ຄະນະຜູ້ແທນ ສອງຄະນະພົວພັນຕ່າງປະເທດສູນກາງພັກ ລາວ ແລະ ຫວຽດນາມ ພົບປະເຮັດວຽກຮ່ວມກັນ

ເຜີຍ​ແຜ່​ໂດຍ​: editor ເວ​ລາ: 23/02/2023 15:44:06 ຈຳ​ນວນ​​ຢ້ຽມ​ຊົມ 351 ຄັ້ງ ​

ໃນວັນທີ 22 ກຸມພາ 2023, ໃນໂອກາດທີ່ ຄະນະຜູ້ແທນຂັ້ນສູງ ຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ. ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປະຊາຊົນ ປະຕິວັດລາວ ພ້ອມດ້ວຍຄະນະ ໄດ້ພົບປະເຮັດວຽກສອງຝ່າຍກັບ ສະຫາຍ ເລຮວາຍຈຸງ, ກໍາມະການສູນກາງພັກ, ຫົວໜ້າຄະນະພົວພັນຕາງປະເທດສູນກາງພັກ ກອມມູນິິດຫວຽດນາມ ພ້ອມດ້ວຍຄະນະ, ສອງຝ່າຍ ໄດ້ຮ່ວມກັນຕີລາ ຄາໝາກຜົນການພົວພັນຮ່ວມມື ໃນໄລຍະຜ່ານມາ ແລະ ກໍານົດທິດທາງໃນຕໍ່ໜ້າ, ຖອດຖອນບົດຮຽນ ແລະ ແລກປ່ຽນທັດສະນະຕໍ່ສະພາບການພົ້ນເດັ່ນໃນພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈ. ໃນການພົບປະ, ສະຫາຍ ທອງສະຫວັນ ພົມວິຫານ ໄດ້ຕີລາຄາສູງ ຕໍ່ການມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງ ສະຫາຍ ເລຮວາຍຈຸງ ພ້ອມດ້ວຍຄະນະໃນຄັ້ງນີ້, ເຊິ່ງເປັນການຢ້ຽມຢາມທາງການຄັ້ງທໍາອິດໃນຖານະເປັນ ຫົວໜ້າຄະນະພົວພັນຕ່າງປະ ເທດສູນກາງພັກ ກອມມູນິດຫວຽດນາມ, ເປັນການຜັນຂະຫຍາຍຂໍ້ຕົກລົງການຮ່ວມມືສອງຝ່າຍ, ທັງເປັນການສະແດງໃຫ້ເຫັນເຖິງຄວາມເອົາໃຈໃສ່ໃນການສືບຕໍ່ຮັດແໜ້ນ ແລະ ເພີ່ມທະວີ ສາຍພົວພັນອັນເປັນມູນ ເຊື້ອ, ຄວາມສາມັກຄີພິເສດ ລາວ-ຫວຽດນາມ ກໍ່ຄື ຮັດແໜ້ນ ແລະ ເພີ່ມທະວີການພົວພັນຮ່ວມມື ລະຫວ່າງ ຄະນະພົວພັນຕ່າງປະເທດຂອງສອງສູນກາງພັກ ລາວ-ຫວຽດນາມ. ພ້ອມນັ້ນ, ສອງຝ່າຍ ຍັງໄດ້ແຈ້ງໃຫ້ກັນຊາບ ສະພາບພົ້ນເດັ່ນຂອງແຕ່ລະພັກ, ແຕ່ລະປະເທດ; ຕີລາຄາສູງການປະສານສົມທົບຢ່າງແໜ້ນແຟ້ນ ໃນການເປັນເສນາທິການໃຫ້ແກ່ສອງສູນກາງພັກ ລາວ-ຫວຽດນາມ ໃນການກະກຽມແກ່ການຢ້ຽມຢາມ ແລະ ພົບປະລະຫວ່າງການນໍາຂັ້ນສູງຂອງ ສອງພັກ, ສອງລັດ; ການປະສານສົມທົບໃນການຈັດຕັ້ງກິດຈະກໍາການ ເຄື່ອນໄຫວ ສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ, ການຈັດຊຸດບໍາລຸງສ້າງໃຫ້ແກ່ພະນັກງານຂັ້ນຕ່າງໆຂອງລາວ; ການແລກປ່ຽນບົດຮຽນທາງດ້ານທິດສະດີ ແລະ ພຶດຕິກໍາ, ການຖອດຖອນບົດຮຽນໃນການພັດທະນາເສດຖະກິດ - ສັງຄົມ, ການຊຸກຍູ້ການໄປມາຫາສູ່ກັນລະຫວ່າງປະຊາຊົນສອງຊາດ ລາວ-ຫວຽດນາມ ແລະ ອື່ນໆ. ສອງຝ່າຍ ເປັນເອກະພາບສືບຕໍ່ປະສານສົມທົບຢ່າງແໜ້ນແຟ້ນ ໃນການຈັດຕັ້ງຜັນຂະຫຍາຍຂໍ້ຕົກລົງການຮ່ວມມືສອງຝ່າຍ ໄລຍະ 2021 - 2025; ສືບຕໍ່ຮັກສາກົນໄກການຢ້ຽມຢາມ ແລກປ່ຽນຄະນະຜູ້ແທນຂັ້ນສູງເຊິ່ງກັນແລະກັນ, ແລກປ່ຽນບົດຮຽນ ແລະ ສະພາບການພົ້ນເດັ່ນຂອງພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈ; ເປັນເຈົ້າການໃນການ ຕິດຕາມ, ກວດກາ, ແນະນໍາ ແລະ ຊຸກຍູ້ ບັນດາຄະນະຂອງສູນກາງພັກ, ກະຊວງ, ຂະແໜງການ ແລະ ທ້ອງຖິ່ນ ໃນການຈັດຕັ້ງປະຕິບັດ ບັນດາຂໍ້ຕົກລົງການຮ່ວມມື ລະຫວ່າງ ການນໍາຂັ້ນສູງຂອງ ສອງພັກ, ສອງລັດ, ບັນດາຖະແຫຼງການຮ່ວມ, ສັນຍາການຮ່ວມມື ໃນແຕ່ລະໄລຍະຂອງສອງລັດຖະບານ; ປະສານສົມທົບໃນວຽກງານບໍາລຸງສ້າງພະນັກງານຂັ້ນຕ່າງໆຂອງລາວ, ການຈັດກອງປະຊຸມສໍາມະນາ, ແລກປ່ຽນບົດຮຽນທາງດ້ານທິດສະດີ - ພຶດຕິກໍາ ແລະ ອື່ນໆ, ເພື່ອປະກອບສ່ວນເຂົ້າໃນການເສີມຂະ ຫຍາຍ ແລະ ເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສະມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ລອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ນັບກ້າວສູ່ລວງເລິກໃນທຸກຂົງເຂດວຽກງານ ແລະ ຂະແໜງການ, ນໍາເອົາຜົນປະໂຫຍດອັນແທ້ຈິງມາສູ່ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ຫຼາຍຂຶ້ນ, ປະກອບສ່ວນເຂົ້າໃນພາລະກິດເສີມສ້າງ ສັນຕິພາບ, ມິດຕະພາບ, ການຮ່ວມມື ແລະ ພັດທະ ນາໃນພາກພື້ນ ແລະ ສາກົນ

---