ສະຫາຍເລຂາທິການໃຫຍ່, ປະທານປະເທດ ສືບຕໍ່ຢ້ຽມຢາມ ສປ ຈີນ ແລະ ພົບປະກັບ ສະຫາຍເລຂາພັກແຂວງຢຸນນານ, ສປ ຈີນ
ເຜີຍແຜ່ໂດຍ: editor ເວລາ: 17/06/2023 06:11:36 ຈຳນວນຢ້ຽມຊົມ 399 ຄັ້ງ ໃນວັນທີ 16 ມິຖຸນາ 2023 ສະຫາຍ ທອງລຸນ ສີສຸລິດ, ເລຂາທິການໃຫຍ່, ປະທານປະເທດ ແຫ່ງ ສປປ ລາວ ໄດ້ສືບຕໍ່ເຄື່ອນໄຫວຢ້ຽມຢາມ ແຂວງຢຸນນານ, ສປ ຈີນ ເຊິ່ງໂອກາດດັ່ງກ່າວ ສະຫາຍ ເລຂາທິການໃຫຍ່ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ຫວັງ ໜິງ, ກໍາມະການສູນກາງພັກ, ເລຂາພັກແຂວງ, ປະທານສະພາປະຊາຊົນແຂວງຢຸນນານ ທີ່ນະຄອນຄຸນມິງ, ແຂວງຢຸນນານ.
ໃນການພົບປະ, ສະຫາຍ ທອງລຸນ ສີສຸລິດ ໄດ້ຕີລາຄາສູງ ແລະ ສະແດງຄວາມຊົມເຊີຍ ຕໍ່ຫມາກຜົນຂອງການພັດທະນາທ້ອງຖິ່ນ ໂດຍສະເພາະແມ່ນການພັດທະນາຊົນນະບົດ ແລະ ການລຶບລ້າງຄວາມທຸກຍາກ ທີ່ແຂວງຢຸນນານຍາດມາໄດ້ໃນໄລຍະຜ່ານມາ; ສະຫາຍ ໄດ້ຕີລາຄາສູງ ຕໍ່ການພົວພັນຮ່ວມມື ລະຫວ່າງ ສອງພັກ, ສອງລັດ ລາວ-ຈີນ ໃນໄລຍະຜ່ານມາ ກໍ່ຄື ການຮ່ວມມື ລະຫວ່າງ ລາວກັບແຂວງຢຸນນານ ທີ່ເປັນແຂວງ ທີ່ຕິດຈອດກັບ ສປປ ລາວ, ເປັນດັ່ງປະຕູທີ່ເຊື່ອມໂຍງ 2 ປະເທດ ລາວ-ຈີນ ທີ່ມີທ່າແຮງການຮ່ວມມືດ້ານເສດຖະກິດ ແລະ ມີໝາກຜົນການຮ່ວມມືທີ່ເປັນຮູບປະທຳຕົວຈິງນັບມື້ນັບຫຼາຍຂຶ້ນ ໂດຍສະເພາະພາຍຫລັງທີ່ທັງສອງປະເທດ ໄດ້ເປີດນຳໃຊ້ເສັ້ນທາງລົດໄຟລາວ-ຈີນ ເປັນຕົ້ນມາ ເຊິ່ງເຮັດໃຫ້ສະພາບການພົວພັນຮ່ວມມືສອງຝ່າຍ ນັບມື້ນັບມີຊີວິດຊີວາ ແລະ ສະດວກວ່ອງໄວຍິ່ງຂຶ້ນ; ແຂວງຢຸນນານ ຍັງເປັນແຂວງທີ່ໄດ້ມີການລົງທຶນໃນບັນດາໂຄງການສຳຄັນ ທີ່ເປັນໂຄງການຍຸດທະສາດຂອງສອງປະເທດ ເຊັ່ນ: ໂຄງການທາງດ່ວນ ນະຄອນຫຼວງວຽງຈັນ ຫາ ຊາຍແດນ ລາວ-ຈີນ, ລວມທັງການຮ່ວມມືທາງດ້ານການຄ້າ, ການສຶກສາ, ກະສິກໍາ, ພະລັງງານ ແລະ ອື່ນໆ.
ສະຫາຍ ທອງລຸນ ສີສຸລິດ ຍັງໄດ້ເນັ້ນໜັກ ແລະ ສະເໜີໃຫ້ ແຂວງຢຸນນານ ເພີ່ມທະວີການພົວພັນຮ່ວມມືປະສານສົມທົບກັນກັບ ສປປ ລາວ ໃນການຈັດຕັ້ງຜັນຂະຫຍາຍທິດຊີ້ນໍາທີ່ໄດ້ເປັນເອກະພາບກັນ ລະຫວ່າງ ການນໍາຂອງພັກ, ສອງລັດ ລາວ-ຈີນ ແລະ ລົງເລິກການຈັດຕັ້ງຜັນຂະຫຍາຍ ແຜນແມ່ບົດວ່າດ້ວຍການສ້າງຄູ່ຮ່ວມຊະຕາກໍາສັງຄົມນິຍົມ ລາວ-ຈີນ; ຊຸກຍູ້ພາກສ່ວນກ່ຽວຂ້ອງ ສືບຕໍ່ຈັດຕັ້ງຜັນຂະຫຍາຍຜົນການຢ້ຽມຢາມ ສປປ ລາວ ຂອງ ສະຫາຍ ຫວັງໜິງ ໃນເດືອນມີນາ 2023 ຜ່ານມາ ໃຫ້ປະກົດຜົນເປັນຈິງ, ເອົາໃຈໃສ່ ການຮ່ວມມືດ້ານການພັດທະນາຊັບພະຍາກອນມະນຸດ ລວມທັງການຈັດຕັ້ງການຝຶກອົບຮົມໃຫ້ແກ່ພະນັກງານລາວ, ສືບຕໍ່ຄົ້ນຄວ້າ ບຸກເບີກການຮ່ວມມືໃນໂຄງການໃໝ່ອື່ນໆທີ່ສອງຝ່າຍມີທ່າແຮງ ເພື່ອສືບຕໍ່ຮ່ວມມືກັນແບບຕ່າງຝ່າຍຕ່າງມີຜົນປະໂຫຍດໃຫ້ເລິກເຊິ່ງກວ່າເກົ່າ ເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນ ແລະ ການພົວພັນຮ່ວມມື ລະຫວ່າງ ສອງພັກ, ສອງລັດ ລາວ-ຈີນ ໃຫ້ນັບມື້ນັບຂະຫຍາຍຕົວເຂົ້າສູ່ລວງເລິກ ແລະ ກ້າວຂຶ້ນສູ່ລະດັບໃໝ່.
ສະຫາຍ ຫວັງ ໜິງ ໄດ້ຕີລາຄາສູງຕໍ່ການຢ້ຽມຢາມ ສປ ຈີນ ຂອງ ສະຫາຍ ທອງລຸນ ສີສຸລິດ ພ້ອມດ້ວຍພັນລະຍາ ແລະ ຄະນະໃນຄັ້ງນີ້, ເຊິ່ງເປັນການສືບຕໍ່ຮັດແໜ້ນສາຍພົວພັນມິດຕະພາບອັນເປັນມູນເຊື້ອ ແລະ ການພົວພັນຮ່ວມມື ລະຫວ່າງ ສອງພັກ, ສອງລັດ ລາວ-ຈີນ, ທັງເປັນການຊຸກຍູ້ການພົວພັນຮ່ວມມື ລະຫວ່າງ ແຂວງຢຸນນານ ກັບ ສປປ ລາວ. ໃນຕໍ່ໜ້າ ຍິນດີຈະສືບຕໍ່ຮ່ວມກັບຝ່າຍລາວ ຈັດຕັ້ງປະຕິບັດທິດຊີ້ນໍາທີ່ເປັນເອກະພາບກັນ ລະຫວ່າງ ການນໍາຂັ້ນສູງສຸດ ຂອງ ສອງພັກ, ສອງລັດ ຢ່າງຕັ້ງໜ້າ ເພື່ອປະກອບສ່ວນເສີມຂະຫຍາຍມິດຕະພາບອັນເປັນມູນເຊື້ອ ແລະ ການຮ່ວມມື ຕາມເນື້ອໃນຈິດໃຈຂອງການສ້າງເປັນຄູ່ຮ່ວມຊະຕາກໍາ ລາວ-ຈີນ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ.
ໄລຍະເຄື່ອນໄຫວຢ້ຽມຢາມຢູ່ແຂວງຢຸນນານ, ສະຫາຍ ທອງລຸນ ສີສຸລິດ ແລະ ຄະນະ ຍັງໄດ້ທັດສະນະສຶກສາ ແລະ ແລກປ່ຽນບົດຮຽນ ຢູ່ ເຂດພັດທະນາກະສິກໍາ, ຢ້ຽມຢາມຫມູ່ບ້ານການປະມົງຂອງນະຄອນຄຸນມິງ ທີ່ມີບົດຮຽນ ກ່ຽວກັບ ການພັດທະນາຊົນນະບົດ , ນອກນີ້, ຍັງໄດ້ຢ້ຽມຢາມສະຖານທີ່ ທີ່ມີຊື່ສຽງທາງດ້ານວັດທະນະທໍາ-ທໍາມະຊາດຈໍານວນໜຶ່ງ ຂອງນະຄອນຄຸນມິງ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20