ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ຕ້ອນຮັບການເຂົ້າ ຢ້ຽມຂໍ່ານັບຂອງເອກອັກຄະລັດຖະທູດ ແຫ່ງ ສາທາລະນະລັດ ຟີລິບປິນ ຄົນໃໝ່ ປະຈໍາ ສປປ ລາວ

ເຜີຍ​ແຜ່​ໂດຍ​: editor ເວ​ລາ: 10/04/2023 12:45:37 ຈຳ​ນວນ​​ຢ້ຽມ​ຊົມ 721 ຄັ້ງ ​

ໃນ​​​ວັນ​ທີ 06 ເມ​ສາ 2023, ທີ່​ຄະນະ​ພົວພັນ​ຕ່າງປະ​ເທດ​ສູນ​ກາ​ງພັກ, ທ່ານ ທອງ​ສະ​ຫວັນ ພົມ​ວິ​ຫານ, ກຳ​ມະ​ການສູນກາງພັກ, ຫົວໜ້າ​ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ໄດ້​ຕ້ອນຮັບການ​ເຂົ້າ​ຢ້ຽມ​ຂໍ່ານັບ​ຂອງທ່ານ ນາງ ດີນາ ຈອຍ ດີ. ອາມາຕົງ (Deena Joy D. Amatong), ເອກອັກຄະ​ລັດ​ຖະທູດວິສາມັນຜູ້ມີອໍານາດເຕັມ ແຫ່ງ ສາ​ທາ​ລະ​ນະ​ລັດ ຟີ​ລິບ​ປິນ ປະຈໍາ ສປປ ລາວ.

ໃນໂອກາດດັ່ງກ່າວ, ທ່ານ ທອງ​ສະ​ຫວັນ ພົມ​ວິ​ຫານ ໄດ້ສະ​ແດງ​ຄວາມຍິນດີ ແລະ ​ຊົມ​ເຊີຍ ຕໍ່ທ່ານເອກອັກຄະ​ລັດ​ຖະ​ທູດ ທີ່​ໄດ້​ຮັບ​ມອບ​ໝາຍ​ໜ້າ​ທີ່ອັນສໍາຄັນ​ໃຫ້ດໍາລົງຕໍາແໜ່ງເປັນ ເອກ​ອັກ​ຄະ​ລັດ​ຖະ​ທູດວິ​ສາ​ມັນ​ຜູ້​ມີ​ອຳ​ນາດ​ເຕັມ​ ແຫ່ງ ສາ​ທາ​ລະ​ນະ​ລັດ ຟີ​ລິບ​ປິນ ປະ​ຈຳ​ ສ​ປ​ປ ລາວ ຄົນໃໝ່ ແລະ ເຊື່ອໝັ້ນວ່າ ດ້ວຍປະ​ສົບ​ການ​ອັນ​ອຸ​ດົມ​ສົມບູນ​ຂອງທ່ານທູດ, ​ຫວັງ​ຢ່າງ​ຍິ່ງວ່າ ທ່ານ​ທູດຈະສືບຕໍ່ຍຸກຍູ້ ແລະ ​ປະ​ກອບ​ສ່ວນ​ເຂົ້າ​ໃນ​ການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະ​ຫວ່າງ ລາວ-​ຟີ​ລິບ​ປິນ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ.

ທ່ານ ທອງ​ສະ​ຫວັນ ພົມ​ວິ​ຫານ ​ໄດ້​ແຈ້ງ​​ໃຫ້​ທ່ານ​ທູດ​ຄົນ​ໃໝ່ຊາບ​ ກ່ຽວ​ກັບ​ ສະ​ພາບ​ການ​ພົ້ນ​ເດັ່ນ​ໃນ​ການ​ປົກ​ປັກ​ຮັກ​ສາ ແລະ ສ້າງ​ສາ​ພັດ​ທະ​ນາ​ຂອງ ສ​ປ​ປ ລາວ, ສະ​ແດງ​ຄວາມ​ຊ​ົມ​ເຊີຍ ແລະ ຕີ​ລາ​ຄາ​ສູງ ​ຕໍ່​ການ​ພົວ​ພັນ​ຮ່ວມ​ມື​ລະ​ຫວ່າງ ​ສ​ອງ​ ລັດ​ຖະ​ບ​ານ ລາວ-​ຟີ​ລີບ​ປິນ ໃນ​ໄລ​ຍະ​ທີ່​ຜ່ານ​ມາ, ແຈ້ງ​ໃຫ້​ຊາບ​ ພາ​ລະ​ບົດ​ບາດ​ຂອງຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໃນ​ການ​ເປັນ​ເສ​ນາ​ທິ​ການ​ດ້ານ​ການ​ຕ່າງ​ປະ​ເທດໃຫ້​ແກ່​ສູນ​ກາງ​ພັກ ປ​ປ ລາວ, ການ​ພົວ​ພັນ​ດ້ານ​ການ​ທູດ​ປະ​ຊາ​ຊົນ ກໍ່​ຄື​ ການ​ສ້າງ​ຕັ້ງ​ສາຍ​ພົວ​ພັນມິດ​ຕະ​ພາບ ລາວ-​ຟີ​ລິບ​ປິນ ເຊິ່ງ​ເປັນ​ບາດ​ກ້າວ​​ຂະ​ຫຍາຍ​ຕົວ​ໃໝ່ປະ​ກອບ​ສ່ວນ​ສຳ​ຄັນ​ເຂົ້າ​ໃນ​ການ​ພົວ​ພັນ​ຮ່ວມ​ມື ລະ​ຫວ່າງ​ສອງ​ປະ​ເທດ. ສະ​ແດງ​ຄວາມຍິນ​ດີ​ ທີ່​ຈະໃຫ້​ການ​ສະ​ໜັບ​ສະ​ໜູນ​ທ່​ານ​ທູດ​ ໃນ​ການ​ປະ​ຕິ​ບັດ​ໜ້າ​ທີ່​ການ​ທູດ​ຢູ່ ສ​ປ​ປ ລາວ, ​ປະ​ກອບ​​ຊຸກ​ຍູ້ສາຍ​ພົວ​ພັນ​ມິດ​ຕະ​ພາບ​ອັນ​ດີ​ງາມ ແລະ ການ​ຮ່ວ​ມ​ມື ລະ​ຫວ່າງ ​ລາວ-​ຟີ​ລິບ​ປິນ ໃຫ້​ນັບ​ມື້ນັບ​ມີ​ການ​ຂະ​ຫຍາຍ​ຕົວ​ເປັນ​ກ້າວໆ ​ຍິ່ງຂຶ້​ນ ເພື່ອ​ນຳ​ເອົາ​​ໝາກ​ຜົນ​ຕົວ​ຈິງ​ມາ​ສູ່​ປະ​ຊາ​ຊົນ​ສອງ​ຊາດ ລາວ-​ຟີ​ລິບ​ປິນ.

​ທ່ານເອກອັກຄະ​ລັດ​ຖະ​ທູດ ຟີ​ລິບ​ປິນ ຍັງ​ໄດ້ກ່າວສະ​ແດງ​ຄວາມຂອບໃຈ​ເປັນ​ຢ່າງ​ສູງ ມາ​ຍັງທ່ານ​​ຫົວໜ້າຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ທີ່ໄດ້ໃຫ້​ກຽດ​ຕ້ອນ​ຮັບ​ອັນ​ອົບ​ອຸ່ນ​ ແລະ ໃຫ້ຄໍາໝັ້ນສັນຍາ​ວ່າ ພ້ອມ​ທີ່ຈະ​ເຮັດ​ສຸດ​ຄວາມ​ສາ​ມາດ​ຂອງ​ຕົນ ໃນ​ການ​​ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງ ​ຟີ​ລິບ​ປິນ-ລາວ ໃຫ້ແຕກດອກອອກ​ຜົນ​ມີ​ຜົນ​ສຳ​ເລັດຍິ່ງໆ​ຂຶ້ນ ເພື່ອສືບ​ຕໍ່​ສົ່ງ​ເສີມການ​ຮ່ວມ​ມື​ທາງ​ດ້ານ​ການ​ຄ້າ, ​ການ​ລົງ​ທຶນ, ການ​ທ່ອງ​ທ່ຽວ ລະ​ຫວ່າງ 2 ປະ​ເທດ.

---