ສະຫຼຸບການເຄື່ອນໄຫວວຽກງານຂອງຄະນະບໍລິຫານງານສະຫະພັນແມ່ຍິງ ຄຕພ ປະຈຳປີ 2022 ແລະ ພິທີມອບໃບຍ້ອງຍໍ 03 ດີ ສະຫະພັນແມ່ຍິງ ຄຕພ ແລະ ສະເຫຼີມສະຫຼອງວັນແມ່ຍິງສາກົນ 8 ມີນາ ຄົບຮອບ 113 ປີ

ເຜີຍ​ແຜ່​ໂດຍ​: editor ເວ​ລາ: 03/03/2023 13:55:09 ຈຳ​ນວນ​​ຢ້ຽມ​ຊົມ 755 ຄັ້ງ ​

ກອງປະຊຸມສະຫຼຸບການເຄື່ອນໄຫວວຽກງານຂອງຄະນະບໍລິຫານງານສະຫະພັນແມ່ຍິງ ຄຕພ ປະຈຳປີ 2022 ແລະ ພິທີມອບໃບຍ້ອງຍໍ 03 ດີ ສະຫະພັນແມ່ຍິງ ຄຕພ ແລະ ສະເຫຼີມສະຫຼອງວັນແມ່ຍິງສາກົນ 8 ມີນາ ຄົບຮອບ 113 ປີ (08/03/1910-08/03/2023)

................................

ໃນ​ວັນທີ 02 ມີນາ 2023, ທີ່ ສຳ​ນັກ​ງານ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ (ຫຼັກ6), ຄະ​ນະ​ບໍ​ລິ​ຫານ​ງານສະຫະພັນແມ່ຍິງຄະນະພົວພັນຕ່າງປະເທດສູນກາງພັກ ໄດ້​ຈັດ​ກອງ​ປະ​ຊຸມ​ສະຫຼຸບກາ​ນ​ເຄື່ອນ​ໄຫວ​ວຽກ​ງານປະ​ຈຳ​ປີ 2022, ພ້ອມ​ທັງພິ​ທີ ມອບ​ໃບ​ຍ້ອງ​ຍໍ​ 03 ດີ ​ປະ​ຈຳ​ປີ 2022 ຂອງ​ສະຫະພັນ​ແມ່​ຍິງ ຄ​ຕ​ພ​ ແລະ ສະເຫຼີມ​ສະຫຼອງ ວັນແມ່ຍິງສາກົນ 08 ມີນາ ຄົບຮອບ 113 ປີ (8/3/1910–8/3/2023)​ ພາຍ​ໃຕ້ ​ຄຳ​ຂວັນ “ການ​ນຳໃຊ້​ດິ​ຈີ​ຕອນ​ສຳ​ລັບ​ທຸກ​ຄົນ: ການ​ໃຊ້​ນະວັດ​ຕະ​ກຳ ແລະ ເຕັກ​ໂນ​ໂລ​ຊີ ເພື່ອ​ຄວາມ​ສະ​ເໜີ​ພາບ​ຍິງ-ຊາຍ”, ໂດຍ​ການ​ເປັນ​ປະ​ທານ​ຂອງ​ ສະ​ຫາຍ ນາງ ສີ​ຣິ​ພອນ ຄູ​ຫາ​ເທບ, ຄະ​ນະ​ພັກ ຄ​ຕ​ພ, ຄະ​ນະ​ບໍ​ລິ​ຫານ​ງານ​ສູນ​ກາງ​ສະ​ຫະ​ພັນ​ແມ່​ຍິງລາວ, ປະ​ທານ​ຄະ​ນະ​ບໍ​ລິ​ຫານ​ງານ​ສະ​ຫະ​ພັນ​ແມ່​ຍິງ ຄ​ຕ​ພ ແລະ ໃຫ້​ກຽດ​ເຂົ້າ​ຮ່ວມ​ໂດຍ ສະຫາຍ ວາ​ລະ​ໄຊ ເລັ່ງ​ສະ​ຫວັດ, ກຳ​ມະ​ການ​ຄະ​ນະ​ພັກ, ຮອງ​ຫົວ​ໜ້າຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ. ພ້ອມ​ນັ້ນ​, ຍັງ​ມີ​ຕາງ​ໜ້າ​ບັນ​ດາ​ໜ່ວຍ​ພັກ, ອົງ​ການ​ຈັດ​ຕັ້ງ​ກຳ​ມະ​ບານ, ຊາວ​ໜຸ່ມ ແລະ ສະ​ມ​າ​ຊິກ​ແມ່​ຍິງ ທົ່ວ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ເຂົ້າ​ຮ່ວມ​ຢ່າງ​ພ້ອມ​ພຽງ.

ໃນກອງ​ປະ​ຊຸມ ສະຫາຍ ນາງ ສິຣິພອນ ຄູຫາເທບ, ຄະນະບໍລິຫານສູນກາງສະຫະພັນແມ່ຍິງລາວ, ປະທານຄະ​ນະ​ບໍ​ລິ​ຫານ​ງານສະຫະພັນແມ່ຍິງ ຄຕພ ໄດ້​ຂຶ້ນຜ່ານ​ການ​ສະຫຼຸບ​​ການ​ເຄື່ອນ​ໄຫວວຽກ​ງານ​ຂອງຄະ​ນະ​ບໍ​ລິ​ຫານ​ງານສະ​ຫະ​ພັນ​ແມ່​ຍິງ ຄ​ຕ​ພ ​ປະ​ຈຳ​ປີ 2022 ໃນ​ໄລ​ຍະ 01 ປີຜ່ານ​ມາ, ໂດຍ​ໄດ້​ຍົກ​ໃຫ້​ເຫັນ​ກ​ານ​ຕີ​ລາ​ຄາ​ບັນ​ດາ​ຜົນ​ສຳ​ເລັດ, ຈຸ​ດ​ດີ, ຈຸດ​ອ່ອນ ແລະ ສະ​ເໜີ​ທິດ​ທາງ​ແຜນ​ການ​ ປະ​ຈຳ​ປີ 2023. ຕະຫຼອດ​ໄລ​ຍະ​ປີ 2022, ສະ​ຫະ​ພັນ​ແມ່​ຍິງ ຄ​ຕ​ພ ສາ​ມາດ​ຍາດ​ມາ​ໄດ້​ຜົນ​ສຳ​ເລັດຫຼາຍ​ດ້ານ ເປັນ​ຕົ້ນ ​ການ​ສຶກ​ສາ​ອົບ​ຮົມ​ການ​ເມືອງ-ແນວ​ຄິດ ​ເຊິ່ງເຮັດ​ໃຫ້​ສະ​ມ​າ​ຊິກ​ແມ່​ຍິງ ພາຍ​ໃນ ຄ​ຕ​ພ ມີ​ແນວ​ຄິດ​ອຸ່ນ​ອ່ຽງ​ທຸ່ນ​ທ່ຽງ, ມີ​ສະ​ຕິ, ມີ​ຄວາມ​ເຊື້ອ​ໝັ້ນ​ຕໍ່​ການ​ນຳ​ພາ​ຂອງ​ພັກ; ສາ​ມາດ​ເຊື່ອມ​ຊຶມ​ແນວ​ທາງ​ນະ​ໂຍ​ບາຍ, ​ລັດ​ຖະ​ທຳ​ມະ​ນູນ, ກົດ​ລະ​ບຽບ​ຂອງ​ລັດ, ຮູ້​ຜັນ​ຂະ​ຫຍາຍ​ມະ​ຕິ​ກອງ​ປະ​ຊຸມ​ໃຫຍ່​ຂອງ​ພັກ ຄັ້ງ​ທີ XI, ມະ​ຕິ​ກອງ​ປະ​ຊຸມ​ໃຫຍ່​ຜູ້​ແທນ​ແມ່​ຍິງ​ລາວ ​ທົ່ວ​ປະ​ເທດ ຄັ້ງ​ທີ VIII, ມະ​ຕິ​ກອງ​ປະ​ຊຸມ​ໃຫຍ່ ຄັ້ງ​ທີ II ຂອງ​ອົງ​ຄະ​ນະ​ພັກ ຄ​ຕ​ພ ແລະ ມະ​ຕິ​ກອງ​ປະ​ຊຸມ​ໃຫຍ່​ຄັ້ງ​ທີ I, ຂອງ​ສະ​ມາ​ຊິກ​ສະ​ຫະ​ພັນ​ແມ່​ຍິງ ຄ​ຕ​ພ ໃຫ້​ເປັນ​ແຜນ​ງານ, ໂຄງ​ການ​ເຄື່ອນ​ໄຫວ​ຂອງ​ຕົນ ນອກ​ນັ້ນ, ສະ​ຫະ​ພັນ​ແມ່​ຍິງ ຄ​ຕ​ພ ຍັງ​ໄດ້​ເອົາ​ໃຈ​ໃສ່​ເຄື່ອນ​ໄຫວ​ວຽກ​ງານ​ວິ​ຊາ​ສະ​ເພາະ ທີ່​ເປັນ​ໜ້າ​ທີ່​ການ​ເມືອງ​ຕົ້ນ​ຕໍຂອງ​ຕົນ ​ດ້ວຍ​ຄວາ​ມເປັນ​ເຈົ້າ​ການ ແລະ ມີ​ຜົນ​ສຳ​ເລັດ​ສູງ. ໃນໂອກາດດຽວກັນນີ້, ສະຫາຍ ນາງ ພູສີ ວົງແພງຄໍາ, ຮອງປະທານຄະ​ນະ​ບໍ​ລິ​ຫານ​ງານສະຫະພັນແມ່ຍິງ ຄຕພ, ​ຫົວ​ໜ້າ​ຜູ້​ຊີ້​ນຳວຽກງານ 3 ດີ ​ໄດ້​ຂຶ້ນຜ່ານ​ບົດ​ສະຫຼຸບ​ຕີ​ລາ​ຕາ​ການ​ຈັດ​ຕັ້​ງ​ປະ​ຕິ​ບັດ​ຂໍ້​ແຂ່ງ​ຂັນ 3 ດີ​ ປະ​ຈຳ​ປີ 2022 ​ຂອງ​ສະ​ຫະ​ພັນ​ແມ່​ຍິງ ຄ​ຕ​ພ ​ໂດຍ​ໄດ້​ສະຫຼຸ​ບ​ຕີ​ລາ​ຄາ​ຜົນ​ສຳ​ເລັດ​ການ​ຈັດ​ຕັ້ງ​ປະ​ຕິ​ບັດ​ຂໍ​້ແຂ່ງ​ຂັນ 3 ດີ ໃນ​ໄລ​ຍະທີ ​I, ຈຸດ​ດີ, ຈຸດ​ອ່ອນ ແລະ ​ທິດ​ທາງແຜນ​ການ​ໃນ​ຕໍ່​ໜ້າ, ສະ​ຫະ​ພັນ​ແມ່​ຍິງ ຄ​ຕ​ພ ສ​າ​ມາດ​ຍາດ​ປະ​ຕິ​ບັດ​ຂໍ້​ແຂ່ງ​ຂັນ 03 ດີ​ໄດ້ 100%, ໜ່ວຍ​ແມ່​ຍິງ 03 ດີ ປະ​ເພດ 01 ຈຳ​ນວນ 04 ໜ່ວຍ. ນອກ​ນີ້, ສະ​ຊິກ​ແມ່​ຍິງ ຄ​ຕ​ພ ໄດ້​ຮັບ​ໃບ​ຍ້ອງ​ຍໍ 03 ດີ ຈາກ​ປະ​ທານ​ຄະ​ນ​ະ​ບໍ​ລິ​ຫານ​ງານ​ສະ​ຫະ​ພັນ​ແມ່​ຍິງ ຄ​ຕ​ພ ຈຳ​ນວນ 41 ສະ​ຫາຍ.

ກອງ​ປະ​ຊຸມ​ ໄດ້​ຮັບ​ຟັງ​ການ​ໂອ້​ລົມ​ຂອງ​ ສະ​ຫາຍ ວາ​ລະໄຊ ເລັ່ງ​ສະ​ຫວັດ, ກຳ​ມະ​ການ​ຄະ​ນະ​ພັກ, ຮອງ​ຫົວ​ໜ້າຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ເຊິ່ງໄດ້ຍ້ອງຍໍຊົມເຊີຍຜົນ​ງານການເຄື່ອນໄຫວຂອງສະ​ຫະ​ພັນ​ແມ່​ຍິງ ຄຕພ ທີ່​ຍາດ​ມາ​ໄດ້​ໃນ​ປີ​ຜ່ານ​ມາ ແລະ ໃຫ້​ທິດ​ຊີ້​ນຳ​ຕໍ່​ວຽກ​ງານ​ຈຳ​ນວນ​ໜຶ່ງ​ທີ່​ຕ້ອງ​ໄດ້​ເອົາ​ໃຈ​ໃສ່​ຈັດ​ຕັ້ງ​ປະ​ຕິ​ບັດ​ໃນ​ຕໍ່​ໜ້າ, ອັນ​ໄດ້​ເປັນ​ເຂັມ​ຊີ້​ທິດ​ເຢືອງ​ທາງ​ໃຫ້​ແກ່​ສະ​ມ​າ​ຊິກ​ແມ່​ຍິງ​ທົ່ວ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ພ້ອມທັງ​ເນັ້ນ​ໜັກ​ໃຫ້​ສະ​ມາ​ຊິກແມ່ຍິງ​ ຄຕພ ຍົກສູງຄວາມຮັບຜິດຊອບ ​ໜ້າ​ທີ່​ການ​ເມືອງຂອງຕົນ ເພື່ອປະກອບສ່ວນເຂົ້າໃນການເຄື່ອນໄຫວຕ່າງປະເທດຂອງພັກ ກໍ່​ຄື​ການ​ເຄື່ອນ​ໄຫວ​ວຽກ​ງານ​ລວມ​ຂອງຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ນອກ​ຈາກ​ນີ້, ສະ​ຫະ​ພັນ​ແມ່​ຍິງ ຄ​ຕ​ພ ຍັງ​ໄດ້​ຈັດ​ກິດ​ຈະ​ກຳ​ແຂ່ງ​ຂັ້ນ​ກິ​ລາ ເປ​ຕັງ ເພື່ອ​ເປັນ​ການ​ຂະ​ບວນ​ການ​​ຝົດ​ຝຶນ​ມ່ວນ​ຊືນ.

---