ທ່ານ ສົົມພອນ ສີຈະເລີນ ຮອງຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Dr. Ram Madhav, ຄະນະຜູ້ແທນຈາກພັກປະຊາຊົນອິນເດຍ.

ເຜີຍ​ແຜ່​ໂດຍ​: editor ເວ​ລາ: 04/04/2023 15:32:20 ຈຳ​ນວນ​​ຢ້ຽມ​ຊົມ 373 ຄັ້ງ ​

     ໃນຕອນບ່າຍ ຂອງ ວັນທີ 30 ມີນາ 2023, ທີ່ ຄະນະພົວພັນຕ່າງປະເທດສູນກາງພັກ, ທ່ານ ສົມພອນ ສີຈະເລີນ, ຮອງຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ Dr. Ram Madhav, ສະມາຊິກຄະນະກໍາມະການຮັບຜິດຊອບວຽກງານຂອງມູນນິທິອິນເດຍ, ເຈົ້າໜ້າທີ່ອາວຸໂສຂອງ ພັກປະຊາຊົນອິນເດຍ (ພັກກໍາອໍານາດ ໃນປັດຈຸບັນ) ໃນໂອກາດມາຢ້ຽມຢາມ ສປປ ລາວ ແຕ່ວັນທີ 30-31 ມີນາ 2023.

     ໃນໂອກາດດັ່ງກ່າວ, ທ່ານ ສົມພອນ ສີຈະເລີນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາຕໍ່ການຢ້ຽມຢາມ ສປປ ລາວ ໃນຄັ້ງນີ້, ເຊິ່ງເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ທີ່ເປັນມູນເຊື້ອ ແລະ ການຮ່ວມມື ລະຫວ່າງ ສອງປະເທດ ລາວ-ອິນເດຍ, ເຊິ່ງຕະຫຼອດໄລຍະ 67 ປີ ແຫ່ງການສ້າງຕັ້ງສາຍພົວພັນການທູດ ລາວ-ອິນເດຍ (2/2/1956-2/2/2023) ການພົວພັນຮ່ວມມື ລະຫວ່າງ ສອງປະເທດໄດ້ມີບາດກ້າວຂະຫຍາຍຕົວຢ່າງບໍ່ຢຸດຢັ້ງ; ໄດ້ສະແດງຄວາມຂອບໃຈຢ່າງຈິງໃຈຕໍ່ ລັດຖະບານ ແລະ ປະຊາຊົນອິນເດຍ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອແກ່ ສປປ ລາວ ໃນການຈັດຕັ້ງປະຕິບັດໂຄງການຮ່ວມມືສອງຝ່າຍ ໃນຂົງເຂດ ສາທາລະນະສຸກ, ການສຶກສາ, ການຄ້າ-ການລົງທຶນ, ວັດທະນະທໍາ ແລະ ອື່ນໆ, ເຊິ່ງເປັນການປະກອບສ່ວນອັນສໍາຄັນເຂົ້າໃນການພັດທະນາພື້ນຖານໂຄງລ່າງ, ເສດຖະກິດ-ສັງຄົມຂອງ ສປປ ລາວ ໃນໄລຍະຜ່ານມາ ກໍຄື ປັດຈຸບັນ.       ນອກນັ້ນ, ທ່ານ ສົມພອນ ສີຈະເລີນ ຍັງໄດ້ແຈ້ງກ່ຽວກັບສະພາບການພົ້ນເດັ່ນຂອງ ສປປ ລາວ, ທີ່ຕັ້ງ ແລະ ພາລະບົດບາດຂອງ ຄະນະພົວພັນຕ່າງປະເທດສູນກາງພັກ ກໍຄືການເຄື່ອນໄຫວວຽກງານການຕ່າງປະເທດຂອງພັກ ປປ ລາວ ໃນໄລຍະຜ່ານມາ ກໍຄື ປັດຈຸບັນ; ສະແດງຄວາມຍິນດີຮ່ວມກັບຝ່າຍອິນເດຍ ໃນການຊຸກຍູ້ການພົວພັນຮ່ວມມື ລະຫວ່າງ ສປປ ລາວ ແລະ ສ. ອິນເດຍ ກໍຄື ສາຍພົວພັນດ້ານພັກ ແລະ ການທູດປະຊາຊົນ ໃຫ້ນັບມື້ນັບໄດ້ຮັບການພັດທະນາຍິ່ງໆຂຶ້ນ.

     ໃນໂອກາດດັ່ງກ່າວ, ທ່ານ Dr. Ram Madhav ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ສະແດງຄວາມຊົມເຊີຍຕໍ່ຜົນສໍາເລັດທີ່ພັກ, ລັດຖະບານລາວ ສາມາດຍາດມາໄດ້ໃນການສ້າງສາ ແລະ ພັດທະນາປະເທດຊາດ ໃນໄລຍະຜ່ານມາ ກໍຄື ປັດຈຸບັນ; ແຈ້ງກ່ຽວກັບສະພາບການພົ້ນເດັ່ນພາຍໃນປະເທດອິນເດຍ ໂດຍສະເພາະ ການເຄື່ອນໄຫວວຽກງານຂອງມູນນິທິອິນເດຍ ແລະ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອ ລະຫວ່າງ ສອງປະເທດ ລາວ-ອິນເດຍ ໃນໄລຍະຜ່ານມາ, ຍິນດີຮ່ວມມືກັບ ຝ່າຍລາວ ສືບຕໍ່ຊຸກຍູ້ ແລະ ເສີມຂະຫຍາຍສາຍພົວພັນມິດຕະພາບ ລະຫວ່າງ ສອງປະເທດ ໃຫ້ແຕກດອກອອກຜົນຍິ່ງໆຂຶ້ນ.

    ທ່ານ ຮອງຫົວໜ້າຄະນະພົວພັນຕ່າງປະເທດສູນກາງພັກ ໄດ້ອວຍພອນໃຫ້ ທ່ານ Dr. Ram Madhav ຈົ່ງມີພາລະນາໄມສົມບູນ, ມີຄວາມຜາສຸກ, ປະສົບຜົນສຳເລັດຢ່າງຈົບງາມໃນການຢ້ຽມຢາມ ສປປ ລາວ ໃນຄັ້ງນີ້.

---