ເລຂາທິການໃຫຍ່, ປະທານປະເທດ ແຫ່ງ ສປປ ລາວ ສຶບຕໍ່ຢ້ຽມຢາມ ສປ ຈີນ ແລະ ພົບປະກັບ ເລຂາພັກນະຄອນສົງຊິ້ງ
ເຜີຍແຜ່ໂດຍ: editor ເວລາ: 20/06/2023 13:45:56 ຈຳນວນຢ້ຽມຊົມ 902 ຄັ້ງ ພາຍຫລັງທີ່ໄດ້ຢ້ຽມຢາມແຂວງຢຸນນານ ແລະ ເຂດປົກຄອງຕົນເອງເຜົ່າຈ້ວງກວາງຊີ, ສະຫາຍ ທອງລຸນ ສີສຸລິດ, ເລຂາທິການໃຫຍ່, ປະທານປະເທດ ແຫ່ງ ສປປ ລາວ ໄດ້ສືບຕໍ່ຢ້ຽມຢາມນະຄອນສົງຊິ້ງ, ສປ ຈີນ ແລະ ຕ້ອນຮັບການເຂົ້າຢ້ຽມຂໍ່ານັບ ຂອງ ສະຫາຍ ຢວນ ເຈ່ຍຈຸນ, ກໍາມະການກົມການເມືອງສູນກາງພັກກອມມູນິດຈີນ, ເລຂາພັກນະຄອນສົງຊິ້ງ ໃນວັນທີ 19 ມິຖຸນາ 2023.
ໃນການພົບປະຄັ້ງນີ້, ສະຫາຍ ທອງລຸນ ສີສຸລິດ ໄດ້ຕີລາຄາສູງ ຕໍ່ຜົນສໍາເລັດໃນການສ້າງສາພັດທະນາເສດຖະກິດ-ສັງຄົມ ພາຍໃຕ້ການຊີ້ນໍານໍາພາຂອງ ຄະນະພັກ-ອໍານາດການປົກຄອງ ຂອງ ນະຄອນສົງຊິ້ງ, ໂດຍສະເພາະແມ່ນ ຜົນສໍາເລັດໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XX ຂອງພັກກອມມູນິດຈີນ, ການລົບລ້າງຄວາມທຸກຍາກຂອງປະຊາຊົນ ແລະ ຍຸດທະສາດການສ້າງສາພັດທະນານະຄອນສົງຊິ້ງ ໃຫ້ເປັນສູນກາງເຂດເສດຖະກິດຂະໜາດໃຫຍ່, ທັງເປັນສູນກາງໃນການເຊື່ອມໂຍງການພັດທະນາ ແລະ ການຂົນສົ່ງທາງບົກ-ທາງທະເລ ກັບເຂດພາກຕາເວັນຕົກຂອງຈີນ ແລະ ສາກົນ; ໄດ້ຕີລາຄາສູງຕໍ່ ຄະນະພັກ-ອໍານາດການປົກຄອງ ນະຄອນສົງຊິ້ງ ທີ່ໄດ້ໃຫ້ຄວາມເອົາໃຈໃສ່ປະກອບສ່ວນຢ່າງຕັ້ງໜ້າ ເຂົ້າໃນການເສີມສ້າງສາຍພົວພັນຮ່ວມມື ລະຫວ່າງ ສອງພັກ, ສອງລັດ ລາວ-ຈີນ ກໍ່ຄື ການຈັດຕັ້ງຜັນຂະຫຍາຍເນື້ອໃນຈິດໃຈທີ່ເປັນເອກະພາບກັນ ລະຫວ່າງ ການນໍາສູງສຸດຂອງສອງພັກ ໃນການຊຸກຍູ້ການສ້າງຄູ່ຮ່ວມຊະຕາກຳ ລາວ-ຈີນ ໃຫ້ເຂົ້າສູ່ງລວງເລິກ ແລະ ແຕກດອອກອອກຜົນ.
ສະຫາຍ ທອງລຸນ ສີສຸລິດ ຍັງໄດ້ລົງເລິກແລກປ່ຽນຄໍາຄິດເຫັນ ກ່ຽວກັບ ທິດທາງໃນການພົວພັນຮ່ວມມື ລະຫວ່າງ ສປປ ລາວ ກັບ ນະຄອນສົງຊິ້ງ ໃນຕໍ່ຫນ້າ ໂດຍໄດ້ສະເຫນີໃຫ້ ສອງຝ່າຍ ສືບຕໍ່ຂຸດຄົ້ນການຮ່ວມມື ໃນດ້ານຕ່າງໆ ທີ່ສອງຝ່າຍມີທ່າແຮງ, ເປັນຕົ້ນແມ່ນ ດ້ານການຂົນສົ່ງສິນຄ້າ ລະຫວ່າງ ລາວ-ສົງຊິ້ງ ຜ່ານທາງລົດໄຟ ລາວ-ຈີນ, ເຊິ່ງຈະເປັນການເປີດຕະຫຼາດລາວ ສູ່ເຂດພາກກາງ-ຕາເວັນຕົກຂອງຈີນ ທັງເປັນເງື່ອນໄຂເອື້ອຍອຳນວຍໃຫ້ແກ່ໃນການສົ່ງສິນຄ້າລາວໄປຕ່າງປະເທດ ຜ່ານສົງຊິ້ງ ກໍຄື ການຂົນສົ່ງສິນຄ້າ ຈາກ ນະຄອນສົງຊິ້ງ ໄປ ສປປ ລາວ ແລະ ປະເທດອາຊຽນ; ສະເຫນີໃຫ້ສອງຝ່າຍ ສືບຕໍ່ເສີມຂະຫຍາຍການໄປມາຫາສູ່ກັນ, ລົງເລິກການແລກປ່ຽນຖອດຖອນບົດຮຽນ ທາງດ້ານວຽກງານແນວຄິດ-ທິດສະດີ ກໍຄື ບົດຮຽນໃນການພັດທະນາຊົນນະບົດ, ການລົບລ້າງຄວາມທຸກຍາກຂອງປະຊາຊົນ ນັບມື້ນັບຫຼາຍຂຶ້ນ. ພ້ອມນັ້ນ ກໍ່ໄດ້ສະເໜີໃຫ້ ສົງຊິ້ງ ຊ່ວຍຊຸກຍູ້ຂົນຂວາຍນັກລົງທຶນ ແລະ ວິສາຫະກິດຂອງຕົນ ໄປລົງທຶນຢູ່ ສປປ ລາວ ແລະ ຊຸກຍູ້ໃຫ້ປະຊາຊົນຈີນ ໄປທ່ອງທ່ຽວຢູ່ ສປປ ລາວ ຫຼາຍຂຶ້ນກວ່າເກົ່າ.
ສະຫາຍ ຢວນ ເຈ່ຍຈຸນ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການຢ້ຽມຢາມ ສປ ຈີນ ກໍ່ຄື ນະຄອນສົງຊິ້ງ ໃນຄັ້ງນີ້, ພ້ອມທັງແຈ້ງໃຫ້ຊາບ ສະພາບການພັດທະນາເສດຖະກິດ-ສັງຄົມ ຂອງ ນະຄອນສົງຊິ້ງ ກໍຄື ບັນດາຜົນສໍາເລັດຂອງການພົວພັນຮ່ວມມື ລະຫວ່າງ ສົງຊິ້ງ-ສປປ ລາວ ໃນໄລຍະຜ່ານມາ; ສະຫາຍ ໄດ້ສະແດງຄວາມຂອບໃຈຝ່າຍລາວ ທີ່ໄດ້ໃຫ້ການສະຫນັບສະຫນູນ ແລະ ສົ່ງຄະນະຜູ້ແທນຂອງລາວ ເຂົ້າຮ່ວມກອງປະຊຸມສາກົນທີ່ຈັດຂຶ້ນຢູ່ ນະຄອນສົງຊິ້ງ ໃນບໍ່ດົນຜ່ານມານີ້ ແລະ ໄດ້ສະແດງຄວາມຍິນດີ ທີ່ຈະສືບຕໍ່ໍຊຸກຍູ້ການຈັດຕັ້ງຜັນຂະຫຍາຍຂໍ້ຕົກລົງ ລະຫວ່າງ ການນໍາສູງສຸດຂອງສອງພັກ, ສອງລັດ ລາວ-ຈີນ ເພື່ອເສີມຂະຫຍາຍການພົວພັນຮ່ວມມືສອງຝ່າຍໃນຕໍ່ຫນ້າ ໃຫ້ມີຫມາກມີຜົນຕົວຈິງທີ່ໃຫຍ່ຫລວງກວ່າເກົ່າ.
ໃນໂອກາດຢ້ຽມຢາມ ນະຄອນສົງຊິ້ງ, ສະຫາຍ ທອງລຸນ ສີສຸລິດ ຍັງໄດ້ຢ້ຽມຢາມຫໍມູນເຊື້ອປະຕິວັດຫົງແຢນ ເຊິ່ງເປັນສະຖານທີ່ປະຫວັດສາດທີ່ສຳຄັນຂອງພັກກອມມູນິດຈີນ, ຢ້ຽມຢາມພື້ນຖານການຜະລິດອຸດສາຫະກໍາທີ່ສໍາຄັນ ຂອງ ນະຄອນສົງຊິ້ງ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20