ຄະນະພົວພັນຕ່າງປະເທດສູນກາງພັກຈັດປາຖະກະຖາ ວັນເກີດປະທານ ໄກສອນ ພົມວິຫານ ຄົບຮອບ 103 ປີ

ເຜີຍ​ແຜ່​ໂດຍ​: editor ເວ​ລາ: 15/02/2024 15:38:03 ຈຳ​ນວນ​​ຢ້ຽມ​ຊົມ 334 ຄັ້ງ ​

        ໃນວັນທີ 18 ທັນວາ 2023 ຄະນະພົວພັນຕ່າງປະເທດສູນກາງພັກ(ຄຕພ) ໄດ້ຈັດປາຖະກະຖາວັນເກີດ ປະທານ ໄກສອນ ພົມວິຫານ ຄົບຮອບ 103 ປີ.

        ພາຍໃຕ້ການເປັນ​ປະ​ທານ ຂອງ  ສະຫາຍ ວາລະໄຊ ເລັ່ງສະຫວັດ, ກຳມະການຄະນະພັກ, ຮອງຫົວໜ້າ ຄຕພ, ມີ​ຄະ​ນະ​ບໍ​ລິ​ຫານ​ງານ​ພັກ, ຄະນະນຳ, ​ຄະ​ນະ​ກົມ, ຄະ​ນະພະ​ແນກ ແລະ ພະ​ນັກ​ງານ-ສະ​ມາ​ຊິກ​ພັກ ເຂົ້າ​ຮ່ວມ​ຢ່າງ​ພ້ອມ​ພຽງ.

        ການປາຖະກະຖາຄັ້ງນີ້ ໄດ້ເຊື້ອເຊີນ ສະຫາຍ ນ ພອນລັດສະໝີ ພິມມະສອນ, ຮອງ​ຫົວ​ໜ້າ​ພະ​ແນກ ກິດ​ຈະ​ກຳ ແລະ ໂຄ​ສະ​ນາ  ຫໍພິພິທະພັນ ໄກສອນ ພົມວິຫານ ມາໃຫ້ກຽດເຜີຍແຜ່ ເຊິ່ງ ສະຫາຍ ໄດ້ຍົກໃຫ້ເຫັນເຖິງຊີວິດ ແລະ ການເຄື່ອນໄຫວປະຕິວັດ ຂອງ ປະທານ ໄກສອນ ພົມວິຫານ, ຕະຫຼອດຊີວິດຂອງ ປະທານ ໄກສອນ ພົມວິຫານ ແມ່ນອຸທິດທຸກຢ່າງໃຫ້ກັບພາລະກິດປະຕິວັດ ປະເທດເຮົາໄດ້ມີຫຼາຍວິລະກຳອັນລ້ຳເລີດ ທີ່ສະແດງໃຫ້ເຫັນເຖິງນໍ້າໃຈຮັກຊາດອັນສູງສົ່ງ, ນໍ້າໃຈກຳມະຊິບອັນໜັກແໜ້ນ, ຄວາມເດັດດ່ຽວບໍ່ຍອມຈຳນົນສັດຕູ, ຄວາມສະຫຼຽວສະຫຼາດ ແລະ ຄວາມເສຍສະຫຼະເພື່ອປະເທດຊາດ, ເພື່ອປະຊາຊົນຢ່າງບໍ່ມີຂີດຈຳກັດ ເຊິ່ງສະແດງອອກຢູ່ໃນພຶດຕິກຳຕົວຈິງ ແລະ ຜ່ານຂະບວນວິວັດແຫ່ງການນຳພາ ຕໍ່ສູ້ປົດປ່ອຍຊາດ ກໍຄືພາລະກິດແຫ່ງການປົກປັກຮັກສາ ແລະ ພັດທະນາປະເທດຊາດ ຈົນສາມາດຍາດໄດ້ໄຊຊະນະຢ່າງສົມບູນ ແລະ ສະຖາປະນາ ເປັນປະເທດ ສປປ ລາວ ໃນປັດຈຸບັນ; ໄຊຊະນະທີ່ຍາດມາໄດ້ທັງໝົດນັ້ນແມ່ນຍ້ອນຄວາມສະຫຼາດຫຼັກແຫຼມ, ຄວາມມີໄຫວພິບ ຂອງພັກເຮົາ ແລະ ຄວາມສາມັກຄີ ເປັນຈິດໜຶ່ງໃຈດຽວ ຂອງປວງຊົນລາວທັງຊາດ ໂດຍມີ ປະທານ ໄກສອນ ພົມວິຫານ ເປັນຜູ້ນຳພາ. ສະນັ້ນ ຜົນງານ ອັນຍິ່ງໃຫຍ່ ຂອງປະທານ ໄກສອນ ພົມວິຫານ ໃນພາລະກິດປະຕິວັດປະເທດເຮົາທີ່ຍັງຄົງໄວ້ຄູ່ກັບຊາດລາວເຮົາຕະຫຼອດໄປມີຄື: ປະທານ ໄກສອນ ພົມວິຫານ ເປັນຜູ້ກໍ່ຕັ້ງກອງລາດຊະວົງ ໃນວັນທີ 20 ມັງກອນ 1949 ເຊິ່ງໄດ້ປ່ຽນຊື່ມາເປັນກອງທັບປະຊາຊົນລາວ ໃນປັດຈຸບັນ ແລະ ໄດ້ກຳນົດເອົາວັນດັ່ງກ່າວ ເປັນວັນສ້າງຕັ້ງກອງທັບປະຊາຊົນລາວ; ເປັນຜູ້ນໍາພາ ສ້າງຕັ້ງພັກປະຊາຊົນລາວ ໃນວັນທີ 22 ມີນາ 1955 ກາຍເປັນ ພັກປະຊາຊົນປະຕິວັດລາວ ໃນປັດຈຸບັນ ແລະ ໄດ້ກຳນົດເອົາວັນດັ່ງກ່າວ ເປັນວັນສ້າງຕັ້ງພັກປະຊາຊົນ ປະຕິວັດລາວ; ເປັນຜູ້ນໍາພາ ຕໍ່ສູ້ລົບລ້າງແອກປົກຄອງ ຂອງພວກຈັກກະພັດລ່າເມືອງຂຶ້ນທັງແບບເກົ່າ ແລະ ແບບໃໝ່; ຍາດເອົາເອກະລາດ, ອິດສະຫຼະພາບມາໃຫ້ປະເທດຊາດ ຢ່າງສົມບູນໃນວັນທີ 2 ທັນວາ 1975 ແລະ ນໍາພາສະຖາປະນາປະເທດຊາດເປັນ ສປປ ລາວ ທີ່ເດີນຕາມເສັ້ນທາງສັງຄົມນິຍົມ ແລະ ໄດ້ກຳນົດ ເອົາວັນດັ່ງກ່າວເປັນວັນຊາດ ຂອງ ສປປ ລາວ; ເປັນຜູ້ນໍາພາ ປ່ຽນແປງໃໝ່ ຢ່າງຮອບດ້ານ ແລະ ມີຫຼັກການ ຢູ່ປະເທດເຮົາ, ເຮັດໃຫ້ບາດກ້າວເດີນ ຂອງປະເທດເຮົາ ສອດຄ່ອງກັບສະພາບຄວາມເປັນຈິງ ແລະ ມີການພັດທະນາເປັນກ້າວໆ ໂດຍພາຍໃຕ້ການນໍາພາ ຂອງພັກປະຊາຊົນປະຕິວັດລາວ.

​        ສະນັ້ນ, ສະມາຊິກພັກ ກຳແໜ້ນ ແລະ ຮູ້ບຸນຄຸນ, ຜົນງານອັນຍິ່ງໃຫຍ່ ແລະ ແບບຢ່າງອັນລ້ຳເລີດຂອງປະທານ ໄກສອນ ພົມວິຫານ ໃນພາລະກິດປະຕິວັດ, ພ້ອມທັງເປັນບົດຮຽນອັນລ້ຳຄ່າ ເພື່ອນໍາໄປພັດທະນາຕົນເອງ ກໍຄືເຂົ້າໃນການປະຕິບັດໜ້າທີ່ວຽກງານຕົວຈິງໃຫ້ມີປະສິດທິຜົນດີຂຶ້ນ.

---