ຄະນະຜູ້ແທນຄະນະສັນຕິພາບ ແລະ ສາມັກຄີ ຂອງລາວ ເຂົ້າຮ່ວມກອງປະຊຸມ ວ່າດ້ວຍການຮ່ວມມືສາກົນ ໜຶ່ງແລວ ໜຶ່ງເສັ້ນທາງ ຄັ້ງທີ III ແລະ ຢ້ຽມຢາມ ຢູ່ ສປ ຈີນ.
ເຜີຍແຜ່ໂດຍ: editor ເວລາ: 26/01/2024 12:57:38 ຈຳນວນຢ້ຽມຊົມ 164 ຄັ້ງ ໂດຍຕອບສະໜອງຕາມການເຊີນ ຂອງ ສະມາຄົມປະຊາຊົນຈີນ ເພື່ອສັນຕິພາບ ແລະ ຫຼຸດຜ່ອນອາວຸດ ແລະ ກອງທຶນຈີນ ເພື່ອສັນຕິພາບ ແລະ ການພັດທະນາ, ຄະນະຜູ້ແທນຄະນະສັນຕິພາບ ແລະ ສາມັກຄີຂອງລາວ ນຳໂດຍ ທ່ານ ສົມມາດ ພົລເສນາ, ກຳມະການສູນກາງພັກ, ຮອງປະທານສະພາແຫ່ງຊາດ, ປະທານຄະນະສັນຕິພາບ ແລະ ສາມັກຄີ ຂອງລາວ ໄດ້ເຂົ້າຮ່ວມເວທີກອງປະຊຸມວ່າດ້ວຍການຮ່ວມມືສາກົນ ໜຶ່ງແລວ ໜຶ່ງເສັ້ນທາງ ຄັ້ງທີ III ແລະ ຢ້ຽມຢາມ ຢູ່ ສປ ຈີນ ຢ່າງເປັນທາງການ.
ໃນວັນທີ 18 ຕຸລາ 2023, ທ່ານ ສົມມາດ ພົລເສນາ ໄດ້ເຂົ້າຮ່ວມພິທີເປີດກອງປະຊຸມວ່າດ້ວຍການ ຮ່ວມມືສາກົນ ໜຶ່ງແລວ ໜຶ່ງເສັ້ນທາງ ຄັ້ງທີ III ໂດຍມີປະມຸກລັດ, ຫົວຫນ້າລັດຖະບານ ແລະ ຄະນະຜູ້ແທນ ຈາກ 150 ປະເທດ ແລະ 30 ອົງການຈັດຕັ້ງສາກົນເຂົ້າຮ່ວມ ຊຶ່ງໃນໂອກາດດັ່ງກ່າວໄດ້ມີຄໍາເຫັນໃນເວທີພາຍໃຕ້ຫົວຂໍ້ສົ່ງເສີມການເຊື່ອມຈອດ ລະຫວ່າງ ປະຊາຊົນກັບ ປະຊາຊົນ, ເຊິ່ງໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຂໍ້ລິເລີ່ມໜຶ່ງແລວ ໜຶ່ງເສັ້ນທາງ ຂອງ ສປ ຈີນ ທີ່ ທ່ານ ສີ ຈິ້ນຜິງ ໄດ້ປະກາດໃນປີ 2013, ຖືເປັນກົນໄກແຫ່ງການ ຮ່ວມມືພະຫຸພາຄີທີ່ທຸກຝ່າຍໄດ້ຮັບຜົນປະໂຫຍດຢ່າງແທ້ຈິງ, ທັງເປີດກວ້າງພັດທະນາເສດຖະກິດໂລກໃນທຸກດ້ານ ໂດຍຢຶດຖືເອົາຄວາມຜາສຸກ ຂອງປະຊາຊົນໃນທົ່ວໂລກເປັນບຸລິມະສິດອັນດັບໜຶ່ງ. ໃນຫນຶ່ງທົດສະວັດທີ່ຜ່ານມາໄດ້ພິສູດໃຫ້ເຫັນວ່າ ຂໍ້ລິເລີ່ມໜຶ່ງແລວ ໜຶ່ງເສັ້ນທາງ ເປັນໂຄງການເຊື່ອມຈອດ ລະຫວ່າງຈີນກັບພູມມິພາກອາຊີ, ອາຟຣິກາ ແລະ ເອີຣົບ, ຊຸກຍູ້ການພັດທະນາຮ່ວມກັນ ລະຫວ່າງ ພາກພື້ນ ແລະ ຊຸກຍູ້ການພັດທະນາໂລກຢ່າງ ມີປະສິດທິຜົນ, ພ້ອມນັ້ນ, ຍັງມີບົດບາດສຳຄັນໃນການ ສົ່ງເສີມການເຊື່ອມຕໍ່ທົ່ວໂລກ, ຊຸກຍູ້ການເຕີບໂຕເສດຖະກິດໂລກ ແລະ ເປັນເວທີຮ່ວມມືສາກົນເພື່ອການພັດທະນາແບບຍືນຍົງ ແລະ ເປັນເສັ້ນທາງໄປສູ່ຄວາມຈະເລີນຮຸ່ງເຮືອງຂອງທຸກປະເທດ. ການຈັດຕັ້ງປະຕິບັດຂໍ້ລິເລີ່ມ ໜຶ່ງແລວໜຶ່ງເສັ້ນທາງ ໂດຍສະເພາະການເຊື່ອມຈອດດ້ານພື້ນຖານໂຄງລ່າງ ຖື ເປັນການສ້າງເງື່ອນໄຂສະດວກ ໃຫ້ປະຊາຊົນ ຂອງບັນດາປະເທດ, ພາກພື້ນ ແລະ ຂອງໂລກໄດ້ໄປມາຫາສູ່ຢ້ຽມຢາມ ແລະ ຮ່ວມມືກັນ, ທັງເປັນການສ້າງເງື່ອນໄຂສະດວກ ໃຫ້ແກ່ການພັດທະນາເສດຖະກິດ-ສັງຄົມ, ການຄ້າ, ການລົງທຶນ ກໍຄືການຍົກລະດັບ ຊິວິດການເປັນຢູ່ ຂອງປະຊາຊົນໃຫ້ດີຂື້ນ.
ນອກຈາກເຂົ້າຮ່ວມກອງປະຊຸມ, ຄະນະຜູ້ແທນຍັງໄດ້ພົບປະສອງຝ່າຍກັບສະມາຄົມປະຊາຊົນຈີນເພື່ອສັນຕິພາບ ແລະ ຫຼຸດຜ່ອນອາວຸດ. ສອງຝ່າຍໄດ້ທົບທວນຕີລາຄາ ການພົວພັນຮ່ວມມືລະຫວ່າງສອງຄະນະໃນໄລຍະຜ່ານມາ, ແລກປ່ຽນຄໍາຄິດເຫັນຕໍ່ສະພາບການພາກພື້ນແລະ ສາກົນ ທີ່ ສອງຝ່າຍສົນໃຈແລະ ຢືນຢັນຈະສືບຕໍ່ກົນໄກປະສານງານ, ແລກປ່ຽນຂໍ້ມູນຂ່າວສານ, ເປັນເອກະພາບກັນຕໍ່ບັນດາ ພາກພື້ນ ແລະ ສາກົນ, ສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ.
ການຢ້ຽມຢາມຄັ້ງນີ້ ຖືເປັນການປະກອບສ່ວນສໍາຄັນໃນການເສີມຂະຫຍາຍ ແລະ ເພີ່ມພູນຄູນສ້າງສາຍ ພົວພັນມິດຕະພາບ ອັນເປັນມູນເຊື້ອ ແລະ ການຮ່ວມມືແບບຄູ່ຮ່ວມຍຸດທະສາດ ຮອບດ້ານ, ໝັ້ນຄົງຍາວນານຕາມ ທິດສີ່ດີ ແລະ ຄູ່ຮ່ວມຊາຕາກຳ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ຈີນ ໃຫ້ນັບມື້ກ້າວ ເຂົ້າສູ່ລວງເລິກ ແລະ ນໍາເອົາຜົນໂຫຍດຕົວຈິງມາສູ່ປະຊາຊົນສອງຊາດ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20