ຄະນະພົວພັນຕ່າງປະເທດສູນກາງພັກ

ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບການເຂົ້າຢ້ຽມຂໍ່ານັບ ຂອງຄະນະຜູ້ແທນ ສະມາຄົມມິດຕະພາບ ສ.ເກົາຫຼີ - ລາວ

ເຜີຍແຜ່ໂດຍ: editor ເວລາ: 10/08/2023 09:58:40 ຈຳນວນຢ້ຽມຊົມ 311 ຄັ້ງ

ໃນວັນທີ 07 ສິງຫາ 2023, ທີ່ສໍານັກງານຄະນະພົວພັນຕ່າງປະເທດສູນກາງພັກ ທ່ານ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ໂອ ມິງ ຮວັນ (Oh Myung Hwan), ປະທານສະມາຄົມ ມິດຕະພາບ ສ.ເກົາຫຼີ - ລາວ ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.

ໃນໂອກາດດັັ່ງກ່າວ, ທ່ານ ທອງສະຫວັນ ພົມວິຫານ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການມາຢ້ຽມຢາມ ສປປ ລາວ ຂອງຄະນະຜູ້ແທນສະມາຄົມມິດຕະພາບ ສ.ເກົາຫຼີ - ລາວ ຖືເປັນການປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບ ແລະ ການຮ່ວມມືອັນ ດີງາມ ລະຫວ່າງ ສອງປະເທດ ກໍຄື ປະຊາຊົນສອງຊາດ ລາວ ແລະ ສ.ເກົາຫຼີ ໃຫ້ນັບມື້ໄດ້ຮັບການ ພັດທະນາ. ພ້ອມນັ້ນ, ຍັງໄດ້ຊົມເຊີຍຕໍ່ການພົວພັນຮ່ວມມື ຂອງ ສະມາຄົມມິດຕະພາບສອງຝ່າຍ ທີ່ເຮັດບົດບາດໃນການຊຸກຍູ້ການພົວພັນດ້ານຕ່າງໆ ຂອງ ສປປ ລາວ ແລະ ສ.ເກົາຫຼີ ແລະ ໄດ້ປະກອບສ່ວນເຂົ້າໃນການສ້າງສາພັດທະນາຢູ່ ສປປ ລາວ ໂດຍສະເພາະດ້ານການສຶກສາ, ສາທາລະນະສຸກ, ມະນຸດ ສະທໍາ ແລະ ການແກ້ໄຂຄວາມທຸກຍາກ, ທັງສະໜັບສະໜູນ ແລະ ຊຸກຍູ້ການຮ່ວມມືໃນຂົງເຂດເສດ ຖະກິດ, ການຄ້າ, ການລົງທຶນ, ການສຶກສາ, ວັດທະນະທຳ, ການທ່ອງທ່ຽວ ແລະ ອື່ນໆ ເພື່ອນຳເອົາຜົນ ປະໂຫຍດຕົວຈິງມາສູ່ປະຊາຊົນສອງຊາດ ລາວ - ສ.ເກົາຫຼີ.

ທ່ານ ໂອ ມິງ ຮວັນ, ປະທານສະມາຄົມມິດຕະພາບ ສ.ເກົາຫຼີ-ລາວ ໄດ້ສະແດງຄວາມຂອບໃຈ ຢ່າງຈິງໃຈ ຕໍ່ການຕ້ອນຮັບອັນອົບອຸ່ນ ແລະ ໄດ້ລາຍງານການເຄື່ອນໄຫວ ຂອງສະມາຄົມມິດຕະພາບ ສ.ເກົາຫຼີ-ລາວ ໂດຍຫຍໍ້ໃຫ້ຊາບ ແລະ ໄດ້ສະແດງຄວາມຂອບໃຈ, ທັງຕີລາຄາສູງ ຕໍ່ພັກ ແລະ ລັດຖະບານ ສປປ ລາວ ທີ່ໄດ້ຕີລາຄາສູງຕໍ່ການປະກອບສ່ວນ ຂອງ ສະມາຄົມມິດຕະພາບ ສ.ເກົາຫຼີ -ລາວ ໃນການພັດ ທະນາຢູ່ ສປປ ລາວ ແລະ ໄດ້ປະດັບຫຼຽນໄຊ, ຫຼຽນກາມິດຕະພາບ ໃຫ້ແກ່ສະຄະນະສະມາຄົມມິດຕະພາບ ສ.ເກົາຫຼີ-ລາວ ໃນເດືອນເມສາ 2023 ທີ່ຜ່ານມາ, ພ້ອມທັງຢືນຢັນຈະສືບຕໍ່ພົວພັນຮ່ວມມືກັບສະມາຄົມ ມິດຕະພາບ ລາວ - ສ.ເກົາຫຼີ ໃນການປະຕິບັດພາລະບົດບາດ ຂອງ ຕົນ ບົນພື້ນຖານ ແລະ ຜັນຂະຫຍາຍ ເນື້ອໃນບົດບັນທຶກຄວາມເຂົ້າໃຈ ( MOU) ທີ່ສອງສະມາຄົມໄດ້ເຊັນຮ່ວມກັນ ເພື່ອປະກອບສ່ວນເສີມ ຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ເພື່ອນຳເອົາຜົນປະໂຫຍດຕົວຈິງມາສູ່ປະຊາ ຊົນ ສ.ເກົາຫຼີ ແລະ ສປປ ລາວ.

ໃນວັນດຽວກັນ ຄະນະຜູ້ແທນສະມາຄົມມິດຕະພາບ ລາວ-ສ.ເກົາຫຼີ ຍັງໄດ້ພົບປະເຮັດວຽກກັບກົມປ່າໄມ້, ກະຊວງກະສິກຳ ແລະ ປ່າໄມ້ ເພື່ອປຶກສາຫາລືກ່ຽວກັບຄວາມເປັນໄປໄດ້ໃນການເຊັນບົດບັນທຶກ ຄວາມເຂົ້າໃຈ (MOU) ລະຫວ່າງ ກົມປ່າໄມ້, ກະຊວງກະສິກຳ ແລະ ປ່າໄມ້ ຂອງ ສປປ ລາວ ກັບສູນບໍລິ ການປ່າສະຫງວນແຫ່ງຊາດ ຂອງ ສ.ເກົາຫຼີ ແລະ ຍັງຈະເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງຫົວພັນ ເພື່ອສະໜັບສະໜູນທຶນເພື່ອສ້າງອາຄານໂຮງຮຽນປະຖົມສົມບູນ ຢູ່ບ້ານກ້ານ, ເມືອງຊຳເໜືອ, ແຂວງຫົວພັນ ແລະ ທ່ຽວຊົມສະຖານທີ່ທ່ອງທ່ຽວທາງປະຫວັດສາດ, ວັດທະນະທຳ ແລະ ທຳມະຊາດ ຈຳນວນໜຶ່ງ.