ກອງທຶນເພື່ອພັດທະນາຊົນນະບົດ ສປ ຈີນ ຊ່ວຍເຫຼືອດ້ານອຸປະກອນການສຶກສາຢູ່ ສປປ ລາວ

ເຜີຍ​ແຜ່​ໂດຍ​: editor ເວ​ລາ: 26/01/2024 13:03:56 ຈຳ​ນວນ​​ຢ້ຽມ​ຊົມ 248 ຄັ້ງ ​

       ໃນວັນທີ 19 ຕຸລາ 2023 ຢູ່ໂຮງຮຽນປະຖົມທົ່ງມັງ, ເມືອງໄຊທານີ, ນະຄອນຫຼວງວຽງຈັນ ໄດ້ມີພິທີ ມອບ-ຮັບອຸປະກອນການສຶກສາ (ຖົງປື້ມ, ບິກ, ສໍ, ບິກສີ,ສໍສີ, ແລະ ອື່ນໆລວມທັງໝົດ 30 ລາຍການ) ໃຫ້ແກ່ນັກຮຽນປະຖົມ ຢູ່ ສປປ ລາວ ໂດຍໄດ້ຮັບການຊ່ວຍເຫຼືອ ຈາກກອງທຶນເພື່ອພັດທະນາຊົນນະບົດ ສປ ຈີນ; ໃຫ້ກຽດເຂົ້າຮ່ວມມີຕາງໜ້າຫ້ອງການ ຄະນະສັນຕິພາບ ແລະ ສາມັກຄີຂອງລາວ, ຕາງໜ້າສະຖານເອກອັກຄະລັດຖະທູດ ແຫ່ງ ສປ ຈີນ ປະຈຳ ສປປ ລາວ, ຕາງໜ້າກອງທຶນເພື່ອພັດທະນາຊົນນະບົດ ສປ ຈີນ ຕາງໜ້າ ກະຊວງສຶກສາທິການ ແລະ ກິລາ, ຕາງ ໜ້າພະແນກສຶກສາທິການ ແລະ ກິລານະຄອນຫຼວງວຽງຈັນ, ຕາງໜ້າພະແນກສຶກສາທິການ ແລະ ກິລາ ເມືອງໄຊທານີ, ນະຄອນຫຼວງວຽງຈັນ, ທ່ານ ວິລະພົງ ສີຫາລາດ, ຜູ້ອຳນວຍການໂຮງຮຽນທົ່ງມັງ, ນອກນັ້ນຍັງມີຄະນະກົມ, ພະແນກຈາກພາກສ່ວນທີ່ກ່ຽວຂ້ອງ ຂອງລາວ ແລະ ຈີນ ພ້ອມດ້ວຍຄູ ແລະ ນັກຮຽນໃນໂຮງຮຽນປະຖົມທົ່ງມັງເຂົ້າຮ່ວມລວມທັງໝົດຈຳນວນ 200 ກວ່າທ່ານ.

        ໃນພິທີດັ່ງກ່າວ ຕາງໜ້າຫ້ອງການຄະນະສັນຕິພາບ ແລະ ສາມັກຄີຂອງລາວ ໄດ້ສະແດງຄວາມຂອບໃຈຕໍ່ ກອງທຶນເພື່ອພັດທະນາຊົນນະບົດ ສປ ຈີນ ກໍ່ຄືປະຊາຊົນຈີນອ້າຍນ້ອງ ທີ່ໄດ້ໃຫ້ການຊ່ວຍເຫຼືອດ້ານອຸປະກອນການສຶກສາໃຫ້ແກ່ນັກຮຽນລາວ, ຊຶ່ງໃນເທື່ອນີ້ ໄດ້ນຳເອົາອຸປະກອນການສຶກສາ ຈຳນວນ 18,536 ຊຸດ ລວມມູນຄ່າ 264,952.81 ໂດລາສະຫະລັດ ມອບໃຫ້ແກ່ນັກຮຽນຈຳນວນ 18,536 ຄົນ ໃນໂຮງຮຽນປະຖົມທົ່ງມັງ, ເມືອງໄຊທານີ, ນະຄອນຫຼວງວຽງຈັນ, ບັນດາໂຮງຮຽນປະຖົມແຂວງສະຫວັນນະເຂດ ແລະ ໂຮງຮຽນປະຖົມແຂວງສາລະວັນ ຈຳນວນ 251 ໂຮງຮຽນ, ເຊິ່ງເປັນການປະກອບສ່ວນສຳຄັນເຂົ້າໃນການພັດທະນາຊັບພະຍາກອນມະນຸດ ຂອງລາວໃຫ້ນັບມື້ມີບາດກ້າວໃໝ່.

        ທ່ານ ວິລະພົງ ສີຫາລາດ, ຜູ້ອຳນວຍການໂຮງຮຽນປະຖົມທົ່ງມັງ, ເມືອງໄຊທານີ, ນະຄອນຫຼວງວຽງຈັນ ຕາງໜ້າບັນດາຄູອາຈານ ແລະ ນັກຮຽນສະແດງຄວາມຂອບໃຈຢ່າງຈິງໃຈຕໍ່ ກອງທຶນເພື່ອພັດທະນາຊົນນະບົດ ສປ ຈີນ ທີ່ໄດ້ໃຫ້ການຊ່ວຍເຫຼືອອຸປະກອນການສຶກສາໃນຄັ້ງນີ້ ແລະ ຈະນຳເອົາເຄື່ອງຊ່ວຍເຫຼືອດັ່ງກ່າວໄປນຳໃຊ້ໃຫ້ເກີດປະໂຫຍດສູງສຸດ, ປະກອບສ່ວນປັບປຸງຄຸນນະພາບການສຶກສາ ຂອງນ້ອງນັກຮຽນໃຫ້ດີຂື້ນເລື້ອຍໆ.

---