ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບການເຂົ້າຢ້ຽມອໍາລາຂອງ ເອກອັກຄະລັດຖະທູດ ສປ ຈີນ

ເຜີຍ​ແຜ່​ໂດຍ​: editor ເວ​ລາ: 25/07/2023 15:12:22 ຈຳ​ນວນ​​ຢ້ຽມ​ຊົມ 347 ຄັ້ງ ​

    ໃນຕອນເຊົ້າຂອງວັນທີ 25 ກໍລະກົດ 2023, ທີ່ສໍານັກງານຄະນະພົວພັນຕ່າງປະເທດສູນກາງພັກ, ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມອໍາລາຂອງ ສະຫາຍ ຈ່ຽງ ຈ້າຍຕົງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈໍາ ສປປ ລາວ ເນື່ອງໃນໂອກາດ​ທີ່​ສຳເລັດ​ໜ້າທີ່​ການ​ທູດ ຢູ່ ສປປ ລາວ.

     ໃນໂອກາດດັ່ງກ່າວ, ສະຫາຍ ທອງສະຫວັນ ພົມວິຫານ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນງານຂອງ ສະຫາຍ ຈ່ຽງ ຈ້າຍຕົງ ທີ່ໄດ້ປະກອບສ່ວນຢ່າງຕັ້ງໜ້າ ເຂົ້າໃນການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ, ການຮ່ວມມືແບບຄູ່ຮ່ວມຍຸດທະສາດ ຮອບດ້ານ ໝັ້ນຄົງ ຍາວນານ ຕາມທິດ 4 ດີ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ກໍຄື ການສ້າງຄູ່ຮ່ວມຊະຕາກຳ ລາວ-ຈີນ ທີ່ນັບມື້ນັບກ້າວເຂົ້າສູ່ລວງເລິກ, ເຊິ່ງຕະຫຼອດໄລຍະການປະຕິບັດໜ້າທີ່ການທູດຂອງສະຫາຍ ຈ່ຽງ ຈ້າຍຕົງ, ສະຫາຍ ໄດ້ມີການປະກອບສ່ວນອັນສໍາຄັນໃນການຊຸກຍູ້ໃຫ້ແກ່ການພົວພັນຮ່ວມມືໃນລະດັບຕ່າງໆ ແລະ ການແລກປ່ຽນຄະນະຜູ້ແທນຂັ້ນສູງ ຂອງ ສອງພັກ, ສອງລັດ ລາວ-ຈີນ ຢ່າງເປັນປົກກະຕິ, ໄດ້ເປັນຂົວຕໍ່ສໍາຄັນຂອງການຈັດຕັ້ງປະຕິບັດບັນດາທິດຊີ້ນໍາທີ່ການນໍາຂັ້ນສູງຂອງສອງພັກ ໄດ້ເຫັນດີເປັນເອກະພາບກັນ ກ່ຽວກັບ ທິດທາງການຮ່ວມມື ລະຫວ່າງ ສອງພັກ, ສອງລັດ ໃນແຕ່ລະໄລຍະ ຢ່າງມີຜົນສຳເລັດ, ທັງໄດ້ໃຫ້ການຊຸກຍູ້ ແລະ ອໍານວຍຄວາມສະດວກໃຫ້ແກ່ບັນດາອົງການອ້ອມຂ້າງສູນກາງພັກ ຂອງສອງພັກ ລາວ-ຈີນ ໄດ້ມີການໄປມາຫາສູ່, ແລກປ່ຽນ-ຖອດຖອນບົດຮຽນນໍາກັນເປັນປົກກະຕິ ແລະ ນັບມື້ນັບເລິກເຊິ່ງກວ່າເກົ່າ.

       ສະຫາຍ ຈ່ຽງ ຈ້າຍຕົງ ໄດ້ສະແດງຄວາມຂອບໃຈຕໍ່ ສະຫາຍ ທອງສະຫວັນ ພົມວິຫານ ທີ່ໄດ້ໃຫ້ກຽດຕ້ອນຮັບການເຂົ້າຢ້ຽມອຳລາໃນຄັ້ງນີ້, ພ້ອມທັງໄດ້ສະແດງຄວາມຂອບໃຈຕໍ່ ພັກ ປປ ລາວ ກໍຄື ຄະນະພົວພັນຕ່າງປະເທດສູນກາງພັກ ທີ່ໄດ້ເອົາໃຈໃສ່ໃຫ້ການຮ່ວມມື ໃນການປະຕິບັດໜ້າທີ່ການທູດຂອງສະຫາຍ ຕະຫລອດໄລຍະເວລາທີ່ຜ່ານມາ ແລະ ຫວັງວ່າ ຄະນະພົວພັນຕ່າງປະເທດສູນກາງພັກ ຈະສືບຕໍ່ໃຫ້ການຮ່ວມມື ແລະ ອໍານວຍຄວາມສະດວກ ໃຫ້ແກ່ທູດ ສປ ຈີນ ຜູ້ໃໝ່ ທີ່ຈະມາຮັບໜ້າທີ່ແທນສະຫາຍຕໍ່ໄປ ເພື່ອພ້ອມກັນສືບຕໍ່ເຮັດໜ້າທີ່ເປັນຂົວຕໍ່ແຫ່ງການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ໃຫ້ຈະເລີນງອກງາມຍິ່ງໆຂຶ້ນ ກໍຄື ຮ່ວມກັນສ້າງຄູ່ຮ່ວມຊະຕາກໍາ ລາວ-ຈີນ ໃຫ້ປະກົດຜົນເປັນຈິງ.

---