ຫົວໜ້າຄະນະພົວພັນຕ່າງປະເທດສູນກາງພັກຕ້ອນຮັບທູດ​ອາ​ເມ​ຣິ​ກາ

ເຜີຍ​ແຜ່​ໂດຍ​: admin ເວ​ລາ: 11/03/2022 10:23:07 ຈຳ​ນວນ​​ຢ້ຽມ​ຊົມ 505 ຄັ້ງ ​

ທ່ານ ທອງສະຫວັນ ພົມວິຫານ ກໍາມະການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກ (ຄ​ຕ​ພ) ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ປີເຕີ ເຮມອນ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສະຫະລັດ ອາເມຣິກາປະຈໍາ ສປ​ປ​ ລາວ ໃນ​ວັນ​ທີ 20 ກໍ​ລະ​ກົດ 2021 ທີ່ຄ​ະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ.

ໃນການພົບປະຄັ້ງນີ້, ​ທ່ານ ປີເຕີ ເຮມອນ​ໄດ້ສະແດງຄວາມຂອບໃຈເປັນຢ່າງສູງທີີ່ໄດ້ມີໂອກາດພົບປະກັບຫົວໜ້າຄະນະພົວພັນຕ່າງປະເທດສູນກາງພັກ ແລະ ໄດ້ສະແດງຄວາມຊົມເຊີຍເນື່ອງໃນໂອກາດທີີ່ທ່ານ ທອງສະຫວັນ ພົມວິຫານ ໄດ້ຮັບການເລືອກຕັ້ງເປັນກໍາມະການສູນກາງພັກ ແລະ ໄດ້ຮັບການແຕ່ງຕັ້ງເປັນຫົວໜ້າຄະນະພົວພັນຕ່າງປະເທດສູນກາງພັກ. ທ່ານ ປີເຕີ ເຮມອນ ໄດ້ຕີລາຄາສູງຕໍ່ການພົວພັນຮ່ວມມື ລະຫວ່າງ ສ ອາເມຣິກາ - ສປປ ລາວ ທີ່ມີການຂະຫຍາຍຢ່າງຕໍ່ເນື່ອງ ແລະ ໄດ້ຢືນຢັນຄວາມມຸ້ງຫວັງຂອງຕົນ ກ່ຽວກັບການສືບຕໍ່ເຮັດວຽກຮ່ວມກັບພາກສ່ວນຕ່າງໆຂອງ ສປປ ລາວ ເພື່ອສົ່ງເສີມການພົວພັນຮ່ວມມືລະຫວ່າງສອງປະເທດ ໃຫ້ແຕກດອກອອກຜົນຂຶ້ນໄປເລື້ອຍໆ.

ໃນໂອກາດດັ່ງກ່າວ, ທ່ານ ທອງສະຫວັນ ພົມວິຫານ ໄດ້ຕີລາຄາສູງຕໍ່ສາຍພົວພັນ ແລະ ການຮ່ວມມືທີ່ດີ ລະຫວ່າງ ລາວ-ອາເມຣິກາ ຕະຫຼອດໄລຍະ 60 ກວ່າປີຜ່ານມາແຫ່ງການສ້າງຕັ້ງສາຍພົວພັນການທູດຮ່ວມກັນ ແລະ ເຫັນວ່າສາຍພົວພັນດັ່ງກ່າວແມ່ນສືບຕໍ່ຂະຫຍາຍຕົວຢ່າງຕໍ່ເນື່ອງ ພ້ອມທັງໄດ້ຍົກສູງການພົວພັນສອງຝ່າຍເປັນຄູ່ຮ່ວມມືແບບກວມລວມ ນັບແຕ່ປີ 2016 ເປັນຕົ້ນມາ; ສະແດງຄວາມຂອບໃຈຢ່າງຈິງໃຈຕໍ່ລັດຖະບານ ແລະ ປະຊາຊົນອາເມຣິກາ ທີ່ໄດ້ໃຫ້ການສະໜັບສະໜູນ ສປປ ລາວ ຈັດຕັ້ງປະຕິບັດໂຄງການຮ່ວມມືສອງຝ່າຍໃນຂະແໜງການຕ່າງໆ ເປັນຕົ້ນແມ່ນສາທາລະນະສຸກ, ການຄ້າ, ການລົງທຶນ, ການສຶກສາ, ການເກັບກູ້ລະເບີດບໍ່ທັນແຕກ ແລະ ອື່ນໆ. ເບື້ອງລັດຖະບານລາວກໍໄດ້ປະຕິບັດນະໂຍບາຍດ້ານມະນຸດສະທໍາໃນການຮ່ວມມືຊອກຄົ້ນຫາສິ່ງເສດເຫຼືອຂອງທະຫານອາເມຣິກາທີ່ຫາຍສາບສູນໃນປາງສົງຄາມຢູ່ລາວ. ພິເສດ, ໃນ​ທ່າມກາງການແຜ່ລະບາດຂອງພະຍາດໂຄວິດ-19, ສ ອາເມຣິກາ ຍັງໄດ້ໃຫ້ການສະໜັບສະໜູນ ວັດຖຸປັດໄຈຈຳເປັນ ກໍຄືອຸປະກອນການແພດ ແລະ ຢາວັກ​ຊິນຕ້ານພະຍາດໂຄວິດ-19 ໃຫ້ແກ່ ສປປ ລາວ; ສະແດງຄວາມຊົມເຊີຍຕໍ່ທ່ານທູດ ເຮມອນ ທີ່ີໄດ້ປະຕິບັດໜ້າທີ່ການທູດຂອງຕົນຢ່າງຫ້າວຫັນ ຊຶ່ງເປັນການປະກອບ​ສ່ວນ​ສໍາຄັນ​ເຂົ້າ​ໃນ​ການສົ່ງເສີມສາຍພົວພັນຮ່ວມມືອັນດີງາມ ບົນພື້ນຖານການເປັນຄູ່ຮ່ວມມືແບບກວມລວມ ລະຫວ່າງ ສປປ ລາວ - ສ ອາເມຣິກາ ທີ່ບັນຈົບຄົບຮອບມາໄດ້ 5 ປີ ໃນປີ 2021 ນີ້.

ທ່ານ ທອງສະຫວັນ ພົມວິຫານ ໄດ້ຢືນຢັນວ່າ ຄະນະພົວພັນຕ່າງປະເທດສູນກາງພັກ ຍິນດີສະໜັບສະໜູນ ທ່ານ ປີເຕີ ເຮມອນ ຕະຫຼອດໄລຍະການປະຕິບັດໜ້າທີ່ຢູ່ ສປປ ລາວ ເພື່ອປະກອບສ່ວນສຳຄັນເຂົ້າໃນການເສີມຂະຫຍາຍສາຍພົວພັນຮ່ວມມືອັນດີງາມ ກໍຄື ເພີ່ມທະວີຄວາມເຂົ້າອົກເຂົ້າໃຈ ແລະ ນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ - ສ ອາເມຣິກາ ໃຫ້ນັບມື້ຫຼາຍຂຶ້ນ.

(ຂ່າວ: ຄຕພ, ພາບ: ສຳນານ)

---