ຫົວໜ້າຄະນະພົວພັນຕ່າງປະເທດສູນກາງພັກຕ້ອນຮັບການເຂົ້າຢ້ຽມອຳລາຂອງ ເອກອັກຄະລັດຖະທູດ ສິງກະໂປ ປະຈຳ ສປປ ລາວ

ເຜີຍ​ແຜ່​ໂດຍ​: editor ເວ​ລາ: 22/06/2023 15:31:18 ຈຳ​ນວນ​​ຢ້ຽມ​ຊົມ 324 ຄັ້ງ ​

ໃນ​ວັນ​ທີ 22 ມິ​ຖຸ​ນາ 2023, ທີ່ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ, ທ່ານ ທອງ​ສະ​ຫວັນ ພົມ​ວິ​ຫານ, ກຳ​ມະ​ການ​ສູນ​ກາງ​ພັກ, ຫົວ​ໜ້​າຄະ​ນະ​ພົວ​ພັ​ນ​ຕ່າງ​ປະ​ເທດ​ສູນ​ກາງ​ພັກໄດ້​ຕ້ອນຮັບການ​ເຂົ້າ​ຢ້ຽມ​ອຳ​ລາ​ຂອງ ​ທ່ານ ນາງ ຫຼຽວ ຊຸຍ ຫຼິນ  )Leow Siu lin ), ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສິງກະໂປ ປະຈໍາ ສປປ ລາວ.

ໃນ​ໂອ​ກາດ​ດັ່ງ​ກ່າວ, ທ່ານ ທອງ​ສະ​ຫວັນ ພົມ​ວິ​ຫານ ໄດ້​ສະ​ແດງ​ຄວາມ​ຍິນ​ດີ ແລະ ຊົ​ມ​ເຊີຍຕໍ່​ ທ່ານ​ເອກ​ອັກ​ຄະ​ລັດ​ຖະ​ທູດ ທີ່​ໄດ້​ປະ​ຕິ​ບັດ​ໜ້າ​ທີ່​ການ​ທູດ ຢູ່ ສ​ປ​ປ ລາວ ດ້ວຍ​ຜົນ​ສຳ​ເລັດ, ປະ​ກອບ​ສ່ວນ​ສຳ​ຄັນ​ເຂົ້າ​ໃນ​ການ​ເພີ່ມ​ພູນ​ຄູນ​ສ້າງ​ສາຍ​ພົວ​ພັນ​ມິດ​ຕະ​ພາບ ລະ​ຫວ່າງ ລາວ-ສິງ​ກະ​ໂປ ໃນ​ໄລ​ຍະທີ່​ຜ່ານ​ມາ, ຊ່ວຍ​ຊຸກ​ຍູ້​ການ​ພົວ​ພັນ​ຮ່ວມ​ມື​ໃນ​ຂົງ​ເຂດ​ຕ່າງໆຂອງ 2 ປະ​ເທດ ຢ່າງ​ຕັ້ງ​ໜ້າ ເປັນ​ຕົ້ນ​ ​ດ້ານ​ການ​ເມືອງ, ດ້ານ​ການ​ສຶກ​ສາ, ການ​ຊ່ວຍ​ເຫຼືອ​ທາງ​ດ້ານ​ມະ​ນຸດ​ສະ​ທຳ ໃນ​ໄລ​ຍະ​ການໂຄວິດ-19, ການ​ຄ້າ-ການ​ລົງ​ທຶນ, ການ​ທ່ອງ​ທ່ຽວ ແລະ ວຽກ​ງານ​ການ​ຮ່ວມ​ມື​ອື່ນໆໃຫ້​ມີ​ບາດ​ກ້າວ​ຂະ​ຫຍາຍ​ຕົວ​ໃໝ່. ສະ​ແດງ​ຄວາມ​ມຸ້ງ​ຫວັງ​ວ່າທ່ານເອກ​ອັກ​ຄະ​ລັດ​ຖະ​ທູດສິງ​ກະ​ໂປຄົນ​ໃໝ່ຈະ​ສືບ​ຕໍ່​​ຮັກ​ສາ​ມູນ​ເຊື້ອໃນ​ການ​ຮ່ວມ​ມື ແລະ ປະ​ສານ​ສົມ​ທົບ​ຢ່​າງ​ແໜ້ນ​ແຟ້ນ​ກັບ​ພາກ​ສ່ວນ​ກ່ຽວ​ຂ້ອງ ​ຂອງ ສປປ ລາວ ​ເພື່ອ​ເສີມ​ຂະ​ຫຍາຍ​ສາຍ​ພົວ​ພັນມິດຕະພາບ​ ແລະ ການຮ່ວມມື ລະຫວ່າງ ​ສ​ປ​ປ ລາວ-ສິງ​ກະ​ໂປ ໃຫ້​ນັບ​ມື້​ນັບແໜ້ນແຟ້ນ ແລະ ​ມີໝາກຜົນ​ຍິ່ງໆ ​ຂຶ້ນ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນ 2 ຊາດ ລາວ ແລະ ສິງ​ກະ​ໂປ.

ທ່ານເອກອັກຄະລັດຖະທູດສິງ​ກະ​ໂປ ໄດ້ສະ​ແດງ​ຄວາມຂອບໃຈ​ເປັນ​ຢ່າງ​ສູງ ທີ່​ໄດ້​ມີ​ໂອ​ກາດ​ເຂົ້າ​ຢ້ຽມອຳ​ລາ ທ່ານ​​ຫົວໜ້າຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ແລະ ຕີ​ລາ​ຄາ​ສູງ​ຕໍ່​ການ​ພົວ​ພັນ​ຮ່ວມ​ມື ລະ​ຫວ່າງ 2 ປະ​ເທດ ສິງ​ກະ​ໂປ ແລະ ລາວ ໃນ​ໄລ​ຍະ​ທີ່​ຜ່ານ​ມາ, ພ້ອມ​ທັງ​ສະ​ແດງ​ຄວາມ​ຂອບ​ໃຈ​ຕໍ່ ພັກ, ລັດຖະ​ບານ​ລາວຍາມ​ໃດທີ່​ໄດ້​ໃຫ້​ການ​ສະ​ໜັບ​ສະ​ໜູນ​ຊ່ວຍ​ເຫຼືອ​ຕົນ​ເອງຕະຫຼອດ​​ໄລ​ຍະ​ປະ​ຕິ​ບັດ​ໜ້າ​ທີ່​ການ​ທູດ ຢູ່ ສ​ປ​ປ ລາວ ຈົນ​ໄດ້​ຮັບ​ຜົນ​ສຳ​ເລັດ​ຈົບ​ງາມ; ສະ​ແດງ​ຄວາມ​ມຸ່ງ​ຫວັງ​ຈະ​ສືບ​ຕໍ່​ປະ​ກອບ​ສ່ວນ​ເຂົ້າ​ໃນໃນ​ການ​​ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສິງກະໂປ-ສ​ປ​ປ ລາວ ກໍ່ຄືສາຍພົວພັນມິດຕະພາບໃຫ້​​ນັບ​ມື້ແຕກດອກອອກ​ຜົນຍິ່​ງໆ​ຂຶ້ນ.

ທ່ານຫົວໜ້າຄະນະພົວພັນຕ່າງປະເທດສູນກາງພັກ ຍັງໄດ້ອວຍພອນໃຫ້ ທ່ານທູດເດີນ​ທາງ​ກັບ​ຄືນ​ປະ​ເທດ​ດ້ວຍ​ຄວາມ​ສະ​ຫວັດ​ດີ​ພາບ, ປະ​ສົ​ບ​ຜົນ​ສຳ​ເລັດ​ໃນ​ໜ້າ​ທີ່​ວຽກ​ງານ​ໃໝ່ ແລະ ສະ​ເໜີໃຫ້​ທ່ານ​ທູດ​ສືບ​ຕໍ່ເປັນຂົວເຊື່ອມຕໍ່ມິດຕະພາບທີ່ດີງາມ ລະຫວ່າງ  2 ປະເທດ ລາວ ແລະ ສິງ​ກະ​ໂປ ໃຫ້​ນັບ​ມື້​ໄດ້​ຮັບ​ການ​ຂະ​ຫຍາຍ​ຕົວ​ຍິ່ງໆ ຂຶ້ນ ເພື່ອສັນຕິພາບ ແລະ ການ​ຮ່​ວມ​ມື ເພື່ອ​ການ​ພັດ​ທະ​ນາ ​ໃນ​ພາກ​ພື້ນ ແລະ ໃນ​ໂລກ.

---