ຄະນະພົວພັນຕ່າງປະເທດສູນກາງພັກ ເຜີຍແຜ່ເຊື່ອມຊຶມ ວັນສະຖາປານາ ສ ປປ ລາວ ຄົບຮອບ 48 ປີ ແລະ ມະຕິຄັ້ງທີ 7 ຂອງຄະນະບໍລິຫານງານສູນກາງພັກ ສະໄໝທີ XI

ເຜີຍ​ແຜ່​ໂດຍ​: editor ເວ​ລາ: 15/02/2024 15:32:07 ຈຳ​ນວນ​​ຢ້ຽມ​ຊົມ 354 ຄັ້ງ ​

        ໃນວັນທີ 24 ພະ​ຈິກ 2023 ນີ້ ທີ່ຫ້ອງ​ປະ​ຊຸມ​ໃຫຍ່ ຄ​ຕ​ພ ໄດ້ຈັດພິທີເຊື່ອມຊຶມ ວັນ​ສະ​ຖາ​ປາ​ນາ​ ສ ປປ​ ລາວ ຄົບ​ຮອບ 48 ປີ ແລະ ຜັນຂະຫຍາຍມະ​ຕິ​ກອງ​ປະ​ຊຸມ​ຄົບ​ຄະ​ນະ ຄັ້ງ​ທີ 7 ຂອງຄະນະບໍລິຫານງານສູນກາງພັກ ສະໄໝທີ XI, ໃຫ້ກຽດເປັນ​ປະ​ທານ ແລະ ເຜີຍ​ແຜ່​ໂດຍ  ສະຫາຍ ທອງ​ສະ​ຫວັນ ພົມ​ວິ​ຫານ, ກໍາມະການສູນກາງພັກ, ​ເລ​ຂາ​ຄະ​ນະ​ພັກ, ຫົວ​ໜ້າ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ, ​ມີ​ຄະ​ນະ​ບໍ​ລິ​ຫານ​ງານ​ພັກ, ​ຄະ​ນະ​ກົມ, ຄະ​ນະພະ​ແນກ ແລະ ພະ​ນັກ​ງານ-ສະ​ມາ​ຊິກ​ພັກ ເຂົ້າ​ຮ່ວມ​ຢ່າງ​ພ້ອມ​ພຽງ.

         ສະຫາຍ ທອງ​ສະ​ຫວັນ ພົມ​ວິ​ຫານ ​ໄດ້​ຍົກ​ໃຫ້​ເຫັນຄວາມໝາຍສໍາຄັນຂອງວັນຊາດທີ 2 ທັນ​ວາ ຄົບ​ຮອບ 48 ປີ ພາຍ​ໃຕ້​ການນໍາພາ​ຂອງ​ພັກ ປະ​ຊາ​ຊົນ ປະ​ຕິ​ວັດ​ລາວ ໃນ​ພາ​ລະ​ກິດ ປົກປັກຮັກສາ ແລະ ສ້າງສາປະເທດຊາດ ຕາມຈຸດໝາຍສັງຄົມນິຍົມ; ພັກມີຄວາມສະດຸ້ງໄວ ແລະ ຫັນປ່ຽນໃນການນໍາພາຂອງຕົນໃຫ້ສອດຄ່ອງກັບສະພາບຄວາມເປັນຈິງ, ສາມາດປົກປັກຮັກສາຄວາມເປັນເອກະລາດ, ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດໄວ້ໄດ້ຢ່າງໝັ້ນຄົງ, ເສດຖະກິດ-ສັງຄົມ ມີການຂະຫຍາຍຕົວຢ່າງຕໍ່ເນື່ອງ ຕາມທິດຫັນເປັນອຸດສາຫະກໍາ - ທັນສະໄໝ, ສິດເປັນເຈົ້າ ຂອງປະຊາຊົນບັນດາເຜົ່າ ໄດ້ຮັບການເສີມຂະຫຍາຍ ແລະ ເປີດກວ້າງອອກໃນສັງຄົມ, ຄວາມສາມັກຄີເປັນ ເອກະພາບພາຍໃນຊາດ ນັບມື້ໄດ້ຮັບການປັບປຸງດີຂຶ້ນ ແລະ ທີ່ຕັ້ງບົດບາດອິດທິພົນ ຂອງປະເທດຊາດ ໄດ້ຮັບການເຊີດຊູສູງຂຶ້ນເປັນ​ກ້າວໆມາ. ພວກເຮົາຕ້ອງໄດ້ສ້າງບາດລ້ຽວໃໝ່ ໃຫ້ແກ່ການສ້າງ ແລະ ເສີມຂະຫຍາຍລະບອບປະຊາທິປະໄຕ ປະຊາຊົນ ຕາມຈຸດໝາຍສັງຄົມນິຍົມຢ່າງຫນັກແໜ້ນ, ເຮັດໃຫ້ປະຊາຊົນຮັ່ງມີ, ມີຄວາມຜາສຸກ, ປະເທດຊາດມັ່ງຄັ່ງເຂັ້ມ ແຂງ, ສັງຄົມມີຄວາມສາມັກຄີປອງດອງ, ປະຊາທິປະໄຕ, ຍຸຕິທໍາ ແລະ ສີວິໄລ.

        ໃນ​ໂອ​ກາດ​ດັ່ງ​ກ່າວ ສະຫາຍ ທອງ​ສະ​ຫວັນ ພົມ​ວິ​ຫານ ຍັງໄດ້ເຜີຍ​ແຜ່ການ​ຕີ​ລາ​ຄາ​ການ​ຈັດ​ຕັ້ງ​ປະ​ຕິ​ບັດ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ, ແຜນ​ງົບ​ປະ​ມານ, ແຜນ​ເງິນ​ຕາ ປະ​ຈຳ​ປີ 2023 ແລະ ແຜນ​ການ​ປະ​ຈຳ​ປີ 2024 ຕິດ​ພັນ​ກັບ​ການ​ຈັດ​ຕັ້ງ​ປະ​ຕິ​ບັດ​ວາ​ລະ​ແຫ່ງ​ຊາດ ວ່າ​ດ້ວຍ​ການ​ແກ້​ໄຂ​ຄວາມ​ທຸກ​ຍາກ​ດ້ານ​ເສດ​ຖະ​ກິດ-ການ​ເງິນ ແລະ ວາ​ລະ​ແຫ່ງ​ຊາດ​ວ່າ​ດ້ວຍ​ການ​ແກ້​ໄຂ​ບັນ​ຫາຢາ​ເສບ​ຕິດ; ຕີ​ລາ​ຄາ​ວຽກ​ງານ ປກ​ຊ-ປກ​ສ ແລະ ວຽກ​ງານການ​ຕ່າງ​ປະ​ເທດ ປະ​ຈຳ​ປີ 2023 ແລະ ທິດ​ທາງ ປີ 2024; ການ​ກະ​ກຽມ ແລະ ດຳ​ເນີນກອງ​ປະ​ຊຸມ 3 ຂັ້ນ​ຂອງ​ພັກ, ການ​ຈັດ​ຕັ້ງ ແລະ ການ​ເຄື່ອນ​ໄຫວ​ຂອງ​ຄະ​ນະ​ພັກ​ຮາກ​ຖານ​ກຸ່ມ​ບ້ານ ຫຼື ບ້ານ​ໃຫຍ່ ແລະ ວາງ​ຈຸດ​ສຸມ​ນຳ​ພາ​ຊີ້​ນຳ​ຂອງ​ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ ແຕ່​ນີ້​ຮອດກອງ​ປະ​ຊຸມ​ຄົບ​ຄະ​ນະ​ຄັ້ງ​ທີ 8 ສະ​ໄໝ​ທີ XI.

        ​ການ​ເຜີຍ​ແຜ່-ເຊື່ອມ​ຊຶມ​ດັ່ງ​ກ່າວ ໄດ້​ເຮັດ​ໃຫ້ ພະນັກງານ ແລະ ສະມາຊິກພັກ ກຳແໜ້ນຢ່າງເລິກເຊິ່ງ ແລະ ສາມາດນຳໄປຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງໃນຂອບເຂດຄວາມຮັບຜິດຊອບ​ຕົນ.

---