ສະຫາຍຫົວໜ້າຄະນະພົວພັນຕ່າງປະເທດສູນກາງພັກ ອວຍພອນການນຳກະຊວງປ້ອງກັນປະເທດ,ຢ້ຽມຢາມນາຍ ແລະ ພົນທະຫານ ທີ່ ສູນເສຍອົງຄະພິເສດ 790 ແລະ ກອງຮ້ອຍຊາຍແດນ 241

ເຜີຍ​ແຜ່​ໂດຍ​: editor ເວ​ລາ: 26/01/2024 11:51:43 ຈຳ​ນວນ​​ຢ້ຽມ​ຊົມ 354 ຄັ້ງ ​

        ໃນລະຫວ່າງວັນທີ 17, 22 ແລະ 26 ມັງກອນ 2024 ທີ່ຜ່ານມານີ້, ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວຄົບຮອບ 75 ປີ (20 ມັງກອນ 1949-20 ມັງກອນ 2024) ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ (ຄຕພ) ໄດ້ນໍາພາຄະນະໄປອວຍພອນການນໍາຂອງກະຊວງປ້ອງກັນປະເທດ ເຊິ່ງໃຫ້ກຽດຕ້ອນຮັບໂດຍ ສະຫາຍ ພົນໂທ ປອ.​ ທອງລອຍ ສິລິວົງ,​ ກຳມະການສູນກາງ​ພັກ,​ ຮອງລັດຖະມົນຕີ, ​ຫົວຫນ້າກົມໃຫຍ່ການເມືງກອງທັບ; ຈາກນັ້ນ, ກໍໄດ້ໄປຢ້ຽມຢາມ ແລະ ພົບປະກັບ ຄະນະພັກ-ຄະນະບັນຊາ, ພະນັກງານຫຼັກແຫຼ່ງ, ນາຍ ແລະ ພົນທະຫານປະຕິວັດອາວຸໂສບໍານານ ທີ່ ສູນເສຍອົງຄະພິເສດ 790 ແລະ ກອງຮ້ອຍຊາຍແດນ 241 ໂດຍມີພາກສ່ວນກ່ຽວຂ້ອງຂອງ ຄຕພ ເຂົ້າຮ່ວມຢ່າງພ້ອມພຽງ.

        ໃນການຢ້ຽມຢາມສູນເສຍອົງຄະພິເສດ 790, ສະຫາຍ ທອງສະຫວັນ ພົມວິຫານ ໄດ້ແຈ້ງໃຫ້ຄະນະພັກ-ຄະນະບັນຊາກ່ຽວກັບຈຸດປະສົງຂອງການມາຢ້ຽມຢາມຄັ້ງນີ້ ແມ່ນມາໃຫ້ກໍາລັງໃຈ, ສະແດງຄວາມຂອບໃຈ, ຮູ້ບຸນຄຸນ ແລະ ອວຍ ພອນໄຊໃຫ້ບັນດານັກຮົບທີ່ເສຍອົງຄະ ຈາກການສູ້ຮົບໃນໄລຍະກ່ອນ ແລະ ໄລຍະບໍ່ດົນມານີ້ ຈົ່ງມີສຸຂະພາບແຂງແຮງ, ມີຄວາມເບີກບານມ່ວນຊື່ນ ໃນບັນຍາກາດກາສະເຫຼີມສະ ຫຼອງ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ. ພ້ອມທັງໄດ້ໃຫ້ກໍາລັງໃຈແກ່ພະນັກງານ, ນາຍ ແລະ ພົນທະຫານໜຸ່ມນ້ອຍ ທີ່ກຳລັງເຮັດໜ້າທີ່ດູແລເບິ່ງແຍ່ງບັນດານັກຮົບບໍານານເສຍອົງຄະ ຈົງມີຄວາມພາກ ພູມໃຈທີ່ໄດ້ຮັບໃຊ້ພວກເພີ່ນເຫຼົ່ານີ້ ຍ້ອນການເສຍສະຫຼະ ແລະ ປະກອບສ່ວນອັນປະເສີດໃນການຕໍ່ສູ້ເດັດດ່ຽວ, ພິລະອາດຫານ, ບໍ່ຍອມຈໍານົນ ຍາກປານໃດກໍບຸກ, ທຸກປານໃດກໍສູ້, ເສຍສະຫລະເລືອດເນື້ອໂດຍບໍ່ເສຍດາຍຊີວິດໃນມື້ນັ້ນ ຈຶ່ງເຮັດໃຫ້ພວກເຮົາຮັກສາໄດ້ ເອກະລາດ ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງ ສປປ ລາວໄວ້ໄດ້ຈົນຮອດມື້ນີ້. ນອກນັ້ນ, ຫົວໜ້າ ຄຕພ ຍັງໄດ້ນຳພາຄະນະ ໄປຢ້ຽມຢາມໃຫ້ກຳລັງໃຈບັນດາທະຫານອະວຸໂສບໍານານເສຍອົງຄະທີ່ກຳລັງປິ່ນປົວສຸຂະພາບຢູ່ໃນໂຮງໝໍຂອງສູນ 790 ນໍາດ້ວຍ.

        ໃນໂອກາດຢ້ຽມຢາມກອງຮ້ອຍຊາຍແດນ 241, ສະຫາຍ ທອງສະຫວັນ ພົມວິຫານ ໄດ້ເນັ້ນໃຫ້ຄະນະພັກ-ຄະນະບັນຊາ, ພະນັກງານ-ນັກຮົບທີ່ກຳລັງປະຕິບັດໜ້າທີ່ຈົງສືບຕໍ່ຮັກສາມູນເຊື້ອ, ທາດແທ້ປະຕິວັດຂອງກອງທັບ, ບໍລິສຸດ ແລະ ເດັດດ່ຽວໜຽວແໜ້ນ; ສືບຕໍ່ຈັດຕັ້ງປະຕິບັດມະຕິກອງກອງປະຊຸມໃຫຍ່ຂອງພັກ ໂດຍຖືເອົາວຽກງານປ້ອງກັນຊາດ-ປ້ອງກັນຄວາມສະຫງົບເປັນສໍາຄັນ, ຫັນເອົາກໍາລັງລົງກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ຕາມ 4 ເນື້ອໃນ 4 ຄາດໝາຍ; ສຸມໃສ່ສ້າງບ້ານປ້ອງກັນຊາດເຂັ້ມແຂງ, ກຸ່ມບ້ານປ້ອມໝັ້ນສູ້ຮົບເຂັ້ມແຂງໃຫ້ເພີ່ມຂຶ້ນທາງດ້ານຈໍານວນ ແລະ ຄຸນນະພາບ; ຍູ້ແຮງການອົບຮົມ-ຫັດແອບການເມືອງ-ການທະຫານ, ພະລາທິການ, ເຕັກນິກ, ສິລະປະຍຸດ-ຍຸດທະວິທີຂອງທະຫານຮາບ ແລະ ເຫລົ່າຮົບວິຊາສະເພາະໃຫ້ມີຄວາມຊໍານິຊໍານານ; ເປັນເຈົ້າການປ້ອງກັນ, ກວດກາ, ຕິດຕາມເຂດຫລັກ ໝາຍຊາຍແດນຕ່າງໆ ແລະ ສັງຄົມທົ່ວໄປ ເພື່ອຮັບປະກັນສ້າງເງື່ອນໄຂໃຫ້ແກ່ການພັດທະນາເສດຖະກິດ-ສັງຄົມໄດ້ຂະ ຫຍາຍຕົວຢ່າງຕໍ່ເນື່ອງ; ຍົກສູງນໍ້າໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ສ້າງພະລາທິການກັບທີ່ຕາມເງື່ອນໄຂທ່າແຮງບົ່ມຊ້ອນຂອງກົມກອງ.

        ໂອກາດດຽວກັນນີ້, ສະຫາຍ ບຸນມີ ອິນທະວົງສາ, ເລຂາໜ່ວຍພັກ, ຫົວໜ້າການເມືອງສູນເສຍອົງຄະພິເສດ 790 ພ້ອມດ້ວຍ ສະຫາຍ ພັນຕີ ບົວໄລ ໃບສະແຫວງ, ເລຂາໜ່ວຍພັກ, ຫົວໜ້າການເມືອງກອງຮ້ອຍຊາຍແດນ 241 ໄດ້ລາຍງານສະພາບທີ່ພົ້ນເດັ່ນຂອງກົມກອງຕົນ ຕໍ່ສະຫາຍຫົວໜ້າຄະນະພົວພັນສູນກາງພັກ ພ້ອມທັງໃຫ້ຄຳໜັ້ນສັນາຍາວ່າ: ຈະສືບຕໍ່ນໍາພາ-ຊີ້ນໍາບັນດານາຍ ແລະ ພົນທະຫານຈັດຕັ້ງປະຕິບັດໜ້າທີ່ການເມືອງຂອງຕົນໃຫ້ບັນລຸຜົນສໍາເລັດຕາມຄາດໝາຍ.

       ໃນການເຄື່ອນໄຫວດັ່ງກ່າວ, ສະຫາຍຫົວໜ້າຄະນະພົວພັນຕ່າງປະເທດສູນກາງພັກ ພ້ອມດ້ວຍຄະນະ ຍັງໄດ້ມອບວັດຖຸປັດໄຈຈຳນວນໜຶ່ງ ໃຫ້ແກ່ສູນເສຍອົງຄະພິເສດ 790 ແລະ ກອງຮ້ອຍຊາຍແດນ 241 ຕື່ມອີກ.

---