ສະຫາຍ ເລຂາທິການໃຫຍ່ ຄະນະບໍລິຫານງານສູນກາງພັກ ປປ ລາວ ເຂົ້າຮ່ວມກອງປະຊຸມໂຕະມົນ ລະຫວ່າງ ພັກຣັດເຊຍເອກະພາບ ແລະ ພັກການເມືອງປະເທດອາຊຽນ
ເຜີຍແຜ່ໂດຍ: editor ເວລາ: 24/01/2024 10:51:44 ຈຳນວນຢ້ຽມຊົມ 365 ຄັ້ງ ໃນວັນທີ 23 ມັງກອນ 2024, ສະຫາຍ ທອງລຸນ ສີສຸລິດ, ເລຂາທິການໃຫຍ່ຄະນະບໍລິຫານງານສູນກາງພັກ ປປ ລາວ, ປະທານປະເທດ ແຫ່ງ ສປປ ລາວ ໄດ້ນໍາພາຄະນະຜູ້ແທນພັກ ປປ ລາວ ເຂົ້າຮ່ວມກອງປະຊຸມໂຕະມົນ ລະຫວ່າງ ພັກຣັດເຊຍເອກະພາບ ແລະ ພັກການເມືອງຂອງປະເທດອາຊຽນ ຜ່ານຮູບແບບວີດີໂອທາງໄກ ໂດຍການເປັນເຈົ້າພາບຂອງ ພັກຣັດເຊຍເອກະພາບ ພາຍໃຕ້ຫົວຂໍ້: “ບົດບາດຂອງບັນດາກຳລັງການເມືອງທີ່ມີຄວາມຮັບຜິດຊອບຂອງຣັດເຊຍ ແລະ ບັນດາປະເທດອາຊຽນ ໃນການກໍ່ສ້າງລະບຽບໂລກໃໝ່ທີ່ຍຸຕິທຳ”; ມີສະຫາຍ ດີມິຕຣີ ເມດເວເດບ, ປະທານພັກຣັດເຊຍເອກະພາບ, ຮອງປະທານສະພາຄວາມໝັ້ນຄົງແຫ່ງສະຫະພັນຣັດເຊຍ ແລະ ການນໍາຂັ້ນສູງຈາກ 10 ພັກການເມືອງ, ໃນ 8ປະເທດອາຊຽນ ເຂົ້າຮ່ວມ.
ກອງປະຊຸມດັ່ງກ່າວໄດ້ຈັດມາແລ້ວ 2 ຄັ້ງ, ຊຶ່ງຄັ້ງນີ້ເປັນຄັ້ງທີ 3 ແລະ ເປັນຄັ້ງທໍາອິດທີ່ປຶກສາຫາລືພາຍໃຕ້ຫົວຂໍ້ດັ່ງກ່າວ. ກອງປະຊຸມຄັ້ງນີ້ຈັດຂຶ້ນໃນໂອກາດຄົບຮອບ 28 ປີ ການເປັນຄູ່ຮ່ວມມື ລະຫວ່າງ ອາຊຽນ-ຣັດເຊຍ ຊຶ່ງເປັນຂີດ ໝາຍສຳຄັນແຫ່ງການສືບຕໍ່ເສີມຂະຫຍາຍການພົວພັນຮ່ວມມືດ້ານພັກ ລະຫວ່າງ ພັກການເມືອງປະເທດອາຊຽນ ແລະ ພັກຣັດເຊຍເອກະພາບ, ປະກອບສ່ວນຊຸກຍູ້ການຮ່ວມມືດ້ານລັດ ລະຫວ່າງ ອາຊຽນ ແລະ ຣັດເຊຍ ເພື່ອເສີມຂະຫຍາຍການຮ່ວມມືທີ່ເປັນຮູບປະທຳ ແລະ ຮັບມືກັບສິ່ງທ້າທາຍພາກພື້ນ ແລະ ສາກົນ ຢ່າງມີປະສິດທິພາບ.
ສະຫາຍ ທອງລຸນ ສີສຸລິດ ໄດ້ປະກອບຄໍາເຫັນໃນກອງປະຊຸມຄັ້ງນີ້, ໂດຍໄດ້ຕີລາຄາສູງ ແລະ ຊົມເຊີຍການຈັດກອງປະຊຸມຄັ້ງນີ້ຂອງພັກຣັດເຊຍເອກະພາບ; ຕີລາຄາສະພາບການພາກພື້ນ ແລະ ສາກົນ ທີ່ຍັງສືບຕໍ່ຜັນແປໄປຢ່າງໄວວາ, ສະຫຼັບສັບຊ້ອນ ແລະ ຄາດຄະເນໄດ້ຍາກ, ມີທັງກາລະໂອກາດ ແລະ ສິ່ງທ້າທາຍຕ່າງໆຕໍ່ສັນຕິພາບ, ຄວາມໝັ້ນຄົງ ແລະ ການພັດທະນາຂອງບັນດາປະຊາຊາດໃນໂລກ; ຕີລາຄາສູງຕໍ່ການສະໜັບສະໜູນ ແລະ ການຊ່ວຍເຫຼືອອັນລໍ້າຄ່າ ຂອງສະຫະພັນຣັດເຊຍ ທີ່ມີຕໍ່ ສປປ ລາວ ໃນໄລຍະຜ່ານມາ ກໍຄືການພົວພັນຮ່ວມມື ລະຫວ່າງ ສປປ ລາວ ກັບ ສ. ຣັດເຊຍ ກໍຄື ພັກ ປປ ລາວ ແລະ ພັກຣັດເຊຍເອກະພາບ ທີ່ໄດ້ຮັບການເສີມຂະຫຍາຍຢ່າງຕໍ່ເນື່ອງ ແລະ ມີບາດກ້າວໃໝ່ທີ່ຕັ້ງໜ້າໃນຫຼາຍຂົງເຂດ ເຊັ່ນ: ດ້ານການເມືອງ-ຄວາມໝັ້ນຄົງ, ເສດຖະກິດ-ການຄ້າ, ວັດທະນະທໍາ-ສັງຄົມ ແລະ ອື່ນໆ; ສະແດງຄວາມຍິນດີທີ່ການພົວພັນຮ່ວມມື ອາຊຽນ-ຣັດເຊຍ ຕະຫຼອດໄລຍະຜ່ານມາ ໄດ້ຮັບການເສີມຂະຫຍາຍຢ່າງຕັ້ງໜ້າ, ມີປະສິດທິຜົນ ແລະ ນັບມື້ເຂົ້າສູ່ລວງເລິກ, ບັນລຸໄດ້ຜົນສໍາເລັດທີ່ໜ້າເພິ່ງພໍໃຈຫຼາຍດ້ານ ລວມທັງດ້ານການເມືອງ ແລະ ປະກອບສ່ວນສໍາຄັນເຂົ້າໃນການຄໍ້າປະກັນຄວາມໝັ້ນຄົງ ແລະ ການຮ່ວມມື ໃນພາກພື້ນອາຊີ-ປາຊີຟິກ; ເນັ້ນ ໜັກເຖິງຄວາມຮັບຜິດຊອບ ແລະ ຄວາມມຸ່ງມາດປາດຖະໜາຂອງບັນດາປະເທດ ແລະ ພັກການເມືອງໃນພາກພື້ນ ໃນການຮັບປະກັນ, ເສີມຂະຫຍາຍຄວາມໝັ້ນຄົງ ແລະ ສົ່ງເສີມການຮ່ວມໃນພາກພື້ນ ໃນສະເພາະໜ້າ ແລະ ຍາວນານ.
ນອກຈາກນີ້, ສະຫາຍ ເລຂາທິການໃຫຍ່ ຍັງໄດ້ຖືໂອກາດນີ້ ແຈ້ງໃຫ້ບັນດາຜູ້ນໍາພັກການເມືອງປະເທດອາຊຽນ ກ່ຽວກັບ ການເປັນປະທານອາຊຽນ ຂອງ ສປປ ລາວ ໃນປີ 2024 ພາຍໃຕ້ຄໍາຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ”, ພັກ ແລະ ລັດຖະບານ ແລະ ປະຊາຊົນລາວບັນດາເຜົ່າ ມີຄວາມໝາຍໝັ້ນໃນການເສີມຂະຫຍາຍການສ້າງປະຊາຄົມອາຊຽນ ໃຫ້ມີການເຊື່ອມຈອດກັນຫຼາຍຂຶ້ນ ແລະ ມີຄວາມເຂັ້ມແຂງຫຼາຍຂຶ້ນ, ສົ່ງເສີມຄວາມສາມາດອາຊຽນ ເພື່ອສາມາດຈັບເອົາກາລະໂອກາດ ແລະ ຮັບມືກັບສິ່ງທ້າທາຍໃນປັດຈຸບັນ ແລະ ອະນາຄົດ. ພ້ອມດຽວກັນນັ້ນ, ສະຫາຍ ເລຂາທິການໃຫຍ່ ຍັງໄດ້ເຊື້ອເຊີນຜູ້ນຳບັນດາການນຳພັກ, ລັດ ແລະ ປະຊາຊົນຂອງບັນດາປະເທດສະມາຊິກອາຊຽນ ແລະ ຣັດເຊຍ ມາຢ້ຽມຢາມ ສປປ ລາວ ໃນໂອກາດປີທ່ອງທ່ຽວລາວ 2024 ພາຍໃຕ້ຄໍາຂວັນ: “ທ່ອງທ່ຽວລາວປອດໄພ, ຊື່ນໃຈວັດທະນະທໍາ, ທໍາມະຊາດ ແລະ ປະຫວັດສາດ”.
ບັນດາຜູ້ແທນກອງປະຊຸມ ໄດ້ເຫັນດີເປັນເອກະພາບຮັບຮອງເອົາຖະແຫຼງການສຸດທ້າຍ ຂອງກອງປະຊຸມ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20