ຄະນະນຳ ຄະນະພົວພັນຕ່າງປະເທດສູນກາງພັກໃຫ້ສຳພາດຂ່າວການສະເຫລີມສະຫລອງ ຄະນະພົວພັນຕ່າງປະເທດສູນກາງພັກ ຄົບຮອບ 40 ປີ

ເຜີຍ​ແຜ່​ໂດຍ​: editor ເວ​ລາ: 08/08/2023 14:05:59 ຈຳ​ນວນ​​ຢ້ຽມ​ຊົມ 463 ຄັ້ງ ​

      ໃນວັນທີ 4 ສິງຫາ 2023, ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ໃຫ້ສຳພາດຂ່າວກ່ຽວກັບ ການສະເຫລີມສະຫລອງ ຄະນະພົວພັນຕ່າງປະເທດສູນກາງພັກ ຄົບຮອບ 40 ປີ (29/6/ - 29/6/2023), ໂດຍມີເນື້ອ ໃນດັ່ງນີ້:

      ຄະນະພົວພັນຕ່າງປະເທດສູນກາງພັກ (ມີຕົວອັກສອນຫຍໍ້ ຄຕພ) ເປັນອົງການຈັດຕັ້ງໜຶ່ງ ຂອງພັກ ຂື້ນກັບຄະນະບໍລິຫານງານສູນກາງພັກ, ມີຖານະທຽບເທົ່າຄະນະ ຂອງ ພັກຂັ້ນສູນກາງ, ມີພາລະບົດບາດ ເປັນເສນາທິການໃຫ້ ຄະນະບໍລິຫານງານສູນກາງພັກ, ກົມການເມືອງສູນ ກາງພັກ ແລະ ຄະນະເລຂາທິ ການສູນກາງພັກ ໃນການຄົ້ນຄ້ວາແຜນຍຸດທະສາດ, ແນວທາງ ນະໂຍບາຍການພົວພັນຕ່າງປະເທດ ຂອງພັກ; ຕາງໜ້າສູນກາງພັກ ໃນການພົວພັນຮ່ວມມືກັບ ພັກການເມືອງ ຂອງ ຕ່າງປະເທດ ໃນຂອບສອງ ຝ່າຍ ແລະ ຫຼາຍຝ່າຍຕາມການມອບໝາຍ ຂອງ ກົມການເມືອງສູນກາງພັກ ແລະ ຄະນະເລຂາທິການສູນ ກາງພັກ ພ້ອມທັງເປັນເຈົ້າການຊີ້ນໍາ, ຄຸ້ມຄອງການເຄື່ອນໄຫວວຽກງານພົວພັນຕ່າງປະເທດຂອງ ອົງການ ຈັດຕັ້ງພັກ ແລະ ການທູດ ປະຊາຊົນໃຫ້ມີຄວາມເປັນເອກະພາບ. 

       ໃນໄລຍະການປະຕິວັດຕໍ່ສູ້ກູ້ຊາດ ຈົນຮອດໄລຍະປົດປ່ອຍຊາດໃນປີ 1975, ອົງການທີ່ເຮັດ ວຽກງານຕ່າງປະເທດ ທັງສາຍພັກ ແລະ ສາຍລັດ ໄດ້ລວມສູນຢູ່ບ່ອນດຽວນັ້ນຄື: ຫ້ອງການຕໍ່ສູ້ ການເມືອງ ແລະ ຕ່າງປະເທດ ຂອງ ແນວລາວສ້າງຊາດ ມີສຳນັກງານຕັ້ງຢູ່ເມືອງວຽງໄຊ ແຂວງ ຫົວພັນ. ພາຍຫຼັງ ການສະຖາປະນາສາທາລະນະລັດ ປະຊາທິປະໄຕ ປະຊາຊົນລາວ ປີ 1975 ແລະ ໃນໄລຍະແຫ່ງການປົກ ປັກຮັກສາ ແລະ ສ້າງສາພັດທະນາປະເທດຊາດຮອດປີ 1983, ກະຊວງ ການຕ່າງປະເທດ ຮັບຜິດຊອບ ວຽກງານພົວພັນຕ່າງປະເທດ ທັງສາຍພັກ-ລັດ ແລະ ອົງການຈັດ ຕັ້ງມະຫາຊົນ. ເນື່ອງຈາກການພົວພັນ ຕ່າງປະເທດ ຂອງ ພັກ ແລະ ລັດ ເຮົາ ນັບມື້ມີການ ເປີດກວ້າງ, ບໍລິມາດວຽກງານນັບມື້ນັບຫຼາຍຂຶ້ນ ຈຶ່ງມີຄວາມຈຳ ເປັນສ້າງຕັ້ງອົງການທີ່ ຮັບຜິດຊອບການພົວພັນຕ່າງປະເທດ ຂອງ ພັກຂຶ້ນ, ເຊິ່ງກ່ອນໜ້ານີ້ 40 ປີ, ກົມການເມືອງ ສູນກາງພັກໄດ້ອອກມະຕິຕົກລົງສ້າງຕັ້ງ ຄະນະພົວພັນຕ່າງປະເທດສູນກາງພັກ ໃນເດຶອນ ມິຖຸນາ 1983 ແລະ ກົດລະບຽບສະບັບທຳອິດ ຂອງ ຄະນະພົວພັນຕ່າງປະເທດສູນກາງພັກ ໄດ້ຖືກຮັບ ຮອງ ໃນວັນທີ 29 ມິຖຸນາ 1983. ຕະຫຼອດໄລຍະ 40 ປີ ຜ່ານມາ, ຄະນະພົວພັນຕ່າງ ປະເທດສູນກາງພັກ ໄດ້ເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ, ໂຄງປະ ກອບການ ຈັດຕັ້ງ ແລະ ພາລະບົດບາດ ຂອງ ຕົນ ໂດຍໄດ້ແບ່ງອອກເປັນ 5 ໄລຍະ ດັ່ງນີ້:  

      - ໄລຍະທີ 1: ແຕ່ປີ 1983-1993: ສະຫາຍ ພູນ ສີປະເສີດ, ກຳມະການກົມການເມືອງສູນ ກາງພັກ ຖືກແຕ່ງຕັ້ງເປັນຫົວໜ້າຄະນະພົວພັນຕ່າງປະເທດສູນກາງພັກຜູ້ທຳອິດ, ທັງເປັນລັດ ຖະມົນຕີກະຊວງການ ຕ່າງປະເທດ, ໄລຍະນີ້ ປະກອບມີ 3 ກົມ: ຫ້ອງການ, ກົມຄົ້ນຄວ້າສັງລວມ ການພົວພັນ ລະຫວ່າງພັກ ກັບພັກ ແລະ ກົມຊີ້ນຳການເຄື່ອນໄຫວສາກົນຂອງອົງການ ຈັດຕັ້ງມະຫາຊົນ.

      - ໄລຍະທີ 2: ແຕ່ປີ 1993-2006: ສະຫາຍ ສົມສະຫວາດ ເລັ່ງສະຫວັດ, ກຳມະການກົມການ ເມືອງສູນກາງພັກ ເປັນຫົວໜ້າຄະນະພົວພັນຕ່າງປະເທດສູນກາງພັກ ທັງເປັນລັດຖະມົນຕີ ກະຊວງການ ຕ່າງປະເທດ, ໃນໄລຍະນີ້ ໂດຍປະຕິ ບັດຕາມມະຕິກອງປະຊຸມໃຫຍ່ ຄັ້ງທີ V ຂອງ ພັກ, ແລະ ມະຕິຕົກລົງ ຂອງ ກົມການເມືອງສູນກາງພັກ ໄດ້ໂອນຄະນະກຳ ມະການເພື່ອສັນ ຕິພາບ ແລະ ສາມັກຄີ ຂອງ ລາວ ແລະ ຄະນະຄົ້ນຄວ້າວິໄຈການເມືອງ ເຂົ້າມາສັງກັດຢູ່ໃນຄະນະ ພົວພັນຕ່າງປະເທດສູນກາງພັກ; ໃນໄລຍະນີ້ ໄດ້ປັບປຸງກົງຈັກການຈັດຕັ້ງເປັນ 4 ກົມ ຄື: ຫ້ອງການ, ກົມຄົ້ນຄວ້າ-ສັງລວມ, ກົມພົວພັນພັກ ແລະ ກົມພົວພັນຄົນເຊື້ອຊາດລາວ ຢູ່ຕ່າງປະເທດ; ໃນປີ 2002, ເພື່ອໃຫ້ການເຄື່ອນໄຫວ ຂອງ ຄະນະພົວພັນຕ່າງປະເທດສູນ ກາງພັກ ສອດຄ່ອງກັບສະພາບການໃນໄລຍະໃໝ່, ຈຶ່ງຂະຫຍາຍເປັນ 5 ກົມ, ເພີ່ມກົມພົວພັນ ສາກົນ ຂອງ ອົງການຈັດຕັ້ງມະຫາຊົນ.

      - ໄລຍະທີ 3: ແຕ່ປີ 2006-2015: ສະຫາຍ ທອງລຸນ ສີສຸລິດ, ກໍາມະການກົມການເມືອງ ສູນກາງພັກ ໄດ້ຮັບການແຕ່ງຕັ້ງເປັນເລຂາຄະນະພັກກະຊວງການຕ່າງປະເທດ ແລະ ຄະນະພົວ ພັນຕ່າງ ປະເທດສູນກາງພັກ, ທັງເປັນຫົວໜ້າຄະນະພົວພັນຕ່າງປະເທດສູນກາງພັກ ແລະ ລັດຖະມົນຕີກະຊວງການຕ່າງປະເທດ. ໄລຍະນີ້ ກົງຈັກການຈັດຕັ້ງ ຂອງ ຄະນະພົວພັນຕ່າງ ປະເທດ ໄດ້ປັບປຸງຈາກ 5 ກົມ ເຫລືອພຽງ 3 ກົມ ຄື: ຫ້ອງການ, ກົມພົວພັນພັກ ແລະ ກົມພົວພັນສາກົນ ຂອງ ອົງການຈັດຕັ້ງ ມະຫາຊົນ.

      - ໄລຍະທີ 4: ແຕ່ປີ 2015-2020: ຍ້ອນການເຕີບໃຫຍ່ຂະຫຍາຍຕົວ ຂອງ ວຽກງານການ ຕ່າງປະເທດ ຂອງປະເທດເຮົານັບມື້ນັບກວ້າງຂວາງ, ເລິກເຊິ່ງ ບໍລິມາດການຊີ້ນຳ-ນຳພາ ຂອງ ຄະນະພັກ ຂະແໜງການຕ່າງປະເທດນັບມື້ນັບຫຼາຍຂຶ້ນ, ຄະນະເລຂາທິການສູນກາງພັກ ຈຶ່ງໄດ້ ຕົກລົງແຍກອົງຄະນະ ພັກກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ອອກເປັນ 2 ອົງຄະນະພັກເອ ກະລາດ, ສະຫາຍ ນາງ ສູນທອນ ໄຊຍະຈັກ, ກໍາມະການສູນກາງພັກ ໄດ້ຮັບການແຕ່ງຕັ້ງເປັນເລຂາ ຄະນະບໍລິຫານງານພັກ, ຫົວໜ້າຄະນະພົວພັນຕ່າງປະເທດ ສູນກາງພັກ. ໄລຍະນີ້ ກົງຈັກການຈັດຕັ້ງ ໄດ້ປັບ ປຸງຄືນ ປະກອບມີ 6 ກົມຄື: ຫ້ອງການ, ກົມຈັດຕັ້ງ-ພະນັກງານ, ກົມຄົ້ນຄວ້າ-ສັງລວມ, ກົມອາຊີ-ປາຊີ ຟິກ ແລະ ອາຟຣິກກາ, ກົມເອີຣົບ-ເອເມຣິກາ ແລະ ກົມພົວພັນສາກົນ ຂອງ ອົງການຈັດຕັ້ງມະຫາຊົນ.

      - ໄລຍະທີ 5: ແຕ່ປີ 2021 - ປະຈຸບັນ: ສະຫາຍ ທອງສະຫວັນ ພົມວິຫານ, ກຳມະການສູນ ກາງພັກ, ເປັນເລຂາຄະນະບໍລິຫານງານພັກ, ຫົວໜ້າຄະນະພົວພັນຕ່າງປະເທດສູນກາງພັກ. ໄລຍະນີ້ ໂຄງປະກອບການຈັດຕັ້ງ ຍັງຮັກສາໄວ້ 6 ກົມ ຄືໄລຍະທີ 4, ແຕ່ອີງໃສ່ການປະຕິ ບັດວຽກງານຕົວຈິງ ແລະ ເພື່ອໃຫ້ສອດຄ່ອງກັບວຽກງານໄລຍະໃໝ່ ມາຮອດປີ 2023, ໄດ້ປັບປຸງປ່ຽນຊື່ໃໝ່ 2 ກົມ ຄື: ກົມຄົ້ນ ຄວ້າ-ສັງລວມ ເປັນກົມຄົ້ນຄວ້າ ແລະ ພົວພັນຫຼາຍຝ່າຍ ແລະ ກົມພົວພັນສາກົນ ຂອງ ອົງການຈັດຕັ້ງ ມະຫາຊົນ ເປັນ ກົມການທູດປະຊາຊົນ. ປະຈຸບັນ, ຄະນະພົວພັນຕ່າງປະເທດສູນກາງພັກມີພະນັກງານ ທັງໝົດ 150 ກວ່າຄົນ.

        ຄະນະພົວພັນຕ່າງປະເທດສູນກາງພັກ ໄດ້ເຄື່ອນໄຫວໜ້າທີ່ການເມືອງ ໂດຍປະຕິບັດຕາມ ແນວທາງການຕ່າງປະເທດ ຂອງ ພັກ ຕິດພັນກັບຍຸດທະສາດລວມ ຂອງ ການພົວພັນກັບຕ່າງ ປະເທດ ແລະ ເພື່ອປະຕິບັດສອງໜ້າທີ່ຍຸດທະສາດ ປົກປັກຮັກສາ ແລະ ສ້າງສາພັດທະນາປະເທດ ຊາດ, ໃນຖານະເປັນ ເສນາທິການໃຫ້ສູນກາງພັກປະຊາຊົນ ປະຕິວັດລາວ ແລະ ໂດຍຢຶດໝັ້ນ ນະໂຍບາຍການຕ່າງປະເທດ ຂອງ ພັກວາງອອກໃນແຕ່ລະສະໄໝ, ຄະນະພົວພັນຕ່າງປະເທດ ໄດ້ ເຄື່ອນໄຫວຕ່າງປະເທດສາຍພັກ ແລະ ການທູດປະຊາຊົນ ໂດຍເສີມຂະຫຍາຍສາຍພົວພັນທີ່ ເປັນມູນເຊື້ອກັບບັນດາພັກການເມືອງໃນພາກພື້ນ ຕ່າງໆ ຂອງ ໂລກ ບົນພື້ນຖານ 5 ຫຼັກການ ຢູ່ຮ່ວມກັນໂດຍສັນຕິ, ບໍ່ຈໍາແນກລະບອບການເມືອງທີ່ ແຕກຕ່າງກັນ, ເປີດກວ້າງ ການພົວພັນ ກັບບັນດາພັກອ້າຍນ້ອງປະເທດສັງຄົມນິຍົມ, ບັນດາພັກກອມ ມູນິດ, ພັກກໍາມະກອນ, ພັກການ ເມືອງທີ່ກ້າວໜ້າ, ບັນດາພັກກໍາອໍານາດໃນປະເທດຕ່າງໆ, ໃນນັ້ນ ສືບຕໍ່ໃຫ້ບູລິມະສິດໃນການ ພົວພັນກັບບັນດາພັກເພື່ອນມິດຍຸດທະສາດຄື: ພັກກອມມູນິດຫວຽດນາມ, ພັກກອມມູນິດຈີນ, ພັກກອມມູນິດກູບາ ແລະ ພັກແຮງງານເກົາຫຼີ. ການພົວພັນກັບພັກສັງຄົມນິຍົມ ອ້າຍນ້ອງ, ພັກເຮົາຖືສໍາຄັນວຽກງານກໍ່ສ້າງພັກ-ພະນັກງານ, ຈັດກອງປະຊຸມສໍາມະນາທິດສະດີຮ່ວມກັນ.

      ນອກຈາກນັ້ນ, ພັກເຮົາໄດ້ເປີດກວ້າງການພົວພັນກັບບັນດາພັກກອມມູນິດ, ພັກກໍາມະ ກອນ, ພັກການເມືອງທີ່ກ້າວໜ້າ, ບັນດາພັກກໍາອໍານາດ, ພັກຮ່ວມລັດຖະບານ ແລະ ອົງການຈັດ ຕັ້ງສາກົນ ຢູ່ພາກພື້ນ ແລະ ໃນໂລກ ໂດຍຜ່ານຂອບການຮ່ວມມືຫຼາຍຝ່າຍ ເຊັ່ນ: ກອງປະຊຸມສາກົນ ຂອງ ບັນດາ ພັກການເມືອງໃນອາຊີ (ICAPP); ກອງປະຊຸມສາກົນ ຂອງ ບັນ ດາພັກກອມມູນິດ ແລະ ກຳມະກອນ ສາກົນ (IMCWP); ກອງປະຊຸມເວທີປຶກສາຫາລື ຊາວປາວໂລ ແລະ ກອງປະຊຸມຂອບຫລາຍຝ່າຍອື່ນໆ. ຄະນະພົວພັນຕ່າງ ປະເທດສູນກາງພັກ ໄດ້ເປັນໃຈກາງໃນການປະສານງານໃຫ້ແກ່ການ ເຄື່ອນໄຫວຕ່າງ ປະເທດ ຂອງ ບັນດາອົງການ ຈັດມະຫາຊົນ, ສູນກາງແນວລາວສ້າງຊາດ, ສູນກາງຊາວໜຸ່ມປະຊາຊົນ ປະຕິວັດລາວ, ສູນກາງ ສະຫະພັນແມ່ຍິງລາວ, ສູນກາງກຳມະບານລາວ, ສະຫະພັນນັກຮົບເກົ່າ ແຫ່ງຊາດ ລາວ ແລະ ບັນ ດາສະມາຄົມມິດຕະພາບລາວ ກັບຕ່າງປະເທດ, ຄະນະສັນຕິພາບ ແລະ ສາມັກຄີຂອງລາວ ເພື່ອສ້າງສາຍພົວພັນມິດຕະພາບ ແລະ ການຮ່ວມມືບົນພື້ນຖານຕ່າງຝ່າຍຕ່າງມີຜົນປະໂຫຍດ, ປະກອບ ສ່ວນສ້າງສັນຕິພາບ, ສະຖຽນລະພາບໃນພາກພື້ນ-ສາກົນ. ການເຄື່ອນໄຫວຕ່າງປະເທດ ຂອງ ບັນດາອົງ ການຈັດຕັ້ງດັ່ງກ່າວ ເພື່ອແນໃສ່ເຜີຍແຜ່ນະໂຍບາຍ ຂອງ ພັກ, ລັດເຮົາ ຕໍ່ຕ່າງປະເທດ, ສ້າງຄວາມ ເຂົ້າອົກເຂົ້າໃຈ ລະຫວ່າງປະຊາຊາດ, ຊຸກຍູ້ ແລະ ສົ່ງເສີມການ ຮ່ວມມືທາງດ້ານເສດຖະກິດ, ການຄ້າ ແລະ ວັດທະນະທຳ-ສັງຄົມ ລະຫວ່າງ ສປປ ລາວ ກັບບັນດາປະເທດທີ່ກ່ຽວຂ້ອງ.     

       ມາເຖິງປະຈຸບັນ, ພັກປະຊາຊົນ ປະຕິວັດລາວ ໄດ້ພົວພັນກັບ 140 ພັກການເມືອງ ໃນ 83 ປະເທດ ທົ່ວໂລກ; ໄດ້ພົວພັນ ແລະ ເຂົ້າເປັນສະມາຊິກໃນຂອບການຮ່ວມມືຫຼາຍຝ່າຍກັບ 3 ອົງການຈັດຕັ້ງສາກົນ (ກອງປະຊຸມສາກົນຂອງບັນດາພັກການເມືອງໃນອາຊີ (ICAPP), ກອງປະ ຊຸມ ຂອງ ບັນດາພັກກອມມູ ນິດ ແລະ ກຳມະກອນສາກົນ (IMCWP), ກອງປະຊຸມເວທີປຶກສາ ຫາລືຊາວປາວໂລ); ອັນພົ້ນເດັ່ນ ແມ່ນໄດ້ເຂົ້າເປັນສະມາຊິກໜ່ວຍງານວິຊາການ ຂອງ IMCWP; ສ້າງຕັ້ງສະມາຄົມມິດຕະພາບກັບ ຕ່າງປະເທດທັງໝົດມີ 19 ສະມາຄົມ ແລະ 1 ຄະນະສັນຕິພາບ ແລະ ສາມັກຄີ ຂອງ ລາວ ກັບຕ່າງ ປະເທດ. ສ່ວນຂັ້ນແຂວງໃນ 18 ແຂວງ ຂອງ ລາວ ແມ່ນໄດ້ຈັດຕັ້ງບັນດາສະມາຄົມມິດຕະພາບ ລາວ-ຫວຽດນາມ ແລະ ລາວ-ຈີນ; ນອກຈາກນັ້ນ ສະມາຄົມມິດຕະພາບລາວ-ກໍາປູເຈຍ ກໍໄດ້ຂະຫຍາຍ ສ້າງຕັ້ງສະມາຄົມຂັ້ນແຂວງ ຂອງ ຕົນຢູ່ແຂວງ ຈໍາປາສັກ ແລະ ອັດຕະປື. ສໍາລັບການພົວພັນໃນສາຍລັດ, ສປປ ລາວ ໄດ້ສ້າງຕັ້ງ ສາຍພົວພັນການທູດກັບ 148 ປະເທດ, ມີສຳນັກງານຜູ້ຕາງໜ້າ ຂອງ ຕົນ ປະຈຳຢູ່ຕ່າງປະເທດ 42 ແຫ່ງ (ສະຖານເອກອັກຄະລັດຖະທູດ 27 ແຫ່ງ, ສຳນັກງານຜູ້ຕາງໜ້າຖາວອນ 3 ແຫ່ງ, ສະຖານກົງສຸນໃຫຍ່ 10 ແຫ່ງ ແລະ ຫ້ອງການກົງສຸນ 1 ແຫ່ງ).

      ເພື່ອເສີມຂະຫຍາຍການພົວພັນຮ່ວມມືກັບຕ່າງປະເທດ ແລະ ຖືການທູດປ້ອງກັນເຫດເປັນ ທິດສໍາຄັນ, ຄະນະພົວພັນຕ່າງປະເທດສູນກາງພັກ ຈະສຸມໃສ່ການເຄື່ອນໄຫວຕ່າງປະເທດດ້ານ ພັກ ແລະ ການທູດ ປະຊາຊົນໃນຕໍ່ໜ້າດັ່ງນີ້:

      - ກຳແໜ້ນນະໂຍບາຍການຕ່າງປະເທດ ຂອງ ພັກ, ສືບຕໍ່ຂະຫຍາຍການພົວພັນຮ່ວມ ມືຫຼາຍທິດ, ຫຼາຍຝ່າຍ, ຫຼາຍຮູບແບບ, ຫຼາຍລະດັບ ລະຫວ່າງພັກເຮົາ ກັບພັກການເມືອງ ຕ່າງປະເທດ ບົນພື້ນຖານ ເຄົາລົບເອກະລາດ, ອຳນາດອະທິປະໄຕເຊິ່ງກັນ ແລະ ກັນ, ຕ່າງຝ່າຍ ຕ່າງມີຜົນປະໂຫຍດ; ເພີ່ມທະວີການ ຈັດຕັ້ງປະຕິບັດບັນດາຂໍ້ຕົກລົງຮ່ວມມືກັບບັນດາປະເທດ ເພື່ອນມິດຍຸດທະສາດ, ໃນນັ້ນ ສືບຕໍ່ເສີມ ຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານກັບ ສສ ຫວຽດນາມ; ເສີມຂະຫຍາຍສາຍພົວ ພັນທີ່ເປັນມູນເຊື້ອ ຄູ່ຮ່ວມມືຍຸດທະສາດຮອບດ້ານ, ໝັ້ນຄົງ ຍາວນານກັບ ສປ ຈີນ ຕິດພັນກັບ ການຈັດຕັ້ງປະຕິບັດແຜນແມ່ບັດຄູ່ຮ່ວມຊະຕາກຳລາວ-ຈີນ; ສາຍພົວ ພັນທີ່ເປັນມູນເຊື້ອກັບ ສປປ ເກົາຫລີ; ສ.ກູບາ; ເພີ່ມທະວີສາຍພົວພັນມິດຕະພາບອັນດີງາມ ກັບບັນດາປະເທດ ອ້າຍນ້ອງ ສະຫະພັນລັດເຊຍ; ບັນດາປະເທດເພື່ອນບ້ານໃກ້ຄຽງ ແລະ ປະເທດເພື່ອນ ມິດອື່ນໆ ເພື່ອປະກອບສ່ວນສໍາຄັນເຂົ້າໃນການປົກປັກຮັກສາສັນຕິພາບ, ສະຖຽນລະພາບ ແລະ ການຮ່ວມ ມືພັດທະນາ, ສ້າງເງື່ອນໄຂເອື້ອອໍານວຍແກ່ພາລະກິດປົກປັກຮັກສາ ແລະ ສ້າງສາປະເທດຊາດ.

     - ເປັນເຈົ້າການປະຕິບັດຫຼັກການ ການເຄື່ອນໄຫວຕ່າງປະເທດ ຂອງ ພັກເຮົາ ໃຫ້ສອດ ຄ່ອງກັບ ກົດບັດສະຫະປະຊາຊາດ ແລະ ກົດໝາຍສາກົນ ເຊັ່ນ: ການເຄົາລົບເອກະລາດ, ອະທິປະໄຕ ແລະ ບໍ່ແຊກ ແຊງເຂົ້າກິດຈະການພາຍໃນຂອງກັນ ແລະ ກັນ, ຮ່ວມມືກັນແບບ ສະເໝີພາບຕ່າງຝ່າຍຕ່າງມີຜົນປະ ໂຫຍດ; ສະໜັບສະໜູນການສ້າງລະບຽບການສາກົນ ໃໝ່ດ້ານການເມືອງ ແລະ ເສດຖະກິດທີ່ສົມເຫດ ສົມຜົນ ບົນພື້ນຖານ ຂອງ ສາກົນ 5 ຫຼັກການແຫ່ງການຢູ່ຮ່ວມກັນໂດຍສັນຕິ; ກໍາແໜ້ນທິດນໍາ ຂອງ ພັກ-ລັດເຮົາ ກ່ຽວກັບຍຸດ ທະສາດລວມ ແລະ ຫຼັກການເຄື່ອນໄຫວຕ່າງປະເທດການທູດການເມືອງ ໄປຄຽງຄູ່ກັບການທູດ ເສດຖະກິດເພື່ອຍາດແຍ່ງເອົາທຶນຮອນເຂົ້າໃນການພັດທະນາປະເທດຊາດ; ເອົາການ ພົວພັນ ດ້ານການເມືອງ ຕິກພັນກັບດ້ານການປ້ອງກັນຊາດປ້ອງກັນຄວາມສະຫງົບ ເພື່ອຮັບມືກັບ ທຸກສະຖານະການ, ບໍ່ຕົກໃນກົນອຸບາຍ ຂອງ ອິດທິກໍາລັງປໍລະປັກ; ເປີດກ້ວາງການພົວພັນຮ່ວມ ມືກັບສາກົນ ໃນຂອບຫຼາຍຝ່າຍ ຕາມແຕ່ລະບາດກ້າວ ແລະ    ເໝາະສົມຕາມເງື່ອນ ໄຂຄວາມສາມາດຕົວຈິງ.

     - ສືບຕໍ່ເສີມຂະຫຍາຍການພົວພັນຮ່ວມມືກັບປະເທດຕ່າງໆ ແລະ ບັນດາພັກການເມືອງຕ່າງ ປະເທດ ດ້ວຍຫລາຍທິດ, ຫລາຍຝ່າຍ, ຫລາຍຮູບແບບ, ຫລາຍລະດັບ ໂດຍບໍ່ຈຳແນກລະບອບ ການເມືອງທີ່ແຕກ ຕ່າງກັນເພື່ອຍາດແຍ່ງການສະໜັບສະໜູນ, ທັງເປັນການສ້າງສະພາບແວດ ລ້ອມເອື້ອອໍານວຍໃຫ້ແກ່ ການປົກປັກຮັກສາ ແລະ ສ້າງສາພັດທະນາປະເທດຊາດ; ເປັນເຈົ້າການຈັດ ຕັ້ງປະຕິບັດມະຕິກອງປະຊຸມ ໃຫຍ່ຄັ້ງທີ XI ຂອງ ພັກ ແລະ ມະຕິ ຂອງ ອົງຄະນະພັກ ຄຕພ ຄັ້ງທີ II ໃນການເຄື່ອນໄຫວທຸກວຽກງານ ທີ່ຢູ່ໃນຄວາມຮັບຜິດຊອບ ໂດຍສະເພາະການພົວພັນສອງຝ່າຍ ແລະ ຫລາຍຝ່າຍ ຂອງ ພັກ, ການພົວພັນ ການທູດປະຊາຊົນ ໃຫ້ມີປະສິດທິຜົນ ເພື່ອເປັນເສນາທິການໃຫ້ສູນກາງພັກທັນກັບສະພາບການ.

      ເວົ້າລວມແລ້ວ, ການເສີມຂະຫຍາຍພົວພັນຮ່ວມມືຕ່າງປະເທດດ້ານພັກໃນຂອບສອງຝ່າຍ ແລະ ຫລາຍຝ່າຍ, ການພົວພັນກັບບັນດາຂະບວນການກອມມູນິດ ແລະ ກຳມະກອນສາກົນ ແລະ ການພົວພັນ ການທູດປະຊາຊົນລ້ວນແຕ່ເປັນການເພີ່ມທະວີສາຍພົວພັນມິດຕະພາບ, ຍົກສູງ ບົດບາດ ຂອງ ພັກ-ລັດ ໃນເວທີສາກົນ, ເປັນການຍາດແຍ່ງທືນຮອນ, ຍາດແຍ່ງເຕັກໂນໂລຊີ, ແລກປ່ຽນບົດຮຽນດ້ານທິດສະດີ ແລະ ພຶດຕິກຳ ເພື່ອນຳມາສ້າງສາພັດທະນາປະເທດຊາດ, ທັງເປັນການປະກອບສ່ວນ ເພື່ອສັນຕິພາບ, ສະຖຽນລະພາບ ໃນພາກພື້ນ-ສາກົນ.

---