ຄະນະຜູ້ແທນຂັ້ນສູງ ຄະນະພົວພັນຕ່າງປະເທດສູນກາງພັກ ປະຊາຊົນ ປະຕິວັດລາວ ໄປຢ້ຽມຢາມເຮັດວຽກ ແລະ ເຂົ້່າຮ່ວມພົບປະມິດຕະພາບ ຢູ່ ສສ ຫວຽດນາມ

ເຜີຍ​ແຜ່​ໂດຍ​: editor ເວ​ລາ: 27/04/2023 10:46:26 ຈຳ​ນວນ​​ຢ້ຽມ​ຊົມ 585 ຄັ້ງ ​

ໂດຍປະ​ຕິ​ບັດ​ຕາມ ​​ຂໍ້​ຕົກ​ລົງ​ການຮ່ວມ​ມືລະຫວ່າງ ​ສອງ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ​ລາວ ແລະ ຫວຽດ​ນາມ ໄລຍະ 2021-2025; ຄະ​ນະ​ຜູ້​ແທນ​ຂັ້ນ​ສູງ​ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ​ປະຊາຊົນ ປະຕິວັດລາວ ນຳ​ໂດຍ ສະ​ຫາຍ ທອງສະຫວັນ ພົມວິຫານ, ກຳ​ມະ​ການ​ສູນ​ກາງ​ພັກ, ຫົວ​ໜ້າ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ​ ປະຊາຊົນ ປະຕິວັດລາວ ພ້ອມ​ດ້ວຍ​ຄະ​ນະ ໄດ້​ເດີນ​ທາງ​ໄປຢ້ຽມ​ຢາ​ມເຮັດວຽກ ແລະ ເຂົ້າຮ່ວມງານພົບປະມິດ​ຕະ​ພາບ ຄັ້ງ​ທີ X ລະຫວ່າງ ສອງຄະນະພົວພັນຕ່າງປະເທດສູນກາງພັກ ລາວ-ຫວຽດນາມ ທີ່ນະຄອນຫຼວງຮ່າໂນ້ຍ ແລະ ແຂວງ ເທື່ອທຽນເຫວ້, ສສ ຫວຽດນາມ ແຕ່ວັນ​ທີ 20-24 ເມສາ 2023.

ສະ​ຫາຍ ທອງສະຫວັນ ພົມວິຫານ, ກຳ​ມະ​ການ​ສູນ​ກາງ, ຫົວ​ໜ້າ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ປະຊາ ຊົນ ປະຕິວັດລາວ ພ້ອມດ້ວຍຄະນະ ໄດ້​ພົບ​ປະເຮັດ​ວຽກ​ກັບ ສະຫາຍ ເລຮ່ວາຍຈຸງ, ກຳມະການສູນກາງພັກ, ຫົວໜ້າຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ​ກອມ​ມູ​ນິດຫວຽດ​ນາມ ພ້ອມດ້ວຍຄະນະ, ໂດຍສອງຝ່າຍ ໄດ້ຮ່ວມກັນຕີລາຄາຄືນກ່ຽວກັບການພົວພັນຮ່ວມມື ລະຫວ່າງ ສອງພັກ, ສອງລັດ ໃນໄລຍະຜ່ານມາ, ໄດ້ແຈ້ງໃຫ້ກັນຊາບສະພາບການພົ້ນເດັ່ນຂອງແຕ່ລະພັກ, ແຕ່ລະປະເທດ, ໄດ້ຕີລາຄາສູງການປະສານສົມທົບຢ່າງແໜ້ນແຟ້ນ ໃນການເປັນເສນາທິການໃຫ້ແກ່ສອງສູນກາງພັກ ລາວ - ຫວຽດນາມ; ຢືນຢັນໃນການສືບຕໍ່ຮັດແໜ້ນ ແລະ ເພີ່ມທະວີສາຍພົວພັນອັນເປັນມູນເຊື້ອ, ຄວາມສາມັກຄີພິເສດ ລາວ - ຫວຽດນາມ ເວົ້າລວມ, ເວົ້າສະເພາະ ລະຫວ່າງ ສອງຄະນະພົວພັນຕ່າງປະເທດສູນກາງພັກ ລາວ - ຫວຽດນາມ; ໄດ້ຈັດພິທີຍ້ອງຍໍຈາກ ພັກ, ລັດຖະບານ ສປປ ລາວ ແລະ ສສ ຫວຽດນາມ ໃຫ້ແກ່ກົມກອງ ແລະ ບຸກຄົນຂອງ ຄະນະພົວພັນຕ່າງປະເທດຂອງສອງພັກ ລາວ-ຫວຽດນາມ ທີ່ມີຜົນງານດີເດັ່ນປະກອບສ່ວນເຂົ້າໃນການເພີ່ມພູນຄູນສ້າງ ແລະ ເສີມຂະຫຍາຍສາຍພົວພັນອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ແລະ ໃນໂອກາດສະເຫຼີມສະຫຼອງ ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ. ພ້ອມນັ້ນ, ສອງຝ່າຍຍັງໄດ້ເປັນເອກະພາບກັນ ສືບຕໍ່ປະສານສົມທົບຢ່າງແໜ້ນແຟ້ນ ໃນການຈັດຕັ້ງຜັນຂະຫຍາຍ ຂໍ້ຕົກລົງການຮ່ວມມືສອງຝ່າຍ ໄລຍະ 2021-2025, ສືບຕໍ່ຮັກສາກົນໄກການຢ້ຽມຢາມແລກປ່ຽນ ຄະນະຜູ້ແທນຂັ້ນສູງເຊິ່ງກັນແລະກັນ, ແລກປ່ຽນບົດຮຽນ ແລະ ສະພາບການພົ້ນເດັ່ນຂອງພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈ; ຈະປະສານສົມທົບກັນຢ່າງແໜ້ນແຟ້ນໃນການເປັນເສນາທິການໃຫ້ແກ່ຂັ້ນເທິງຂອງແຕ່ລະຝ່າຍ.

ການ​ເດີນນທາງ​​ຢ້ຽມ​ຢາມ ສສ ຫວຽດນາມ ​ ແລະ ເຂົ້າຮ່ວມງານ​ພົບ​ປະ​ມິດ​ຕະ​ພາບ​ ລະຫວ່າງ ສອງ​ຄະ​ນະ​ຜູ້​ແທນ​ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ລາວ-ຫວຽດ​ນາມ ແລະ ແຂວງເທື່ອທຽນເຫວ້, ສສ ຫວຽດນາມ ໃນ​ຄັ້ງ​ນີ້ ນອກຈາກເປັນການ​ເພີ່ມ​ທະ​ວີ​ການ​ພົວ​ພັນ ແລະ ຮ່ວມ​ມື​ລະ​ຫວ່າງ​ສອງ​​ອົງການ​ຈັດ​ຕັ້ງ ແລະ ທ້ອງຖິ່ນ ລາວ-ຫວຽດນາມ ​ຍັງ​ເປັນ​ການ​ປະ​ກອບ​ສ່ວນ​ສຳ​ອັນ​ຄັນ​ເຂົ້າ​ໃນ​ການ​ສຶກ​ສາ​ອົບ​ຮົມ​ພະ​ນັກ​ງານ​ໜຸ່ມ​ຂອງ​ສອງ​​ອົງການຈັດ​ຕັ້ງ​ ແລະ ທ້ອງຖິ່ນຂອງສອງປະເທດ ໄດ້​ຮັບຮູ້ ແລະ ເຂົ້າ​ໃຈ​ຢ່າງ​ເລິກ​ເຊິ່ງຕື່ມ​ຕໍ່​ສາຍ​ພົວ​ພັນພິເສດ ລາວ-ຫວຽດ​ນາມ ແລະ ຮຸ້ເຖິງຄວາມຮັບຜິດຊອບ ແລະ ພັນທະຂອງຕົນ ໃນການປົກປັກຮັກສາ ແລະ ​ເພີ່ມ​ທະ​ວີ​ສາຍ​ພົວ​ພັນ​ມິດ​ຕະ​ພາບ​ທີ່​​ອັນ​ຍິ່ງ​ໃຫຍ່, ຄວາມ​ສ​າ​ມັກ​ຄີ​ພິ​ເສດ ແລະ ການ​ຮ່ວ​ມ​ມື​ຮອບ​ດ້ານ ລະ​ຫວ່າງ​ ສອງ​ພັກ, ສອງ​ລັດ ແລະ ປະ​ຊາ​ຊົນ​ສອງ​ຊາດ ລາວ-ຫວຽດ​ນາມ ໃຫ້​ເກີດດອກ​ອອກ​ຜົນ ແລະ ຍືນ​ຍົງ​ຕະຫຼອດ​ໄປ. ໃນການເຄື່ອນໄຫວຢູ່ແຂວງເທື່ອທຽນເຫວ້, ຄະນະຜູ້ແທນລາວ ຍັງໄດ້ຢ້ຽມຢາມຖາມຂ່າວ ດ້ວຍຄວາມສະໜິດສະໜົມຮັກແພງຕໍ່ 3 ຄອບຄົວ ທີ່ເປັນອະດີດທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເຄີຍມາເຄື່ອນໄຫວ, ໃຫ້ການຊ່ວຍເຫຼືອຢູ່ ສປປ ລາວ ໃນໄລຍະຕໍ່ສູ້ປົດປ່ອຍປະເທດຊາດ.

ບົນເສັ້ນທາງເດີນທາງກັບຄືນປະເທດ, ຄະນະຍັງໄດ້ແວ່ເຂົ້າວາງພວງມາລາທີ່ ສຸສານນັກຮົບເສັ້ນທາງເລກ 9 ເຊິ່ງມີນັກຮົບຫວຽດນາມ ທີ່ໄດ້ເສຍສະຫຼະຊີວິດຢູ່ໃນສະໜາມຮົບ ເສັ້ນທາງເລກ 9 ແລະ ໃນສະໜາມຮົບກວາງຈິ ເວົ້າສະເພາະ ແລະ ເວົ້າລວມຢູ່ໃນດິນແດນຂອງ ສປປ ລາວ.

ໃນການເຄື່ອນໄຫວຄັ້ງນີ້, ສະຖານເອກອັກຄະລັດຖະທູດແຫ່ງ ສປປ ລາວ ປະຈໍາ ສສ ຫວຽດນາມ ແລະ ສະຖານກົງສູນໃຫຍ່ແຫ່ງ ສປປ ລາວ ທີ່ນະຄອນດານັງ ກໍ່ໄດ້ເຂົ້າຮ່ວມ ແລະ ປະກອບສ່ວນຢ່າງຕັ້ງໜ້າ.

---