ຄະນະພົວພັນຕ່າງປະເທດສູນກາງພັກ (ຄຕພ) ປາຖະກະຖາ ວັນເກີດ ປະທານ ສຸພານຸວົງ ຄົບຮອບ 114 ປີ ແລະ ເຜີຍແຜ່ມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 6 ສະໄໝທີ XI

ເຜີຍ​ແຜ່​ໂດຍ​: editor ເວ​ລາ: 23/08/2023 14:36:16 ຈຳ​ນວນ​​ຢ້ຽມ​ຊົມ 370 ຄັ້ງ ​

       ໃນວັນທີ 22 ສິງຫານີ້ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ (ຄ​ຕ​ພ) ໄດ້ຈັດພິທີປາຖະກະຖາ ວັນ​ຄ້າຍວັນເກີດ ປະທານ ສຸພານຸວົງ ຄົບຮອບ 114 ປີ ແລະ ເຜີຍ​ແຜ່ມະຕິ 6 ຂອງຄະນະບໍລິຫານງານສູນກາງ ພັກສະໄໝທີ XI ​ພາຍ​ໃຕ້ການເປັນປະທານ ແລະ ໃຫ້​ກຽດ​ເຜີຍ​ແຜ່​ໂດຍ ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ເລຂາຄະນະພັກ, ຫົວໜ້າ ຄຕພ ຊຶ່ງມີບັນດາຄະນະບໍລິຫານງານພັກ, ຫ້ອງການ, ບັນດາກົມ, ພະແນກ, ສະມາຊິກພັກ, ພະນັກງານ ເຂົ້າ​ຮ່ວມ​ 70 ​ສະ​ຫາຍ.

    ສະຫາຍ ທອງສະຫວັນ ພົມວິຫານ ໄດ້​ຍົກໃຫ້​ເຫັນ​ເຖິງຄຸນ​ງາມ​ຄວາມ​ດີ ແລະ ຜົນງານອັນໃຫຍ່ ຫຼວງຂອງ ປະທານ ສຸພາ​ນຸ​ວົງ ເຊິ່ງ​​ເປັນໜຶ່ງ​ໃນ​ຜູ້ນຳ​ສູງ​ສຸດ ຂອງ​ພັກ ແລະ ລັດ ທີ່​ຕິດ​ພັນ​ກັບ​ຂະບວນ​ການ​ປະຕິວັດ, ເປັນ​ວິ​ສະ​ວະ​ກອນ​ເອກ ຂອງ​ປະເທດ​ລາວ ແລະ ເປັນ​ນັກ​ການເມືອງ​ທີ່​ມີ​ຈິດໃຈ​ສາກົນ​ອັນ​ຜ່ອງ​ໃສ, ​ມີຄວາມຈົ່ງຮັກພັກດີຮ່ວມ​ກັບ​ຜູ້ນຳ​ຄົນ​ອື່ນໆນຳພາ​ຂະບວນ​ການ​ຕໍ່ສູ້ຕ້ານຈັກກະພັດຜູ້ຮຸກຮານຢ່າງອົງ ອາດກ້າຫານ ​ຈົນ​ສາ​ມາດ​ປົດ​ປ່ອຍ​ປະ​ເທດ​ຊາດ​ໄດ້​ໃນ​ວັນ​ທີ 2 ທັນ​ວາ 1975. ​ຄຸນງາມຄວາມດີ ແລະ ຄວາມເປັນແບບຢ່າງອັນໃສແຈ້ງ ຂອງປະ​ທານ ສຸ​ພາ​ນຸ​ວົງ ໄດ້ກາຍເປັນບົດຮຽນອັນລ້ຳຄ່າທີ່ປະໄວ້ໃຫ້ຄົນ ຮຸ່ນຫຼັງ, ພະນັກງານ-ລັດຖະກອນ ຄ​ຕ​ພ ທຸກຄົນຕ້ອງໄດ້ຈາລຶກບຸນຄຸນ ແລະ ຮໍ່າຮຽນເອົາເປັນແບບຢ່າງ ເພື່ອປະຕິບັດໜ້າທີ່ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນ ໄລຍະໃໝ່.

    ນອກ​ນີ້ ສະ​ຫາຍ ປະ​ທານ ກໍ່​ໄດ້ເຜີຍ​ແຜ່​ມະ​ຕິກອງ​ປະ​ຊຸມ​ຄົບ​ຄະ​ນະ​ບໍ​ລິ​ຫານ​ງານ​ພັກ ຄັ້ງ​ທີ 6 ເຊິ່ງໄດ້ ຍົກໃຫ້ເຫັນສະພາບການຂອງໂລກ ທີ່ພວມຜັນແປຢ່າງສັບສົນ ສົ່ງຜົນສະທ້ອນຕໍ່ສັນຕິພາບ, ສະຖຽນລະ ພາບ ແລະ ຄວາມໝັ້ນຄົງຢູ່ໃນພາກພື້ນ, ສາກົນ ແລະ ຕໍ່ປະເທດລາວ ໂດຍສະເພາະຄວາມຫຍຸ້ງຍາກດ້ານ ເສດຖະກິດ-ການເງິນ, ສະຫຼຸບຕີ​ລາຄາ​ການຈັດຕັ້ງ​ປະຕິບັດ​ແຜນ​ພັດທະນາ​ເສດ​ຖະ​ກິດ​-​ສັງຄົມ​ແຫ່ງ​ຊາດ, ແຜນ​ງົບປະມານ ແລະ ແຜນ​ເງິນຕາ 6 ເດືອນ​ຕົ້ນ​ປີແລະ ຄາດ​ຄະເນທິດ​ທາງ​ແຜນ​ວຽກ​ຈຸດ​ສຸມ 6 ເດືອນ​ທ້າຍ​ປີ 2023, ​ການຈັດຕັ້ງ​ປະຕິບັດ 2 ​ວາລະ​ແຫ່ງ​ຊາດ ວ່າ​ດ້ວຍ​ການແກ້​ໄຂ​ຄວາມ​ຫຍຸ້ງຍາກ​ດ້ານ​ເສດ​ຖະ​ກິດ​-​ການ​ເງິນ ແລະ ວາລະ​ແຫ່ງ​ຊາດ ວ່າ​ດ້ວຍການ​ແກ້​ໄຂບັນ​ຫາ​ຢາ​ເສບ​ຕິດ, ວຽກ​ງານ​ປ້ອງ​ກັນ​ຄວາມ​ສະຫງົບ ໃນ​ສະພາບ​ການ​ໃໝ່, ​ການຈັດຕັ້ງ​ປະຕິບັດ​ວຽກ​ງານ​ການ​ພົວພັນ​ຄົນ​ເຊື້ອ​ຊາດ​ລາວຢູ່​ຕ່າງປະເທດ ແຕ່​ປີ 2007- 2022 ແລະ ທິດ​ທາງ​ແຜນການ​ໃນຕໍ່ໜ້າ, ການ​ກະກຽມ ແລະ ດໍາ​ເນີນ​ກອງ​ປະຊຸມ​ໃຫຍ່ 3 ຂັ້ນ​ຂອງ​ພັກ.

        ໃນ​ວັນ​ດຽວ​ກັນ​ນີ້, ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ  ກໍ່​ໄດ້​ຈັດ​ພິ​ທີມອບບັດ​ສະ​ມາ​ຊິກ​ພັກສົມ​ບູນ​ຊຸດ​ທີ V ໃຫ້ 12 ສະ​ຫາຍ ແລະ ປະ​ກາດ​ການ​ແຕ່ງ​ຕັ້ງ​ຕຳ​ແໜ່ງ​ບໍລິ​ຫານຂັ້ນ​ຮອງ​ຫົວ​ໜ້າ​ກົມ ຈຳ​ນວນ 4 ສະ​ຫາຍ.

       ໃນ​ຕອນ​ທ້າຍ ສະ​ຫາຍ ທອງ​ສະ​ຫວັນ ພົມ​ວິ​ຫານ ໄດ້​ເນັ້ນ​ໜັກ​ເຖິງ​ຄວາມ​ສຳ​ຄັນ​ຂອງ​ບັດ​ສະ​ມາ​ຊິກ​ພັກ ແລະ ຊີ້​ນຳ​ໃຫ້​ສະ​ມາ​ຊິກ​ພັກ ນຳ​ໃຊ້​ບັດ​ໃຫ້​ຖືກ​ຕ້ອງ​ຕາມ​ກົດ​ລະ​ບຽບ​ພັກ. ພ້ອມ​ທັງ​ໄດ້​ໂອ້​ລົມ​ໃຫ້​ທິດ​ຊີ້​ນຳ​ຕໍ່​ພະ​ນັກ​ງານ​ທີ່​ໄດ້​ຮັບ​ການ​ເລື່ອນ​ຕຳ​ແໜ່ງ​ບໍ​ລິ​ຫານ​ໃຫ້​ເອົາ​ໃຈ​ໃສ່​ເພີ່ມ​ທະ​ວີ​ການ​ນຳ​ໃຊ້​ຄວາມ​ຮູ້-ຄວາມ​ສາ​ມາດ​ຂອງ​ຕົນ​ເຂົ້າ​ໃນ​ການ​ເປັນ​ກຳ​ລັງ​ແຮງ​ໃຫ້​ແກ່ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ​ໃນ​ໄລ​ຍະ​ໃໝ່.

---