ທ່ານ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າ ຄຕພ ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ແອວເບີດ ຈົວ, ຮອງລັດຖະມົນຕີກະຊວງການຕ່າງປະເທດ ສິງກະໂປ
ເຜີຍແຜ່ໂດຍ: editor ເວລາ: 16/02/2024 11:20:07 ຈຳນວນຢ້ຽມຊົມ 263 ຄັ້ງ ໃນຕອນເຊົ້າຂອງ ວັນທີ 13 ຕຸລາ 2023, ທ່ານ ທອງສະຫວັນ ພົມວິຫານ, ກໍາມະການສູນກາງພັກ, ຫົວຫນ້າ ຄະນະພົວພັນຕ່າງປະເທດສູນກາງພັກ ປະຊາຊົນ ປະຕິວັດລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ແອວເບີດ ຈົວ, ຮອງລັດຖະມົນຕີກະຊວງການຕ່າງປະເທດ ສາທາລະນະລັດ ສິງກະໂປ ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການ ໃນລະຫວ່າງ ວັນທີ 12-13 ຕຸລາ 2023.
ໃນໂອກາດດັ່ງກ່າວ, ທ່ານຫົວໜ້າຄະນະພົວພັນຕ່າງປະເທດສູນກາງພັກ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການເດີນທາງມາຢ້ຽມຢາມ ສປປ ລາວ ແລະ ການມາພົບປະເຮັດວຽກຢູ່ ຄະນະພົວພັນຕ່າງປະເທດສູນກາງພັກ ຂອງຄະນະໃນຄັ້ງນີ້, ອັນເປັນການປະກອບສ່ວນສໍາຄັນ ເຂົ້າໃນການຮັດແໜ້ນ ແລະ ເສີມຂະຫຍາຍ ສາຍພົວພັນມິດຕະພາບ ລາວ-ສິງກະໂປ ໃຫ້ແຕກດອກອອກຜົນຍິ່ງໆຂຶ້ນ.
ທ່ານຫົວໜ້າຄະນະພົວພັນຕ່າງປະເທດສູນກາງພັກ ໄດ້ສະແດງຄວາມຊົມເຊີຍ ຜົນສໍາເລັດໃນການຈັດກອງປະຊຸມປຶກສາຫາລືດ້ານການເມືອງ ຄັ້ງປະຖົມມະເລີກ ລະຫວ່າງ 2 ກະຊວງການຕ່າງປະເທດ ລາວ-ສິງກະໂປ ຕາມສັນຍາຮ່ວມມື ທີ່ໄດ້ລົງນາມຮ່ວມກັນ ໃນປີ 2022 ຜ່ານມາ, ເປັນການປະກອບ ສ່ວນຢ່າງຕັ້ງໜ້າເຂົ້າ ໃນການເສີມຂະຫຍາຍ ສາຍພົວພັນມິດຕະພາບ ລະຫວ່າງ ສປປ ລາວ-ສິງກະໂປ ກໍ່ຄື ການຊຸກຍູ້ສົ່ງເສີມການໄປມາຫາສູ່ກັນ ລະຫວ່າງ ປະຊາຊົນ 2 ຊາດ.
ໃນການພົບປະດັ່ງກ່າວ, ທ່ານ ແອວເບີດ ຈົວ ໄດ້ສະແດງຄວາມຂອບໃຈ ຕໍ່ການຕ້ອນຮັບອັັນອົບອຸ່ນ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສິງກະໂປ-ສປປ ລາວ ໃນໄລຍະຜ່ານມາ ແລະ ການພົວພັນຮ່ວມມື ລະຫວ່າງ ສອງປະເທດ ສິງກະໂປ-ສປປ ລາວ ໃຫ້ໄດ້ຮັບການຂະຫຍາຍຕົວຢ່າງຕໍ່ເນື່ອງ ເພື່ອນໍາເອົາຜົນປະໂຫຍດຕົວຈິງມາສູ່ ປະຊາຊົນສອງຊາດ ສິງກະໂປ-ລາວ; ພິເສດ ທ່ານ ຍິນດີສະໜັບສະໜູນການເປັນປະທານອາຊຽນ ຂອງ ສປປ ລາວ ໃນປີ 2024 ໃຫ້ສໍາເລັດຜົນຢ່າງຈົບງາມ; ສືບຕໍ່ສະໜັບສະໜູນການຮ່ວມມື ກັບ ສປປ ລາວ ໃນຂະແໜງການພັດທະນາຊັບພະຍາ ກອນມະນຸດ, ຂົງເຂດພະລັງງານສະອາດ ແລະ ຍືນຍົງ ຕາມທ່າແຮງຂອງສອງຝ່າຍ, ສືບຕໍ່ເປັນຂົວເຊື່ອມມິດຕະພາບ ໃນການປະສານງານທີ່ດີໃນການຊຸກຍູ້ ການພົວພັນຮ່ວມມືດ້ານພັກ ກໍ່ຄື ການທູດປະຊາຊົນ ລະຫວ່າງ ສອງປະເທດ ເພື່ອສ້າງຄວາມສາມັກຄີມິດຕະພາບ ແລະ ຄວາມເຂົ້າອົກເຂົ້າໃຈເຊິ່ງກັນ ແລະ ກັນ ລະຫວ່າງ ປະຊາຊົນສອງຊາດ ສິງກະໂປ-ລາວ. ທ່ານ ແອວເບີດ ຈົວ ຍັງໄດ້ເຊື້ອເຊີນ ທ່ານ ທອງສະຫວັນ ພົມວິຫານ ໄປຢ້ຽມຢາມສິງກະໂປ ໃນປີ 2024.
ສອງຝ່າຍ ຕີລາຄາສູງ ຕໍ່ການພົວພັນຮ່ວມມື ລະຫວ່າງ ສອງປະເທດ ຕະຫຼອດໄລຍະເວລາ 49 ປີ (2 ທັນວາ 1974-ປັດຈຸບັນ) ແຫ່ງການສ້າງຕັ້ງສາຍພົວພັນການທູດນໍາກັນ. ເຫັນວ່າການພົວພັນສອງຝ່າຍ ໄດ້ຮັບການເສີມຂະຫຍາຍຢ່າງຕໍ່ເນື່ອງ, ມີການແລກປ່ຽນຄະນະຜູ້ແທນຂັ້ນຕ່າງໆນໍາກັນ, ມີການແລກປ່ຽນຈົດໝາຍຊົມເຊີຍກັນ ໃນໂອກາດວັນສໍາຄັນຕ່າງໆ ຂອງສອງປະເທດ, ມີການສະໜັບສະໜູນຊ່ວຍເຫຼືອກັນ ທັງໃນຂອບສອງຝ່າຍ, ຫຼາຍຝ່າຍ ໃນເວທີພາກພື້ນ ແລະ ສາກົນ; ພິເສດໃນປີ 2024 ແມ່ນຄົບຮອບ 50 ປີ ການສ້າງຕັ້ງສາຍພົວພັນການທູດ ສອງຝ່າຍໄດ້ຢືນຢັນຈະສືບຕໍ່ສົ່ງເສີມ ແລະ ຮັດແໜ້ນສາຍພົວພັນຮ່ວມມື ລະຫວ່າງ ສອງປະເທດ ແລະ ປະຊາຊົນສອງຊາດ ລາວ-ສິງກະໂປ ໃຫ້ໄດ້ຮັບການເສີມຂະຫຍາຍຍິ່ງຂຶ້ນ.
ທ່ານຫົວໜ້າຄະນະພົວພັນຕ່າງປະເທດສູນກາງພັກ ຍັງໄດ້ແຈ້ງໃຫ້ຝ່າຍແຂກຊາບ ກ່ຽວກັບ ທີ່ຕັ້ງ ແລະ ພາລະບົດບາດຂອງ ຄຕພ ແລະ ຍິນດີຮ່ວມກັບຝ່າຍສິງກະໂປ ກໍ່ຄື ສະຖານທູດ ສິງກະໂປ ປະຈໍາ ສປປ ລາວ ໃນການເພີ່ມທະວີ ສາຍພົວພັນ ແລະ ການຮ່ວມມືດ້ານພັກ ກໍ່ຄື ວຽກງານການທູດປະຊາຊົນ ກັບ ສິງກະໂປ ເພື່ອປະກອບສ່ວນເຂົ້າໃນການຊຸກຍູ້ ແລະ ເສີມຂະຫຍາຍສາຍພົວພັນ ລະຫວ່າງ 2 ປະເທດ ລາວ-ສິງກະໂປ ໃຫ້ແຕກດອກອອກຜົນຍິ່ງຂຶ້ນໆ ນໍາເອົາຜົນປະໂຫຍດຕົວຈິງມາສູ່ປະຊາຊົນ 2 ປະເທດ ລາວ-ສິງກະໂປ ກໍ່ຄື ການເສີມສ້າງສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20