກຢູ່ ຄຕພ, ຊຶ່ງເປັນຄັ້ງທໍາອິດຂອງການເດີນທາງມາຢ້ຽມຢາມລາວ ຂອງທ່ານທູດ ອັນເປັນການປະກອບສ່ວນ ຢ່າງຕັ້ງໜ້າເຂົ້າໃນການເສີມຂະຫຍາຍ ການພົວພັນຮ່ວມມື ລະຫວ່າງ ສອງປະເທດ ທີ່ພວມຢູ່ໃນບັນຍາກາດແຫ່ງການກະກຽມສະເຫຼີມສະຫຼອງ ວັນສ້າງຕັ້ງສາຍພົວພັນການທູດ ລາວ-ເບລາຣຸດຊີ ຄົບຮອບ 30 ປີ ຢູ່ນະຄອນຫຼວງວຽງຈັນ. ພ້ອມກັນນີ້, ທ່ານ ທອງສະຫວັນ ພົມວິຫານ ກໍ່ໄດ້ຍົກໃຫ້ທ່ານທູດ ເຫັນພາລະບົດບາດຂອງ ຄຕພ ກໍ່ຄືຂອງ ພັກ ປປ ລາວ ໃນການເຄື່ອນໄຫວວຽກງານການຕ່າງປະເທດດ້ານພັກ ແລະ ການທູດປະຊາຊົນ, ໄດ້ສະແດງຄວາມຮູ້ບຸນຄຸນຕໍ່ການຊ່ວຍເຫຼືອອັນລໍ້າຄ່າຂອງລັດຖະບານ ແລະ ປະຊາຊົນເບລາຣຸດຊີ ໃນເມື່ອກ່ອນທີ່ມີຕໍ່ ປະຊາຊົນລາວ ໂດຍສະເພາະດ້ານການສຶກສາ, ຊຶ່ງໃນປັດຈຸບັນ ມີອະດີດນັກສຶກສາຫຼາຍທ່ານ ທີ່ຈົບຈາກ   ສ.ເບລາຣຸດຊີ ໄດ້ເຄື່ອນໄຫວຢ່າງຕັ້ງໜ້າຢູ່ໃນຖັນແຖວ ພັກ, ລັດ ແລະ ທຸລະກິດໃນ ສປປ ລາວ. ທ່ານຫົວໜ້າ ຄຕພ ຍັງໄດ້ຕີລາຄາສູງຕໍ່ສາຍພົວພັນ ແລະ ການຮ່ວມມືທີ່ມີມູນເຊື້ອອັນດີງາມ ລະຫວ່າງ ລາວ-ເບລາຣຸດຊີ ທີ່ມີມາແຕ່ດົນນານ ແລະ ໄດ້ຮັບການສືບຕໍ່ພັດທະນາໃຫ້ນັບມື້ນັບແໜ້ນແຟ້ນຍິ່ງຂຶ້ນ ເປັນຕົ້ນດ້ານການເມືອງ ທີ່ມີບາດກ້າວຂະຫຍາຍຕົວດີ ແລະ ໄດ້ປຶກສາຫາລື ເພື່ອຊອກຫາຊ່ອງທາງສົ່ງເສີມການຮ່ວມມືດ້ານເສດຖະກິດ, ການຄ້າ, ສາທາລະນະສຸກ, ການສຶກສາ ແລະ ດ້ານອື່ນໆ ລວມເຖິງການພົວພັນດ້ານພັກ ແລະ ການໄປມາຫາສູ່ລະຫວ່າງປະຊາຊົນສອງຊາດ ກໍ່ຄືການທູດປະຊາຊົນ ເພື່ອເຮັດໃຫ້ສາຍພົວພັນ ແລະ ການຮ່ວມມື ລະຫວ່າງ ສອງປະເທດ ມີບາດກ້າວຂະຫຍາຍຕົວໃໝ່, ມີລັກສະນະກວ້າງຂວາງ, ເລິກເຊິ່ງ ແລະ ມີໝາກມີຜົນເພີ່ມຂຶ້ນ.

        ທ່ານທູດ ເບລາຣຸດຊີ ໄດ້ສະແດງຄວາມເຫັນດີເປັນເອກະພາບໃນການຊຸກຍູ້ການພົວພັນຮ່ວມມື ລາວ-ເບລາຣຸດຊີ ໃຫ້ມີບາດກ້າວຂະຫຍາຍຕົວຍິ່ງຂຶ້ນ ໂດຍສະເພາະ ເພີ່ມທະວີການຮ່ວມມືທາງດ້ານການຄ້າ ແລະ ການລົງທຶນນໍາກັນໃຫ້ຫຼາຍຂຶ້ນ, ຊຸກຍູ້ໃຫ້ນັກທຸລະກິດ ຂອງສອງປະເທດ ໄດ້ມີການພົບປະກັນ, ຂະຫຍາຍການຮ່ວມມືທາງດ້ານທະນາຄານ, ດ້ານການທ່ອງທ່ຽວ, ການແລກປ່ຽນຄະນະຜູ້ແທນຊາວໜຸ່ມເຍົາວະຊົນ, ຊຸກຍູ້ໃຫ້ມີການຕິດຕໍ່ພົວພັນໄປມາຫາສູ່ກັນ ລະຫວ່າງ ບຸກຄົນກັບບຸກຄົນ ແລະ ອົງການຈັດຕັ້ງທາງສັງຄົມ ກໍ່ຄືວຽກງານການພົວພັນດ້ານພັກ ແລະ ການທູດປະຊາຊົນ. ພ້ອມດຽວກັນນີ້, ທ່ານທູດ ຍັງໄດ້ສະແດງຄວາມຂອບໃຈຕໍ່ການສະໜັບສະໜູນຂອງ ສປປ ລາວ ທີ່ມີຕໍ່ ສ.ເບລາຣຸດຊີ ໃນເວທີພາກພື້ນ ແລະ ສາກົນ ກໍ່ຄືໃນຂອບຂອງ ສປຊ ພ້ອມທັງຂໍການສະໜັບສະໜູນຈາກ ສປປ ລາວ ໃນການເຄື່ອນໄຫວວຽກງານອາຊຽນ-ເບລາຣຸດຊີ.

        ໃນຕອນທ້າຍຂອງການພົບປະ, ທ່ານຫົວໜ້າ ຄຕພ ໄດ້ອວຍພອນໃຫ້ ການກະກຽມສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ເບລາຣຸດຊີ ຄົບຮອບ 30 ປີ ຢູ່ນະຄອນຫຼວງວຽງຈັນ ແລະ ການມາເຄື່ອນໄຫວວຽກງານຂອງທ່ານທູດເບລາຣຸດຊີ ໃນຄັ້ງນີ້ ຈົ່ງປະສົບຜົນສໍາເລັດຢ່າງຈົບງາມ, ອວຍພອນໃຫ້ການພົວພັນຮ່ວມມືລະຫວ່າງ ສອງປະເທດ ໄດ້ຮັບການເສີມຂະຫຍາຍ ແລະ ແຕກດອກອອກຜົນຍິ່ງໆຂຶ້ນ. ທ່ານທູດ ອູລາດຊີເມຍ ບາຣາວິກູ ໄດ້ສະແດງຄວາມຂອບໃຈ ທ່ານຫົວໜ້າ ຄຕພ ທີ່ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ແລະ ອວຍພອນໃຫ້ການເປັນປະທານອາຊຽນຂອງ ສປປ ລາວ ໃນປິ 2024 ຈະມີໝາກມິຜົນ ແລະ ປະສົບຜົນສໍາເລັດເປັນຢ່າງດີ.

---