ຫົວໜ້າຄະນະພົວພັນຕ່າງປະເທດສູນກາງພັກ ປະຊາຊົນ ປະຕິວັດລາວ ຕ້ອນຮັບ ແລະ ພົບປະເຮັດວຽກ ກັບ ທ່ານ ລັດຖະມົນຕີຕ່າງປະເທດ ອົດສະຕຣາລີ, ໃນຄັ້ງວັນທີ 16 ພຶດສະພາ 2023, ເວລາ 10:45-11:20 ໂມງ

ເຜີຍ​ແຜ່​ໂດຍ​: editor ເວ​ລາ: 17/05/2023 17:24:41 ຈຳ​ນວນ​​ຢ້ຽມ​ຊົມ 392 ຄັ້ງ ​

     ໃນຕອນເຊົ້າຂອງ ວັນທີ 16 ພຶດ​ສະ​ພາ 2023,​ ທີ່ ສໍານັກງານຄະນະພົວພັນຕ່າງປະເທດສູນກາງພັກ, ທ່ານ  ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປະຊາຊົນ ປະຕິວັດລາວ ໄດ້ຕ້ອນຮັບ ແລະ ​ພົບ​ປະເຮັດ​ວຽກ ກັບ ທ່ານ ນາງ ເພັນນີ ​ວອງ (Penny Wong), ລັດຖະມົນຕີກະຊວງການຕ່າງປະເທດ ອົດສະຕຣາລີ ພ້ອມດ້ວຍຄະນະ ໃນ​ໂອ​ກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການ.

        ໃນໂອກາດດັ່ງກ່າວ, ທ່ານ ທອງສະຫວັນ ພົມວິຫານ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຂອງຄະນະຜູ້ແທນອົດສະຕຣາລີ ໃນຄັ້ງນີ້, ຖືເປັນການປະກອບສ່ວນອັນສໍາຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫ່ວາງ ລາວ ແລະ ອົດສະຕຣາລີ ທີ່ພວມຢູ່ໃນບັນຍາກາດແຫ່ງການສະເຫຼີມສະຫຼອງວັນສ້າງສາຍພົວພັນການທູດ ຄົບຮອບ 71 ປີ. ນອກນັ້ນ, ຍັງ​ໄດ້​ມີ​ການ​ຕີ​ລາ​ຄາ​​ການຮ່ວມ​ມື​ສາຍ​ພັກ ເຊິ່ງພັກປະ​ຊາ​ຊົນ ​ປະ​ຕິ​ວັດ​ລາວ ແລະ ພັກ​ແຮງ​ງານ​ອົດ​ສະ​ຕ​ຣາ​ລີ ກໍ່ໄດ້​ມີ​ການ​ພົວ​ພັນມາ​ກ່ອນ.ທ່ານ ຫົວ​ໜ້າຄະນະພົວພັນຕ່າງປະເທດສູນກາງພັກ ຍັງໄດ້ສະແດງຄວາມປິຕິຊົມຊື່ນ ທີ່ເຫັນວ່າສາຍພົວພັນມິດຕະພາບ ແລະ ການຮ່ວມມືລະຫ່ວາງ ລາວ-ອົດສະຕຣາລີ ໃນຕະຫຼອດໄລຍະ 71 ປີ ຜ່ານມາ ໄດ້ຮັບການພັດທະນາ ແລະ ເສີມຂະຫຍາຍເປັນກ້າວໆມາ; ພ້ອມທັງໄດ້ແຈ້ງໃຫ້ຊາບກ່ຽວ​ກັບສະພາບພົ່ນເດັ່ນ ໃນການສ້າງສາພັດທະນາ ເສດຖະກິດ-ສັງຄົມຂອງ ສປປ ລາວ ພາຍໃຕ້ການນໍາຂອງ ພັກ ປປ ລາວ ທີ່ສາມາດຍາດໄດ້ຜົນສໍາເລັດໃນຫຼາຍດ້ານ, ໂດຍສະເພາະ ຜົນສໍາເລັດເບື້ອງຕົ້ນ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ສະໄໝ ທີ XI ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9, ການຈັດຕັ້ງປະຕິບັດ 2 ວາລະແຫ່ງຊາດ; ສະແດງຄວາມຂອບໃຈຕໍ່ການຊ່ວຍເຫຼືອ​ທີ່​ມີ​ປະ​ສິດ​ທິ​ຜົນຂອງລັດຖະບານອົດສະຕຣາລີ ໃຫ້​ແກ່ ສ​ປ​ປ ລາວ ໂດຍ​ສະ​ເພາະໃນດ້ານການສຶກສາ, ການພັດທະນາຊັບພະຍາກອນມະນຸດ, ດ້ານ​ມະ​ນຸດ​ສະ​ທຳ, ສາທາລະນະສຸກ, ການຊ່ວຍເຫຼືອອຸປະກອນການແພດ, ຢາວັກແຊງຕ້ານພະຍາດໂຄວິດ-19, ການ​ຮ່ວມ​ມື​ດ້ານ​ການ​ຄ້າ-ການ​ລົງ​ທຶນ ແລະ ​ການ​ພັດ​ທະ​ນາ​ພື້ນ​ຖານ​ໂຄງ​ລ່າງ​ ແລະ ດ້ານອື່ນໆ ໃນ​ໄລ​ຍະຜ່ານມາ ແລະ ຫວັງຢ່າງ​ຍິ່ງວ່າຝ່າຍອົດສະຕຣາລີ ຈະສືບຕໍ່ໃຫ້ການຊ່ວຍເຫຼືອ ແລະ ສະ​ໜັບ​ສະ​ໜູນ ສປປ ລາວ ຕື່ມອີກໃນຕໍ່ໜ້າ.

ທ່ານ  ນາງ ​ເພັນນີ ​ວອງ, ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ແຈ້ງສະພາບພົ້ນເດັ່ນການພັດທະນາຂອງ ອົດສະຕຣາລີ ໃຫ້​​ຊາບ ແລະ ຊົມເຊີຍບັນດາຜົນສໍາເລັດໃນດ້ານຕ່າງໆ ທີ່ປະຊາຊົນລາວຍາດມາໄດ້ ໂດຍສະເພາະການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງ ອົດສະຕຣາລີ-ລາວ ຕະຫຼອດໄລຍະ 71 ປີ. ພ້ອມນັ້ນ, ຍັງໄດ້ແຈ້ງໃຫ້ຊາບຕື່ມວ່າ ອົດສະຕຣາລີ ມີຄວາມຍິນດີເຮັດວຽກຮ່ວມກັນ ເພື່ອສະໜັບສະໜູນ ສປປ ລາວ ໃນການເປັນປະທານໝູນວຽນອາຊຽນ ໃນປີ 2024.

ສອງ​ຝ່າຍ​ເຫັນ​ດີ​ເປັນ​ເອ​ກະ​ພາບ​ນຳ​ກັນ​ສືບ​ຕໍ່​ຊຸກ​ຍູ້​ໃນການເສີມສ້າງສາຍພົວພັນສອງ​ຝ່າຍ ໂດຍ​ສະ​ເພາະ​ ແມ່ນໄດ້ເຊັນບົດບັນທຶກສະແດງເຈດຈໍານົງຮ່ວມມື ເພື່ອສ້າງຕັ້ງສະມາຄົມມິດຕະພາບ ລາວ-ອົດສະຕຣາລີ ແລະ ອົດສະຕຣາລີ-ລາວແນໃສ່​ເພີ່ມທະວີການພົວພັນຮ່ວມມືໃນຂອບການທູດປະຊາຊົນຂອງ 2 ປະເທດ ເພື່ອໃຫ້ໄດ້ຮັບການພັດທະນາ ແລະ ນໍາເອົາຜົນປະໂຫຍດຕົວຈິງມາສູ່ປະຊາຊົນສອງປະເທດລາວ ແລະ ອົດສະຕຣາລີ ກໍ່ຄືປະກອບສ່ວນເສີມສ້າງສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.

---