ຄະນະພົວພັນຕ່າງປະເທດສູນກາງພັກ

ຫົວໜ້າຄະນະພົວພັນຕ່າງປະເທດສູນກາງພັກ ພົບປະກັບ ລັດຖະມົນຕີກະຊວງການຕ່າງປະເທດສິງກະໂປ

ເຜີຍແຜ່ໂດຍ: editor ເວລາ: 30/01/2024 09:05:51 ຈຳນວນຢ້ຽມຊົມ 520 ຄັ້ງ

ໃນຕອນເຊົ້າຂອງ ວັນທີ 27 ມັງກອນ 2024, ທີ່ ຄະນະພົວພັນຕ່າງປະເທດສູນກາງພັກ, ທ່ານ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ (ຄຕພ) ໄດ້ພົບປະເຮັດວຽກກັບ ທ່ານ ວິວຽນ ບາລາຄຣິສນານ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ສິງກະໂປ ພ້ອມດ້ວຍຄະນະ ໃນໂອກາດເດີນທາງຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແຕ່ວັນທີ 27-28 ມັງກອນ 2024.

ໃນໂອກາດດັ່ງກ່າວ, ທ່ານ ຫົວໜ້າຄະນະພົວພັນຕ່າງປະເທດ ໄດ້ຕີລາຄາສູງ ຕໍ່ການຢ້ຽມຢາມ ສປປ ລາວ ແລະ ຍາດໂອກາດມາພົບປະເຮັດວຽກຢູ່ ຄຕພ, ອັນໄດ້ເປັນການປະກອບສ່ວນຢ່າງຕັ້ງໜ້າ ເຂົ້າໃນການຮັດແໜ້ນສາຍພົວພັນມິດຕະພາບ ແລະ ການຮ່ວມມື ລາວ-ສິງກະໂປ ທີ່ພວມຢູ່ໃນບັນຍາກາດ ແຫ່ງການສະເຫລີມສະຫລອງວັນສ້າງຕັ້ງສາຍພົວພັນການທູດ ລາວ-ສິງກະໂປ ຄົບຮອບ 50 ປີ; ໄດ້ຕີລາຄາສູງສາຍພົວພັນມິດຕະພາບ ແລະ ການຮ່ວມມືສອງຝ່າຍ ເຊິ່ງເປັນການພົວພັນທີ່ສະເໝີຕົ້ນສະເໝີປາຍ ທັງໄດ້ຮັບການພັດທະນາ ແລະ ເສີມຂະຫຍາຍເປັນກ້າວໆ; ແຈ້ງໃຫ້ຝ່າຍແຂກຊາບ ກ່ຽວກັບທີ່ຕັ້ງ ແລະ ພາລະບົດບາດຂອງ ຄຕພ, ສະພາບພົ້ນເດັ່ນຂອງ ພັກ, ລັດລາວ ໃນການສ້າງສາພັດທະນາເສດຖະກິດ-ສັງຄົມ ຂອງ ສປປ ລາວ ພາຍໃຕ້ການນໍາຂອງ ພັກ ປປ ລາວ ທີ່ສາມາດຍາດໄດ້ຜົນສໍາເລັດໃນຫຼາຍດ້ານ ລວມທັງຄວາມພ້ອມການເປັນປະທານໝູນວຽນອາຊຽນ ໃນປີ 2024; ພ້ອມກັນນັ້ນກໍ່ໄດ້ ສະແດງຄວາມຂອບໃຈ ຕໍ່ການຮ່ວມມື ແລະ ສະໜັບສະໜູນດ້ານຕ່າງໆຂອງລັດຖະບານສິງກະໂປ ຕໍ່ ສປປ ລາວ ຕະຫຼອດໄປລະຜ່ານມາ.

ທ່ານ ວິວຽນ ບາລາຄຣິສນານ ໄດ້ສະແດງຄວາມຂອບໃຈ ຕໍ່ການຕ້ອນຮັບອັັນອົບອຸ່ນ ແລະ ຊົມເຊີຍ ຕໍ່ຜົນບັນດາສໍາເລັດໃນການພັດທະນາເສດຖະກິດ-ສັງຄົມ ພາຍໃຕ້ການນຳພາຂອງພັກປະຊາຊົນ ປະຕິວັດລາວ; ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມື ສິງກະໂປ-ລາວ ຕະຫຼອດ 50 ປີ ຜ່ານມາ ແລະ ຢືນຢັນຈະສືບຕໍ່ເສີມຂະຫຍາຍການພົວພັນຮ່ວມມືສອງຝ່າຍໃຫ້ໄດ້ຮັບການຂະຫຍາຍຕົວຂຶ້ນໄປເລື້ອຍໆ; ຝ່າຍສິງກະໂປຍິນດີໃຫ້ການສະໜັບສະໜູນ ໃນການເປັນປະທານອາຊຽນຂອງ ສປປ ລາວ ໃນປີນີ້ໃຫ້ບັນລຸຜົນສໍາເລັດຢ່າງຈົບງາມ.

ພິເສດ, ໃນການພົບປະຄັ້ງນີ້ທັງສອງຝ່າຍ ມີຄວາມຍິນດີຢ່າງສູງໃນການສືບຕໍ່ຊຸກຍູ້ການພົວພັນຮ່ວມມືດ້ານພັກ ກໍຄືລະຫວ່າງ ພັກ ປປ ລາວ ແລະ ພັກ ກິດປະຊາຂອງສິງກະໂປ; ສົ່ງເສີມວຽກງານການທູດປະຊາຊົນສອງປະເທດ ເພື່ອສ້າງຄວາມເຂົ້າອົກເຂົ້າໃຈລະຫວ່າງ ປະຊາຊົນສອງຊາດ. ພ້ອມທັງຍັງໄດ້ເອກະພາບກັນສືບຕໍ່ຄົ້ນຄວ້າທ່າແຮງໃນການຮ່ວມມືໃນຕໍ່ໜ້າ ໂດຍສະເພາະ ດ້ານພະລັງງານສະອາດ, ພະລັງງານທົດແທນ, ເຕັກໂນໂລຊີ, ຊັບພະຍາກອນບໍ່ແຮ່, ການພັດທະນາຊັບພະກອນມະນຸດ, ການພັດທະກະສິກຳສະອາດ ແລະ ສີຂຽວ, ກາກບອນເຄຼດິດ, ການເຊື່ອມຍົງເຊື່ອມຈອດທາງດ້ານເສດຖະກິດ, ການຄ້າ, ການລົງທຶນ ແລະ ອື່ນໆທີ່ທັງສອງຝ່າຍມີທ່າແຮງບົ່ມຊ້ອນ ເພື່ອນໍາເອົາຜົນປະໂຫຍດຕົວຈິງມາສູ່ ປະຊາຊົນສອງຊາດ ລາວ-ສິງກະໂປ-ລາວໃຫ້ຂະຫຍາຍຕົວຢ່າງຕໍ່ເນື່ອງ ກໍ່ຄື ເພື່ອເສີມສ້າງສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.

ໃນວັນດຽວກັນ, ທ່ານ ທອງສະຫວັນ ພົມວິຫານ ຍັງໄດ້ຕາງໜ້າການນຳລາວ ໃນຖານະແຂກກິດຕິມະສັກເຂົ້າຮ່ວມງານພົບປະອະດີດນັກສຶກສາລາວທີ່ເຄີຍຮໍ່າຮຽນຢູ່ສິງກະໂປ ເຊິ່ງເປັນກິດຈະກຳໜຶ່ງໃນແຜນຢ້ຽມຢາມ ສປປ ລາວ ຂອງ ທ່ານ ວິວຽນ ບາລາຄຣິສນານ. ໃນໂອກາດດັ່ງກ່າວ, ທ່ານຫົວໜ້າ ຄຕພ ສະແດງຄວາມຂອບໃຈ ແລະ ຮູ້ບຸນຄຸນຢ່າງສູງຕໍ່ ລັດຖະບານ ແລະ ປາຊາຊົນສິງກະໂປ ທີ່ໄດ້ໃຫ້ການຊ່ວຍເຫຼືອພັດທະນາຊັບພະກອນມະນຸດໃຫ້ແກ່ ສປປ ລາວ ພາຍໃຕ້ໂຄງການຮ່ວມມືຂອງສິງກະໂປ (SCP) ເລີ່ມແຕ່ປີ 1992 ເຖິງປັດຈຸບັນ ເຊິ່ງມີພະນັກງານພັກ-ລັດເຂົ້າຮ່ວມເກືອບ 16.000 ຄົນ; ສິ່ງດັ່ງກ່າວເປັນການສ້າງໂອກາດໃຫ້ຮຽນຮູ້ກ່ຽວກັບບົດຮຽນໃນການພັດທະນາປະເທດຂອງສິງກະໂປ, ການຄຸ້ມຄອງບໍລິຫານ, ການຍົກລະດັບພາສາອັງກິດ ແລະ ຍັງເປັນການສົ່ງເສີມວຽກງານການທູດປະຊາຊົນນຳອີກ ແລະ ຫວັງວ່າຝ່າຍສິງກະໂປ ຈະສືບຕໍ່ໃຫ້ການສະນັບສະໜູນ ສປປ ລາວ ຕື່ມອີກໃນຕໍ່ໜ້າ.