ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບ ເອກອັກຄະລັດຖະທູດ ສ.ອາເມຣິກາ ເຂົ້າຢ້ຽມອໍາລາ

ເຜີຍ​ແຜ່​ໂດຍ​: editor ເວ​ລາ: 17/07/2023 15:32:54 ຈຳ​ນວນ​​ຢ້ຽມ​ຊົມ 534 ຄັ້ງ ​

    ໃນວັນທີ 17 ກໍລະກົດ 2023, ທີ່ສໍານັກງານຄະນະພົວພັນຕ່າງປະເທດສູນກາງພັກ, ທ່ານ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ, ໄດ້ຕ້ອນຮັບການເຂົ້າຢ້ຽມອຳລາຂອງ ທ່ານ ປີເຕີ ເຮມອນ, ເອກອັກຄະລັດຖະທູດວິສາມັນຜູ້ມີອໍາ ນາດເຕັມແຫ່ງ ສະຫະລັດ ອາເມຣິກາ ປະຈໍາ ສປປ ລາວ, ໃນໂອກາດທີ່ສໍາເລັດການ ປະຕິບັດໜ້າທີ່ທາງ ການທູດຢູ່ ສປປ ລາວ.

   ໃນໂອກາດດັ່ງກ່າວ, ຫົວ​ໜ້າ​ຄະ​ນະ​​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໄດ້ສະແດງຄວາມຍິນດີຕ້ອນຮັບ, ສະແດງຄວາມຊົມເຊີຍ ຕໍ່ຜົນສໍາເລັດໃນການປະຕິບັດໜ້າທີ່ການທູດຢູ່ ສປປ ລາວ ຕະຫຼອດໄລຍະຜ່ານມາ ໂດຍໄດ້ປະກອບສ່ວນຢ່າງຕັ້ງໜ້າເຂົ້າໃນການຊຸກຍູ້ ແລະ ເສີມຂະຫຍາຍສາຍພົວພັນຮ່ວມມື ລະຫວ່າງ ສອງປະເທດ ລາວ-ອາເມຣິກາ ໃຫ້ນັບມື້ນັບດີຂຶ້ນເລື້ອຍໆ; ສະແດງຄວາມຂອບໃຈຕໍ່ການຊ່ວຍເຫຼືອຂອງ ລັດຖະບານ ແລະ ປະຊາຊົນອາ​ເມ​ຣິ​ກາ ທີ່ມີຕໍ່ ສປປ ລາວ ໃນໄລຍະຜ່ານມາ ໃນຂອບສອງຝ່າຍ ແລະ ຫຼາຍຝ່າຍ, ເປັນຕົ້ນ: ການລະດົມທຶນ ເພື່ອສະໜັບສະໜູນການພັດທະນາເສດຖະກິດ-ສັງຄົມຢູ່ ສປປ ລາວ, ສະໜອງທຶນໃຫ້ແກ່ວຽກງານສະກັດກັ້ນຢາເສບຕິດ ແລະ ການພັດທະນາການບັງຄັບໃຊ້ກົດໝາຍ, ການເກັບກູ້ລະເບີດບໍ່ທັນແຕກ ໃນ ສປປ ລາວ, ວຽກງານສາທາລະນະສຸກ, ການສຶກສາ, ສະໜັບສະໜູນ ໂຄງການອະນຸລັກຮັກສາມູນເຊື້ອວັດທະນະທຳລາວ ແລະ ໄດ້ມອບວັກຊິນຕ້ານພະຍາດໂຄວິດ-19 ໃຫ້ແກ່ ສປປ ລາວ.

    ທ່ານ ປີເຕີ ເຮມອນ ໄດ້ສະແດງຄວາມຂອບໃຈ ມາຍັງຫົວ​ໜ້າ​ຄະ​ນະ​​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ຂອບໃຈຕໍ່ລັດຖະບານ ສປປ ລາວ ທີ່ໄດ້ເອົາໃຈໃສ່ ໃຫ້ການຮ່ວມ ມືຊ່ວຍເຫຼືອ ໃນການປະຕິບັດໜ້າທີ່ການທູດຂອງຕົນຢູ່ ສປປລາວ ຕະຫຼອດໄລຍະເວລາຜ່ານມາ ແລະ ສະແດງຄວາມຫວັງວ່າລັດຖະບານ ສປປ ລາວ ຈະສືບຕໍ່ໃຫ້ການຮ່ວມມື ແກ່ທ່ານເອກອັກຄະລັດຖະທູດ ສະຫະລັດ ອາເມຣິກາ ຄົນໃໝ່ ທີ່ຈະມາຮັບໜ້າທີ່ຕໍ່ໄປ ເພື່ອພ້ອມກັນສືບຕໍ່ຊຸກຍູ້, ສົ່ງເສີມສາຍພົວພັນ ຮ່ວມມື ລະຫວ່າງ ສອງປະເທດທີ່ມີມາແລ້ວນັ້ນ ໃຫ້ສືບຕໍ່ໄດ້ຮັບການຂະຫຍາຍຕົວ ແລະ ເປັນຮູບປະທຳ ຍິ່ງໆຂຶ້ນ.

    ໃນຕອນທ້າຍ, ຫົວ​ໜ້າ​ຄະ​ນະ​​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໄດ້ອວຍພອນໃຫ້ ທ່ານທູດ ຈົ່ງມີສຸຂະພາບເຂັ້ມແຂງ, ປະສົບຜົນສຳເລັດໃນໜ້າທີ່ວຽກງານໃໝ່ທີ່ໃຫຍ່ກວ່າເກົ່າຂອງທ່ານ ແລະ ເດີນທາງກັບຄືນປະເທດດ້ວຍຄວາມສະຫວັດດີພາບ.

---